ਮਸ਼ਹੂਰ ਕਾਰੋਬਾਰੀ ''ਤੇ GST ਵਿਭਾਗ ਨੇ ਮਾਰੀ ਰੇਡ, ਅਧਿਕਾਰੀਆਂ ਨੂੰ ਚੰਗਾ ਮਾਲੀਆ ਹੋਣ ਦੀ ਉਮੀਦ

ਲੁਧਿਆਣਾ (ਸੇਠੀ)- ਸੂਬੇ ਦੇ ਜੀ.ਐੱਸ.ਟੀ. ਵਿਭਾਗ ਦੇ ਜ਼ਿਲ੍ਹਾ-4 ਦੀ ਟੀਮ ਨੇ ਮਹਾਨਗਰ ਦੀ ਸਥਾਨਕ ਦਾਲ ਮੰਡੀ ਨੇੜੇ ਰਾਏ ਬਹਾਦਰ ਰੋਡ 'ਤੇ ਸਥਿਤ ਸਾਲਾਸਰ ਟ੍ਰੇਡਰਜ਼ ਵਿਖੇ ਅਚਾਨਕ ਛਾਪਾ ਮਾਰਿਆ। ਇਹ ਕਾਰਵਾਈ ਵਿੱਤ ਕਮਿਸ਼ਨਰ ਟੈਕਸੇਸ਼ਨ ਪੰਜਾਬ ਕ੍ਰਿਸ਼ਨਾ ਗੁਪਤਾ ਦੇ ਦਿਸ਼ਾ-ਨਿਰਦੇਸ਼ਾਂ 'ਤੇ ਕੀਤੀ ਗਈ, ਜਿਸ ਦੌਰਾਨ ਸਟੇਟ ਟੈਕਸ ਅਫ਼ਸਰ ਜਸਪਾਲ ਸਿੰਘ, ਜ਼ੋਰਾ ਸਿੰਘ, ਖੁਸ਼ਵੰਤ ਸਿੰਘ, ਇੰਦਰਪਾਲ ਭੱਲਾ ਸਮੇਤ ਕਈ ਅਧਿਕਾਰੀ ਅਤੇ ਪੁਲਸ ਮੁਲਾਜ਼ਮ ਵੀ ਮੌਕੇ 'ਤੇ ਮੌਜੂਦ ਰਹੇ।

ਉਕਤ ਕਾਰੋਬਾਰੀ ਹੌਜ਼ਰੀ ਅਤੇ ਰੈਡੀਮੇਡ ਸਮਾਨ ਦਾ ਕਾਰੋਬਾਰ ਕਰਦਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਵਿਭਾਗੀ ਅਧਿਕਾਰੀਆਂ ਨੇ ਮੌਕੇ ਤੋਂ ਸਟਾਕ ਬੁੱਕ, ਸੇਲ ਐਂਡ ਖਰੀਦ, ਬੈਲੇਂਸ ਸ਼ੀਟ ਆਦਿ ਸਮੇਤ ਵੱਡੀ ਮਾਤਰਾ ਵਿੱਚ ਦਸਤਾਵੇਜ਼ ਜ਼ਬਤ ਕੀਤੇ ਹਨ। ਜ਼ਿਕਰਯੋਗ ਹੈ ਕਿ ਅਧਿਕਾਰੀਆਂ ਨੇ ਉਕਤ ਫਰਮ ਦੀਆਂ 3 ਇਕਾਈਆਂ ਦੀ ਤਲਾਸ਼ੀ ਲਈ, ਜਦੋਂ ਅਧਿਕਾਰੀਆਂ ਨੂੰ 2 ਹੋਰ ਇਕਾਈਆਂ ਬਾਰੇ ਜਾਣਕਾਰੀ ਮਿਲੀ ਤਾਂ ਉਨ੍ਹਾਂ ਨੇ ਮਾਲਕ ਨੂੰ ਇਸ ਬਾਰੇ ਪੁੱਛਿਆ, ਪਰ ਉਹ ਸਾਫ਼ ਮੁਕਰ ਗਿਆ। ਜਦਕਿ ਮਾਰਕੀਟ ਦਾ ਦਾਅਵਾ ਹੈ ਕਿ ਇਹ ਦੋਵੇਂ ਇਕਾਈਆਂ ਤੇ ਇਕ ਹੋਰ ਵੀ, ਜੋ ਕਿ ਹਾਲੇ ਨਿਰਮਾਣ ਅਧੀਨ ਹੈ, ਵੀ ਉਨ੍ਹਾਂ ਦੀ ਹੀ ਹੈ। 

ਅਧਿਕਾਰੀਆਂ ਨੇ ਇਹ ਕਾਰਵਾਈ ਟੈਕਸ ਚੋਰੀ ਦੇ ਸ਼ੱਕ 'ਚ ਕੀਤੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਜ਼ਬਤ ਕੀਤੇ ਗਏ ਸਬੂਤਾਂ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਜਾਵੇਗੀ ਅਤੇ ਜੇਕਰ ਕੋਈ ਕਮੀ ਪਾਈ ਗਈ ਤਾਂ ਟੈਕਸ ਸਮੇਤ ਜੁਰਮਾਨਾ ਵੀ ਵਸੂਲਿਆ ਜਾਵੇਗਾ। ਵਿਭਾਗ ਨੂੰ ਇਸ ਕਾਰਵਾਈ ਤੋਂ ਚੰਗਾ ਮਾਲੀਆ ਮਿਲਣ ਦੀ ਉਮੀਦ ਹੈ।

ਇਹ ਵੀ ਪੜ੍ਹੋ- ਪੰਜਾਬ ਸਰਕਾਰ ਦਾ ਕਾਮਿਆਂ ਨੂੰ ਵੱਡਾ ਤੋਹਫ਼ਾ, ਉਜਰਤਾਂ ਵਧਾਉਣ ਦਾ ਹੋ ਗਿਆ ਐਲਾਨ

ਬਾਜ਼ਾਰ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਕਤ ਸਾਲਾਸਰ ਟ੍ਰੇਡਰਜ਼ ਨੇ ਸੇਲਜ਼ਮੈਨ ਦੇ ਤੌਰ 'ਤੇ ਕਾਰੋਬਾਰ ਵਿਚ ਜੁਆਇਨ ਕੀਤਾ ਸੀ ਪਰ ਕੁਝ ਹੀ ਸਾਲਾਂ ਵਿਚ ਉਹ ਕਰੋੜਾਂ ਰੁਪਏ ਦਾ ਮਾਲਕ ਬਣ ਗਿਆ ਹੈ। ਉਥੇ ਹੀ ਕੋਰੋਨਾ ਕਾਰਨ ਲੋਕਾਂ ਨੂੰ ਕਾਰੋਬਾਰ ਵਿਚ ਕਾਫ਼ੀ ਨੁਕਸਾਨ ਹੋਇਆ ਸੀ ਅਤੇ ਕਾਰੋਬਾਰ ਠੱਪ ਹੋ ਗਿਆ ਸੀ। ਇਸੇ ਮੰਦੀ ਦੌਰਾਨ ਇਸ ਕਾਰੋਬਾਰੀ ਨੇ ਕਰੋੜਾਂ ਦੀ ਦੌਲਤ ਬਣਾਈ। ਸੂਤਰਾਂ ਦਾ ਕਹਿਣਾ ਹੈ ਕਿ ਰਾਏਪੁਰ ਰੋਡ 'ਤੇ ਛੋਟੀ ਦੁਕਾਨ ਦੀ ਕੀਮਤ ਕਰੀਬ 2 ਤੋਂ 3 ਕਰੋੜ ਰੁਪਏ ਦੱਸੀ ਜਾਂਦੀ ਹੈ। ਇਕ ਵਪਾਰੀ ਨੇ ਆਪਣਾ ਨਾਂ ਨਾ ਛਾਪਣ ਦੀ ਸ਼ਰਤ 'ਤੇ ਦੱਸਿਆ ਕਿ ਉਕਤ ਵਪਾਰੀ ਦੀਆਂ 7 ਦੁਕਾਨਾਂ ਹਨ। ਸੂਤਰਾਂ ਅਨੁਸਾਰ ਉਹ ਆਪਣੀ ਵਿਕਰੀ ਨੂੰ ਦਬਾ ਕੇ ਘੱਟ ਟੈਕਸ ਅਦਾ ਕਰਦਾ ਹੈ, ਜਦੋਂ ਕਿ ਅਸਲ ਵਿਕਰੀ ਦਿਖਾਈ ਗਈ ਵਿਕਰੀ ਤੋਂ ਦੁੱਗਣੀ ਹੈ।

ਕਾਰਵਾਈ ਦੌਰਾਨ 'ਪੰਜਾਬ ਕੇਸਰੀ' ਗਰੁੱਪ ਦਾ ਨੁਮਾਇੰਦਾ ਖੁਦ ਮੌਕੇ 'ਤੇ ਮੌਜੂਦ ਸੀ ਅਤੇ ਉੱਥੇ ਉਸ ਨੇ ਇਕ ਹੈਰਾਨੀਜਨਕ ਚੀਜ਼ ਦੇਖੀ। ਜਿੱਥੇ ਦੁਕਾਨ ਦੇ ਮਾਲਕ ਨੇ ਦਫ਼ਤਰ ਵਿੱਚ ਇੱਕ ਵਿਸ਼ੇਸ਼ ਪਰਚਾ ਲਗਾਇਆ ਹੈ, ਜਿਸ ਵਿੱਚ ਸਪੱਸ਼ਟ ਲਿਖਿਆ ਹੈ ਕਿ ਜੀ-ਪੇ ਅਤੇ ਪੇਟੀਐੱਮ (ਆਨਲਾਈਨ ਭੁਗਤਾਨ) ਰਾਹੀਂ ਪੇਮੈਂਟ ਨਹੀਂ ਲਈ ਜਾਂਦੀ, ਸਿਰਫ਼ ਨਕਦ ਭੁਗਤਾਨ ਸਵੀਕਾਰਯੋਗ ਹੈ। ਯਾਨੀ ਕਿ ਉਕਤ ਕਾਰੋਬਾਰੀ ਨਕਦੀ 'ਚ ਡੀਲ ਕਰਦਾ ਹੈ, ਜਦਕਿ ਕਈ ਕਾਰੋਬਾਰੀ ਆਨਲਾਈਨ ਪੇਮੈਂਟ ਵੱਲ ਰੁਖ ਕਰ ਰਹੇ ਹਨ, ਫਿਰ ਉਹ ਆਪਣੇ ਗਾਹਕਾਂ ਨੂੰ ਨਕਦ ਭੁਗਤਾਨ ਲਈ ਕਿਉਂ ਜ਼ੋਰ ਦੇ ਰਿਹਾ ਹੈ। ਇਸ ਤੋਂ ਇੱਕ ਗੱਲ ਤਾਂ ਸਪੱਸ਼ਟ ਹੈ ਕਿ ਉਕਤ ਨਕਦੀ ਦਾ ਸੌਦਾ ਕਰਕੇ ਉਹ ਵਿਭਾਗ ਦੀਆਂ ਅੱਖਾਂ ਵਿੱਚ ਧੂੜ ਪਾ ਰਿਹਾ ਹੈ।

ਇਹ ਵੀ ਪੜ੍ਹੋ- ਪੰਜਾਬ ਦੇ ਸਰਕਾਰੀ ਸਕੂਲਾਂ ਨੂੰ ਜਾਰੀ ਹੋਏ ਸਖ਼ਤ ਨਿਰਦੇਸ਼, ਕੀਤੀ ਕੋਤਾਹੀ ਤਾਂ ਭੁਗਤਣਾ ਪਵੇਗਾ ਅੰਜਾਮ

ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਆਮਦਨ ਕਰ ਵਿਭਾਗ ਵੀ ਨਕਦੀ ਦਾ ਲੈਣ-ਦੇਣ ਕਰਨ ਵਾਲਿਆਂ 'ਤੇ ਤਿੱਖੀ ਨਜ਼ਰ ਰੱਖ ਰਿਹਾ ਹੈ, ਸੰਭਵ ਹੈ ਕਿ ਜੀ.ਐੱਸ.ਟੀ. ਤੋਂ ਬਾਅਦ ਹੁਣ ਆਮਦਨ ਕਰ ਵਿਭਾਗ ਵੀ ਜਲਦ ਹੀ ਇਸ 'ਤੇ ਕਾਰਵਾਈ ਕਰੇਗਾ ਅਤੇ ਕਰੋੜਾਂ ਦੀ ਜਾਇਦਾਦ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾਵੇਗੀ।

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ

👇Join us on Whatsapp channel👇

https://whatsapp.com/channel/0029Va94hsaHAdNVur4L170e