ਲੁਟੇਰਿਆਂ ਨੂੰ ਫੜਨ ਲਈ ਪੁਲਸ ਵਾਲੇ ਬਣੇ ਫੇਰੀਵਾਲੇ ! ਕੰਬਲ ਵੇਚਦੇ-ਵੇਚਦੇ ਮੌਕਾ ਦੇਖ ਫੜ ਲਏ ਮੁਲਜ਼ਮ

ਨੈਸ਼ਨਲ ਡੈਸਕ : ਫ਼ਿਲਮਾਂ 'ਚ ਅਕਸਰ ਦੇਖਿਆ ਜਾਂਦਾ ਹੈ ਕਿ ਅਪਰਾਧੀਆਂ ਨੂੰ ਫੜਨ ਲਈ ਪੁਲਸ ਅਧਿਕਾਰੀ ਭੇਸ ਬਦਲਦੇ ਹਨ। ਕੁਝ ਅਜਿਹੀ ਹੀ ਅਨੋਖੀ ਤਕਨੀਕ ਮੱਧ ਪ੍ਰਦੇਸ਼ ਦੀ ਖੰਡਵਾ ਪੁਲਸ ਨੇ ਅਪਣਾਈ, ਜਿੱਥੇ ਫਰਜ਼ੀ ਪੁਲਸ ਵਾਲੇ ਬਣ ਕੇ ਦਿਨ-ਦਿਹਾੜੇ ਲੁੱਟ ਕਰਨ ਵਾਲੇ ਦੋ ਮੁਲਜ਼ਮਾਂ ਨੂੰ ਫੜਨ ਲਈ ਪੁਲਸ ਮੁਲਾਜ਼ਮਾਂ ਨੇ ਫੇਰੀਵਾਲੇ ਦਾ ਰੂਪ ਧਾਰਨ ਕਰ ਲਿਆ।
ਇਸ ਤਰ੍ਹਾਂ ਫੜੇ ਗਏ ਮੁਲਜ਼ਮ
ਖੰਡਵਾ ਪੁਲਸ ਨੂੰ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੇ ਮੁਲਜ਼ਮਾਂ ਬਾਰੇ ਸੂਚਨਾ ਮਿਲੀ ਸੀ। ਇਨ੍ਹਾਂ ਨੂੰ ਫੜਨ ਲਈ ਪੁਲਸ ਮੁਲਾਜ਼ਮਾਂ ਨੇ ਫੇਰੀਵਾਲੇ ਦਾ ਭੇਸ ਧਾਰਨ ਕੀਤਾ। ਪੁਲਸ ਕਰਮਚਾਰੀ ਫੇਰੀਵਾਲੇ ਬਣ ਕੇ ਮੁਲਜ਼ਮਾਂ ਦੇ ਇਲਾਕੇ ਵਿੱਚ ਕੰਬਲ ਅਤੇ ਫਲ ਵੇਚਦੇ ਨਜ਼ਰ ਆਏ। ਉਨ੍ਹਾਂ ਨੇ ਫੇਰੀਵਾਲਿਆਂ ਵਾਂਗ ਆਵਾਜ਼ਾਂ ਲਗਾਈਆਂ। ਜਿਵੇਂ ਹੀ ਮੁਲਜ਼ਮ ਦਿਖਾਈ ਦਿੱਤੇ, ਤੈਅ ਯੋਜਨਾ ਮੁਤਾਬਕ ਉਨ੍ਹਾਂ ਨੂੰ ਦਬੋਚ ਲਿਆ ਗਿਆ।
ਕੀ ਸੀ ਵਾਰਦਾਤ?
ਇਨ੍ਹਾਂ ਮੁਲਜ਼ਮਾਂ 'ਤੇ ਖੰਡਵਾ ਵਿੱਚ ਦਿਨ-ਦਿਹਾੜੇ ਕੱਟਾ (ਦੇਸੀ ਪਿਸਤੌਲ) ਅੜਾ ਕੇ ਲੁੱਟ ਕਰਨ ਦਾ ਦੋਸ਼ ਸੀ। ਇਹ ਘਟਨਾ ਪਿਛਲੇ ਮਹੀਨੇ ਦੀ 12 ਤਰੀਕ ਨੂੰ ਸ਼ਹਿਰ ਦੇ ਰੁੱਝੇ ਹੋਏ ਪੜਾਵਾ ਰੋਡ 'ਤੇ ਵਾਪਰੀ ਸੀ। ਮੁਲਜ਼ਮਾਂ ਨੇ ਕੱਪੜਾ ਵਪਾਰੀ ਹਸ਼ਮਤ ਨੂੰ ਫਰਜ਼ੀ ਪੁਲਸ ਕਰਮਚਾਰੀ ਬਣ ਕੇ ਰੋਕਿਆ ਸੀ। ਉਨ੍ਹਾਂ ਨੇ ਵਪਾਰੀ ਨੂੰ ਕਿਹਾ ਕਿ ਅੱਗੇ ਲੁੱਟ ਦੀ ਵਾਰਦਾਤ ਹੋਈ ਹੈ, ਇਸ ਲਈ ਉਹ ਆਪਣੇ ਸੋਨੇ ਦੇ ਗਹਿਣੇ ਉਤਾਰ ਕੇ ਰੱਖ ਲੈਣ। ਜਦੋਂ ਵਪਾਰੀ ਨੇ ਗਹਿਣੇ ਉਤਾਰੇ, ਤਾਂ ਮੁਲਜ਼ਮਾਂ ਨੇ ਉਸ ਨੂੰ ਕੱਟਾ ਅੜਾਇਆ, ਧੱਕਾ-ਮੁੱਕੀ ਕੀਤੀ ਅਤੇ ਸੋਨੇ ਦੀ ਚੇਨ ਤੇ ਅੰਗੂਠੀ ਲੈ ਕੇ ਮੌਕੇ ਤੋਂ ਫਰਾਰ ਹੋ ਗਏ।
ਇਰਾਨੀ ਗੈਂਗ ਦੇ ਮੈਂਬਰ ਗ੍ਰਿਫ਼ਤਾਰ
ਪਦਮ ਨਗਰ ਥਾਣਾ ਪੁਲਸ ਨੇ ਇਸ ਮਾਮਲੇ ਵਿੱਚ ਇਰਾਨੀ ਗੈਂਗ ਦੇ ਦੋ ਮੈਂਬਰਾਂ ਨੂੰ ਨਰਮਦਾਪੁਰਮ ਜ਼ਿਲ੍ਹੇ ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ਮੁਲਜ਼ਮਾਂ ਦੀ ਪਛਾਣ ਕਾਸਿਮ ਅਤੇ ਅਯਾਨ ਵਜੋਂ ਹੋਈ ਹੈ। ਪੁਲਸ ਨੇ ਮੁਲਜ਼ਮਾਂ ਕੋਲੋਂ ਵਾਰਦਾਤ ਵਿੱਚ ਵਰਤੀ ਗਈ ਮੋਟਰਸਾਈਕਲ ਜ਼ਬਤ ਕੀਤੀ ਹੈ ਅਤੇ ਲੁੱਟੀ ਗਈ ਸੋਨੇ ਦੀ ਚੇਨ ਤੇ ਅੰਗੂਠੀਆਂ ਬਾਰੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।
ਹਿਸਟਰੀਸ਼ੀਟਰ ਹਨ ਮੁਲਜ਼ਮ
ਐਸ.ਪੀ. ਮਨੋਜ ਕੁਮਾਰ ਰਾਏ ਨੇ ਦੱਸਿਆ ਕਿ ਲੁੱਟ ਦੀ ਘਟਨਾ ਨੂੰ ਸੁਲਝਾਉਣ ਲਈ ਇੱਕ ਵਿਸ਼ੇਸ਼ ਟੀਮ ਬਣਾਈ ਗਈ ਸੀ, ਜਿਸ ਨੂੰ ਨਰਮਦਾਪੁਰਮ ਜ਼ਿਲ੍ਹੇ ਵਿੱਚ ਮੁਲਜ਼ਮਾਂ ਦੀ ਸੂਚਨਾ ਮਿਲੀ। ਫਿਰ ਪੁਲਸ ਟੀਮ ਨੇ ਭੇਸ ਬਦਲ ਕੇ ਉਨ੍ਹਾਂ ਦੇ ਟਿਕਾਣੇ 'ਤੇ ਛਾਪਾ ਮਾਰਿਆ ਤੇ ਗ੍ਰਿਫ਼ਤਾਰ ਕਰ ਲਿਆ। ਮੁਲਜ਼ਮਾਂ ਨੇ ਫਰਜ਼ੀ ਪੁਲਸ ਅਧਿਕਾਰੀ ਬਣ ਕੇ ਵਾਰਦਾਤ ਨੂੰ ਅੰਜਾਮ ਦਿੱਤਾ ਸੀ। ਦੋਵੇਂ ਮੁਲਜ਼ਮ ਹਿਸਟਰੀਸ਼ੀਟਰ ਹਨ, ਜਿਨ੍ਹਾਂ ਖ਼ਿਲਾਫ਼ ਲੁੱਟ, ਮਾਰਪੀਟ ਅਤੇ ਧੋਖਾਧੜੀ ਦੇ ਕਰੀਬ ਨੌਂ ਮੁਕੱਦਮੇ ਦਰਜ ਹਨ। ਫਿਲਹਾਲ ਮੁਲਜ਼ਮਾਂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾ ਰਿਹਾ ਹੈ ਅਤੇ ਪੁਲਿਸ ਰਿਮਾਂਡ ਲੈ ਕੇ ਅੱਗੇ ਦੀ ਪੁੱਛਗਿੱਛ ਕਰੇਗੀ।