ਬਰਨਾਲਾ ਨਗਰ ਨਿਗਮ ਦੀਆਂ ਪਹਿਲੀਆਂ ਚੋਣਾਂ; 50 ਵਾਰਡਾਂ ’ਚ 89500 ਵੋਟਰ ਕਰਨਗੇ ਫ਼ੈਸਲਾ

ਬਰਨਾਲਾ (ਵਿਵੇਕ ਸਿੰਧਵਾਨੀ, ਰਵੀ)- ਸ਼ਹਿਰ ਬਰਨਾਲਾ ਦੇ ਇਤਿਹਾਸ ਵਿਚ ਇਕ ਨਵਾਂ ਅਧਿਆਏ ਲਿਖੇ ਜਾਣ ਦਾ ਵੇਲਾ ਆ ਗਿਆ ਹੈ। ਪੰਜਾਬ ਰਾਜ ਚੋਣ ਕਮਿਸ਼ਨ ਵੱਲੋਂ ਸੂਬੇ ’ਚ ਨਗਰ ਕੌਂਸਲਾਂ ਅਤੇ ਨਗਰ ਨਿਗਮਾਂ ਦੀਆਂ ਚੋਣਾਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ ਅਤੇ ਬਰਨਾਲਾ ’ਚ 26 ਮਈ ਨੂੰ ਵੋਟਾਂ ਪੈਣਗੀਆਂ। ਇਹ ਚੋਣਾਂ ਇਸ ਲਈ ਵੀ ਇਤਿਹਾਸਕ ਹਨ ਕਿਉਂਕਿ ਇਹ ਬਰਨਾਲਾ ਦੇ ਨਗਰ ਨਿਗਮ ਬਣਨ ਤੋਂ ਬਾਅਦ ਪਹਿਲੀ ਵਾਰ ਹੋਣ ਜਾ ਰਹੀਆਂ ਹਨ। 89500 ਵੋਟਰ 50 ਵਾਰਡਾਂ ’ਚ ਆਪਣੇ ਨੁਮਾਇੰਦੇ ਚੁਣਨਗੇ ਅਤੇ ਸ਼ਹਿਰ ਦੀ ਤਕਦੀਰ ਦਾ ਫ਼ੈਸਲਾ ਕਰਨਗੇ।

ਨਗਰ ਕੌਂਸਲ ਤੋਂ ਨਗਰ ਨਿਗਮ-ਇਕ ਇਤਿਹਾਸਕ ਸਫਰ

ਨਵੰਬਰ 2025 ’ਚ ਪੰਜਾਬ ਸਰਕਾਰ ਵੱਲੋਂ ਸ਼ਹਿਰ ਬਰਨਾਲਾ ਨੂੰ ਨਗਰ ਕੌਂਸਲ ਤੋਂ ਨਗਰ ਨਿਗਮ ’ਚ ਅਪਗ੍ਰੇਡ ਕੀਤਾ ਗਿਆ ਸੀ। ਇਹ ਸ਼ਹਿਰ ਵਾਸੀਆਂ ਲਈ ਮਾਣ ਵਾਲੀ ਗੱਲ ਸੀ ਕਿਉਂਕਿ ਨਗਰ ਨਿਗਮ ਦਾ ਦਰਜਾ ਮਿਲਣ ਨਾਲ ਸ਼ਹਿਰ ਦੇ ਵਿਕਾਸ ਲਈ ਵੱਧ ਫੰਡ ਅਤੇ ਵੱਧ ਅਧਿਕਾਰ ਮਿਲਣ ਦਾ ਰਾਹ ਖੁੱਲ੍ਹਦਾ ਹੈ। ਨਗਰ ਨਿਗਮ ਬਣਨ ਤੋਂ ਬਾਅਦ ਪੁਰਾਣੇ 31 ਵਾਰਡਾਂ ਦੀ ਗਿਣਤੀ ਵਧ ਕੇ 50 ਹੋ ਗਈ। ਵਾਰਡਾਂ ਦੀ ਨਵੀਂ ਹੱਦਬੰਦੀ ਸਬੰਧੀ ਪੰਜਾਬ ਸਰਕਾਰ ਵੱਲੋਂ 31 ਦਸੰਬਰ 2025 ਨੂੰ ਨੋਟੀਫਿਕੇਸ਼ਨ ਜਾਰੀ ਕੀਤਾ ਗਿਆ ਸੀ। ਉਸ ਤੋਂ ਬਾਅਦ 50 ਵਾਰਡਾਂ ਦੀਆਂ ਵੋਟਰ ਸੂਚੀਆਂ ਤਿਆਰ ਕੀਤੀਆਂ ਗਈਆਂ ਜਿਨ੍ਹਾਂ ਦੀ ਸਾਰੀ ਜਾਣਕਾਰੀ ਜ਼ਿਲਾ ਪ੍ਰਸ਼ਾਸਨ ਬਰਨਾਲਾ ਵੱਲੋਂ ਆਪਣੀ ਵੈੱਬਸਾਈਟ ਉੱਪਰ ਪਾ ਦਿੱਤੀ ਗਈ ਹੈ।

89500 ਵੋਟਰ-46708 ਪੁਰਸ਼, 42792 ਮਹਿਲਾ

ਜ਼ਿਲਾ ਪ੍ਰਸ਼ਾਸਨ ਵੱਲੋਂ ਜਾਰੀ ਅੰਕੜਿਆਂ ਅਨੁਸਾਰ ਸ਼ਹਿਰ ਬਰਨਾਲਾ ਦੇ 50 ਵਾਰਡਾਂ ’ਚ ਕੁੱਲ 89500 ਵੋਟਰ ਹਨ। ਇਨ੍ਹਾਂ ’ਚੋਂ ਪੁਰਸ਼ ਵੋਟਰਾਂ ਦੀ ਗਿਣਤੀ 46708 ਅਤੇ ਮਹਿਲਾ ਵੋਟਰਾਂ ਦੀ ਗਿਣਤੀ 42792 ਹੈ। ਇਹ ਅੰਕੜੇ ਦੱਸਦੇ ਹਨ ਕਿ ਪੁਰਸ਼ ਅਤੇ ਮਹਿਲਾ ਵੋਟਰਾਂ ’ਚ ਜ਼ਿਆਦਾ ਫਰਕ ਨਹੀਂ ਹੈ ਜਿਸ ਕਾਰਨ ਇਸ ਵਾਰ ਮਹਿਲਾ ਵੋਟਰ ਚੋਣਾਂ ’ਚ ਅਹਿਮ ਭੂਮਿਕਾ ਨਿਭਾਉਣਗੀਆਂ।

ਵਾਰਡ ਵਾਈਜ਼ ਵੋਟਰਾਂ ਦੀ ਵੇਰਵਾਵਾਰ ਜਾਣਕਾਰੀ

ਵਾਰਡ ਵਾਈਜ਼ ਅੰਕੜਿਆਂ ਅਨੁਸਾਰ ਵਾਰਡ ਨੰਬਰ 1 ’ਚ 1626, ਵਾਰਡ ਨੰਬਰ 2 ’ਚ 1872, ਵਾਰਡ ਨੰਬਰ 3 ’ਚ 1631, ਵਾਰਡ ਨੰਬਰ 4 ’ਚ 1674, ਵਾਰਡ ਨੰਬਰ 5 ’ਚ 1953, ਵਾਰਡ ਨੰਬਰ 6 ’ਚ 1555, ਵਾਰਡ ਨੰਬਰ 7 ’ਚ 1477, ਵਾਰਡ ਨੰਬਰ 8 ’ਚ 2043, ਵਾਰਡ ਨੰਬਰ 9 ’ਚ 2016, ਵਾਰਡ ਨੰਬਰ 10 ’ਚ 1743, ਵਾਰਡ ਨੰਬਰ 11 ’ਚ 1838, ਵਾਰਡ ਨੰਬਰ 12 ’ਚ 1378, ਵਾਰਡ ਨੰਬਰ 13 ’ਚ 1060, ਵਾਰਡ ਨੰਬਰ 14 ’ਚ 1875, ਵਾਰਡ ਨੰਬਰ 15 ’ਚ 1666, ਵਾਰਡ ਨੰਬਰ 16 ’ਚ 1938, ਵਾਰਡ ਨੰਬਰ 17 ’ਚ 1748, ਵਾਰਡ ਨੰਬਰ 18 ਵਿੱਚ 1748, ਵਾਰਡ ਨੰਬਰ 19 ’ਚ 1217 ਅਤੇ ਵਾਰਡ ਨੰਬਰ 20 ’ਚ 2747 ਵੋਟਰ ਹਨ।

ਇਸੇ ਤਰ੍ਹਾਂ, ਵਾਰਡ ਨੰਬਰ 21 ’ਚ 1073, ਵਾਰਡ ਨੰਬਰ 22 ’ਚ 2335, ਵਾਰਡ ਨੰਬਰ 23 ’ਚ 1595, ਵਾਰਡ ਨੰਬਰ 24 ’ਚ 1205, ਵਾਰਡ ਨੰਬਰ 25 ’ਚ 1992, ਵਾਰਡ ਨੰਬਰ 26 ’ਚ 2345, ਵਾਰਡ ਨੰਬਰ 27 ’ਚ 2181, ਵਾਰਡ ਨੰਬਰ 28 ’ਚ 1668, ਵਾਰਡ ਨੰਬਰ 29 ’ਚ 2849, ਵਾਰਡ ਨੰਬਰ 30 ’ਚ 2382, ਵਾਰਡ ਨੰਬਰ 31 ’ਚ 2887, ਵਾਰਡ ਨੰਬਰ 32 ’ਚ 1942, ਵਾਰਡ ਨੰਬਰ 33 ’ਚ 1244, ਵਾਰਡ ਨੰਬਰ 34 ’ਚ 1995 ਅਤੇ ਵਾਰਡ ਨੰਬਰ 35 ’ਚ 2469 ਵੋਟਰ ਹਨ।

ਵਾਰਡ ਨੰਬਰ 36 ’ਚ 2235, ਵਾਰਡ ਨੰਬਰ 37 ’ਚ 2074, ਵਾਰਡ ਨੰਬਰ 38 ’ਚ 197, ਵਾਰਡ ਨੰਬਰ 39 ’ਚ 1225, ਵਾਰਡ ਨੰਬਰ 40 ’ਚ 1777, ਵਾਰਡ ਨੰਬਰ 41 ’ਚ 1901, ਵਾਰਡ ਨੰਬਰ 42 ’ਚ 1333, ਵਾਰਡ ਨੰਬਰ 43 ’ਚ 1204, ਵਾਰਡ ਨੰਬਰ 44 ’ਚ 1676, ਵਾਰਡ ਨੰਬਰ 45 ’ਚ 1484, ਵਾਰਡ ਨੰਬਰ 46 ’ਚ 2099, ਵਾਰਡ ਨੰਬਰ 47 ’ਚ 1520, ਵਾਰਡ ਨੰਬਰ 48 ’ਚ 1687, ਵਾਰਡ ਨੰਬਰ 49 ’ਚ 1378 ਅਤੇ ਵਾਰਡ ਨੰਬਰ 50 ’ਚ 1361 ਵੋਟਰ ਹਨ।

ਸਭ ਤੋਂ ਘੱਟ ਅਤੇ ਸਭ ਤੋਂ ਵੱਧ ਵੋਟਰਾਂ ਵਾਲੇ ਵਾਰਡ

ਵਾਰਡ ਵਾਈਜ਼ ਅੰਕੜਿਆਂ ’ਚ ਇਕ ਮਹੱਤਵਪੂਰਨ ਤੱਥ ਇਹ ਸਾਹਮਣੇ ਆਇਆ ਹੈ ਕਿ ਸਭ ਤੋਂ ਘੱਟ ਵੋਟਰ ਵਾਰਡ ਨੰਬਰ 13 ਵਿਚ ਸਿਰਫ 1060 ਹਨ ਜਦੋਂਕਿ ਸਭ ਤੋਂ ਵੱਧ ਵੋਟਰ ਵਾਰਡ ਨੰਬਰ 31 ਵਿਚ 2887 ਹਨ। ਇਨ੍ਹਾਂ ਦੋਵਾਂ ਵਾਰਡਾਂ ’ਚ ਵੋਟਰਾਂ ਦੀ ਗਿਣਤੀ ਵਿਚ ਲੱਗਭਗ ਤਿੰਨ ਗੁਣਾ ਦਾ ਫਰਕ ਹੈ ਜੋ ਹੱਦਬੰਦੀ ਪ੍ਰਕਿਰਿਆ ’ਚ ਅਸਮਾਨਤਾ ਵੱਲ ਇਸ਼ਾਰਾ ਕਰਦਾ ਹੈ। ਇਹ ਅਸਮਾਨਤਾ ਚੋਣ ਮੁਕਾਬਲੇ ਦੀ ਪ੍ਰਕਿਰਤੀ ਉੱਪਰ ਵੀ ਅਸਰ ਪਾਵੇਗੀ।

100 ਪੋਲਿੰਗ ਬੂਥ, ਪ੍ਰਸ਼ਾਸਨ ਤਿਆਰ

ਚੋਣ ਕਮਿਸ਼ਨ ਵੱਲੋਂ ਨਗਰ ਨਿਗਮ ਦੇ 50 ਵਾਰਡਾਂ ਲਈ ਕੁੱਲ 100 ਪੋਲਿੰਗ ਬੂਥ ਬਣਾਏ ਗਏ ਹਨ। ਜ਼ਿਲਾ ਪ੍ਰਸ਼ਾਸਨ ਵੱਲੋਂ ਚੋਣਾਂ ਨੂੰ ਸੁਚਾਰੂ, ਸ਼ਾਂਤਮਈ ਅਤੇ ਨਿਰਪੱਖ ਢੰਗ ਨਾਲ ਕਰਵਾਉਣ ਲਈ ਸਾਰੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ। ਸੁਰੱਖਿਆ ਪ੍ਰਬੰਧ, ਪੋਲਿੰਗ ਸਟਾਫ ਦੀ ਤਾਇਨਾਤੀ ਅਤੇ ਵੋਟਿੰਗ ਮਸ਼ੀਨਾਂ ਦੀ ਜਾਂਚ ਸਬੰਧੀ ਕੰਮ ਜ਼ੋਰਾਂ-ਸ਼ੋਰਾਂ ਨਾਲ ਜਾਰੀ ਹੈ।

ਸਿਆਸੀ ਸਰਗਰਮੀਆਂ ਤੇਜ਼, ਉਮੀਦਵਾਰਾਂ ਦੀ ਭੱਜ-ਦੌੜ ਸ਼ੁਰੂ

ਚੋਣਾਂ ਦੇ ਐਲਾਨ ਤੋਂ ਬਾਅਦ ਸ਼ਹਿਰ ਵਿੱਚ ਸਿਆਸੀ ਸਰਗਰਮੀਆਂ ਤੇਜ਼ ਹੋ ਗਈਆਂ ਹਨ। ਵੱਖ-ਵੱਖ ਸਿਆਸੀ ਪਾਰਟੀਆਂ ਆਪਣੇ ਉਮੀਦਵਾਰਾਂ ਦੀ ਚੋਣ ਕਰਨ ’ਚ ਜੁੱਟ ਗਈਆਂ ਹਨ। ਹਰ ਵਾਰਡ ’ਚ ਇੱਛੁਕ ਉਮੀਦਵਾਰ ਘਰ-ਘਰ ਜਾ ਕੇ ਵੋਟਰਾਂ ਨਾਲ ਸੰਪਰਕ ਕਰ ਰਹੇ ਹਨ ਅਤੇ ਵਿਕਾਸ ਦੇ ਵਾਅਦੇ ਕਰ ਰਹੇ ਹਨ। ਨਗਰ ਨਿਗਮ ਦੀਆਂ ਪਹਿਲੀਆਂ ਚੋਣਾਂ ਹੋਣ ਕਾਰਨ ਸ਼ਹਿਰ ਵਾਸੀਆਂ ’ਚ ਵੀ ਖਾਸਾ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ।

ਸ਼ਹਿਰ ਵਾਸੀਆਂ ਨੂੰ ਉਮੀਦ ਹੈ ਕਿ ਨਗਰ ਨਿਗਮ ਦੀਆਂ ਇਨ੍ਹਾਂ ਪਹਿਲੀਆਂ ਚੋਣਾਂ ਤੋਂ ਬਾਅਦ ਬਣਨ ਵਾਲੀ ਨਵੀਂ ਕੌਂਸਲ ਸ਼ਹਿਰ ’ਚ ਸੜਕਾਂ, ਸੀਵਰੇਜ, ਪੀਣ ਵਾਲੇ ਪਾਣੀ ਅਤੇ ਸਾਫ਼-ਸਫ਼ਾਈ ਵਰਗੀਆਂ ਬੁਨਿਆਦੀ ਸਮੱਸਿਆਵਾਂ ਨੂੰ ਤਰਜੀਹੀ ਆਧਾਰ ’ਤੇ ਹੱਲ ਕਰੇਗੀ ਅਤੇ ਬਰਨਾਲਾ ਨੂੰ ਇਕ ਵਿਕਸਤ ਅਤੇ ਆਧੁਨਿਕ ਸ਼ਹਿਰ ਵਜੋਂ ਸਥਾਪਿਤ ਕਰੇਗੀ।