ਕਿਸਾਨੀ ਮੰਗਾਂ ਨੂੰ ਲੈ ਕੇ ਮੋਦੀ ਤੇ ਪੰਜਾਬ ਸਰਕਾਰ ਦੀ ਪੁਤਲੇ ਫੂਕੇ

ਭਵਾਨੀਗੜ੍ਹ (ਵਿਕਾਸ) - ਕਿਸਾਨੀ ਮੰਗਾਂ ਨੂੰ ਲੈ ਕੇ ਅੱਜ ਕੁੱਲ ਹਿੰਦ ਕਿਸਾਨ ਸਭਾ ਸਮੇਤ ਸੀ. ਪੀ. ਆਈ ਤੇ ਸੀ. ਪੀ.ਆਈ. (ਐਮ) ਵਲੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਪੰਜਾਬ ਸਰਕਾਰ ਦੇ ਪੂਤਲੇ ਫੂਕ ਕੇ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ ਗਈ। ਇਸ ਮੌਕੇ ਸਭਾ ਦੇ ਆਗੂਆਂ ਬੰਤ ਸਿੰਘ ਨਮੋਲ ਤੇ ਸੁਰਜੀਤ ਸਿੰਘ ਗੱਗੜਪੁਰ ਨੇ ਕਿਹਾ ਕਿ 2014 ਵਿਚ ਮੋਦੀ ਸਰਕਾਰ ਕਿਸਾਨਾਂ ਨਾਲ ਵੱਡੇ ਵਾਅਦੇ ਕਰ ਕੇ ਕੇਂਦਰ ਦੀ ਸੱਤਾ 'ਤੇ ਬਿਰਾਜਮਾਨ ਹੋ ਗਈ, ਪਰ ਕੇਂਦਰ ਸਰਕਾਰ ਨੇ ਚਾਰ ਸਾਲ ਬੀਤਣ 'ਤੇ ਵੀ ਸਵਾਮੀਨਾਥਨ ਰਿਪੋਰਟ ਨਾ ਲਾਗੂ ਕਰਕੇ ਕਿਸਾਨਾਂ ਨਾਲ ਧ੍ਰੋਹ ਕਮਾਇਆ ਹੈ।ਇਸੇ ਤਰ੍ਹਾਂ ਪੰਜਾਬ ਸਰਕਾਰ ਦੇ ਚੋਣ ਵਾਅਦੇ ਵੀ ਲੋਕਾਂ ਲਈ ਫੋਕੇ ਜੁਮਲੇ ਹੀ ਸਾਬਤ ਹੋਏ। ਕੈਪਟਨ ਸਰਕਾਰ ਨੇ ਨੌਜਵਾਨਾਂ ਨਾਲ ਨੌਕਰੀਆਂ ਦੇ ਵਾਅਦੇ ਕਰਕੇ ਲੋਕਾਂ ਦੀ ਨੌਕਰੀ ਖੋਹ ਲਈ, ਕਿਸਾਨਾਂ ਦੇ ਸਿਰ 'ਤੋਂ ਕਰਜ਼ਾ ਮੁਆਫ ਕਰਨ ਦੀ ਬਜਾਏ ਖੇਤੀਬਾੜੀ ਮੋਟਰਾਂ 'ਤੇ ਬਿੱਲ ਲਾ ਕੇ ਕਿਸਾਨ ਵਰਗ ਨੂੰ ਹੋਰ ਆਰਥਿਕ ਸੰਕਟ ਵੱਲ ਧੱਕ ਦਿੱਤਾ। ਸਭਾ ਦੇ ਤਹਿਸੀਲ ਸਕੱਤਰ ਸੰਗਰੂਰ ਕਾਮਰੇਡ ਸਰਬਜੀਤ ਸਿੰਘ ਕਿਸਾਨਾਂ ਤੇ ਮਜ਼ਦੂਰਾਂ ਨੂੰ ਅਪੀਲ ਕੀਤੀ ਕਿ ਸਭਾ ਨੂੰ ਮਜ਼ਬੂਤ ਕਰਕੇ ਕ੍ਰਾਂਤੀਕਾਰੀ ਸੰਗਠਨ ਤਿਆਰ ਕੀਤਾ ਜਾਵੇ ਤਾਂ ਜੋ ਸਰਕਾਰ ਨੂੰ ਨੀਤੀਆਂ ਤਿਆਗਣ ਲਈ ਮਜ਼ਬੂਰ ਕੀਤਾ ਜਾ ਸਕੇ। ਇਸ ਮੌਕੇ ਆਗੂਆਂ ਨੇ ਦੱਸਿਆ ਕਿ ਕਿਸਾਨ ਸਭਾ ਵਲੋਂ ਸੰਤੋਖਪੁਰਾ, ਨਾਗਰਾ, ਝਨੇੜੀ, ਬਾਲਦ ਕਲਾਂ, ਗੱਗੜਪੁਰ, ਮੰਡੇਰ ਖੁਰਦ ਲੋਹਾ ਖੇੜਾ, ਲੌਂਗੋਵਾਲ, ਦੁਗਾਂ ਆਦਿ ਪਿੰਡਾਂ ਵਿਚ ਰੈਲੀਆਂ ਵੀ ਕੀਤੀਆਂ ਗਈਆਂ, ਜਿਸ ਵਿਚ ਕਿਸਾਨ ਸਭਾ ਦੇ ਆਗੂਆਂ ਭੂਰਾ ਸਿੰਘ ਦੁਗਾਂ, ਮਗਰ ਸਿੰਘ, ਸੁਰਜੀਤ ਸਿੰਘ ਭੁਲਰ, ਸੁਰਜੀਤ ਸਿੰਘ ਗਗੜਪੁਰ, ਸੁਖਪਾਲ ਸਿੰਘ, ਲਖਮੀ ਚੰਦ, ਨਰੰਜਨ ਸਿੰਘ ਸੰਗਰੂਰ ਆਦਿ ਨੇ ਰੈਲੀ ਦੌਰਾਨ ਸੰਬੋਧਨ ਕੀਤਾ।