'Strait of Hormuz' ਮੁਕੰਮਲ ਬੰਦ! ਗੱਲਬਾਤ ਅਸਫਲ ਰਹਿਣ 'ਤੇ ਭੜਕੇ ਟਰੰਪ ਦਾ ਵੱਡਾ ਐਲਾਨ

ਵਾਸ਼ਿੰਗਟਨ: ਅਮਰੀਕਾ ਤੇ ਈਰਾਨ ਵਿਚਾਲੇ ਤਣਾਅ ਇੱਕ ਵਾਰ ਫਿਰ ਸਿਖਰਾਂ 'ਤੇ ਪਹੁੰਚ ਗਿਆ ਹੈ। ਰਾਸ਼ਟਰਪਤੀ ਡੋਨਾਲਡ ਜੇ. ਟਰੰਪ ਨੇ ਈਰਾਨ ਵਿਰੁੱਧ ਸਖ਼ਤ ਰੁਖ ਅਖਤਿਆਰ ਕਰਦਿਆਂ 'ਸਟ੍ਰੇਟ ਆਫ ਹਾਰਮੁਜ਼' (Strait of Hormuz) ਦੀ ਮੁਕੰਮਲ ਨਾਕਾਬੰਦੀ ਕਰਨ ਦੇ ਹੁਕਮ ਜਾਰੀ ਕਰ ਦਿੱਤੇ ਹਨ। ਟਰੰਪ ਨੇ ਸਪੱਸ਼ਟ ਕੀਤਾ ਹੈ ਕਿ ਪਰਮਾਣੂ ਮੁੱਦੇ 'ਤੇ ਸਹਿਮਤੀ ਨਾ ਬਣਨ ਕਾਰਨ ਅਮਰੀਕੀ ਜਲ ਸੈਨਾ ਤੁਰੰਤ ਪ੍ਰਭਾਵ ਨਾਲ ਇਸ ਰਸਤੇ ਤੋਂ ਹੋਣ ਵਾਲੀ ਹਰ ਤਰ੍ਹਾਂ ਦੀ ਆਵਾਜਾਈ ਨੂੰ ਰੋਕਣ ਦੀ ਪ੍ਰਕਿਰਿਆ ਸ਼ੁਰੂ ਕਰੇਗੀ।

ਈਰਾਨ 'ਤੇ ਲਾਇਆ 'ਵਿਸ਼ਵ ਜਬਰਦਸਤੀ' ਦਾ ਦੋਸ਼
ਰਾਸ਼ਟਰਪਤੀ ਟਰੰਪ ਨੇ ਈਰਾਨ ਦੀਆਂ ਕਾਰਵਾਈਆਂ ਨੂੰ "ਵਿਸ਼ਵ ਜਬਰਦਸਤੀ" (World Extortion) ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਈਰਾਨ ਨੇ ਸਮੁੰਦਰੀ ਰਸਤਿਆਂ ਵਿੱਚ ਬਾਰੂਦੀ ਸੁਰੰਗਾਂ (mines) ਵਿਛਾ ਕੇ ਦੁਨੀਆ ਨੂੰ ਡਰਾਉਣ ਦੀ ਕੋਸ਼ਿਸ਼ ਕੀਤੀ ਹੈ। ਅਮਰੀਕੀ ਜਲ ਸੈਨਾ ਨੂੰ ਹੁਕਮ ਦਿੱਤੇ ਗਏ ਹਨ ਕਿ ਉਹ ਉਨ੍ਹਾਂ ਸਾਰੇ ਜਹਾਜ਼ਾਂ ਨੂੰ ਰੋਕਣ ਜਿਨ੍ਹਾਂ ਨੇ ਈਰਾਨ ਨੂੰ ਗੈਰ-ਕਾਨੂੰਨੀ ਟੈਕਸ ਜਾਂ ਟੋਲ ਅਦਾ ਕੀਤਾ ਹੈ। 

"ਗੋਲੀ ਚਲਾਈ ਤਾਂ ਨਰਕ ਭੇਜ ਦਿਆਂਗੇ", ਟਰੰਪ ਦੀ ਸਿੱਧੀ ਚਿਤਾਵਨੀ
ਟਰੰਪ ਨੇ ਬੇਹੱਦ ਹਮਲਾਵਰ ਅੰਦਾਜ਼ ਵਿੱਚ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਕਿਸੇ ਵੀ ਈਰਾਨੀ ਨੇ ਅਮਰੀਕੀ ਫੌਜ ਜਾਂ ਸ਼ਾਂਤੀਪੂਰਨ ਜਹਾਜ਼ਾਂ 'ਤੇ ਗੋਲੀ ਚਲਾਈ, ਤਾਂ ਉਸ ਨੂੰ "ਨਰਕ ਦਾ ਰਸਤਾ" ਦਿਖਾਇਆ ਜਾਵੇਗਾ। ਉਨ੍ਹਾਂ ਦਾਅਵਾ ਕੀਤਾ ਕਿ ਈਰਾਨ ਦੀ ਹਵਾਈ ਸੈਨਾ, ਜਲ ਸੈਨਾ ਅਤੇ ਰਾਡਾਰ ਸਿਸਟਮ ਪਹਿਲਾਂ ਹੀ ਤਬਾਹ ਹੋ ਚੁੱਕੇ ਹਨ ਅਤੇ ਉਨ੍ਹਾਂ ਦੇ ਕਈ ਵੱਡੇ ਨੇਤਾ ਵੀ ਮਾਰੇ ਜਾ ਚੁੱਕੇ ਹਨ।

ਅਮਰੀਕੀ ਫੌਜ 'ਲੌਕਡ ਐਂਡ ਲੋਡਡ'
ਅਮਰੀਕੀ ਰਾਸ਼ਟਰਪਤੀ ਨੇ ਕਿਹਾ ਹੈ ਕਿ ਉਨ੍ਹਾਂ ਦੀ ਫੌਜ ਪੂਰੀ ਤਰ੍ਹਾਂ "ਲੌਕਡ ਐਂਡ ਲੋਡਡ" ਹੈ ਅਤੇ ਉਹ ਈਰਾਨ ਦੇ ਬਚੇ-ਖੁਚੇ ਹਿੱਸੇ ਨੂੰ ਖਤਮ ਕਰਨ ਲਈ ਤਿਆਰ ਹਨ। ਇਸ ਨਾਕਾਬੰਦੀ ਵਿੱਚ ਹੋਰ ਦੇਸ਼ਾਂ ਦੇ ਵੀ ਸ਼ਾਮਲ ਹੋਣ ਦੀ ਉਮੀਦ ਹੈ ਤਾਂ ਜੋ ਈਰਾਨ ਨੂੰ ਉਸ ਦੀਆਂ ਪਰਮਾਣੂ ਲਾਲਸਾਵਾਂ ਕਾਰਨ ਹੋਰ ਮੁਨਾਫਾ ਕਮਾਉਣ ਤੋਂ ਰੋਕਿਆ ਜਾ ਸਕੇ।

ਆਪਣੇ ਇਰਾਦੇ ਛੱਡਣ ਲਈ ਤਿਆਰ ਨਹੀਂ ਈਰਾਨ :ਟਰੰਪ
ਰਾਸ਼ਟਰਪਤੀ ਨੇ ਕਿਹਾ ਕਿ ਇਸਲਾਮਾਬਾਦ ਵਿੱਚ ਪਾਕਿਸਤਾਨੀ ਲੀਡਰਸ਼ਿਪ ਦੀ ਮੇਜ਼ਬਾਨੀ ਹੇਠ ਹੋਈ ਇੱਕ ਉੱਚ-ਪੱਧਰੀ ਮੀਟਿੰਗ ਵਿੱਚ ਇਰਾਨ ਦੇ ਪ੍ਰਮਾਣੂ ਪ੍ਰੋਗਰਾਮ ਨੂੰ ਲੈ ਕੇ ਕੋਈ ਸਹਿਮਤੀ ਨਹੀਂ ਬਣ ਸਕੀ। ਅਮਰੀਕੀ ਪ੍ਰਤੀਨਿਧੀਆਂ ਅਤੇ ਇਰਾਨੀ ਆਗੂਆਂ ਵਿਚਕਾਰ ਲਗਾਤਾਰ 20 ਘੰਟੇ ਚੱਲੀ ਇਸ ਗੰਭੀਰ ਗੱਲਬਾਤ ਵਿੱਚ ਈਰਾਨ ਨੇ ਆਪਣੇ ਪ੍ਰਮਾਣੂ ਇਰਾਦਿਆਂ ਨੂੰ ਤਿਆਗਣ ਤੋਂ ਸਾਫ਼ ਮਨਾ ਕਰ ਦਿੱਤਾ ਹੈ। ਇਹ ਮੀਟਿੰਗ ਸਵੇਰੇ ਸ਼ੁਰੂ ਹੋਈ ਅਤੇ ਪੂਰੀ ਰਾਤ ਚੱਲਦੀ ਰਹੀ। ਭਾਵੇਂ ਕੁਝ ਹੋਰ ਨੁਕਤਿਆਂ 'ਤੇ ਸਹਿਮਤੀ ਬਣੀ, ਜੋ ਕਿ ਫੌਜੀ ਕਾਰਵਾਈ ਜਾਰੀ ਰੱਖਣ ਨਾਲੋਂ ਬਿਹਤਰ ਮੰਨੇ ਜਾ ਰਹੇ ਸਨ, ਪਰ ਮੁੱਖ ਮੁੱਦਾ 'ਪ੍ਰਮਾਣੂ ਸ਼ਕਤੀ' ਹੀ ਰਿਹਾ। ਈਰਾਨ ਦੇ ਪ੍ਰਤੀਨਿਧੀ—ਮੁਹੰਮਦ-ਬਾਗੇਰ ਗਾਲੀਬਾਫ, ਅੱਬਾਸ ਅਰਾਗਚੀ, ਅਤੇ ਅਲੀ ਬਘੇਰੀ—ਇਸ ਮੁੱਦੇ 'ਤੇ ਬਿਲਕੁਲ ਵੀ ਝੁਕਣ ਲਈ ਤਿਆਰ ਨਹੀਂ ਸਨ। ਅਮਰੀਕੀ ਪੱਖ ਨੇ ਦੁਹਰਾਇਆ ਹੈ ਕਿ ਈਰਾਨ ਨੂੰ ਕਦੇ ਵੀ ਪ੍ਰਮਾਣੂ ਹਥਿਆਰ ਹਾਸਲ ਨਹੀਂ ਕਰਨ ਦਿੱਤੇ ਜਾਣਗੇ।

ਇਸ ਦੇ ਨਾਲ ਹੀ ਟਰੰਪ ਨੇ ਈਰਾਨ 'ਤੇ ਦੋਸ਼ ਲਾਇਆ ਗਿਆ ਹੈ ਕਿ ਉਸ ਨੇ ਅੰਤਰਰਾਸ਼ਟਰੀ ਜਲ ਮਾਰਗ 'ਹੋਰਮੁਜ਼' ਨੂੰ ਖੋਲ੍ਹਣ ਦੇ ਆਪਣੇ ਵਾਅਦੇ ਦੀ ਉਲੰਘਣਾ ਕੀਤੀ ਹੈ। ਇਰਾਨ ਵੱਲੋਂ ਪਾਣੀ ਵਿੱਚ ਬਾਰੂਦੀ ਸੁਰੰਗਾਂ (mines) ਵਿਛਾਉਣ ਦੀਆਂ ਖਬਰਾਂ ਨੇ ਵਿਸ਼ਵ ਪੱਧਰ 'ਤੇ ਚਿੰਤਾ ਅਤੇ ਆਰਥਿਕ ਮੁਸ਼ਕਲਾਂ ਪੈਦਾ ਕਰ ਦਿੱਤੀਆਂ ਹਨ। ਅਮਰੀਕੀ ਪ੍ਰਸ਼ਾਸਨ ਨੇ ਇਰਾਨ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਉਹ ਇਸ ਅੰਤਰਰਾਸ਼ਟਰੀ ਮਾਰਗ ਨੂੰ ਜਲਦੀ ਤੋਂ ਜਲਦੀ ਖੋਲ੍ਹੇ, ਕਿਉਂਕਿ ਇਹ ਹਰ ਕਾਨੂੰਨ ਦੀ ਉਲੰਘਣਾ ਹੈ। ਫਿਲਹਾਲ, ਪ੍ਰਮਾਣੂ ਮੁੱਦੇ 'ਤੇ ਈਰਾਨ ਦੇ ਅੜੀਅਲ ਰਵੱਈਏ ਕਾਰਨ ਖੇਤਰ ਵਿੱਚ ਤਣਾਅ ਬਰਕਰਾਰ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਸਥਿਤੀ ਹੋਰ ਗੰਭੀਰ ਹੋ ਸਕਦੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e