ਹਾਕੀ ਇੰਡੀਆ ਦੇ ਡਾਇਰੈਕਟਰ ਜਨਰਲ ਆਰ. ਕੇ. ਸ਼੍ਰੀਵਾਸਤਵ ''ਤੇ ਵੱਡਾ ਐਕਸ਼ਨ, ਸਾਰੇ ਅਧਿਕਾਰ ਖੋਹੇ

ਨਵੀਂ ਦਿੱਲੀ : ਹਾਕੀ ਇੰਡੀਆ ਨੇ ਆਪਣੇ ਡਾਇਰੈਕਟਰ ਜਨਰਲ ਕਮਾਂਡਰ ਆਰ. ਕੇ. ਸ਼੍ਰੀਵਾਸਤਵ ਵਿਰੁੱਧ ਸਖ਼ਤ ਕਾਰਵਾਈ ਕਰਦਿਆਂ ਉਨ੍ਹਾਂ ਦੇ ਸਾਰੇ ਅਧਿਕਾਰ ਤੁਰੰਤ ਪ੍ਰਭਾਵ ਨਾਲ ਖੋਹ ਲਏ ਹਨ। ਹਾਕੀ ਇੰਡੀਆ ਦੇ ਪ੍ਰਧਾਨ ਦਿਲੀਪ ਟਿਰਕੀ ਨੇ ਆਪਣੇ ਵਕੀਲ ਰਾਹੀਂ ਨੋਟਿਸ ਭੇਜ ਕੇ ਸ਼੍ਰੀਵਾਸਤਵ 'ਤੇ ਭਾਰਤੀ ਟੀਮ ਦੀ ਜਰਸੀ ਵਿਵਾਦ ਸਮੇਤ ਅੱਠ ਗੰਭੀਰ ਦੋਸ਼ ਲਗਾਏ ਹਨ ਅਤੇ ਚਾਰ ਹਫ਼ਤਿਆਂ ਦੇ ਅੰਦਰ ਜਵਾਬ ਮੰਗਿਆ ਹੈ।

ਜਾਰੀ ਕੀਤੇ ਗਏ ਨੋਟਿਸ ਅਨੁਸਾਰ ਆਰ. ਕੇ. ਸ਼੍ਰੀਵਾਸਤਵ ਦੇ ਡਾਇਰੈਕਟਰ ਜਨਰਲ ਵਜੋਂ ਸਾਰੇ ਕਾਰਜਕਾਰੀ, ਪ੍ਰਸ਼ਾਸਨਿਕ, ਵਿੱਤੀ, ਨਿਗਰਾਨੀ ਅਤੇ ਮੀਡੀਆ ਪ੍ਰਤੀਨਿਧਤਾ ਨਾਲ ਜੁੜੇ ਅਧਿਕਾਰ ਸਮਾਪਤ ਕਰ ਦਿੱਤੇ ਗਏ ਹਨ। ਇਹ ਕਾਰਵਾਈ ਸੰਸਥਾ ਵਿੱਚ ਅਨੁਸ਼ਾਸਨ, ਜਵਾਬਦੇਹੀ ਅਤੇ ਪਾਰਦਰਸ਼ਤਾ ਬਣਾਏ ਰੱਖਣ ਲਈ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਨੂੰ ਸਾਰੇ ਅਧਿਕਾਰਤ ਰਿਕਾਰਡ, ਦਸਤਾਵੇਜ਼, ਫਾਈਲਾਂ ਅਤੇ ਐਕਸੈਸ ਕ੍ਰੇਡੇਨਸ਼ੀਅਲਸ ਪ੍ਰਧਾਨ ਦਫ਼ਤਰ ਵੱਲੋਂ ਨਾਮਜ਼ਦ ਅਧਿਕਾਰੀ ਨੂੰ ਸੌਂਪਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਹਾਲਾਂਕਿ, ਨੋਟਿਸ ਵਿੱਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਇਹ ਕੋਈ ਅੰਤਿਮ ਫੈਸਲਾ ਜਾਂ ਸਜ਼ਾ ਨਹੀਂ ਹੈ ਅਤੇ ਉਨ੍ਹਾਂ ਦੀ ਤਨਖਾਹ ਜਾਂ ਸੇਵਾ ਲਾਭਾਂ 'ਤੇ ਇਸ ਦਾ ਕੋਈ ਅਸਰ ਨਹੀਂ ਪਵੇਗਾ।

ਸ਼੍ਰੀਵਾਸਤਵ 'ਤੇ ਲਗਾਏ ਗਏ ਮੁੱਖ ਦੋਸ਼ਾਂ ਵਿੱਚ ਭਾਰਤੀ ਟੀਮ ਦੀ ਰਵਾਇਤੀ ਨੀਲੀ ਜਰਸੀ ਨੂੰ ਬਿਨਾਂ ਪ੍ਰਧਾਨ ਜਾਂ ਕਾਰਜਕਾਰੀ ਕਮੇਟੀ ਦੀ ਸਲਾਹ ਦੇ ਨਾਰੰਗੀ ਰੰਗ ਵਿੱਚ ਬਦਲਣਾ ਸ਼ਾਮਲ ਹੈ। ਇਸ ਤੋਂ ਇਲਾਵਾ, ਉਨ੍ਹਾਂ ਨੂੰ ਹਾਕੀ ਇੰਡੀਆ ਲੀਗ (HIL) ਦੀ ਯੋਜਨਾਬੰਦੀ ਲਈ ਭਾਰਤ ਵਿੱਚ ਹੀ ਰਹਿਣ ਦੇ ਸਖ਼ਤ ਨਿਰਦੇਸ਼ ਦਿੱਤੇ ਗਏ ਸਨ, ਪਰ ਇਸ ਦੇ ਬਾਵਜੂਦ ਉਹ ਨੀਦਰਲੈਂਡਜ਼ ਅਤੇ ਬੈਲਜੀਅਮ ਵਿੱਚ ਆਯੋਜਿਤ ਵਿਸ਼ਵ ਕੱਪ ਦੌਰਾਨ ਯਾਤਰਾ 'ਤੇ ਗਏ, ਜਿਸ ਨੂੰ ਨਿਰਦੇਸ਼ਾਂ ਦੀ ਉਲੰਘਣਾ ਮੰਨਿਆ ਗਿਆ ਹੈ।

ਹੋਰ ਦੋਸ਼ਾਂ ਵਿੱਚ ਦੱਖਣੀ ਅਫਰੀਕਾ ਦੌਰੇ ਦੌਰਾਨ ਖਿਡਾਰੀਆਂ ਨਾਲ ਜੁੜੇ ਦੁਰਵਿਹਾਰ ਮਾਮਲੇ 'ਚ ਹਦਾਇਤਾਂ ਦੀ ਅਣਦੇਖੀ ਕਰਨੀ, ਹੈੱਡ ਕੋਚ ਕ੍ਰੇਗ ਫੁਲਟਨ ਨਾਲ ਜੁੜੇ ਮੁੱਦੇ 'ਤੇ ਸਪੱਸ਼ਟੀਕਰਨ ਨਾ ਦੇਣਾ, POSH ਰਿਕਾਰਡ ਉਪਲਬਧ ਨਾ ਕਰਵਾਉਣਾ ਅਤੇ FIH ਤੇ AHF ਨਾਲ ਹੋਏ ਪੱਤਰ-ਵਿਹਾਰ ਨੂੰ ਪ੍ਰਧਾਨ ਅਤੇ ਚੁਣੀ ਹੋਈ ਸੰਸਥਾ ਸਾਹਮਣੇ ਨਾ ਰੱਖਣਾ ਸ਼ਾਮਲ ਹੈ। ਸ਼੍ਰੀਵਾਸਤਵ ਨੂੰ ਨੋਟਿਸ ਮਿਲਣ ਦੇ ਚਾਰ ਹਫ਼ਤਿਆਂ ਦੇ ਅੰਦਰ ਜਵਾਬ ਦੇਣਾ ਹੋਵੇਗਾ, ਜਿਸ ਤੋਂ ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।