ਇਕ ਹੋਰ ਕਿਸ਼ਤੀ ਹਾਦਸਾ, ਖਰਬੂਜਾ ਖਾਣ ਦੀ ਜ਼ਿੱਦ ''ਚ ਚੱਲੀ ਗਈ 6 ਲੋਕਾਂ ਦੀ ਜਾਨ

ਹਮੀਰਪੁਰ- ਉੱਤਰ ਪ੍ਰਦੇਸ਼ ਦੇ ਹਮੀਰਪੁਰ ਜ਼ਿਲ੍ਹੇ ਦੇ ਕੁਰਾਰਾ ਇਲਾਕੇ 'ਚ ਯਮੁਨਾ ਨਦੀ 'ਚ ਇਕ ਦਰਦਨਾਕ ਹਾਦਸਾ ਵਾਪਰਿਆ ਹੈ, ਜਿੱਥੇ ਇਕ ਛੋਟੀ ਕਿਸ਼ਤੀ ਪਲਟਣ ਕਾਰਨ ਇਕ ਔਰਤ ਅਤੇ ਉਸ ਦੇ 5 ਸਾਲਾ ਮਾਸੂਮ ਪੁੱਤ ਸਮੇਤ 6 ਲੋਕਾਂ ਦੀ ਡੁੱਬਣ ਨਾਲ ਮੌਤ ਹੋ ਗਈ। ਇਹ ਹਾਦਸਾ ਬੁੱਧਵਾਰ ਦੇਰ ਸ਼ਾਮ ਉਸ ਸਮੇਂ ਵਾਪਰਿਆ ਜਦੋਂ ਕੋਤੂਪੁਰ ਪਿੰਡ ਦੇ 9 ਲੋਕ ਇਕ ਛੋਟੀ ਮੱਛੀ ਫੜਨ ਵਾਲੀ ਕਿਸ਼ਤੀ 'ਚ ਸਵਾਰ ਹੋ ਕੇ ਖਰਬੂਜੇ ਤੋੜਨ ਅਤੇ ਖਾਣ ਲਈ ਨਦੀ ਦੇ ਕੰਢੇ ਗਏ ਸਨ। ਇਹ ਹਾਦਸਾ ਕਿਸ਼ਤੀ 'ਚ ਸਮਰੱਥਾ ਤੋਂ ਵੱਧ ਲੋਕਾਂ ਅਤੇ ਖਰਬੂਜਿਆਂ ਦੀਆਂ ਬੋਰੀਆਂ ਲੱਦਣ ਕਾਰਨ ਹੋਇਆ। ਜਿਸ ਕਿਸ਼ਤੀ 'ਚ ਸਿਰਫ਼ 4-5 ਲੋਕਾਂ ਦੇ ਬੈਠਣ ਦੀ ਜਗ੍ਹਾ ਸੀ, ਉਸ 'ਚ 9 ਲੋਕਾਂ ਦੇ ਨਾਲ ਖਰਬੂਜਿਆਂ ਦੀਆਂ ਕਈ ਬੋਰੀਆਂ ਵੀ ਰੱਖੀਆਂ ਗਈਆਂ ਸਨ।

ਜਦੋਂ ਕਿਸ਼ਤੀ ਨਦੀ ਦੇ ਵਿਚਕਾਰ ਪਹੁੰਚੀ ਤਾਂ ਖਰਬੂਜਿਆਂ ਦੀ ਇਕ ਬੋਰੀ ਪਾਣੀ 'ਚ ਡਿੱਗ ਗਈ। ਉਸ ਬੋਰੀ ਨੂੰ ਬਚਾਉਣ ਦੀ ਕੋਸ਼ਿਸ਼ 'ਚ ਸਾਰੇ ਲੋਕ ਕਿਸ਼ਤੀ ਦੇ ਇਕ ਪਾਸੇ ਆ ਗਏ, ਜਿਸ ਨਾਲ ਕਿਸ਼ਤੀ ਦਾ ਸੰਤੁਲਨ ਵਿਗੜ ਗਿਆ ਅਤੇ ਉਹ ਪਲਟ ਗਈ। ਇਸ ਹਾਦਸੇ 'ਚ ਮ੍ਰਿਤਕਾਂ ਦੀ ਪਛਾਣ ਬ੍ਰਜਰਾਣੀ, ਉਸ ਦਾ 5 ਸਾਲਾ ਪੁੱਤਰ ਲਾਬਿਆਂਸ਼, ਆਕਾਂਸ਼ਾ, ਆਦਿਤਿਆ, ਅਰਚਨਾ ਅਤੇ ਰਾਣੀ ਵਜੋਂ ਹੋਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਛੋਟਾ ਲਾਬਿਆਂਸ਼ ਖਰਬੂਜੇ ਖਾਣ ਜਾਣ ਦੀ ਜ਼ਿੱਦ ਕਰ ਰਿਹਾ ਸੀ, ਜਿਸ ਕਾਰਨ ਉਸ ਦੀ ਮਾਂ ਵੀ ਉਸ ਦੇ ਨਾਲ ਕਿਸ਼ਤੀ 'ਚ ਸਵਾਰ ਹੋ ਗਈ ਸੀ।

ਚਸ਼ਮਦੀਦਾਂ ਅਨੁਸਾਰ, ਡੁੱਬਣ ਵੇਲੇ ਵੀ ਬ੍ਰਜਰਾਣੀ ਨੇ ਆਪਣੇ ਪੁੱਤਰ ਨੂੰ ਆਪਣੀ ਛਾਤੀ ਨਾਲ ਲਗਾਇਆ ਹੋਇਆ ਸੀ ਅਤੇ ਦੋਵਾਂ ਦੀਆਂ ਲਾਸ਼ਾਂ ਵੀ ਇਕੱਠੀਆਂ ਹੀ ਮਿਲੀਆਂ, ਜਿਸ ਨੂੰ ਦੇਖ ਕੇ ਹਰ ਕੋਈ ਭਾਵੁਕ ਹੋ ਗਿਆ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਡੀਐੱਮ ਅਭਿਸ਼ੇਕ ਗੋਇਲ ਅਤੇ ਐੱਸਪੀ ਮ੍ਰਿਗਾਂਕ ਸ਼ੇਖਰ ਪਾਠਕ ਸਮੇਤ ਕਈ ਉੱਚ ਅਧਿਕਾਰੀ ਮੌਕੇ 'ਤੇ ਪਹੁੰਚੇ। ਐੱਨ.ਡੀ.ਆਰ.ਐੱਫ. (NDRF) ਅਤੇ ਪੁਲਸ ਦੀਆਂ ਟੀਮਾਂ ਨੇ ਵੀਰਵਾਰ ਸ਼ਾਮ ਤੱਕ ਸਾਰੀਆਂ 6 ਲਾਸ਼ਾਂ ਬਰਾਮਦ ਕਰ ਲਈਆਂ ਸਨ। ਪ੍ਰਸ਼ਾਸਨ ਨੇ ਹਰੇਕ ਮ੍ਰਿਤਕ ਦੇ ਪਰਿਵਾਰ ਨੂੰ 4-4 ਲੱਖ ਰੁਪਏ ਦੀ ਸਹਾਇਤਾ ਰਾਸ਼ੀ ਦੇਣ ਦਾ ਐਲਾਨ ਕੀਤਾ ਹੈ। ਇਸ ਹਾਦਸੇ 'ਚ ਤਿੰਨ ਲੋਕਾਂ ਨੂੰ ਦੂਜੀ ਕਿਸ਼ਤੀ 'ਚ ਮੌਜੂਦ ਮਛੇਰਿਆਂ ਨੇ ਸੁਰੱਖਿਅਤ ਬਚਾ ਲਿਆ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e