ਆਸਟ੍ਰੇਲੀਆ 'ਚ 12 ਹਜ਼ਾਰ ਨਰਸਾਂ ਹੜਤਾਲ 'ਤੇ, ਸਿਹਤ ਸੇਵਾਵਾਂ ਠੱਪ

ਸਿਡਨੀ- ਆਸਟ੍ਰੇਲੀਆ ਤੋਂ ਇਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਇੱਥੇ ਨਿਊ ਸਾਊਥ ਵੇਲਜ਼ (NSW) ਸੂਬੇ ਵਿਚ 12,000 ਤੋਂ ਵੱਧ ਨਰਸਾਂ ਨੇ ਬਿਹਤਰ ਤਨਖਾਹ ਦੀ ਮੰਗ ਨੂੰ ਲੈ ਕੇ ਹੜਤਾਲ ਕਰ ਦਿੱਤੀ ਹੈ, ਜਿਸ ਕਾਰਨ ਲਗਭਗ 700 ਚੋਣਵੀਆਂ ਸਰਜਰੀਆਂ ਰੱਦ ਕਰਨੀਆਂ ਪਈਆਂ।

NSW ਸਰਕਾਰ ਦੇ ਇਸ ਹਫ਼ਤੇ ਨਰਸਿੰਗ ਯੂਨੀਅਨ ਦੇ 15 ਪ੍ਰਤੀਸ਼ਤ ਤਨਖਾਹ ਵਾਧੇ ਦੀ ਮੰਗ ਨੂੰ ਪੂਰਾ ਕਰਨ ਤੋਂ ਇਨਕਾਰ ਕਰਨ ਮਗਰੋਂ ਨਰਸਾਂ ਨੇ ਸਿਡਨੀ ਸੀ.ਬੀ.ਡੀ ਦੁਆਰਾ ਰਾਜ ਦੀ ਸੰਸਦ ਤੱਕ ਮਾਰਚ ਕੀਤਾ ਜਦਕਿ ਇਸ ਹਫ਼ਤੇ ਪੁਲਸ ਅਧਿਕਾਰੀਆਂ ਨੂੰ ਭਾਰੀ ਤਨਖਾਹ ਦੀ ਪੇਸ਼ਕਸ਼ ਕੀਤੀ ਗਈ ਸੀ। ਮਾਰਚ ਦੁਪਹਿਰ 12 ਵਜੇ ਸ਼ੁਰੂ ਹੋਇਆ, ਜੋ ਸਾਰੀਆਂ ਨਰਸਾਂ ਅਤੇ ਦਾਈਆਂ ਵੱਲੋਂ 24 ਘੰਟੇ ਦੀ ਹੜਤਾਲ ਦੀ ਸ਼ੁਰੂਆਤ ਸੀ। ਇਹ ਹੜਤਾਲ ਉਦੋਂ ਤੱਕ ਜਾਰੀ ਰਹਿਣ ਦੀ ਸੰਭਾਵਨਾ ਹੈ ਜਦੋਂ ਤੱਕ ਸਰਕਾਰ ਉਨ੍ਹਾਂ ਦੇ ਤਨਖਾਹ ਸੌਦੇ ਲਈ ਸਹਿਮਤ ਨਹੀਂ ਹੁੰਦੀ।

ਪੜ੍ਹੋ ਇਹ ਅਹਿਮ ਖ਼ਬਰ-ਪਾਕਿਸਤਾਨ ਦੇ ਕਈ ਹਿੱਸਿਆਂ 'ਚ 5.3 ਤੀਬਰਤਾ ਦਾ ਭੂਚਾਲ, ਘਰਾਂ ਤੋਂ ਬਾਹਰ ਆਏ ਲੋਕ

ਉੱਧਰ ਸਿਹਤ ਮੰਤਰੀ ਰਿਆਨ ਪਾਰਕ ਨੇ ਕਿਹਾ ਕਿ ਤਨਖਾਹ ਸੌਦੇ ਲਈ ਸਹਿਮਤ ਹੋਣਾ ਸੰਭਵ ਨਹੀਂ ਸੀ। ਪਾਰਕ ਨੇ ਕਿਹਾ, "ਮੈਂ ਸਿਰਫ਼ ਇੱਕ ਸਾਲ ਵਿੱਚ ਇਸ ਪਾੜੇ ਨੂੰ ਪੂਰਾ ਨਹੀਂ ਕਰ ਸਕਦਾ।'' NSW ਨਰਸਾਂ ਅਤੇ ਮਿਡਵਾਈਵਜ਼ ਐਸੋਸੀਏਸ਼ਨ (NSWNMA) ਨੇ ਕਿਹਾ ਕਿ ਸਰਕਾਰ ਅਜੇ ਵੀ ਅਸਲ 3 ਪ੍ਰਤੀਸ਼ਤ ਪ੍ਰਤੀ ਸਾਲ ਦੀ ਪੇਸ਼ਕਸ਼ ਤੋਂ ਅੱਗੇ ਨਹੀਂ ਵਧੀ ਹੈ। NSW ਪੁਲਸ ਅਧਿਕਾਰੀਆਂ ਨੂੰ 39 ਪ੍ਰਤੀਸ਼ਤ ਤੱਕ ਤਨਖਾਹ ਵਾਧੇ ਦੀ ਪੇਸ਼ਕਸ਼ ਕੀਤੇ ਜਾਣ ਤੋਂ ਬਾਅਦ ਯੂਨੀਅਨ ਨੇ ਕਿਹਾ ਕਿ ਉਹ ਇਸ ਫ਼ੈਸਲੇ ਤੋਂ ਨਿਰਾਸ਼ ਹੈ।  

NSWNMA  ਤੋਂ ਸ਼ੈਏ ਕੈਂਡਿਸ਼ ਨੇ ਕਿਹਾ, "ਸਾਡੇ ਮੈਂਬਰ ਗੁੱਸੇ ਵਿੱਚ ਹਨ ਕਿਉਂਕਿ ਉਨ੍ਹਾਂ ਲਈ ਬਰਾਬਰ ਤਨਖਾਹ ਵਿੱਚ ਵਾਧਾ ਉਪਲਬਧ ਨਹੀਂ ਹੈ।" ਕੈਂਡਿਸ਼ ਨੇ ਕਿਹਾ ਕਿ ਨਰਸਾਂ ਨਿਰਾਸ਼" ਹਨ ਅਤੇ ਮੈਂਬਰ ਨਾਰਾਜ਼ ਹਨ ਕਿਉਂਕਿ ਤਨਖਾਹ ਵਾਧੇ ਦਾ ਪ੍ਰਸਤਾਵ ਅਸਵੀਕਾਰ ਕਰ ਦਿੱਤਾ ਗਿਆ। ਅੱਜ ਦੀ ਹੜਤਾਲ ਤੋਂ ਪਹਿਲਾਂ ਬੋਲਦਿਆਂ NSW ਦੇ ਸਿਹਤ ਮੰਤਰੀ ਰਿਆਨ ਪਾਰਕ ਨੇ ਕਿਹਾ ਕਿ ਉਹ ਇਸ ਕਾਰਵਾਈ ਤੋਂ "ਨਿਰਾਸ਼" ਸਨ, ਪਰ ਸਿਹਤ ਪ੍ਰਣਾਲੀ ਸੰਭਾਵਿਤ ਪ੍ਰਭਾਵਾਂ ਲਈ ਤਿਆਰ ਸੀ। ਪਾਰਕ ਨੇ ਕਿਹਾ, "ਮੈਂ ਭਾਈਚਾਰੇ ਨੂੰ ਭਰੋਸਾ ਦਿਵਾਉਣਾ ਚਾਹੁੰਦਾ ਹਾਂ ਕਿ ਅਸੀਂ ਉਨ੍ਹਾਂ ਦੀ ਦੇਖਭਾਲ 'ਤੇ ਇਸ ਦੇ ਪ੍ਰਭਾਵ ਨੂੰ ਘੱਟ ਕਰਨ ਲਈ ਹਰ ਸੰਭਵ ਕੋਸ਼ਿਸ਼ ਕਰ ਰਹੇ ਹਾਂ।" ਪਾਰਕ ਮੁਤਾਬਕ,"NSW ਹੈਲਥ ਇਹ ਯਕੀਨੀ ਬਣਾਉਣ ਲਈ ਸਖ਼ਤ ਮਿਹਨਤ ਕਰ ਰਹੀ ਹੈ ਕਿ ਮੁਲਤਵੀ ਸਰਜਰੀਆਂ ਨੂੰ ਜਲਦੀ ਤੋਂ ਜਲਦੀ ਮੁਨਾਸਬ ਤੌਰ 'ਤੇ ਮੁੜ ਨਿਯਤ ਕੀਤਾ ਜਾਵੇ।" ਪਾਰਕ ਨੇ ਕਿਹਾ ਕਿ ਸਰਕਾਰ NSWNMA ਦੇ ਸਾਰੇ ਗੈਰ-ਉਜਰਤ ਦਾਅਵਿਆਂ 'ਤੇ ਇੱਕ ਸਮਝੌਤੇ 'ਤੇ ਪਹੁੰਚ ਗਈ ਹੈ ਅਤੇ ਇੱਕ ਨਵੀਂ ਵਧੀ ਹੋਈ ਤਨਖਾਹ ਦੀ ਪੇਸ਼ਕਸ਼ ਨੂੰ ਫੰਡ ਦੇਣ ਅਤੇ ਪ੍ਰਦਾਨ ਕਰਨ ਲਈ ਪ੍ਰਸਤਾਵਿਤ ਵਿਕਲਪਾਂ 'ਤੇ ਪਹੁੰਚ ਗਈ ਹੈ। ਗੌਰਤਲਬ ਹੈ ਕਿ ਇਸ ਹਫ਼ਤੇ NSW ਸਰਕਾਰ ਨੇ ਪੁਲਸ ਨੂੰ ਚਾਰ ਸਾਲਾਂ ਵਿੱਚ ਉਨ੍ਹਾਂ ਦੇ ਦਰਜੇ ਦੇ ਅਧਾਰ ਤੇ 22.3 ਤੋਂ 39.4 ਪ੍ਰਤੀਸ਼ਤ ਵਾਧੇ ਦੀ ਪੇਸ਼ਕਸ਼ ਕੀਤੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।