ਗਰਮੀਆਂ ’ਚ ਮੁਟਿਆਰਾਂ ਦੀ ਪਹਿਲੀ ਪਸੰਦ ਬਣੇ ਫਿੱਟ ਐਂਡ ਫਲੇਅਰ ਫਲੋਰਲ ਮੈਕਸੀ ਡਰੈੱਸ

ਵੈੱਬ ਡੈਸਕ- ਗਰਮੀਆਂ ਦੇ ਮੌਸਮ ’ਚ ਮੁਟਿਆਰਾਂ ਤੇ ਔਰਤਾਂ ਅਜਿਹੀ ਡਰੈੱਸ ਪਹਿਨਣਾ ਪਸੰਦ ਕਰਦੀਆਂ ਹਨ, ਜੋ ਉਨ੍ਹਾਂ ਨੂੰ ਸੁੰਦਰ ਅਤੇ ਸਟਾਈਲਿਸ਼ ਦਿਖਾਉਣ ਦੇ ਨਾਲ-ਨਾਲ ਕੰਫਰਟੇਬਲ ਵੀ ਮਹਿਸੂਸ ਕਰਵਾਏ। ਚੁੱਭਦੀ ਗਰਮੀ ਅਤੇ ਤਿੱਖੀ ਧੁੱਪ ’ਚ ਹੈਵੀ ਅਤੇ ਟਾਈਟ ਕੱਪੜੇ ਪਹਿਨਣਾ ਮੁਸ਼ਕਿਲ ਹੋ ਜਾਂਦਾ ਹੈ। ਅਜਿਹੇ ’ਚ ਹਲਕੀ, ਹਵਾਦਾਰ ਅਤੇ ਟ੍ਰੈਂਡੀ ਡਰੈੱਸ ਦੀ ਮੰਗ ਵਧ ਜਾਂਦੀ ਹੈ। ਇਹੋ ਕਾਰਨ ਹੈ ਕਿ ਮੌਜੂਦਾ ਸਮੇਂ ’ਚ ਫਲੋਰਲ ਪ੍ਰਿੰਟਿਡ ਡਰੈੱਸ ਕਾਫੀ ਟ੍ਰੈਂਡ ’ਚ ਹੈ ਅਤੇ ਇਸ ’ਚ ਵੀ ਫਿੱਟ ਐਂਡ ਫਲੇਅਰ ਫਲੋਰਲ ਮੈਕਸੀ ਡਰੈੱਸ ਮੁਟਿਆਰਾਂ ਦੀ ਪਹਿਲੀ ਪਸੰਦ ਬਣ ਗਈ ਹੈ।

ਫਿੱਟ ਐਂਡ ਫਲੇਅਰ ਮੈਕਸੀ ਡਰੈੱਸ ਦੇਖਣ ’ਚ ਬੇਹੱਦ ਖੂਬਸੂਰਤ ਲੱਗਦੀ ਹੈ। ਇਸ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਇਹ ਹੈ ਕਿ ਇਹ ਕਮਰ ਤੱਕ ਫਿਟਿਡ ਰਹਿੰਦੀ ਹੈ ਅਤੇ ਕਮਰ ਦੇ ਹੇਠਾਂ ਤੋਂ ਫਲੇਅਰ ਭਾਵ ਘੇਰਾਦਾਰ ਹੋ ਜਾਂਦੀ ਹੈ। ਇਹ ਕੱਟ ਹਰ ਬਾਡੀ ਟਾਈਪ ’ਤੇ ਜੱਚਦਾ ਹੈ। ਦੁਬਲੀਆਂ-ਪਤਲੀਆਂ ਮੁਟਿਆਰਾਂ ਤੋਂ ਲੈ ਕੇ ਹਰ ਬਾਡੀ ਟਾਈਪ ਦੀਆਂ ਔਰਤਾਂ ’ਤੇ ਇਹ ਡਰੈੱਸ ਆਕਰਸ਼ਕ ਲੁੱਕ ਦਿੰਦੀ ਹੈ ਅਤੇ ਉਨ੍ਹਾਂ ਨੂੰ ਸਲਿਮ ਅਤੇ ਲੰਬਾ ਵਿਖਾਉਂਦੀ ਹੈ। ਇਹੋ ਵਜ੍ਹਾ ਹੈ ਕਿ ਕਾਲਜ-ਸਕੂਲ ਜਾਣ ਵਾਲੀਆਂ ਮੁਟਿਆਰਾਂ ਤੋਂ ਲੈ ਕੇ ਆਫਿਸ ’ਚ ਕੰਮ ਕਰਨ ਵਾਲੀਆਂ ਔਰਤਾਂ ਤੱਕ ਸਾਰੀਆਂ ਇਸ ਨੂੰ ਬੇਹੱਦ ਪਸੰਦ ਕਰ ਰਹੀਆਂ ਹਨ। ਖਾਸ ਕਰ ਕੇ ਆਊਟਿੰਗ, ਪਿਕਨਿਕ, ਯਾਤਰਾ, ਸ਼ਾਪਿੰਗ ਜਾਂ ਦੋਸਤਾਂ ਨਾਲ ਘੁੰਮਣ ਦੌਰਾਨ ਇਹ ਡਰੈੱਸ ਸਭ ਤੋਂ ਜ਼ਿਆਦਾ ਕੰਫਰਟੇਬਲ ਰਹਿੰਦੀ ਹੈ।

ਗਰਮੀਆਂ ’ਚ ਕਾਟਨ, ਰੇਆਨ, ਜਾਰਜੈੱਟ ਅਤੇ ਲਿਨਨ ਵਰਗੇ ਹਲਕੇ ਫੈਬਰਿਕ ’ਚ ਬਣੀ ਫਲੋਰਲ ਮੈਕਸੀ ਡਰੈੱਸ ਸਰੀਰ ਨੂੰ ਠੰਢਕ ਦਾ ਅਹਿਸਾਸ ਕਰਵਾਉਂਦੀ ਹੈ ਅਤੇ ਪਸੀਨੇ ਤੋਂ ਵੀ ਬਚਾਉਂਦੀ ਹੈ। ਡਿਜ਼ਾਈਨ ਦੀ ਗੱਲ ਕਰੀਏ ਤਾਂ ਇਸ ’ਚ ਕਈ ਵੈਰਾਇਟੀਜ਼ ਦੇਖਣ ਨੂੰ ਮਿਲ ਰਹੀਆਂ ਹਨ। ਮਾਰਕੀਟ ’ਚ ਫੁੱਲ ਸਲੀਵਜ਼, ਹਾਫ ਸਲੀਵਜ਼ ਦੇ ਨਾਲ-ਨਾਲ ਡਿਜ਼ਾਈਨਰ ਸਲੀਵਜ਼ ਜਿਵੇਂ ਅੰਬਰੇਲਾ ਸਲੀਵਜ਼, ਬੈੱਲ ਸਲੀਵਜ਼ ਅਤੇ ਫ੍ਰਿਲ ਸਲੀਵਜ਼ ਵੀ ਕਾਫੀ ਪਸੰਦ ਕੀਤੀਆਂ ਜਾ ਰਹੀਆਂ ਹਨ। ਉੱਥੇ ਹੀ ਅੱਜਕੱਲ ਦੀ ਨੌਜਵਾਨ ਪੀੜ੍ਹੀ ਸਪੈਗੇਟੀ ਸਟ੍ਰੈਪ ਅਤੇ ਨੂਡਲ ਸਟ੍ਰੈਪ ਵਾਲੀ ਫਿੱਟ ਐਂਡ ਫਲੇਅਰ ਡਰੈੱਸ ਨੂੰ ਜ਼ਿਆਦਾ ਪਸੰਦ ਕਰ ਰਹੀ ਹੈ, ਜੋ ਉਨ੍ਹਾਂ ਨੂੰ ਟ੍ਰੈਂਡੀ ਅਤੇ ਮਾਡਰਨ ਲੁੱਕ ਦਿੰਦੀ ਹੈ। ਕੁਝ ਡਰੈੱਸਾਂ ’ਚ ਵਨ-ਸਾਈਡ ਰਫਲ ਅਤੇ ਪ੍ਰੀ-ਡ੍ਰੈਪਡ ਸਾੜ੍ਹੀ ਸਟਾਈਲ ਵੀ ਦੇਖਣ ਨੂੰ ਮਿਲ ਰਿਹਾ ਹੈ, ਜੋ ਇੰਡੋ-ਵੈਸਟਰਨ ਲੁੱਕ ਦਿੰਦਾ ਹੈ।

ਸਿਰਫ ਆਮ ਮੁਟਿਆਰਾਂ ਹੀ ਨਹੀਂ, ਬਾਲੀਵੁੱਡ ਅਦਾਕਾਰਾਂ ਵੀ ਅਕਸਰ ਆਪਣੇ ਵੈਕੇਸ਼ਨ ਅਤੇ ਕੈਜ਼ੂਅਲ ਲੁੱਕ ’ਚ ਇਸ ਤਰ੍ਹਾਂ ਦੀ ਡਰੈੱਸ ’ਚ ਨਜ਼ਰ ਆਉਂਦੀਆਂ ਹਨ, ਜਿਸ ਤੋਂ ਬਾਅਦ ਇਹ ਟ੍ਰੈਂਡ ਹੋਰ ਵੀ ਤੇਜ਼ੀ ਨਾਲ ਵਧਿਆ ਹੈ। ਫਲੋਰਲ ਪ੍ਰਿੰਟ ਦੀ ਗੱਲ ਕਰੀਏ ਤਾਂ ਇਸ ’ਚ ਡਿਊਲ ਅਤੇ ਮਲਟੀਕਲਰ ਦੇ ਆਪਸ਼ਨ ਮੌਜੂਦ ਹਨ। ਛੋਟੇ ਫਲਾਵਰ ਪ੍ਰਿੰਟ ਜਿੱਥੇ ਕਿਊਟ ਅਤੇ ਐਲੀਗੈਂਟ ਲੁੱਕ ਦਿੰਦੇ ਹਨ, ਉੱਥੇ ਹੀ ਵੱਡੇ ਫਲਾਵਰ ਪ੍ਰਿੰਟ ਬੋਲਡ ਅਤੇ ਸਟਾਈਲਿਸ਼ ਲੁੱਕ ਦਿੰਦੇ ਹਨ।

ਯੈਲੋ, ਬਲੂ, ਪਿੰਕ, ਵ੍ਹਾਈਟ ਅਤੇ ਪੇਸਟਲ ਕਲਰ ਦੇ ਫਲੋਰਲ ਪ੍ਰਿੰਟ ਇਸ ਗਰਮੀ ’ਚ ਸਭ ਤੋਂ ਜ਼ਿਆਦਾ ਟ੍ਰੈਂਡ ’ਚ ਹਨ। ਇਸ ਡਰੈੱਸ ਦੇ ਨਾਲ ਸਟਾਈਲਿੰਗ ਵੀ ਬਹੁਤ ਆਸਾਨ ਹੈ। ਮੁਟਿਆਰਾਂ ਇਸ ਦੇ ਨਾਲ ਓਪਨ ਹੇਅਰ, ਮੈਕਸੀ ਬਨ ਅਤੇ ਹਾਫ ਟਾਈ ਹੇਅਰ ਸਟਾਈਲ ਕਰਨਾ ਪਸੰਦ ਕਰਦੀਆਂ ਹਨ। ਜਿਊਲਰੀ ’ਚ ਮਿਨੀਮਲ ਲੁੱਕ ਜ਼ਿਆਦਾ ਪਸੰਦ ਕੀਤੀ ਜਾ ਰਹੀ ਹੈ, ਜਿਵੇਂ ਲਾਂਗ ਈਅਰਰਿੰਗਜ਼, ਛੋਟੇ ਟਾਪਸ, ਬ੍ਰੈਸਲੇਟ ਅਤੇ ਰਿੰਗ। ਧੁੱਪ ਤੋਂ ਬਚਣ ਲਈ ਸਨਗਲਾਸਿਜ਼, ਹੈਟ ਅਤੇ ਸਟੋਲ ਵੀ ਇਸ ਦੇ ਨਾਲ ਸਟਾਈਲ ਕੀਤੇ ਜਾ ਰਹੇ ਹਨ। ਫੁੱਟਵੀਅਰ ’ਚ ਇਸ ਦੇ ਨਾਲ ਹਾਈ ਹੀਲਜ਼, ਪਲੇਟਫਾਰਮ ਹੀਲਜ਼, ਸਿੰਪਲ ਫਲੈਟ ਸੈਂਡਲ ਅਤੇ ਸਨੀਕਰਜ਼ ਸਾਰੇ ਆਸਾਨੀ ਨਾਲ ਮੈਚ ਹੋ ਜਾਂਦੇ ਹਨ। ਕੁੱਲ ਮਿਲਾ ਕੇ ਫਿੱਟ ਐਂਡ ਫਲੇਅਰ ਫਲੋਰਲ ਮੈਕਸੀ ਡਰੈੱਸ ਨੇ ਸਟਾਈਲ ਅਤੇ ਕੰਫਰਟ ਦਾ ਬਿਹਤਰੀਨ ਸੰਗਮ ਪੇਸ਼ ਕੀਤਾ ਹੈ, ਜੋ ਇਸ ਨੂੰ ਇਸ ਗਰਮੀ ਦਾ ਸਭ ਤੋਂ ਹਿੱਟ ਫੈਸ਼ਨ ਟ੍ਰੈਂਡ ਬਣਾਉਂਦਾ ਹੈ।