ਚੰਡੀਗੜ੍ਹ ਦੀ ਸੁਖ਼ਨਾ ਝੀਲ ’ਤੇ ਹਵਾਈ ਸੈਨਾ ਦਾ ਅਭਿਆਸ ਜਾਰੀ

ਚੰਡੀਗੜ੍ਹ (ਰਾਜਿੰਦਰ) : ਸੁਖ਼ਨਾ ਝੀਲ ’ਤੇ 6 ਅਕਤੂਬਰ ਨੂੰ ਹਵਾਈ ਸੈਨਾ ਵਲੋਂ ਫੁੱਲ ਡਰੈੱਸ ਰਿਹਰਸਲ ਹੋਵੇਗੀ ਅਤੇ 8 ਅਕਤੂਬਰ ਨੂੰ ਪ੍ਰੋਗਰਾਮ ਹੋਵੇਗਾ। ਇਨ੍ਹਾਂ ਦੋਵੇਂ ਦਿਨਾਂ ਸਬੰਧੀ ਹਵਾਈ ਸੈਨਾ ਵਲੋਂ ਸੁਖ਼ਨਾ ਝੀਲ ’ਤੇ ਕੁੱਝ ਦਿਨਾਂ ਤੋਂ ਅਭਿਆਸ ਕੀਤਾ ਜਾ ਰਿਹਾ ਹੈ। ਸ਼ੁੱਕਰਵਾਰ ਵੀ ਅਭਿਆਸ ਜਾਰੀ ਰਿਹਾ। ਹਵਾਈ ਸੈਨਾ ਦੇ ਕਈ ਜਹਾਜ਼ਾਂ ਨੇ ਲੋਕਾਂ ਨੂੰ ਰੋਮਾਂਚ ਨਾਲ ਭਰ ਦਿੱਤਾ। ਪੂਰਾ ਦਿਨ ਸ਼ਹਿਰ ਦੇ ਆਸ-ਪਾਸ ਜਹਾਜ਼ਾਂ ਦੀ ਗੜਗੜਾਹਟ ਗੂੰਜਦੀ ਰਹੀ।

ਲੋਕਾਂ ਨੇ ਆਪਣੇ ਘਰਾਂ ਦੀਆਂ ਛੱਤ ਤੋਂ ਵੀ ਇਹ ਨਜ਼ਾਰਾ ਦੇਖਿਆ। ਸੋਸ਼ਲ ਮੀਡੀਆ ’ਤੇ ਪੂਰਾ ਦਿਨ ਹਵਾਈ ਸੈਨਾ ਦੇ ਅਭਿਆਸ ਦੀਆਂ ਤਸਵੀਰਾਂ ਵਾਇਰਲ ਹੁੰਦੀਆਂ ਰਹੀਆਂ। ਸੁਖ਼ਨਾ ਝੀਲ ’ਤੇ ਵੀ ਕਾਫ਼ੀ ਗਿਣਤੀ ਵਿਚ ਲੋਕ ਇਸ ਅਭਿਆਸ ਨੂੰ ਦੇਖਣ ਪਹੁੰਚੇ। ਇਸ ਅਭਿਆਸ ਵਿਚ ਹਈ ਸੈਨਾ ਦੇ ਰਾਫੇਲ, ਚਿਨੂਕ, ਸਾਰੰਗ ਹੈਲੀਕਾਪਟਰ ਅਤੇ ਹੋਰ ਜਹਾਜ਼ਾਂ ਨੇ ਆਪਣੇ ਕਰਤੱਬ ਦਿਖਾਏ। ਲੋਕ ਵੀ ਇਨ੍ਹਾਂ ਦ੍ਰਿਸ਼ਾਂ ਨੂੰ ਆਪਣੇ ਮੋਬਾਇਲਾਂ ਵਿਚ ਕੈਦ ਕਰਦੇ ਨਜ਼ਰ ਆਏ।