ਦੱਖਣੀ ਕੋਰੀਆ ਨੇ ਪਹਿਲੇ ਹਾਈਪਰਸੋਨਿਕ ਗਲਾਈਡ ਵਹੀਕਲ ਦਾ ਕੀਤਾ ਸਫ਼ਲ ਪ੍ਰੀਖਣ

ਸਿਓਲ — ਦੱਖਣੀ ਕੋਰੀਆ ਦੇ ਰਾਸ਼ਟਰਪਤੀ ਦਫ਼ਤਰ ਨੇ ਦੱਸਿਆ ਕਿ ਦੇਸ਼ ਨੇ ਵੀਰਵਾਰ ਨੂੰ ਆਪਣੇ ਪਹਿਲੇ ਹਾਈਪਰਸੋਨਿਕ ਗਲਾਈਡ ਵਹੀਕਲ (HGV) ਦਾ ਸਫ਼ਲ ਪ੍ਰੀਖਣ ਕੀਤਾ ਹੈ। ਰਾਸ਼ਟਰਪਤੀ ਲੀ ਜੇ-ਮਯੋਂਗ ਨੇ ਇਸ ਪ੍ਰੀਖਣ ਦਾ ਖੁਦ ਨਿਰੀਖਣ ਕੀਤਾ, ਜਿਸ ਨੂੰ ਲੰਬੀ ਦੂਰੀ ਤੱਕ ਹਮਲਾ ਕਰਨ ਦੀ ਨਵੀਂ ਸਮਰੱਥਾ ਹਾਸਲ ਕਰਨ ਵੱਲ ਇੱਕ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ।

ਰਾਸ਼ਟਰਪਤੀ ਦੀ ਬੁਲਾਰਾ ਕਾਂਗ ਯੂ-ਜੁੰਗ ਨੇ ਮੀਡੀਆ ਨੂੰ ਦੱਸਿਆ ਕਿ ਇਹ ਪ੍ਰਣਾਲੀ ਅਜੇ ਵਿਕਾਸ ਅਧੀਨ ਹੈ ਅਤੇ ਇਸ ਪਹਿਲੇ ਪ੍ਰੀਖਣ ਦਾ ਮੁੱਖ ਉਦੇਸ਼ ਹਾਈਪਰਸੋਨਿਕ ਤਕਨਾਲੋਜੀ ਦੀਆਂ ਪ੍ਰਮੁੱਖ ਵਿਸ਼ੇਸ਼ਤਾਵਾਂ, ਜਿਵੇਂ ਕਿ ਉਡਾਣ ਮਾਰਗ ਅਤੇ ਗਤੀ ਦੀ ਜਾਂਚ ਕਰਨਾ ਸੀ। ਯੋਨਹਾਪ ਨਿਊਜ਼ ਏਜੰਸੀ ਦੀ ਰਿਪੋਰਟ ਅਨੁਸਾਰ, ਬੁਲਾਰਾ ਨੇ HGV ਨੂੰ 'ਗੇਮ-ਚੇਂਜਿੰਗ ਰਣਨੀਤਕ ਸੰਪਤੀ' ਦੱਸਿਆ ਜੋ ਦੁਸ਼ਮਣ ਦੇ ਟਿਕਾਣਿਆਂ 'ਤੇ ਅਚਾਨਕ ਅਤੇ ਸਟੀਕ ਹਮਲਾ ਕਰਨ ਦੇ ਸਮਰੱਥ ਹੈ। HGV ਆਪਣੇ ਬੂਸਟਰ ਤੋਂ ਸਫ਼ਲਤਾਪੂਰਵਕ ਵੱਖ ਹੋ ਗਿਆ ਅਤੇ ਹਾਈਪਰਸੋਨਿਕ ਸਥਿਤੀਆਂ ਵਿੱਚ ਆਪਣੇ ਨਿਰਧਾਰਿਤ ਉਡਾਣ ਪੱਥ 'ਤੇ ਅੱਗੇ ਵਧਿਆ।

ਪ੍ਰੀਖਣ ਦੌਰਾਨ ਬੂਸਟਰ ਨਾਲੋਂ ਵੱਖ ਹੋਣ ਤੋਂ ਬਾਅਦ HGV ਨੇ ਘੱਟ ਉਚਾਈ 'ਤੇ ਖੇਤਿਜ (horizontal) ਅਤੇ ਲੰਬਵਤ (vertical) ਦਿਸ਼ਾ ਵਿੱਚ ਬਦਲਾਅ ਕਰਦਿਆਂ ਆਪਣੇ ਟੀਚੇ 'ਤੇ ਸਟੀਕ ਨਿਸ਼ਾਨਾ ਲਗਾਇਆ। ਇਸ ਪ੍ਰੀਖਣ ਦੌਰਾਨ ਅਤਿ-ਉੱਚ ਤਾਪਮਾਨ ਸਹਿਣ ਵਾਲੀ ਥਰਮਲ ਪ੍ਰੋਟੈਕਸ਼ਨ ਸਮੱਗਰੀ, ਗਾਈਡੈਂਸ ਅਤੇ ਕੰਟਰੋਲ ਸਿਸਟਮ ਅਤੇ ਘੱਟ ਉਚਾਈ 'ਤੇ ਮੋੜਦਾਰ ਰਸਤੇ 'ਤੇ ਚੱਲਣ ਦੀ ਸਮਰੱਥਾ ਦੀ ਵੀ ਜਾਂਚ ਕੀਤੀ ਗਈ। ਇਸ ਮੌਕੇ ਰੱਖਿਆ ਮੰਤਰੀ ਕਾਂਗ ਸ਼ਿਨ-ਚੁਲ ਅਤੇ ਰੱਖਿਆ ਅਕੁਇਜ਼ੀਸ਼ਨ ਪ੍ਰੋਗਰਾਮ ਪ੍ਰਸ਼ਾਸਨ ਦੇ ਮੁਖੀ ਲੀ ਯੋਂਗ-ਚਿਓਲ ਵੀ ਮੌਜੂਦ ਸਨ।

ਪ੍ਰੀਖਣ ਦੇਖਣ ਤੋਂ ਬਾਅਦ ਰਾਸ਼ਟਰਪਤੀ ਲੀ ਨੇ ਦੇਸ਼ ਦੀ ਰੱਖਿਆ ਸਮਰੱਥਾ ਵਧਾਉਣ ਲਈ ਵਿਕਾਸ ਟੀਮ ਦੀ ਸ਼ਲਾਘਾ ਕੀਤੀ ਅਤੇ ਜ਼ੋਰ ਦਿੱਤਾ ਕਿ ਦੇਸ਼ ਦੀ ਸੁਰੱਖਿਆ ਆਪਣੀ ਤਾਕਤ ਨਾਲ ਹੀ ਯਕੀਨੀ ਬਣਾਈ ਜਾਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਅਤਿ-ਆਧੁਨਿਕ ਹਥਿਆਰਾਂ ਦੇ ਵਿਕਾਸ ਅਤੇ ਉਨ੍ਹਾਂ ਨੂੰ ਮੁਹਿੰਮਾਂ ਵਿੱਚ ਸ਼ਾਮਲ ਕਰਨ ਲਈ ਪੂਰਾ ਸਹਿਯੋਗ ਦੇਵੇਗੀ। ਇਸ ਤੋਂ ਇਲਾਵਾ, ਰਾਸ਼ਟਰਪਤੀ ਲੀ ਨੇ ਫੌਜ ਦੀ 'ਹਯੂਨਮੂ-5' (Hyunmoo-5) ਜਮੀਨ ਤੋਂ ਜਮੀਨ 'ਤੇ ਮਾਰ ਕਰਨ ਵਾਲੀ ਮਿਜ਼ਾਈਲ ਦਾ ਵੀ ਨਿਰੀਖਣ ਕੀਤਾ, ਜਿਸ ਨੂੰ ਇਸਦੇ ਭਾਰੀ ਪੇਲੋਡ ਅਤੇ ਵਿਨਾਸ਼ਕਾਰੀ ਸ਼ਕਤੀ ਕਾਰਨ 'ਮੌਨਸਟਰ ਮਿਜ਼ਾਈਲ' ਕਿਹਾ ਜਾਂਦਾ ਹੈ।