ਟਰੰਪ ਨੇ ਇਰਾਨ ਦੇ ਨਕਸ਼ੇ ’ਤੇ ਲਾਈ ਆਪਣੀ ਫੋਟੋ

ਇੰਟਰਨੈਸ਼ਨਲ ਡੈਸਕ- ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਇਰਾਨ ਦੇ ਖਿਲਾਫ ਸੋਸ਼ਲ ਮੀਡੀਆ ’ਤੇ ਲੱਗਭਗ 1 ਘੰਟੇ ਵਿਚ ਇਕ ਤੋਂ ਬਾਅਦ ਇਕ 7 ਪੋਸਟਾਂ ਕੀਤੀਆਂ। ਇਨ੍ਹਾਂ ਪੋਸਟਾਂ ’ਚ ਉਨ੍ਹਾਂ ਨੇ ਇਰਾਨ ਦੀ ਕਮਜ਼ੋਰ ਆਰਥਿਕਤਾ, ਡਿੱਗਦੀ ਤੇਲ ਬਰਾਮਦ ਅਤੇ ਕਮਜ਼ੋਰ ਹੁੰਦੀ ਕਰੰਸੀ ਨੂੰ ਨਿਸ਼ਾਨਾ ਬਣਾਇਆ। 

ਟਰੰਪ ਨੇ ਐਤਵਾਰ ਰਾਤ ਇਰਾਨ ਦੇ ਨਕਸ਼ੇ ’ਤੇ ਆਪਣੀ ਤਸਵੀਰ ਲਾ ਕੇ ਵੀ ਪੋਸਟ ਕੀਤਾ। ਸਭ ਤੋਂ ਵੱਧ ਧਿਆਨ ਖਾਰਗ ਟਾਪੂ ਨਾਲ ਜੁੜੀ ਏ. ਆਈ. ਤਸਵੀਰ ਨੇ ਖਿੱਚਿਆ, ਜਿਸ ’ਚ ਤੇਲ ਟਿਕਾਣਿਆਂ ’ਤੇ ਬੰਬਾਰੀ ਹੁੰਦੀ ਦਿਖਾਈ ਗਈ ਅਤੇ ਲਿਖਿਆ ਸੀ- ਬਾਏ-ਬਾਏ ਖਾਰਗ।

ਟਰੰਪ ਨੇ ਇਕ ਗ੍ਰਾਫਿਕ ਸ਼ੇਅਰ ਕਰ ਕੇ ਦਾਅਵਾ ਕੀਤਾ ਕਿ ਹੋਰਮੁਜ਼ ਤੋਂ ਹੁਣ ਲੱਗਭਗ 1.8 ਕਰੋੜ ਬੈਰਲ ਤੇਲ ਰੋਜ਼ਾਨਾ ਲੰਘ ਰਿਹਾ ਹੈ, ਜਦਕਿ ਪਹਿਲਾਂ ਇਹ ਅੰਕੜਾ ਲੱਗਭਗ 2 ਕਰੋੜ ਬੈਰਲ ਪ੍ਰਤੀ ਦਿਨ ਸੀ। ਟਰੰਪ ਨੇ ਇਰਾਨ ਦੇ ਤੇਲ ਬਰਾਮਦ ਦਾ ਗ੍ਰਾਫਿਕ ਸ਼ੇਅਰ ਕੀਤਾ। ਇਸ ਵਿਚ ਦਾਅਵਾ ਕੀਤਾ ਗਿਆ ਕਿ 2025 ਦੀ ਸ਼ੁਰੂਆਤ ਵਿਚ ਲੱਗਭਗ 20 ਲੱਖ ਬੈਰਲ ਪ੍ਰਤੀ ਦਿਨ ਦਾ ਐਕਸਪੋਰਟ 2026 ਵਿਚ ਡਿੱਗ ਕੇ ਲੱਗਭਗ ਸਿਫ਼ਰ ਤੱਕ ਪਹੁੰਚ ਗਿਆ ਹੈ। ਗ੍ਰਾਫਿਕ ਵਿਚ ਕੁਝ ਸੁਧਾਰ ਦਿਖਾਇਆ ਗਿਆ ਹੈ ਪਰ ਤੀਜੀ ਤਿਮਾਹੀ ਵਿਚ ਐਕਸਪੋਰਟ ਫਿਰ ਬਹੁਤ ਘੱਟ ਪੱਧਰ ’ਤੇ ਆਉਂਦਾ ਨਜ਼ਰ ਆ ਰਿਹਾ ਹੈ।