ਅਚਾਨਕ ਹੋਣ ਲੱਗ ਪਈ ''ਪੈਸਿਆਂ ਦੀ ਬਰਸਾਤ'' ! ਕੋਰਟ ਕੰਪਲੈਕਸ ''ਚ ਦਿਖਿਆ ਅਨੋਖਾ ਨਜ਼ਾਰਾ

ਨੈਸ਼ਨਲ ਡੈਸਕ- ਉੱਤਰ ਪ੍ਰਦੇਸ਼ ਦੇ ਬੁਲੰਦਸ਼ਹਿਰ ਤੋਂ ਇੱਕ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਕਚਹਿਰੀ ਰੋਡ 'ਤੇ ਇੱਕ ਸ਼ਰਾਰਤੀ ਬਾਂਦਰ ਨੇ ਇੱਕ ਵਕੀਲ ਦਾ ਨੋਟਾਂ ਨਾਲ ਭਰਿਆ ਬੈਗ ਖੋਹ ਲਿਆ। ਬਾਂਦਰ ਇੰਨੇ 'ਤੇ ਹੀ ਨਹੀਂ ਰੁਕਿਆ, ਉਹ ਪੈਸਿਆਂ ਦਾ ਭਰਿਆ ਬੈਗ ਲੈ ਕੇ ਦਰੱਖ਼ਤ 'ਤੇ ਚੜ੍ਹ ਗਿਆ ਤੇ ਹਵਾ 'ਚ ਨੋਟ ਉਡਾਉਣੇ ਸ਼ੁਰੂ ਕਰ ਦਿੱਤੇ, ਜਿਸ ਨਾਲ ਕੋਰਟ ਕੰਪਲੈਕਸ ਵਿੱਚ ਅਚਾਨਕ 'ਨੋਟਾਂ ਦੀ ਬਾਰਿਸ਼' ਵਰਗਾ ਮਾਹੌਲ ਬਣ ਗਿਆ। ਇਸ ਘਟਨਾ ਦੀ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।

ਜਾਣਕਾਰੀ ਮੁਤਾਬਕ, ਇਹ ਘਟਨਾ ਬੁਲੰਦਸ਼ਹਿਰ ਦੇ ਕਚਹਿਰੀ ਰੋਡ 'ਤੇ ਸਥਿਤ ਸਟੈਂਪ ਵਿਕਰੇਤਾ ਦੇ ਕੋਲ ਵਾਪਰੀ। ਇੱਕ ਵਕੀਲ ਆਪਣੇ ਕਲਾਇੰਟ ਦੀ ਜ਼ਮੀਨ ਦੀ ਰਜਿਸਟਰੀ ਤਿਆਰ ਕਰਵਾਉਣ ਅਤੇ ਸਟੈਂਪ ਖਰੀਦਣ ਲਈ 2 ਲੱਖ ਰੁਪਏ ਨਕਦ ਲੈ ਕੇ ਪਹੁੰਚਿਆ ਸੀ। ਉਹ ਹਾਲੇ ਕਾਗਜ਼ੀ ਕਾਰਵਾਈ ਦੀ ਤਿਆਰੀ ਕਰ ਹੀ ਰਹੇ ਸਨ ਕਿ ਅਚਾਨਕ ਉੱਥੇ ਇੱਕ ਬਾਂਦਰ ਆ ਪਹੁੰਚਿਆ ਅਤੇ ਪਲਕ ਝਪਕਦਿਆਂ ਹੀ ਵਕੀਲ ਦੇ ਹੱਥੋਂ ਨੋਟਾਂ ਨਾਲ ਭਰਿਆ ਬੈਗ ਖੋਹ ਕੇ ਨੇੜਲੇ ਇੱਕ ਉੱਚੇ ਦਰੱਖ਼ਤ 'ਤੇ ਜਾ ਚੜ੍ਹਿਆ।

ਦਰੱਖ਼ਤ 'ਤੇ ਬੈਠ ਕੇ ਬਾਂਦਰ ਖਾਣ-ਪੀਣ ਦੀ ਚੀਜ਼ ਲੱਭਣ ਦੇ ਚੱਕਰ ਵਿੱਚ ਬੈਗ ਨੂੰ ਫਰੋਲਣ ਲੱਗਾ। ਇਸ ਦੌਰਾਨ ਉਸ ਨੇ ਬੈਗ ਵਿੱਚੋਂ 500-500 ਰੁਪਏ ਦੇ ਨੋਟਾਂ ਦੀਆਂ ਗੱਡੀਆਂ ਕੱਢ ਕੇ ਹਵਾ ਵਿੱਚ ਉਡਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਦਰੱਖ਼ਤ ਤੋਂ ਨੋਟਾਂ ਨੂੰ ਹੇਠਾਂ ਡਿੱਗਦੇ ਦੇਖ ਕੇ ਉੱਥੇ ਮੌਜੂਦ ਰਾਹਗੀਰਾਂ ਅਤੇ ਹੋਰ ਲੋਕਾਂ ਵਿੱਚ ਨੋਟ ਇਕੱਠੇ ਕਰਨ ਦੀ ਦੌੜ ਲੱਗ ਗਈ। ਇਹ ਦੇਖ ਕੇ ਵਕੀਲ ਅਤੇ ਉਨ੍ਹਾਂ ਦੇ ਸਾਥੀ ਬੇਵੱਸ ਹੋ ਗਏ ਅਤੇ ਲੋਕਾਂ ਨੂੰ ਨੋਟ ਨਾ ਚੁੱਕਣ ਦੀਆਂ ਅਪੀਲਾਂ ਕਰਨ ਲੱਗੇ।

A monkey in Bulandshahr snatched a bag with ₹2 lakh and scattered notes from a tree, but most of the money was later recovered.#UttarPradesh #Bulandshahr #ViralNews #India pic.twitter.com/vWf4uIVLDD

— Vishnu (@Vishnu1340367) May 31, 2026

ਨੋਟਾਂ ਦੀ ਬਾਰਿਸ਼ ਹੁੰਦੀ ਦੇਖ ਕੇ ਆਸ-ਪਾਸ ਭਾਰੀ ਭੀੜ ਇਕੱਠੀ ਹੋ ਗਈ। ਇਸ ਦੌਰਾਨ ਵਕੀਲ ਦੇ ਸਾਥੀਆਂ ਅਤੇ ਕੁਝ ਸਥਾਨਕ ਲੋਕਾਂ ਨੇ ਹਿੰਮਤ ਦਿਖਾਈ। ਇੱਕ ਨੌਜਵਾਨ ਬਾਂਦਰ ਕੋਲੋਂ ਬੈਗ ਛੁਡਾਉਣ ਲਈ ਦਰੱਖ਼ਤ 'ਤੇ ਚੜ੍ਹ ਗਿਆ। ਕਾਫ਼ੀ ਦੇਰ ਦੀ ਮੁਸ਼ੱਕਤ, ਕੇਲੇ ਅਤੇ ਹੋਰ ਚੀਜ਼ਾਂ ਦਾ ਲਾਲਚ ਦੇਣ ਤੋਂ ਬਾਅਦ, ਬਾਂਦਰ ਆਖ਼ਰਕਾਰ ਬੈਗ ਨੂੰ ਦਰੱਖ਼ਤ 'ਤੇ ਹੀ ਛੱਡ ਕੇ ਭੱਜ ਗਿਆ। ਵਕੀਲ ਨੂੰ ਉਨ੍ਹਾਂ ਦਾ ਬੈਗ ਤਾਂ ਵਾਪਸ ਮਿਲ ਗਿਆ ਹੈ, ਪਰ ਹਵਾ ਵਿੱਚ ਉੱਡੇ ਨੋਟਾਂ ਕਾਰਨ ਕੁਝ ਰਕਮ ਗਾਇਬ ਹੋਣ ਦਾ ਖਦਸ਼ਾ ਜਤਾਇਆ ਜਾ ਰਿਹਾ ਹੈ।

ਕਚਹਿਰੀ ਖੇਤਰ ਦੇ ਵਕੀਲਾਂ ਮੁਤਾਬਕ ਇੱਥੇ ਬਾਂਦਰਾਂ ਦੀ ਭਾਰੀ ਸਮੱਸਿਆ ਹੈ ਅਤੇ ਉਹ ਅਕਸਰ ਲੋਕਾਂ ਦੇ ਬੈਗ ਝਪਟ ਲੈਂਦੇ ਹਨ। ਫਿਲਹਾਲ, ਬਾਂਦਰ ਦੀ ਇਸ ਸ਼ਰਾਰਤ ਦੀ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ ਤੇ ਲੋਕਾਂ ਦੇ ਮਨੋਰੰਜਨ ਦਾ ਕੇਂਦਰ ਬਣੀ ਹੋਈ ਹੈ।

ਇਹ ਵੀ ਪੜ੍ਹੋ- ਕਸੌਲ ਘੁੰਮਣ ਗਏ ਪੰਜਾਬੀਆਂ ਦਾ ਪੈ ਗਿਆ ਪੰਗਾ ! ਚੱਲ ਗਈ ਗੋਲ਼ੀ, 4 ਗ੍ਰਿਫ਼ਤਾਰ

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ

👇Join us on Whatsapp channel👇

https://whatsapp.com/channel/0029Va94hsaHAdNVur4L170e