ਦਿੱਲੀ ਏਅਰਪੋਰਟ ''ਤੇ ਸੁਰੱਖਿਆ ''ਚ ਵੱਡੀ ਚੂਕ, ਬਿਨਾਂ ਇਮੀਗ੍ਰੇਸ਼ਨ ਕਲੀਅਰੈਂਸ ਦੇ ਵਿਦੇਸ਼ ਉੱਡੇ ਇਟਲੀ ਦੇ 3 ਯਾਤਰੀ
Monday, Sep 14, 2026 - 10:23 PM (IST)
ਨਵੀਂ ਦਿੱਲੀ : ਦਿੱਲੀ ਦੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਸੁਰੱਖਿਆ 'ਚ ਇੱਕ ਵੱਡੀ ਚੂਕ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇਟਲੀ ਦੇ ਤਿੰਨ ਯਾਤਰੀ ਬਿਨਾਂ ਇਮੀਗ੍ਰੇਸ਼ਨ ਕਲੀਅਰੈਂਸ ਕਰਵਾਏ ਹੀ ਭਾਰਤ ਤੋਂ ਬਾਹਰ ਚਲੇ ਗਏ। ਇਸ ਗੰਭੀਰ ਲਾਪਰਵਾਹੀ ਨੂੰ ਲੈ ਕੇ ਨਾਗਰਿਕ ਉੱਡਣ ਮੰਤਰਾਲੇ ਨੇ ਏਅਰ ਇੰਡੀਆ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕਰਕੇ 7 ਦਿਨਾਂ ਦੇ ਅੰਦਰ ਜਵਾਬ ਮੰਗਿਆ ਹੈ।
ਜਾਣਕਾਰੀ ਅਨੁਸਾਰ, ਇਹ ਤਿੰਨੋਂ ਯਾਤਰੀ ਏਅਰ ਇੰਡੀਆ ਦੀ 'ਹਬ-ਐਂਡ-ਸਪੋਕ' ਪ੍ਰਣਾਲੀ ਤਹਿਤ ਅੰਮ੍ਰਿਤਸਰ ਤੋਂ ਏਅਰ ਇੰਡੀਆ ਦੀ ਘਰੇਲੂ ਉਡਾਣ ਰਾਹੀਂ ਦਿੱਲੀ ਪਹੁੰਚੇ ਸਨ। ਅੰਮ੍ਰਿਤਸਰ ਏਅਰਪੋਰਟ 'ਤੇ ਉਨ੍ਹਾਂ ਨੂੰ ਏਅਰ ਇੰਡੀਆ ਦੀ ਘਰੇਲੂ ਉਡਾਣ ਲਈ 'D' (ਡੋਮੈਸਟਿਕ) ਸ਼੍ਰੇਣੀ ਦੇ ਬੋਰਡਿੰਗ ਪਾਸ ਜਾਰੀ ਕੀਤੇ ਗਏ ਸਨ, ਪਰ ਨਿਯਮਾਂ ਦੀ ਉਲੰਘਣਾ ਕਰਦੇ ਹੋਏ ਉਨ੍ਹਾਂ ਨੂੰ ਉੱਥੇ ਹੀ ਅੱਗੇ ਦੀ ਲੁਫ਼ਥਾਂਸਾ ਉਡਾਣ ਦੇ ਬੋਰਡਿੰਗ ਪਾਸ ਵੀ ਜਾਰੀ ਕਰ ਦਿੱਤੇ ਗਏ।
ਨਿਯਮਾਂ ਮੁਤਾਬਕ ਦਿੱਲੀ ਪਹੁੰਚਣ 'ਤੇ ਇਨ੍ਹਾਂ ਯਾਤਰੀਆਂ ਦੀ ਪਛਾਣ ਅੰਤਰਰਾਸ਼ਟਰੀ ਯਾਤਰੀਆਂ ਵਜੋਂ ਕਰਕੇ ਇਨ੍ਹਾਂ ਨੂੰ ਘਰੇਲੂ ਯਾਤਰੀਆਂ ਦੀ ਭੀੜ ਤੋਂ ਵੱਖ ਕਰਕੇ ਇਮੀਗ੍ਰੇਸ਼ਨ ਵੱਲ ਭੇਜਿਆ ਜਾਣਾ ਚਾਹੀਦਾ ਸੀ। ਪਰ ਇਸ ਦੇ ਉਲਟ, ਉਨ੍ਹਾਂ ਨੂੰ ਗੇਟ ਨੰਬਰ 39 ਤੋਂ 'ਇੰਟਰਨੈਸ਼ਨਲ-ਟੂ-ਇੰਟਰਨੈਸ਼ਨਲ ਟ੍ਰਾਂਸਫਰ ਏਰੀਆ' ਵੱਲ ਲੈ ਜਾਇਆ ਗਿਆ। ਉੱਥੋਂ ਉਹ ਡਿਪਾਰਚਰ ਏਰੀਆ ਵਿੱਚ ਗਏ ਅਤੇ ਬਿਨਾਂ ਕਿਸੇ ਇਮੀਗ੍ਰੇਸ਼ਨ ਜਾਂਚ ਦੇ ਲੁਫ਼ਥਾਂਸਾ ਦੀ ਫਲਾਈਟ ਵਿੱਚ ਸਵਾਰ ਹੋ ਕੇ ਮਿਊਨਿਖ ਲਈ ਰਵਾਨਾ ਹੋ ਗਏ।
ਮੰਤਰਾਲੇ ਨੇ ਦੱਸਿਆ ਕਿ ਇਸ ਪੂਰੇ ਘਟਨਾਕ੍ਰਮ ਦੌਰਾਨ ਏਅਰ ਇੰਡੀਆ ਦੇ ਸਟੈਂਡਰਡ ਓਪਰੇਟਿੰਗ ਪ੍ਰੋਸੀਜਰ (SOP) ਦੇ 5 ਅਹਿਮ ਪ੍ਰਾਵਧਾਨਾਂ ਦੀ ਉਲੰਘਣਾ ਹੋਈ ਹੈ। ਹਬ-ਐਂਡ-ਸਪੋਕ ਏਅਰਪੋਰਟ 'ਤੇ 24 ਘੰਟੇ ਨੋਡਲ ਅਫ਼ਸਰ ਅਤੇ ਨਿਗਰਾਨੀ ਟੀਮ ਦੀ ਤੈਨਾਤੀ ਹੋਣੀ ਜ਼ਰੂਰੀ ਸੀ, ਪਰ ਇਹ ਨਿਗਰਾਨੀ ਤੰਤਰ ਪੂਰੀ ਤਰ੍ਹਾਂ ਨਾਕਾਮ ਰਿਹਾ। ਇਸ ਗੜਬੜੀ ਦਾ ਪਤਾ ਉਡਾਣ ਵੇਲੇ ਨਹੀਂ, ਸਗੋਂ ਬਾਅਦ ਵਿੱਚ ਦਸਤਾਵੇਜ਼ਾਂ ਦੇ ਮੈਨੂਅਲ ਮਿਲਾਨ ਦੌਰਾਨ ਲੱਗਿਆ।
ਨਾਗਰਿਕ ਉੱਡਣ ਮੰਤਰਾਲੇ ਨੇ ਏਅਰ ਇੰਡੀਆ ਤੋਂ ਪੁੱਛਿਆ ਹੈ ਕਿ ਅੰਮ੍ਰਿਤਸਰ ਵਿੱਚ ਲੁਫ਼ਥਾਂਸਾ ਦੇ ਬੋਰਡਿੰਗ ਪਾਸ ਕਿਉਂ ਜਾਰੀ ਕੀਤੇ ਗਏ, 'D' ਸ਼੍ਰੇਣੀ ਦੇ ਯਾਤਰੀ ਅੰਤਰਰਾਸ਼ਟਰੀ ਟ੍ਰਾਂਸਫਰ ਏਰੀਆ ਤੱਕ ਕਿਵੇਂ ਪਹੁੰਚੇ, ਅਤੇ ਕੀ ਪੈਸੰਜਰ ਮੈਨੀਫੈਸਟ ਤੇ API-PNR ਡਾਟਾ ਸਮੇਂ ਸਿਰ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੂੰ ਦਿੱਤਾ ਗਿਆ ਸੀ। ਜੇਕਰ ਏਅਰਲਾਈਨ ਤੈਅ ਸਮੇਂ ਦੇ ਅੰਦਰ ਤਸੱਲੀਬਖ਼ਸ਼ ਜਵਾਬ ਨਹੀਂ ਦਿੰਦੀ, ਤਾਂ ਮੰਤਰਾਲੇ ਵਲੋਂ ਪ੍ਰਸ਼ਾਸਨਿਕ ਅਤੇ ਰੈਗੂਲੇਟਰੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।
