ਭਾਰਤ ਪਹੁੰਚਿਆ ਲਗਜ਼ਮਬਰਗ ਦਾ ਵਫ਼ਦ, ਸਪੇਸ ਤੇ AI ਸਣੇ ਕਈ ਮੁੱਦਿਆਂ ''ਤੇ ਕੀਤੀ ਚਰਚਾ
Tuesday, Sep 08, 2026 - 01:34 PM (IST)
ਇੰਟਰਨੈਸ਼ਨਲ ਡੈਸਕ- ਭਾਰਤ ਅਤੇ ਲਗਜ਼ਮਬਰਗ ਨੇ ਸਪੇਸ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI), ਕਵਾਂਟਮ ਟੈਕਨਾਲੋਜੀ ਅਤੇ ਲਾਈਫ਼ ਸਾਇੰਸਿਜ਼ ਵਰਗੇ ਤੇਜ਼ੀ ਨਾਲ ਵਧ ਰਹੇ ਸੈਕਟਰਾਂ 'ਚ ਆਪਸੀ ਸਹਿਯੋਗ ਨੂੰ ਹੋਰ ਮਜ਼ਬੂਤ ਕਰਨ ਲਈ ਉੱਚ ਪੱਧਰੀ ਬੈਠਕ ਕੀਤੀ ਹੈ। ਲਗਜ਼ਮਬਰਗ ਦੇ ਵਿੱਤ ਮੰਤਰੀ ਲੇਕਸ ਡੇਲਸ ਨੇ ਭਾਰਤ ਦੇ ਕੇਂਦਰੀ ਵਿਗਿਆਨ ਅਤੇ ਤਕਨਾਲੋਜੀ ਮੰਤਰੀ ਡਾ. ਜਿਤੇਂਦਰ ਸਿੰਘ ਨਾਲ ਮੁਲਾਕਾਤ ਕਰ ਕੇ ਜਨਵਰੀ 2027 'ਚ ਹੋਣ ਵਾਲੇ ਸੰਭਾਵੀ 'ਸਟੇਟ ਵਿਜ਼ਿਟ' ਤੋਂ ਪਹਿਲਾਂ ਸਾਂਝੇ ਭਾਈਵਾਲੀ ਦੇ ਢਾਂਚੇ 'ਤੇ ਚਰਚਾ ਕੀਤੀ।
ਨਵੀਂ ਦਿੱਲੀ 'ਚ ਹੋਈ ਇਸ ਬੈਠਕ ਦੌਰਾਨ ਦੋਵਾਂ ਦੇਸ਼ਾਂ ਨੇ ਨਿੱਜੀ ਖੇਤਰ ਦੀ ਹਿੱਸੇਦਾਰੀ ਵਧਾਉਣ 'ਤੇ ਜ਼ੋਰ ਦਿੱਤਾ। ਭਾਰਤੀ ਸਪੇਸ ਏਜੰਸੀ ਅਤੇ ਲਗਜ਼ਮਬਰਗ ਸਪੇਸ ਏਜੰਸੀ ਵਿਚਾਲੇ ਅਰਥ ਆਬਜ਼ਰਵੇਸ਼ਨ ਇਮੇਜਰੀ, ਸੈਟੇਲਾਇਟ ਕਮਿਊਨੀਕੇਸ਼ਨ, ਲਾਂਚਿੰ ਵਹੀਕਲ ਸਰਵਿਸ ਅਤੇ ਗ੍ਰਾਊਂਡ ਸਟੇਸ਼ਨਾਂ ਲਈ ਸਹਿਯੋਗ 'ਤੇ ਸਹਿਮਤੀ ਬਣੀ। ਡਾ. ਜਿਤੇਂਦਰ ਸਿੰਘ ਨੇ ਭਾਰਤ ਦੇ 2035 ਤੱਕ ਸਪੇਸ ਸਟੇਸ਼ਨ ਸਥਾਪਤ ਕਰਨ ਅਤੇ 2040 ਤੱਕ ਚੰਦ 'ਤੇ ਮਨੁੱਖ ਭੇਜਣ ਦੇ ਆਪਣੇ ਟੀਚੇ ਬਾਰੇ ਵੀ ਜਾਣਕਾਰੀ ਦਿੱਤੀ।
ਭਾਰਤ ਨੇ ਆਪਣੇ 'ਇੰਡੀਆ ਏ.ਆਈ. ਮਿਸ਼ਨ' ਅਧੀਨ ਦੇਸ਼ ਦੀਆਂ ਵੱਖ-ਵੱਖ ਭਾਸ਼ਾਵਾਂ ਲਈ 'ਲਾਰਜ ਲੈਂਗੂਏਜ ਮਾਡਲ' ਅਤੇ ਕੰਪਿਊਟਿੰਗ ਸਮਰੱਥਾ ਵਧਾਉਣ ਦੇ ਯਤਨਾਂ ਨੂੰ ਸਾਂਝਾ ਕੀਤਾ। ਲਗਜ਼ਮਬਰਗ ਨੇ ਆਪਣੇ ਨਵੇਂ AI-ਆਧਾਰਿਤ ਹਾਈ-ਪ੍ਰਫਾਰਮੈਂਸ ਕੰਪਿਊਟਿੰਗ ਪ੍ਰੋਜੈਕਟ ਵਿੱਚ ਭਾਰਤੀ ਕੰਪਨੀਆਂ ਨਾਲ ਮਿਲ ਕੇ ਕੰਮ ਕਰਨ 'ਚ ਦਿਲਚਸਪੀ ਦਿਖਾਈ।
ਭਾਰਤ ਦੇ 'ਨੈਸ਼ਨਲ ਕਵਾਂਟਮ ਮਿਸ਼ਨ' ਦੇ ਤਹਿਤ ਕਵਾਂਟਮ ਕਮਿਊਨੀਕੇਸ਼ਨ, ਸੈਂਸਿੰਗ ਅਤੇ ਕੰਪਿਊਟਿੰਗ 'ਚ ਸਹਿਯੋਗ ਦੀਆਂ ਸੰਭਾਵਨਾਵਾਂ 'ਤੇ ਗੱਲਬਾਤ ਹੋਈ। ਖ਼ਾਸ ਕਰਕੇ ਸਪੇਸ ਸੈਕਟਰ ਨਾਲ ਜੁੜੀ 'ਆਪਟੀਕਲ ਕਮਿਊਨੀਕੇਸ਼ਨ' ਨੂੰ ਦੋਵਾਂ ਦੇਸ਼ਾਂ ਲਈ ਲਾਹੇਵੰਦ ਮੰਨਿਆ ਗਿਆ।
ਇਸ ਤੋਂ ਇਲਾਵਾ ਭਾਰਤ ਦੀ 'BioE3' (Bioeconomy, Environment, and Employment) ਨੀਤੀ ਦਾ ਜ਼ਿਕਰ ਕਰਦਿਆਂ ਜੈਵਿਕ ਤਕਨਾਲੋਜੀ ਅਤੇ ਸਿਹਤ ਖੇਤਰ 'ਚ ਰਿਸਰਚ ਅਤੇ ਉਦਯੋਗਿਕ ਹਿੱਸੇਦਾਰੀ ਨੂੰ ਵਧਾਉਣ 'ਤੇ ਵੀ ਸਹਿਮਤੀ ਜਤਾਈ ਗਈ।
