ਵੱਡੀ ਮਾਤਰਾਂ ਵਿਚ ਉਘੇ ਭੰਗ ਦੇ ਪੌਦਿਆਂ ਕਾਰਨ ਨਸ਼ੇੜੀ ਬਣੇ ਸ਼ਹਿਰ ਨਿਵਾਸੀਆਂ ਲਈ ਵੱਡੀ ਸਿਰਦਰਦੀ

ਭਵਾਨੀਗੜ੍ਹ(ਕਾਂਸਲ) - ਸਥਾਨਕ ਸ਼ਹਿਰ ਦੇ ਵੱਖ-ਵੱਖ ਗਲੀ ਮੁਹੱਲਿਆਂ ਵਿਚ ਪਈਆਂ ਖਾਲ੍ਹੀ ਥਾਵਾਂ ਉਪਰ ਭਾਰੀ ਮਾਤਰਾਂ ਵਿਚ ਉਘੇ ਭੰਗ ਦੇ ਪੌਦੇ ਸ਼ਹਿਰ ਨਿਵਾਸੀਆਂ ਲਈ ਜਿਥੇ ਵੱਡੀ ਸਿਰਦਰਦੀ ਬਣੇ ਹੋਏ ਹਨ। ਉਥੇ ਇਨ੍ਹਾਂ ਪੌਦਿਆਂ ਤੋਂ ਭੰਗ ਦੀ ਪ੍ਰਾਪਤੀ ਲਈ ਰੋਜਾਨਾ ਨਸ਼ੇੜੀਆਂ ਦੀ ਇਨ੍ਹਾਂ ਗਲੀ-ਮੁਹੱਲਿਆਂ ਵਿਚ ਜ਼ਿਆਦਾ ਆਉਣੀ-ਜਾਣੀ ਸੁਰੱਖਿਆਂ ਦੇ ਲਿਹਾਜ ਨਾਲ ਠੀਕ ਨਾ ਹੋਣ ਕਾਰਨ ਖਤਰੇ ਦੇ ਅਹਿਸਾਸ ਦੇ ਚਲਦਿਆਂ ਹੋਰ ਵੀ ਵੱਡੀ ਸਿਰਦਰਦੀ ਬਣੀ ਹੋਈ ਹੈ।

ਸਥਾਨਕ ਸ਼ਹਿਰ ਦੀ ਅਨਾਜ਼ ਮੰਡੀ ਦੇ ਪਿਛੇ ਸਥਿਤ ਆਦਰਸ਼ ਕਲੋਨੀ ਦੇ ਵਸਨੀਕਾਂ ਮੋਹਿੰਦਰਪਾਲ ਸਿੰਘ ਮੋਖਾ, ਐਡਵੋਕੇਟ ਪੀ.ਐਸ ਕੰਗ, ਐਡਵੋਕੇਟ ਈਸ਼ਵਰ ਬਾਂਸਲ, ਤਰਸੇਮ ਜਿੰਦਲ, ਰਾਜ ਕੁਮਾਰ ਕਾਂਸਲ, ਈਸ਼ਰ ਸਿੰਘ, ਦਵਿੰਦਰ ਸਿੰਘ, ਮਹਿੰਦਰ ਸਿੰਘ, ਪ੍ਰੇਮ ਸਿੰਘ ਖਿਪਲ, ਹਨੀ ਸਿੰਘ, ਰਮੇਸ਼ ਕੁਮਾਰ, ਰਾਜਿੰਦਰ ਸਿੰਘ ਖੰਗੂੜਾ, ਜੋਨੀ ਰਾਮ ਅਤੇ ਮੇਵਾ ਸਿੰਘ ਸਮੇਤ ਹੋਰ ਕਈ ਮੁਹੱਲਾ ਨਿਵਾਸੀਆਂ ਨੇ ਰੋਸ ਜ਼ਾਹਰ ਕਰਦਿਆਂ ਕਿਹਾ ਕਿ ਸਰਕਾਰ ਦੀ ਕਹਿਣੀ ਅਤੇ ਕਥਣੀ ਵਿਚ ਬਹੁਤ ਫਰਕ ਹੈ, ਇਕ ਪਾਸੇ ਤਾਂ ਸਰਕਾਰ ਵੱਲੋਂ ਪੰਜਾਬ ਨੂੰ ਪੂਰੀ ਤਰ੍ਹਾਂ ਨਸ਼ਾ ਮੁਕਤ ਕਰਨ ਦੇ ਵੱਡੇ-ਵੱਡੇ ਦਾਅਵੇ ਕੀਤੇ ਗਏ ਸਨ ਅਤੇ ਦੂਜੇ ਪਾਸੇ ਸ਼ਹਿਰ ਦੇ ਗਲੀ-ਮੁਹੱਲਿਆਂ ਵਿਚ ਵੱਡੀ ਮਾਤਰਾਂ ਵਿਚ ਉਘੇ ਇਨ੍ਹਾਂ ਭੰਗ ਦੇ ਪੌਦਿਆਂ ਦੇ ਖਾਤਮੇ ਵੱਲ ਕੋਈ ਵੀ ਧਿਆਨ ਨਹੀਂ ਦਿੱਤਾ ਜਾ ਰਿਹਾ।

ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਭੰਗ ਦੇ ਪੌਦਿਆਂ ਤੋਂ ਨਸ਼ੇ ਦੀ ਪ੍ਰਾਪਤੀ ਲਈ ਨਸ਼ੇੜੀਆਂ ਦੀ ਗਲੀ ਮੁਹੱਲਿਆਂ ਵਿਚ ਵੱਡੀ ਆਮਦ ਸੁਰੱਖਿਆਂ ਦੇ ਲਿਹਾਜ ਨਾਲ ਉਨ੍ਹਾਂ ਲਈ ਵੱਡੀ ਚਿੰਤਾ ਦਾ ਵਿਸਾ ਹੈ ਕਿਉਂਕਿ ਲਾਕਡਾਊਨ ਕਾਰਨ ਸਕੂਲ ਵਗੈਰਾ ਬੰਦ ਹੋਣ ਕਾਰਨ ਛੋਟੇ ਛੋਟੇ ਬੱਚੇ ਇਥੇ ਗਲੀਆਂ ਵਿਚ ਖੇਡਦੇ ਹਨ ਅਤੇ ਇਨ੍ਹਾਂ ਨਸ਼ੇੜੀਆਂ ਦਾ ਕੋਈ ਭਰੋਸਾ ਨਹੀਂ ਕਿ ਇਹ ਇਨ੍ਹਾਂ ਬੱਚਿਆਂ ਲਈ ਹੀ ਕੋਈ ਖਤਰਾ ਬਣ ਜਾਣ। ਇਸ ਤੋਂ ਇਲਾਵਾ ਨਸ਼ੇੜੀਆਂ ਦਾ ਆਮਦ ਕਾਰਨ ਇਥੇ ਗਲੀਆਂ ਵਿਚ ਖੜ੍ਹੇ ਵਾਹਨ ਅਤੇ ਕਈ ਵਾਰ ਘਰਾਂ ਵਿਚ ਕੋਈ ਨਾ ਹੋਣ ਕਾਰਨ ਸੁੰਨੇ ਪਏ ਘਰ ਵੀ ਸੁਰੱਖਿਅਤ ਨਹੀਂ ਹਨ। ਦੂਜਾ ਇਨ੍ਹਾਂ ਨਸ਼ੇੜੀਆਂ ਵੱਲੋਂ ਇਥੇ ਪੌਦਿਆਂ ਤੋਂ ਭੰਗ ਮਲ ਕੇ ਫਿਰ ਇਸ ਨੂੰ ਇਥੇ ਹੀ ਸਿਗਰਟਾਂ ਵਿਚ ਭਰ ਕੇ ਸੂਟੇ ਲਗਾਏ ਜਾਂਦੇ ਹਨ ਜਿਸ ਨੂੰ ਦੇਖ ਕੇ ਇਥੇ ਬੱਚਿਆਂ ਨੂੰ ਵੀ ਇਸ ਨਸ਼ੇ ਦੀ ਲਤ ਲਗ ਸਕਦੀ ਹੈ। ਇਸ ਲਈ ਉਨ੍ਹਾਂ ਸਰਕਾਰ ਅਤੇ ਪ੍ਰਸਾਸ਼ਨ ਤੋਂ ਮੰਗ ਕੀਤੀ ਕਿ ਸ਼ਹਿਰ ਵਿਚੋਂ ਇਨ੍ਹਾਂ ਭੰਗ ਦੇ ਪੌਦਿਆਂ ਦਾ ਤੁਰੰਤ ਖਾਤਮਾ ਕਰਵਾਇਆ ਜਾਵੇ।