PF ''ਚੋਂ ਪੈਸੇ ਕਢਵਾਉਣ ਵਾਲਿਆਂ ਲਈ ਵੱਡਾ ਅਪਡੇਟ: TDS ਛੋਟ ਲਈ ਹੁਣ ਭਰਨਾ ਪਵੇਗਾ ਨਵਾਂ ਫਾਰਮ

ਨਵੀਂ ਦਿੱਲੀ — ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਨੇ ਪੀ.ਐੱਫ. (PF) ਖਾਤੇ ਵਿੱਚੋਂ ਪੈਸੇ ਕਢਵਾਉਣ ਸਮੇਂ ਟੀ.ਡੀ.ਐੱਸ. (TDS) ਛੋਟ ਨਾਲ ਸਬੰਧਤ ਨਿਯਮਾਂ ਵਿੱਚ ਅਹਿਮ ਬਦਲਾਅ ਕੀਤਾ ਹੈ। ਟੈਕਸ ਸਾਲ 2026-27 ਤੋਂ ਪੀ.ਐੱਫ. ਨਿਕਾਸੀ 'ਤੇ TDS ਨਾ ਕੱਟਣ ਦਾ ਦਾਅਵਾ ਕਰਨ ਲਈ ਹੁਣ ਫਾਰਮ 15G ਅਤੇ ਫਾਰਮ 15H ਦੀ ਜਗ੍ਹਾ 'ਫਾਰਮ 121' (Form 121) ਭਰਨਾ ਲਾਜ਼ਮੀ ਕਰ ਦਿੱਤਾ ਗਿਆ ਹੈ।

ਫਾਰਮ 15G ਅਤੇ ਫਾਰਮ 15H ਦੀ ਮਾਨਤਾ ਖ਼ਤਮ  
ਇਸ ਤੋਂ ਪਹਿਲਾਂ ਪੀ.ਐੱਫ. ਵਿੱਚੋਂ ਪੈਸੇ ਕਢਵਾਉਂਦੇ ਸਮੇਂ 60 ਸਾਲ ਤੋਂ ਘੱਟ ਉਮਰ ਦੇ ਯੋਗ ਵਿਅਕਤੀ ਫਾਰਮ 15G ਅਤੇ ਸੀਨੀਅਰ ਨਾਗਰਿਕ ਫਾਰਮ 15H ਜਮ੍ਹਾਂ ਕਰਵਾ ਕੇ TDS ਨਾ ਕੱਟਣ ਦਾ ਦਾਅਵਾ ਕਰਦੇ ਸਨ। ਪਰ EPFO ਦੇ ਨਵੇਂ ਨਿਰਦੇਸ਼ਾਂ ਅਨੁਸਾਰ, ਟੈਕਸ ਸਾਲ 2026-27 ਤੋਂ ਇਹ ਦੋਵੇਂ ਫਾਰਮ ਮਾਨਤਾ ਪ੍ਰਾਪਤ ਨਹੀਂ ਰਹਿਣਗੇ। ਜੇਕਰ ਕੋਈ ਖਾਤਾਧਾਰਕ ਪੁਰਾਣੇ ਫਾਰਮ ਜਮ੍ਹਾਂ ਕਰਵਾਉਂਦਾ ਹੈ, ਤਾਂ ਉਸ ਨੂੰ TDS ਛੋਟ ਦਾ ਲਾਭ ਨਹੀਂ ਮਿਲੇਗਾ।

ਕਿਸ ਨੂੰ ਮਿਲੇਗਾ ਫਾਰਮ 121 ਦਾ ਲਾਭ?  
ਆਮਦਨ ਕਰ ਕਾਨੂੰਨ, 2025 (Income Tax Act, 2025) ਦੀ ਧਾਰਾ 393(6) ਤਹਿਤ ਇਹ ਨਵੀਂ ਵਿਵਸਥਾ ਲਾਗੂ ਕੀਤੀ ਗਈ ਹੈ। ਇਹ ਸੁਵਿਧਾ ਕੇਵਲ ਉਨ੍ਹਾਂ ਟੈਕਸਦਾਤਾਵਾਂ ਲਈ ਹੈ, ਜਿਨ੍ਹਾਂ ਦੀ ਅਨੁਮਾਨਿਤ ਸਾਲਾਨਾ ਕੁੱਲ ਆਮਦਨ 'ਤੇ ਸਬੰਧਤ ਵਿੱਤੀ ਸਾਲ ਦੌਰਾਨ ਕੋਈ ਟੈਕਸ ਦੇਣਦਾਰੀ (Tax liability) ਨਹੀਂ ਬਣਦੀ। ਫਾਰਮ 121 ਜਮ੍ਹਾਂ ਕਰਨ ਲਈ ਇੱਕ ਵੈਧ ਪੈਨ ਕਾਰਡ ਹੋਣਾ ਜ਼ਰੂਰੀ ਹੈ। ਬਿਨਾਂ ਪੈਨ ਤੋਂ ਜਮ੍ਹਾਂ ਕੀਤਾ ਗਿਆ ਫਾਰਮ ਰੱਦ ਮੰਨਿਆ ਜਾਵੇਗਾ। ਅਪ੍ਰਵਾਸੀ ਭਾਰਤੀ (NRI) ਅਤੇ ਅਜਿਹੇ ਵਿਅਕਤੀ ਜਿਨ੍ਹਾਂ ਦੀ ਆਮਦਨ ਟੈਕਸ ਦੇ ਘੇਰੇ ਵਿੱਚ ਆਉਂਦੀ ਹੈ, ਇਸ ਫਾਰਮ ਦੀ ਵਰਤੋਂ ਨਹੀਂ ਕਰ ਸਕਦੇ।

EPFO ਅਨੁਸਾਰ ਫਾਰਮ 121 ਜਮ੍ਹਾਂ ਕਰਨ ਨਾਲ ਪੀ.ਐੱਫ. ਦੀ ਰਕਮ ਆਪਣੇ ਆਪ ਟੈਕਸ-ਫ੍ਰੀ ਨਹੀਂ ਹੋ ਜਾਂਦੀ। ਇਹ ਫਾਰਮ ਕੇਵਲ ਯੋਗ ਵਿਅਕਤੀ ਨੂੰ TDS ਨਾ ਕੱਟਣ ਦੀ ਬੇਨਤੀ ਕਰਨ ਦੀ ਸੁਵਿਧਾ ਦਿੰਦਾ ਹੈ।

EPFO ਨੇ ਆਪਣੇ ਖੇਤਰੀ ਦਫ਼ਤਰਾਂ ਨੂੰ ਫਾਰਮ 121 ਲਈ ਇੱਕ ਯੂਨੀਕ ਆਈਡੈਂਟੀਫਿਕੇਸ਼ਨ ਨੰਬਰ (UIN) ਜਾਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਇਸ ਤੋਂ ਇਲਾਵਾ, ਮੈਂਬਰਾਂ ਲਈ ਫਾਰਮ ਨੂੰ ਆਨਲਾਈਨ ਜਮ੍ਹਾਂ ਕਰਨ ਅਤੇ ਈ-ਸਾਈਨ (E-sign) ਕਰਨ ਦੀ ਸੁਵਿਧਾ ਵੀ ਮੁਹੱਈਆ ਕਰਵਾਈ ਜਾ ਰਹੀ ਹੈ, ਤਾਂ ਜੋ ਅਰਜ਼ੀ ਦੀ ਪ੍ਰਕਿਰਿਆ ਨੂੰ ਆਸਾਨੀ ਨਾਲ ਟਰੈਕ ਕੀਤਾ ਜਾ ਸਕੇ।