ਸ਼ੁਰੂ ਹੋਵੇਗੀ ਦੁਨੀਆ ਦੀ ਸਭ ਤੋਂ ਲੰਬੀ 22 ਘੰਟੇ ਦੀ ਫਲਾਈਟ ! ਸੂਰਜ ਚੜ੍ਹਨ ਅਤੇ ਡੁੱਬਣ ਦਾ ਹੋਵੇਗਾ ਅਹਿਸਾਸ

ਇੰਟਰਨੈਸ਼ਨਲ ਡੈਸਕ: ਹਵਾਈ ਸਫ਼ਰ ਦੇ ਇਤਿਹਾਸ ਵਿੱਚ ਇੱਕ ਨਵਾਂ ਅਧਿਆਏ ਜੁੜਨ ਜਾ ਰਿਹਾ ਹੈ। ਆਸਟ੍ਰੇਲੀਆਈ ਹਵਾਬਾਜ਼ੀ ਕੰਪਨੀ ਕੰਤਾਸ ਏਅਰਵੇਜ਼ ਆਪਣੇ 'ਪ੍ਰੋਜੈਕਟ ਸਨਰਾਈਜ਼' ਦੇ ਤਹਿਤ ਦੁਨੀਆ ਦੀ ਸਭ ਤੋਂ ਲੰਬੀ ਨਾਨ-ਸਟਾਪ ਫਲਾਈਟ ਸ਼ੁਰੂ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਇਹ ਉਡਾਣ ਸਿਡਨੀ ਤੋਂ ਲੰਡਨ ਤੱਕ ਦਾ ਸਫ਼ਰ ਬਿਨਾਂ ਰੁਕੇ ਤੈਅ ਕਰੇਗੀ, ਜਿਸ ਵਿੱਚ ਯਾਤਰੀ ਲਗਾਤਾਰ 20 ਤੋਂ 22 ਘੰਟੇ ਤੱਕ ਆਸਮਾਨ ਵਿੱਚ ਰਹਿਣਗੇ।

9 ਟਾਈਮ ਜ਼ੋਨ ਦਾ ਸਫ਼ਰ; ਜੈੱਟ ਲੈਗ ਤੋਂ ਮਿਲੇਗੀ ਰਾਹਤ 

ਇੰਨੇ ਲੰਬੇ ਸਫ਼ਰ ਦੌਰਾਨ ਇਹ ਜਹਾਜ਼ 9 ਟਾਈਮ ਜ਼ੋਨ ਨੂੰ ਪਾਰ ਕਰੇਗਾ, ਜੋ ਕਿ ਕਿਸੇ ਵੀ ਇਨਸਾਨੀ ਸਰੀਰ ਅਤੇ ਦਿਮਾਗ ਨੂੰ ਥਕਾ ਦੇਣ ਲਈ ਕਾਫੀ ਹੈ। ਪਰ ਵਿਗਿਆਨ ਦੀ ਮਦਦ ਨਾਲ ਇਸ ਸਫ਼ਰ ਨੂੰ ਆਰਾਮਦਾਇਕ ਬਣਾਇਆ ਜਾਵੇਗਾ। ਸਿਡਨੀ ਯੂਨੀਵਰਸਿਟੀ ਦੇ ਮਾਹਿਰਾਂ ਅਨੁਸਾਰ ਜਹਾਜ਼ ਦੇ ਅੰਦਰ ਕੁਦਰਤੀ ਦ੍ਰਿਸ਼ਾਂ ਤੋਂ ਪ੍ਰੇਰਿਤ 14 ਅਲੱਗ-ਅਲੱਗ ਲਾਈਟ ਪ੍ਰੋਗਰਾਮ ਚਲਾਏ ਜਾਣਗੇ, ਜੋ ਯਾਤਰੀਆਂ ਨੂੰ ਜਹਾਜ਼ ਦੇ ਅੰਦਰ ਹੀ ਸੂਰਜ ਚੜ੍ਹਨ ਅਤੇ ਡੁੱਬਣ ਦਾ ਅਹਿਸਾਸ ਕਰਵਾਉਣਗੇ। ਇਹ ਤਕਨੀਕ ਯਾਤਰੀਆਂ ਦੀ 'ਬਾਇਓਲਾਜੀਕਲ ਕਲਾਕ' (ਜੈਵਿਕ ਘੜੀ) ਨੂੰ ਸੰਤੁਲਿਤ ਰੱਖਣ ਅਤੇ ਜੈੱਟ ਲੈਗ (ਥਕਾਵਟ ਤੇ ਅਨਿਦਰਾ) ਨੂੰ ਘਟਾਉਣ ਵਿੱਚ ਮਦਦ ਕਰੇਗੀ।

ਪੜ੍ਹੋ ਇਹ ਅਹਿਮ ਖ਼ਬਰ-  ਹੁਣ ਜਾਪਾਨ ਜਾਣਾ ਹੋਵੇਗਾ ਮਹਿੰਗਾ ! ਸਰਕਾਰ ਨੇ ਵੀਜ਼ਾ ਫੀਸ 'ਚ ਕੀਤਾ ਭਾਰੀ ਵਾਧਾ

ਇਸ ਖ਼ਾਸ ਉਡਾਣ ਲਈ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤੇ ਗਏ ਏਅਰਬੱਸ A350-1000ULR ਜਹਾਜ਼ ਵਿੱਚ ਇੱਕ 'ਵੈਲਨੈੱਸ ਜ਼ੋਨ' ਬਣਾਇਆ ਗਿਆ ਹੈ। ਇੱਥੇ ਯਾਤਰੀਆਂ ਨੂੰ ਸਵਿਮਿੰਗ ਪੂਲ ਦੇ ਕਿਨਾਰੇ ਲੇਟਣ ਵਰਗਾ ਅਹਿਸਾਸ ਹੋਵੇਗਾ, ਜਿੱਥੇ ਉਹ ਖੜ੍ਹੇ ਹੋ ਕੇ ਸਟ੍ਰੈਚਿੰਗ ਕਰ ਸਕਣਗੇ ਅਤੇ ਸਰੀਰ ਦੀ ਥਕਾਵਟ ਮਿਟਾ ਸਕਣਗੇ। ਜਹਾਜ਼ ਵਿੱਚ ਨੀਂਦ ਅਤੇ ਖਾਣ-ਪੀਣ ਲਈ ਵੀ ਵਿਸ਼ੇਸ਼ 'ਪ੍ਰੋਟੈਕਟਿਵ ਸਲੀਪ ਵਿੰਡੋ' ਤੈਅ ਕੀਤੀ ਜਾਵੇਗੀ। ਵਜ਼ਨ ਦੀਆਂ ਪਾਬੰਦੀਆਂ ਕਾਰਨ ਇਸ ਵਿਸ਼ਾਲ ਜਹਾਜ਼ ਵਿੱਚ ਸਿਰਫ਼ 238 ਯਾਤਰੀ ਹੀ ਸਫ਼ਰ ਕਰ ਸਕਣਗੇ। ਇਸ ਦਾ ਫਾਇਦਾ ਇਹ ਹੋਵੇਗਾ ਕਿ ਆਮ ਇਕੋਨੋਮੀ ਕਲਾਸ ਵਿੱਚ ਵੀ ਯਾਤਰੀਆਂ ਨੂੰ ਆਪਣੇ ਪੈਰ ਫੈਲਾਉਣ ਲਈ 33 ਤੋਂ 34 ਇੰਚ ਦੀ ਵਾਧੂ ਜਗ੍ਹਾ ਮਿਲੇਗੀ। ਕੰਪਨੀ ਦਾ ਦਾਅਵਾ ਹੈ ਕਿ ਇਹ ਇਤਿਹਾਸਕ ਉਡਾਣਾਂ ਅਗਲੇ ਸਾਲ ਤੋਂ ਸ਼ੁਰੂ ਹੋ ਜਾਣਗੀਆਂ। ਵਿਗਿਆਨੀਆਂ ਨੇ ਇਸ ਪ੍ਰੋਜੈਕਟ ਲਈ ਹਰ ਛੋਟੀ ਡਿਟੇਲ 'ਤੇ ਕੰਮ ਕੀਤਾ ਹੈ, ਤਾਂ ਜੋ ਇੰਨੇ ਲੰਬੇ ਸਫ਼ਰ ਦੌਰਾਨ ਯਾਤਰੀਆਂ ਦੀ ਸਿਹਤ 'ਤੇ ਕੋਈ ਮਾੜਾ ਅਸਰ ਨਾ ਪਵੇ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।