ਵਿਸ਼ਵ ਪੱਧਰੀ ਖੁਰਾਕ ਮਹਿੰਗਾਈ ’ਚ ਰਾਹਤ, FAO ਫੂਡ ਪ੍ਰਾਈਸ ਇੰਡੈਕਸ ’ਚ ਲਗਾਤਾਰ 5ਵੇਂ ਮਹੀਨੇ ਗਿਰਾਵਟ

ਨਵੀਂ ਦਿੱਲੀ (ਇੰਟ.) - ਭਾਰਤ ਸਮੇਤ ਦੁਨੀਆ ਭਰ ’ਚ ਮਹਿੰਗਾਈ ਦੀ ਮਾਰ ਝੱਲ ਰਹੇ ਕਰੋੜਾਂ ਲੋਕਾਂ ਲਈ ਜਨਵਰੀ ਦਾ ਮਹੀਨਾ ਕੁਝ ਰਾਹਤ ਭਰਿਆ ਸਾਬਤ ਹੋਇਆ ਹੈ। ਸੰਯੁਕਤ ਰਾਸ਼ਟਰ ਦੇ ਖੁਰਾਕ ਤੇ ਖੇਤੀਬਾੜੀ ਸੰਗਠਨ (ਐੱਫ. ਏ. ਓ.) ਦੀ ਤਾਜ਼ਾ ਰਿਪੋਰਟ ਅਨੁਸਾਰ ਵਿਸ਼ਵ ਪੱਧਰ ’ਤੇ ਖੁਰਾਕ ਕੀਮਤਾਂ ’ਚ ਲਗਾਤਾਰ 5ਵੇਂ ਮਹੀਨੇ ਗਿਰਾਵਟ ਦਰਜ ਕੀਤੀ ਗਈ ਹੈ। ਰਿਪੋਰਟ ਮੁਤਾਬਕ ਇਸ ਦੌਰਾਨ ਦੁੱਧ, ਖੰਡ ਤੇ ਮਾਸ ਵਰਗੇ ਜ਼ਰੂਰੀ ਖੁਰਾਕ ਉਤਪਾਦਾਂ ਦੀਆਂ ਕੀਮਤਾਂ ਘਟੀਆਂ, ਜਿਸ ਨਾਲ ਕੌਮਾਂਤਰੀ ਬਾਜ਼ਾਰ ’ਚ ਰਾਹਤ ਦੇਖਣ ਨੂੰ ਮਿਲੀ।

ਇਹ ਵੀ ਪੜ੍ਹੋ : 1 ਮਾਰਚ ਤੋਂ ਸਕੂਲਾਂ 'ਚ ਮੋਬਾਈਲ ਫੋਨ ਬੈਨ, ਫੜੇ ਜਾਣ 'ਤੇ ਲੱਗੇਗਾ 500 ਰੁਪਏ ਜੁਰਮਾਨਾ, CM ਸੁੱਖੂ ਦਾ ਵੱਡਾ ਐਲਾਨ

ਹਾਲਾਂਕਿ ਚੌਲਾਂ ਤੇ ਵਨਸਪਤੀ ਤੇਲ ਦੀਆਂ ਵਧਦੀਆਂ ਕੀਮਤਾਂ ਹੁਣ ਵੀ ਚਿੰਤਾ ਦਾ ਵਿਸ਼ਾ ਬਣੀਆਂ ਹੋਈਆਂ ਹਨ। ਐੱਫ. ਏ. ਓ. ਦਾ ਫੂਡ ਪ੍ਰਾਈਸ ਇੰਡੈਕਸ, ਜੋ ਵਿਸ਼ਵ ਪੱਧਰ ’ਤੇ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ ’ਚ ਮਾਸਿਕ ਬਦਲਾਅ ਨੂੰ ਦਰਸਾਉਂਦਾ ਹੈ, ਜਨਵਰੀ ’ਚ ਔਸਤਨ 123.9 ਅੰਕ ’ਤੇ ਰਿਹਾ। ਇਹ ਦਸੰਬਰ 2025 ਦੀ ਤੁਲਨਾ ’ਚ 0.4 ਫੀਸਦੀ ਘੱਟ ਅਤੇ ਪਿਛਲੇ ਸਾਲ ਦੀ ਇਸੇ ਮਿਆਦ ਤੋਂ 0.6 ਫੀਸਦੀ ਹੇਠਾਂ ਦਰਜ ਕੀਤਾ ਗਿਆ।

ਅਨਾਜ ਦੀਆਂ ਕੀਮਤਾਂ ਲੱਗਭਗ ਸਥਿਰ
ਰਿਪੋਰਟ ਅਨੁਸਾਰ ਅਨਾਜ ਦੀਆਂ ਕੀਮਤਾਂ ’ਚ ਦਸੰਬਰ 2025 ਦੀ ਤੁਲਨਾ ’ਚ ਮਾਮੂਲੀ 0.2 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਹਾਲਾਂਕਿ ਇਸੇ ਦੌਰਾਨ ਕਣਕ ਤੇ ਮੱਕੀ ਦੀਆਂ ਵਿਸ਼ਵ ਪੱਧਰੀ ਕੀਮਤਾਂ ’ਚ ਹਲਕੀ ਗਿਰਾਵਟ ਦੇਖਣ ਨੂੰ ਮਿਲੀ। ਜਨਵਰੀ ’ਚ ਅਨਾਜ ਕੀਮਤ ਸੂਚਕ-ਅੰਕ ਔਸਤਨ 107.5 ਅੰਕ ’ਤੇ ਰਿਹਾ। ਐੱਫ. ਏ. ਓ. ਨੇ ਦੱਸਿਆ ਕਿ ਦੁਨੀਆ ’ਚ ਕਣਕ ਦਾ ਲੋੜੀਂਦਾ ਭੰਡਾਰ ਹੋਣ ਕਾਰਨ ਰੂਸ ਤੇ ਅਮਰੀਕਾ ’ਚ ਮੌਸਮ ਨਾਲ ਜੁੜੀਆਂ ਚਿੰਤਾਵਾਂ ਦਾ ਅਸਰ ਸੀਮਿਤ ਰਿਹਾ। ਦੂਜੇ ਪਾਸੇ ਅਰਜਨਟੀਨਾ ਤੇ ਆਸਟ੍ਰੇਲੀਆ ’ਚ ਚੰਗੀ ਫਸਲ ਦੀ ਉਮੀਦ ਅਤੇ ਉੱਚੇ ਵਿਸ਼ਵ ਪੱਧਰੀ ਭੰਡਾਰ ਨੇ ਕੀਮਤਾਂ ਨੂੰ ਹੇਠਾਂ ਰੱਖਣ ’ਚ ਮਦਦ ਕੀਤੀ।

ਇਹ ਵੀ ਪੜ੍ਹੋ : 'ਸਮਾਗਮ 'ਚ ਨਾ ਆਏ ਤਾਂ ਨਹੀਂ ਮਿਲਣਗੇ 1500 ਰੁਪਏ', 'ਲਾਡਲੀ ਭੈਣਾਂ' ਨੂੰ ਮੰਤਰੀ ਦੀ ਖੁੱਲ੍ਹੀ ਚੇਤਾਵਨੀ

ਚਾਵਲ ਦੀਆਂ ਕੀਮਤਾਂ ’ਚ ਉਛਾਲ, ਖੁਸ਼ਬੂਦਾਰ ਕਿਸਮਾਂ ਦੀ ਮੰਗ
ਇਸ ਤੋਂ ਉਲਟ ਜਨਵਰੀ ’ਚ ਚੌਲਾਂ ਦੀਆਂ ਕੀਮਤਾਂ ’ਚ 1.8 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਖਾਸ ਤੌਰ ’ਤੇ ਖੁਸ਼ਬੂਦਾਰ ਕਿਸਮਾਂ ਦੀ ਮਜ਼ਬੂਤ ਮੰਗ ਕਾਰਨ ਕੌਮਾਂਤਰੀ ਬਾਜ਼ਾਰ ’ਚ ਚੌਲਾਂ ਦੀਆਂ ਕੀਮਤਾਂ ਚੜ੍ਹੀਆਂ ਰਹੀਆਂ। ਹੋਰ ਮੋਟੇ ਅਨਾਜਾਂ ਵਿਚ ਜੌਂ ਦੀਆਂ ਕੀਮਤਾਂ ’ਚ ਹਲਕੀ ਤੇਜ਼ੀ ਦੇਖੀ ਗਈ ਕਿਉਂਕਿ ਅਰਜਨਟੀਨਾ ਤੋਂ ਇਸ ਦੀ ਮੰਗ ਮਜ਼ਬੂਤ ਰਹੀ। ਜਵਾਰ ਦੀਆਂ ਕੀਮਤਾਂ ਕਣਕ ਵਾਂਗ ਨਰਮ ਬਣੀਆਂ ਰਹੀਆਂ।

ਵਨਸਪਤੀ ਤੇਲ ਮੁੜ ਮਹਿੰਗਾ, ਸੂਚਕ-ਅੰਕ ’ਚ ਤੇਜ਼ ਉਛਾਲ
ਰਿਪੋਰਟ ਅਨੁਸਾਰ ਜਨਵਰੀ ’ਚ ਵਨਸਪਤੀ ਤੇਲ ਸੂਚਕ-ਅੰਕ ’ਚ 2.1 ਫੀਸਦੀ ਦਾ ਵਾਧਾ ਹੋਇਆ। ਇਹ ਦਸੰਬਰ 2025 ’ਚ 165.2 ਤੋਂ ਵਧ ਕੇ ਜਨਵਰੀ 2026 ’ਚ 168.6 ਅੰਕ ’ਤੇ ਪਹੁੰਚ ਗਿਆ। ਦੱਖਣ-ਪੂਰਬੀ ਏਸ਼ੀਆ ’ਚ ਉਤਪਾਦਨ ਦੀ ਮੌਸਮੀ ਸੁਸਤੀ ਅਤੇ ਦਰਾਮਦ ਮੰਗ ਵਧਣ ਨਾਲ ਪਾਮ ਆਇਲ ਮਹਿੰਗਾ ਹੋਇਆ। ਦੂਜੇ ਪਾਸੇ ਦੱਖਣੀ ਅਮਰੀਕਾ ’ਚ ਬਰਾਮਦ ਸਪਲਾਈ ਘਟਣ ਅਤੇ ਅਮਰੀਕਾ ’ਚ ਬਾਇਓ ਫਿਊਲ ਦੀ ਮਜ਼ਬੂਤ ਮੰਗ ਦੀ ਉਮੀਦ ਨਾਲ ਸੋਇਆਬੀਨ ਤੇਲ ਦੀਆਂ ਕੀਮਤਾਂ ’ਚ ਵੀ ਉਛਾਲ ਆਇਆ।

ਇਹ ਵੀ ਪੜ੍ਹੋ : ਮੁੜ ਮਹਿੰਗਾ ਹੋਇਆ ਸੋਨਾ-ਚਾਂਦੀ, ਕੀਮਤਾਂ ਨੇ ਮਾਰੀ ਵੱਡੀ ਛਲਾਂਗ

ਮਾਸ ਸਸਤਾ ਪਰ ਪੋਲਟਰੀ ’ਚ ਤੇਜ਼ੀ
ਐੱਫ. ਏ. ਓ. ਦੇ ਅੰਕੜਿਆਂ ਅਨੁਸਾਰ ਜਨਵਰੀ 2026 ’ਚ ਮਾਸ ਦੇ ਕੀਮਤ ਸੂਚਕ-ਅੰਕ ’ਚ 0.4 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ, ਜਿਸ ਨਾਲ ਇਹ 124.2 ਤੋਂ ਘਟ ਕੇ 123.8 ਅੰਕ ’ਤੇ ਆ ਗਿਆ। ਹਾਲਾਂਕਿ ਬ੍ਰਾਜ਼ੀਲ ਤੋਂ ਵਧਦੀ ਬਰਾਮਦ ਕਾਰਨ ਪੋਲਟਰੀ ਦੀਆਂ ਕੀਮਤਾਂ ’ਚ ਵਾਧਾ ਦੇਖਿਆ ਗਿਆ।

ਡੇਅਰੀ ਉਤਪਾਦਾਂ ’ਚ ਵੱਡੀ ਰਾਹਤ
ਜਨਵਰੀ ’ਚ ਸਭ ਤੋਂ ਜ਼ਿਆਦਾ ਰਾਹਤ ਡੇਅਰੀ ਉਤਪਾਦਾਂ ’ਚ ਦੇਖਣ ਨੂੰ ਮਿਲੀ। ਡੇਅਰੀ ਸੂਚਕ-ਅੰਕ ’ਚ ਲੱਗਭਗ 5 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ। ਵਿਸ਼ਵ ਬਾਜ਼ਾਰ ’ਚ ਮੱਖਣ ਤੇ ਪਨੀਰ ਦੇ ਲੋੜੀਂਦੀ ਮਾਤਰਾ ’ਚ ਮੁਹੱਈਆ ਹੋਣ ਕਾਰਨ ਕੀਮਤਾਂ ’ਚ ਨਰਮੀ ਆਈ। ਹਾਲਾਂਕਿ ਸਕਿਮਡ ਮਿਲਕ ਪਾਊਡਰ ਦੀਆਂ ਕੀਮਤਾਂ ’ਚ ਮਜ਼ਬੂਤੀ ਬਣੀ ਰਹੀ। ਪੱਛਮੀ ਏਸ਼ੀਆ, ਉੱਤਰੀ ਅਫਰੀਕਾ ਤੇ ਏਸ਼ੀਆ ਦੇ ਕੁਝ ਹਿੱਸਿਆਂ ਤੋਂ ਮੰਗ ਵਧਣ ਕਾਰਨ ਇਸ ਦੀਆਂ ਕੀਮਤਾਂ ਨੂੰ ਸਹਾਰਾ ਮਿਲਿਆ ਹੋਇਆ ਹੈ।

ਖੰਡ ਦੀਆਂ ਕੀਮਤਾਂ ’ਚ ਵੀ ਗਿਰਾਵਟ
ਰਿਪੋਰਟ ’ਚ ਇਹ ਵੀ ਪਤਾ ਲੱਗਾ ਹੈ ਕਿ ਜਨਵਰੀ 2026 ’ਚ ਖੰਡ ਦੀਆਂ ਕੀਮਤਾਂ ’ਚ ਇਕ ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ। ਖੰਡ ਦਾ ਸੂਚਕ-ਅੰਕ ਦਸੰਬਰ 2025 ਦੇ 90.7 ਤੋਂ ਘਟ ਕੇ ਜਨਵਰੀ 2026 ’ਚ 89.8 ’ਤੇ ਪਹੁੰਚ ਗਿਆ। ਐੱਫ. ਏ. ਓ. ਮੁਤਾਬਕ ਭਾਰਤ ’ਚ ਉਤਪਾਦਨ ’ਚ ਵੱਡੇ ਵਾਧੇ, ਥਾਈਲੈਂਡ ਤੋਂ ਹਾਂ-ਪੱਖੀ ਸੰਕੇਤ ਅਤੇ ਬ੍ਰਾਜ਼ੀਲ ’ਚ ਬਿਹਤਰ ਉਤਪਾਦਨ ਅਨੁਮਾਨ ਕਾਰਨ ਵਿਸ਼ਵ ਪੱਧਰੀ ਸਪਲਾਈ ਵਧਣ ਦੀ ਆਸ ਹੈ, ਜਿਸ ਦਾ ਸਿੱਧਾ ਅਸਰ ਕੀਮਤਾਂ ’ਤੇ ਪਿਆ ਹੈ।

ਤੇਲ ਤੇ ਚੌਲ ਚਿੰਤਾ ਦਾ ਕਾਰਨ
ਕੁਲ ਮਿਲਾ ਕੇ ਵਿਸ਼ਵ ਪੱਧਰੀ ਖੁਰਾਕ ਬਾਜ਼ਾਰ ’ਚ ਫਿਲਹਾਲ ਰਾਹਤ ਦੇ ਸੰਕੇਤ ਨਜ਼ਰ ਆ ਰਹੇ ਹਨ ਪਰ ਵਨਸਪਤੀ ਤੇਲ ਤੇ ਚੌਲਾਂ ਦੀਆਂ ਵਧਦੀਆਂ ਕੀਮਤਾਂ ਚਿੰਤਾ ਵਧਾ ਸਕਦੀਆਂ ਹਨ। ਆਉਣ ਵਾਲੇ ਮਹੀਨਿਆਂ ’ਚ ਮੌਸਮ, ਉਤਪਾਦਨ ਅਤੇ ਕੌਮਾਂਤਰੀ ਮੰਗ ਹੀ ਖੁਰਾਕ ਕੀਮਤਾਂ ਦੀ ਦਿਸ਼ਾ ਤੈਅ ਕਰਨਗੇ।

ਇਹ ਵੀ ਪੜ੍ਹੋ : ਗੈਸ ਸਿਲੰਡਰ, FASTag, ਸਿਗਰੇਟ ਸਣੇ ਕਈ ਚੀਜ਼ਾਂ 'ਚ ਅੱਜ ਤੋਂ ਹੋਵੇਗਾ ਬਦਲਾਅ, ਜੇਬ 'ਤੇ ਪਵੇਗਾ ਅਸਰ!

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e