ਨਿਤੀਸ਼ ਕੁਮਾਰ ਕੋਲ 1.65 ਕਰੋੜ ਰੁਪਏ ਦੀ ਜਾਇਦਾਦ, ਇਕ ਸਾਲ ’ਚ 68,455 ਰੁਪਏ ਦਾ ਵਾਧਾ

ਪਟਨਾ, (ਭਾਸ਼ਾ)- ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਦੀ ਚੱਲ ਤੇ ਅਚੱਲ ਜਾਇਦਾਦ ਦੀ ਕੁੱਲ ਕੀਮਤ 1.65 ਕਰੋੜ ਰੁਪਏ ਹੈ। ਇਹ ਪਿਛਲੇ ਸਾਲ ਨਾਲੋਂ 68,455 ਰੁਪਏ ਵੱਧ ਹੈ। ਇਹ ਜਾਣਕਾਰੀ ਉਨ੍ਹਾਂ ਵੱਲੋਂ ਆਪਣੀ ਜਾਇਦਾਦ ਦੇ ਐਲਾਨੇ ਵੇਰਵਿਆਂ ’ਤੇ ਅਧਾਰਤ ਹੈ। ਮੁੱਖ ਮੰਤਰੀ ਤੇ ਉਨ੍ਹਾਂ ਦੇ ਸਾਥੀ ਮੰਤਰੀਆਂ ਦੀ ਜਾਇਦਾਦ ਦੇ ਵੱਰਵੇ ਬੁੱਧਵਾਰ ਬਿਹਾਰ ਸਰਕਾਰ ਦੀ ਵੈੱਬਸਾਈਟ ’ਤੇ ਅਪਲੋਡ ਕੀਤੀ ਗਈ। ਇਸ ਅਨੁਸਾਰ ਮੁੱਖ ਮੰਤਰੀ ਕੋਲ 20,552 ਰੁਪਏ ਨਕਦ ਹਨ ਜਦੋਂ ਕਿ ਵੱਖ-ਵੱਖ ਬੈਂਕਾਂ ’ਚ ਉਨ੍ਹਾਂ ਦੀ ਜਮ੍ਹਾਂ ਰਕਮ ਲਗਭਗ 57,800 ਰੁਪਏ ਹੈ।

ਨਿਤੀਸ਼ ਕੁਮਾਰ ਸਰਕਾਰ ਨੇ ਸਾਰੇ ਕੈਬਨਿਟ ਮੰਤਰੀਆਂ ਨੂੰ ਹਰੇਕ ਕੈਲੰਡਰ ਸਾਲ ਦੇ ਆਖਰੀ ਦਿਨ ਆਪਣੀਆਂ ਜਾਇਦਾਦਾਂ ਤੇ ਦੇਣਦਾਰੀਆਂ ਦਾ ਖੁਲਾਸਾ ਕਰਨ ਲਈ ਕਿਹਾ ਹੈ। ਕਈ ਮੰਤਰੀ ਮੁੱਖ ਮੰਤਰੀ ਨਾਲੋਂ ਵੱਧ ਜਾਇਦਾਦ ਦੇ ਮਾਲਕ ਹਨ।

ਕੈਬਨਿਟ ਸਕੱਤਰੇਤ ਵਿਭਾਗ ਦੀ ਵੈੱਬਸਾਈਟ ’ਤੇ ਅਪਲੋਡ ਕੀਤੇ ਗਏ ਵੇਰਵਿਆਂ ਅਨੁਸਾਰ ਮੁੱਖ ਮੰਤਰੀ ਕੋਲ ਲਗਭਗ 17.66 ਲੱਖ ਰੁਪਏ ਦੀ ਚੱਲ ਤੇ 1.48 ਕਰੋੜ ਰੁਪਏ ਦੀ ਅਚੱਲ ਜਾਇਦਾਦ ਹੈ। ਉਨ੍ਹਾਂ ਕੋਲ ਦਿੱਲੀ ਦੇ ਦਵਾਰਕਾ ’ਚ ਇਕ ਸਹਿਕਾਰੀ ਹਾਊਸਿੰਗ ਸੋਸਾਇਟੀ ’ਚ ਇਕ ਰਿਹਾਇਸ਼ੀ ਫਲੈਟ ਹੈ।

2024 ’ਚ ਮੁੱਖ ਮੰਤਰੀ ਦੀ ਕੁੱਲ ਜਾਇਦਾਦ 1.64 ਕਰੋੜ ਰੁਪਏ ਦੀ ਸੀ। ਉਨ੍ਹਾਂ ਕੋਲ 10 ਗਾਵਾਂ ਤੇ 13 ਵੱਛੇ ਹਨ। ਉਨ੍ਹਾਂ ਕੋਲ 11.32 ਲੱਖ ਰੁਪਏ ਦੀ ਇਕ ਕਾਰ ਵੀ ਹੈ। ਐਲਾਨ ਪੱਤਰ ਅਨੁਸਾਰ ਬਿਹਾਰ ਦੇ ਉਪ ਮੁੱਖ ਮੰਤਰੀ ਸਮਰਾਟ ਚੌਧਰੀ ਕੋਲ 1.35 ਲੱਖ ਰੁਪਏ ਨਕਦ ਹਨ, ਜਦੋਂ ਕਿ ਉਨ੍ਹਾਂ ਦੀ ਪਤਨੀ ਮਮਤਾ ਕੋਲ 35,000 ਰੁਪਏ ਨਕਦ ਹਨ।

ਚੌਧਰੀ ਕੋਲ 4 ਲੱਖ ਰੁਪਏ ਦੀ ਇਕ ਰਾਈਫਲ ਵੀ ਹੈ। ਉਨ੍ਹਾਂ ਦੀ ਅਚੱਲ ਜਾਇਦਾਦ ਜਿਸ ’ਚ ਗੈਰ-ਖੇਤੀਬਾੜੀ ਜ਼ਮੀਨ ਵੀ ਸ਼ਾਮਲ ਹੈ, ਦੀ ਕੀਮਤ 4.91 ਕਰੋੜ ਰੁਪਏ ਹੈ। ਦੂਜੇ ਉਪ ਮੁੱਖ ਮੰਤਰੀ ਵਿਜੇ ਕੁਮਾਰ ਸਿਨ੍ਹਾ ਕੋਲ 48.46 ਲੱਖ ਰੁਪਏ ਦੀ ਅਚੱਲ ਜਾਇਦਾਦ ਹੈ। ਉਨ੍ਹਾਂ ਕੋਲ 77,181 ਰੁਪਏ ਦੀ ਕੀਮਤ ਵਾਲੀ ਇਕ ਰਿਵਾਲਵਰ ਵੀ ਹੈ।

ਆਪਣੀ ਜਾਇਦਾਦ ਦਾ ਐਲਾਨ ਕਰਨ ਵਾਲੇ ਹੋਰ ਮੰਤਰੀਆਂ ’ਚ ਮੰਗਲ ਪਾਂਡੇ (ਸਿਹਤ), ਵਿਜੇ ਕੁਮਾਰ ਚੌਧਰੀ (ਸੰਸਦੀ ਮਾਮਲੇ), ਲੇਸ਼ੀ ਸਿੰਘ (ਖੁਰਾਕ ਤੇ ਖਪਤਕਾਰ ਸੁਰੱਖਿਆ), ਜਾਮਾ ਖਾਨ (ਘੱਟ ਗਿਣਤੀ ਭਲਾਈ), ਮਦਨ ਸਾਹਨੀ (ਸਮਾਜ ਭਲਾਈ), ਦਿਲੀਪ ਜੈਸਵਾਲ ਤੇ ਅਸ਼ੋਕ ਚੌਧਰੀ ਸ਼ਾਮਲ ਹਨ।