ਕੈਨੇਡਾ ਵੀਜ਼ਾ ਦੀ ਉਡੀਕ ਰਹੇ ਭਾਰਤੀਆਂ ਲਈ ਅਹਿਮ ਖ਼ਬਰ

ਇੰਟਰਨੈਸ਼ਨਲ ਡੈਸਕ: ਕੈਨੇਡਾ ਜਾਣ ਦੇ ਚਾਹਵਾਨ ਭਾਰਤੀਆਂ ਲਈ ਚੰਗੀ ਖ਼ਬਰ ਹੈ। ਕੈਨੇਡਾ ਦੇ ਇਮੀਗ੍ਰੇਸ਼ਨ ਵਿਭਾਗ ਨੇ ਨਵੇਂ ਬਿਨੈਕਾਰਾਂ ਲਈ ਪ੍ਰੋਸੈਸਿੰਗ ਟਾਈਮ ਅਪਡੇਟ ਕੀਤਾ ਹੈ। ਕੈਨੇਡਾ ਦੇ ਇਮੀਗ੍ਰੇਸ਼ਨ ਵਿਭਾਗ (IRCC) ਨੇ ਅਸਥਾਈ ਰਿਹਾਇਸ਼ ਦੀਆਂ ਅਰਜ਼ੀਆਂ ਲਈ ਨਵੇਂ ਪ੍ਰੋਸੈਸਿੰਗ ਸਮੇਂ ਜਾਰੀ ਕੀਤੇ ਹਨ। ਤਾਜ਼ਾ ਅਪਡੇਟ ਅਨੁਸਾਰ ਭਾਰਤ ਅਤੇ ਪਾਕਿਸਤਾਨ ਤੋਂ ਕੀਤੀਆਂ ਗਈਆਂ ਕਈ ਸ਼੍ਰੇਣੀਆਂ ਦੀਆਂ ਅਰਜ਼ੀਆਂ ਦੀ ਪ੍ਰੋਸੈਸਿੰਗ ਪਹਿਲਾਂ ਦੇ ਮੁਕਾਬਲੇ ਤੇਜ਼ ਹੋਈ ਹੈ, ਜਦਕਿ ਨਾਈਜੀਰੀਆ ਅਤੇ ਅਮਰੀਕਾ ਵਰਗੇ ਦੇਸ਼ਾਂ ਦੇ ਬਹੁਤ ਸਾਰੇ ਬਿਨੈਕਾਰਾਂ ਨੂੰ ਹੁਣ ਵਧੇਰੇ ਇੰਤਜ਼ਾਰ ਕਰਨਾ ਪੈ ਸਕਦਾ ਹੈ।

ਸੁਪਰ ਵੀਜ਼ਾ ਸ਼੍ਰੇਣੀ ਵਿੱਚ ਭਾਰਤੀ ਬਿਨੈਕਾਰਾਂ ਨੂੰ ਸਭ ਤੋਂ ਵੱਡੀ ਰਾਹਤ ਮਿਲੀ ਹੈ। ਭਾਰਤ ਲਈ ਪ੍ਰੋਸੈਸਿੰਗ ਸਮਾਂ 160 ਦਿਨਾਂ ਤੋਂ ਘਟ ਕੇ ਹੁਣ ਸਿਰਫ਼ 117 ਦਿਨ ਰਹਿ ਗਿਆ ਹੈ, ਜਿਸਦਾ ਮਤਲਬ ਹੈ ਕਿ ਇੰਤਜ਼ਾਰ ਦੇ ਸਮੇਂ ਵਿੱਚ 43 ਦਿਨਾਂ ਦੀ ਵੱਡੀ ਕਮੀ ਆਈ ਹੈ। ਇਸੇ ਤਰ੍ਹਾਂ ਪਾਕਿਸਤਾਨ ਲਈ ਇਹ ਸਮਾਂ 107 ਦਿਨਾਂ ਤੋਂ ਘਟ ਕੇ 75 ਦਿਨ ਹੋ ਗਿਆ ਹੈ। ਇਸ ਦੇ ਉਲਟ ਅਮਰੀਕਾ ਤੋਂ ਸੁਪਰ ਵੀਜ਼ਾ ਅਪਲਾਈ ਕਰਨ ਵਾਲਿਆਂ ਲਈ ਸਮਾਂ 103 ਤੋਂ ਵਧ ਕੇ 115 ਦਿਨ ਹੋ ਗਿਆ ਹੈ।

ਸਟੱਡੀ ਅਤੇ ਵਰਕ ਪਰਮਿਟ ਦੀ ਸਥਿਤੀ

ਸਟੱਡੀ ਪਰਮਿਟ: ਭਾਰਤੀ ਵਿਦਿਆਰਥੀਆਂ ਲਈ ਸਟੱਡੀ ਪਰਮਿਟ ਦੀ ਪ੍ਰੋਸੈਸਿੰਗ ਮਿਆਦ 4 ਹਫ਼ਤਿਆਂ 'ਤੇ ਸਥਿਰ ਬਣੀ ਹੋਈ ਹੈ। ਪਾਕਿਸਤਾਨੀ ਵਿਦਿਆਰਥੀਆਂ ਨੂੰ ਵੱਡੀ ਰਾਹਤ ਮਿਲੀ ਹੈ, ਜਿਨ੍ਹਾਂ ਦਾ ਸਮਾਂ 11 ਹਫ਼ਤਿਆਂ ਤੋਂ ਘਟ ਕੇ 7 ਹਫ਼ਤੇ ਰਹਿ ਗਿਆ ਹੈ।
ਵਰਕ ਪਰਮਿਟ: ਭਾਰਤ ਤੋਂ ਕੀਤੇ ਗਏ ਵਰਕ ਪਰਮਿਟ ਅਰਜ਼ੀਆਂ ਲਈ ਸਮਾਂ 9 ਹਫ਼ਤਿਆਂ 'ਤੇ ਸਥਿਰ ਹੈ। ਪਾਕਿਸਤਾਨ ਲਈ ਇਹ ਸਮਾਂ 8 ਹਫ਼ਤਿਆਂ ਤੋਂ ਘਟ ਕੇ 6 ਹਫ਼ਤੇ ਰਹਿ ਗਿਆ ਹੈ। ਕੈਨੇਡਾ ਦੇ ਅੰਦਰੋਂ ਅਪਲਾਈ ਕਰਨ ਵਾਲਿਆਂ ਲਈ ਪ੍ਰੋਸੈਸਿੰਗ ਸਮਾਂ 212 ਦਿਨਾਂ ਤੋਂ ਘਟ ਕੇ 206 ਦਿਨ ਹੋ ਗਿਆ ਹੈ।

ਵਿਜ਼ਿਟਰ ਵੀਜ਼ਾ ਲਈ ਵਧਿਆ ਇੰਤਜ਼ਾਰ

ਵਿਜ਼ਿਟਰ ਵੀਜ਼ਾ ਦੇ ਮਾਮਲੇ ਵਿੱਚ ਭਾਰਤੀਆਂ ਨੂੰ ਥੋੜਾ ਵਧੇਰੇ ਇੰਤਜ਼ਾਰ ਕਰਨਾ ਪਵੇਗਾ। ਭਾਰਤ ਲਈ ਇਹ ਮਿਆਦ 27 ਦਿਨਾਂ ਤੋਂ ਵਧ ਕੇ 28 ਦਿਨ ਹੋ ਗਈ ਹੈ। ਕੈਨੇਡਾ ਦੇ ਅੰਦਰੋਂ ਕੀਤੇ ਗਏ ਵਿਜ਼ਿਟਰ ਵੀਜ਼ਾ ਅਰਜ਼ੀਆਂ ਦਾ ਸਮਾਂ 11 ਦਿਨਾਂ ਤੋਂ ਵਧ ਕੇ 16 ਦਿਨ ਹੋ ਗਿਆ ਹੈ। ਅਮਰੀਕਾ ਅਤੇ ਫਿਲੀਪੀਨਜ਼ ਲਈ ਵੀ ਇਸ ਸਮੇਂ ਵਿੱਚ ਮਾਮੂਲੀ ਵਾਧਾ ਦਰਜ ਕੀਤਾ ਗਿਆ ਹੈ।

ਨਾਈਜੀਰੀਆ ਦੇ ਬਿਨੈਕਾਰਾਂ ਨੂੰ ਵੱਡਾ ਝਟਕਾ ਲੱਗਿਆ ਹੈ, ਜਿੱਥੇ ਵਰਕ ਪਰਮਿਟ ਦੀ ਪ੍ਰੋਸੈਸਿੰਗ ਮਿਆਦ 6 ਹਫ਼ਤਿਆਂ ਤੋਂ ਵਧ ਕੇ ਸਿੱਧੀ 12 ਹਫ਼ਤੇ ਹੋ ਗਈ ਹੈ। ਸਟੱਡੀ ਪਰਮਿਟ ਦੇ ਮਾਮਲੇ ਵਿੱਚ ਵੀ ਉੱਥੇ ਸਮਾਂ 5 ਹਫ਼ਤਿਆਂ ਤੋਂ ਵਧ ਕੇ 6 ਹਫ਼ਤੇ ਹੋ ਗਿਆ ਹੈ। ਅਮਰੀਕਾ ਅਤੇ ਫਿਲੀਪੀਨਜ਼ ਲਈ ਜ਼ਿਆਦਾਤਰ ਸ਼੍ਰੇਣੀਆਂ ਵਿੱਚ ਪ੍ਰੋਸੈਸਿੰਗ ਸਮਾਂ ਸਥਿਰ ਰਿਹਾ ਹੈ ਜਾਂ ਮਾਮੂਲੀ ਵਧਿਆ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।