ਜੈ ਸ਼ਾਹ ਕਿਉਂ ਮੁਸਕਰਾ ਰਹੇ ਹਨ
Saturday, Nov 15, 2025 - 10:36 PM (IST)
ਨੈਸ਼ਨਲ ਡੈਸਕ- ਮਹਿਲਾ ਕ੍ਰਿਕਟ ਟੀਮ ਵੱਲੋਂ ਇਕ ਦਿਨਾਂ ਵਿਸ਼ਵ ਕੱਪ ਜਿੱਤਣ ਨਾਲ 2 ਵਿਅਕਤੀਆਂ ਦੀ ਵਿਆਪਕ ਸ਼ਲਾਘਾ ਹੋ ਰਹੀ ਹੈ। ਇਨ੍ਹਾਂ ’ਚੋਂ ਇਕ ਟੀਮ ਦੇ ਕੋਚ ਅਮੋਲ ਮਜੂਮਦਾਰ ਤੇ ਦੂਜੇ ਆਈ. ਸੀ. ਸੀ. ਦੇ ਮੁਖੀ ਜੈ ਸ਼ਾਹ ਹਨ।
ਜੈ ਸ਼ਾਹ ਦੀ ਸ਼ਲਾਘਾ ਇਸ ਲਈ ਕੀਤੀ ਜਾ ਰਹੀ ਹੈ ਕਿਉਂਕਿ ਉਨ੍ਹਾਂ ਮਹਿਲਾ ਕ੍ਰਿਕਟ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ ਹੈ। ਉਨ੍ਹਾਂ ਮਹਿਲਾ ਕ੍ਰਿਕਟ ’ਤੇ ਪੂਰੀ ਤਰ੍ਹਾਂ ਧਿਆਨ ਕੇਂਦ੍ਰਿਤ ਕੀਤਾ ਹੈ, ਕੋਚਿੰਗ ਤੇ ਸਿਖਲਾਈ ਦੇ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕੀਤਾ ਹੈ, ਖਿਡਾਰੀਆਂ ਦੀ ਤਨਖਾਹ ਤੇ ਵਿਸ਼ਵ ਪੱਧਰੀ ਸਹੂਲਤਾਂ ’ਚ ਵਾਧਾ ਕੀਤਾ ਹੈ। ਵਿਸ਼ਵ ਕੱਪ ਦੀ ਜਿੱਤ ਕ੍ਰਿਕਟ ਪ੍ਰਸ਼ਾਸਨ ’ਚ ਜੈ ਸ਼ਾਹ ਲਈ ਇਕ ਫੈਸਲਾਕੁੰਨ ਪਲ ਬਣ ਗਈ ਹੈ।
ਰੂਡੀ ਦੀ ਸ਼ਾਂਤ ਵਾਪਸੀ
ਇਕ ਵਾਰ ਹਾਸ਼ੀਏ ਤੇ ਚਲੇ ਜਾਣ ਤੋਂ ਬਾਅਦ ਭਾਜਪਾ ਦੇ ਸੰਸਦ ਮੈਂਬਰ ਰਾਜੀਵ ਪ੍ਰਤਾਪ ਰੂਡੀ ਬਿਹਾਰ ਦੇ ਸਿਅਾਸੀ ਦ੍ਰਿਸ਼ ’ਤੇ ਇਕ ਮਜ਼ਬੂਤ ਵਾਪਸੀ ਕਰ ਰਹੇ ਹਨ। ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਵੱਲੋਂ ਇਕ ਚੋਣ ਰੈਲੀ ’ਚ ਰੂਡੀ ਨੂੰ ‘ਮੇਰਾ ਦੋਸਤ’ ਕਹਿਣ ਵਰਗੇ ਨਿੱਘੇ ਸੰਬੋਧਨ ਨੇ ਸੰਸਦ ਮੈਂਬਰ ਦੀ ਪਾਰਟੀ ਦੇ ਅੰਦਰੂਨੀ ਚੱਕਰ ’ਚ ਚੁੱਪਚਾਪ ਵਾਪਸੀ ਦਾ ਸੰਕੇਤ ਦਿੱਤਾ ਹੈ। 7 ਵਾਰ ਦੇ ਸੰਸਦ ਮੈਂਬਰ ਰਾਜੀਵ ਪ੍ਰਤਾਪ ਰੂਡੀ ਆਪਣਾ ਮੰਤਰੀ ਦਾ ਅਹੁਦਾ ਗੁਆਉਣ ਤੋਂ ਬਾਅਦ ਹਾਸ਼ੀਏ ’ਤੇ ਚਲੇ ਗਏ ਸਨ ਪਰ ਇਕ ਅਹਿਮ ਜਿੱਤ ਨੇ ਉਨ੍ਹਾਂ ਦੀ ਕਿਸਮਤ ਉਦੋਂ ਬਦਲ ਦਿੱਤੀ ਜਦੋਂ ਉਨ੍ਹਾਂ ਕਾਂਸਟੀਟਿਊਸ਼ਨ ਕਲੱਬ ਆਫ਼ ਇੰਡੀਆ ਦੀਆਂ ਚੋਣਾਂ ’ਚ ਸੰਜੀਵ ਬਾਲੀਆਂ ਨੂੰ ਹਰਾਇਆ ਸੀ।
ਰਾਜਪੂਤ-ਜਾਟ ਸਮੀਕਰਨ ਵਾਲੇ ਮੁਕਾਬਲੇ ਨੇ ਰੂਡੀ ਨੂੰ ਨਵੀਂ ਸਿਆਸੀ ਊਰਜਾ ਦਿੱਤੀ। ਉਨ੍ਹਾਂ ਬਿਹਾਰ ’ਚ ‘ਜੈ ਸਾਂਗਾ’ ਯਾਤਰਾਵਾਂ ਸ਼ੁਰੂ ਕੀਤੀਆਂ। ਰਾਜਪੂਤ ਆਈਕਨ ਰਾਣਾ ਸਾਂਗਾ ਨੂੰ ਆਪਣੇ ਭਾਈਚਾਰੇ ਅੰਦਰ ਸਮਰਥਨ ਇਕੱਠਾ ਕਰਨ ਲਈ ਸੱਦਾ ਦਿੱਤਾ।
ਸ਼ਾਹ ਦੀ ਹਮਾਇਤ ਤੇ ਇਕ ਨਵੇਂ ਰਾਜਪੂਤ ਆਧਾਰ ਨਾਲ ਰੂਡੀ ਦਾ ਲਗਾਤਾਰ ਵਾਧਾ ਦਰਸਾਉਂਦਾ ਹੈ ਕਿ ਸਿਆਸਤ ’ਚ ਸਬਰ ਤੇ ਸਮਾਂ ਅਕਸਰ ਸ਼ਕਤੀ ਨਾਲੋਂ ਵੱਧ ਅਰਥ ਰੱਖਦੇ ਹਨ।
