ਸਮਲਿੰਗੀ ਲੋਕਾਂ ਦਾ ਕਰੰਟ ਨਾਲ ਇਲਾਜ ਕਰਨ ਵਾਲੇ ਡਾਕਟਰ ਨੂੰ ਕੋਰਟ ਨੇ ਕੀਤਾ ਤਲੱਬ

ਨਵੀਂ ਦਿੱਲੀ— ਕਰੰਟ ਲਗਾ ਕੇ ਸਮਲਿੰਗੀ ਲੋਕਾਂ ਦੇ ਇਲਾਜ ਦਾ ਦਾਅਵਾ ਕਰਨ ਵਾਲੇ ਇਕ ਡਾਕਟਰ ਨੂੰ ਇਕ ਅਦਾਲਤ ਨੇ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ 'ਚ ਆਪਣੇ ਸਾਹਮਣੇ ਹਾਜ਼ਰ ਹੋਣ ਦਾ ਆਦੇਸ਼ ਦਿੱਤਾ ਹੈ। ਇਹ ਡਾਕਟਰ ਦਾਅਵਾ ਕਰਦਾ ਹੈ ਕਿ ਸਮਲਿੰਗੀ ਇਕ 'ਅੰਦਰੂਨੀ ਮਾਨਸਿਕ ਵਿਕਾਰ' ਹੈ ਅਤੇ ਸਮਲਿੰਗੀ ਇਸਤਰੀ-ਪੁਰਸ਼ਾਂ ਨੂੰ ਬਿਜਲੀ ਦਾ ਝਟਕਾ ਦੇ ਕੇ ਇਸ ਨੂੰ ਠੀਕ ਕੀਤਾ ਜਾ ਸਕਦਾ ਹੈ। ਦਿੱਲੀ ਡਾਕਟਰੀ ਪ੍ਰੀਸ਼ਦ (ਡੀ.ਐੱਮ.ਸੀ.) ਨੇ ਡਾ. ਪੀ.ਕੇ. ਗੁਪਤਾ ਦੇ ਪ੍ਰੈਕਟਿਸ ਕਰਨ 'ਤੇ ਰੋਕ ਲੱਗਾ ਦਿੱਤੀ ਸੀ ਪਰ ਉਹ ਹੁਣ ਵੀ ਇਸ ਅਜੀਬੋ-ਗਰੀਬ ਤਰੀਕੇ ਨੂੰ ਅੰਜਾਮ ਦਿੰਦਾ ਹੈ। ਮੈਟਰੋਪੋਲਿਟਨ ਮੈਜਿਸਟਰੇਟ ਅਭਿਲਾਸ਼ ਮਲਹੋਤਰਾ ਨੇ ਕਿਹਾ ਕਿ ਇਹ ਡਾਕਟਰ ਜੋ ਤਰੀਕਾ ਇਸਤੇਮਾਲ ਕਰ ਰਿਹਾ ਹੈ, ਉਸ ਦਾ ਕੋਈ ਵੇਰਵਾ ਡਾਕਟਰੀ ਵਿਗਿਆਨ ਜਾਂ ਮਨਜ਼ੂਰੀ ਤੌਰ ਤਰੀਕਿਆਂ 'ਚ ਨਹੀਂ ਹੈ। ਭਾਰਤੀ ਡਾਕਟਰੀ ਪ੍ਰੀਸ਼ਦ ਐਕਟ ਦੇ ਅਧੀਨ ਉਸ ਨੂੰ ਇਕ ਸਾਲ ਦੀ ਸਜ਼ਾ ਹੋ ਸਕਦੀ ਹੈ। ਅਦਾਲਤ ਨੇ ਇਹ ਵੀ ਕਿਹਾ ਕਿ ਇਹ ਵੀ ਸਪੱਸ਼ਟ ਹੋ ਰਿਹਾ ਹੈ ਕਿ ਗੁਪਤਾ ਦੇ ਪ੍ਰੈਕਟਿਸ 'ਤੇ ਰੋਕ ਲੱਗਣ ਤੋਂ ਬਾਅਦ ਵੀ ਉਹ ਬਾਜ਼ਰ ਨਹੀਂ ਆ ਰਿਹਾ ਹੈ।
ਅਦਾਲਤ ਨੇ ਡੀ.ਐੱਮ.ਸੀ. ਵੱਲੋਂ ਗੁਪਤਾ ਦੇ ਖਿਲਾਫ ਉਸ ਸ਼ਿਕਾਇਤ 'ਤੇ ਵੀ ਧਿਆਨ ਦਿੱਤਾ, ਜਿਸ 'ਚ ਦਾਅਵਾ ਕੀਤਾ ਗਿਆ ਹੈ ਕਿ ਉਹ ਇਲਾਜ ਪ੍ਰਦਾਨ ਕਰਨ ਲਈ ਹਾਰਮੋਨਲ ਅਤੇ ਝਟਕੇ ਵਾਲੀ ਥੈਰੇਪੀ ਦਾ ਵਰਤੋਂ ਕਰ ਰਿਹਾ ਹੈ। ਅਦਾਲਤ ਨੇ ਆਪਣੇ ਸੰਮੰਨ 'ਚ ਸਮਲਿੰਗੀ 'ਤੇ ਹਾਈ ਕੋਰਟ ਦੇ ਉਸ ਫੈਸਲੇ ਦਾ ਵੀ ਜ਼ਿਕਰ ਕੀਤਾ ਹੈ, ਜਿਸ 'ਚ ਉਸ ਨੇ 2 ਬਾਲਗਾਂ ਦੇ ਨਿੱਜੀ ਰੂਪ ਨਾਲ ਆਪਸੀ ਸਹਿਮਤੀ ਨਾਲ ਯੌਨ ਸੰਬੰਧ ਬਣਾਉਣ ਨੂੰ ਅਪਰਾਧ ਨਹੀਂ ਮੰਨਿਆ ਹੈ। ਅਦਾਲਤ ਅਨੁਸਾਰ ਗੁਪਤਾ 15 ਮਿੰਟ ਦੀ ਕਾਊਂਸਲਿੰਗ ਲਈ 4500 ਰੁਪਏ ਵਸੂਲਦਾ ਹੈ ਅਤੇ ਉਸ ਤੋਂ ਬਾਅਦ ਹੀ ਉਹ ਹਾਰਮੋਨ ਜਾਂ ਮਨੋਵਿਗਿਆਨੀ ਤਰੀਕੇ ਨਾਲ ਇਲਾਜ ਕਰਦਾ ਹੈ। ਜਦੋਂ ਡੀ.ਐੱਮ.ਸੀ. ਨੇ ਇਸ ਡਾਕਟਰ ਨੂੰ ਨੋਟਿਸ ਜਾਰੀ ਕੀਤਾ ਤਾਂ ਉਸ ਨੇ ਕਿਹਾ ਕਿ ਉਹ ਇਸ ਪ੍ਰੀਸ਼ਦ ਨਾਲ ਰਜਿਸਟਰਡ ਨਹੀਂ ਹੈ, ਲਿਹਾਜਾ ਉਹ ਇਸ ਦਾ ਜਵਾਬ ਦੇਣ ਲਈ ਜ਼ਿੰਮੇਵਾਰ ਨਹੀਂ ਹੈ।