ਅਫਰੀਕਾ ਦੇ ਮਾਊਂਟ ਕਿਲੀਮੰਜਾਰੋ ''ਤੇ ਵੱਡਾ ਹਾਦਸਾ! ਬਚਾਅ ਮਿਸ਼ਨ ਦੌਰਾਨ ਹੈਲੀਕਾਪਟਰ ਕ੍ਰੈਸ਼, 5 ਲੋਕਾਂ ਦੀ ਮੌਤ

ਦਾਰ ਐਸ ਸਲਾਮ: ਅਫਰੀਕਾ ਦੀ ਸਭ ਤੋਂ ਉੱਚੀ ਚੋਟੀ, ਮਾਊਂਟ ਕਿਲੀਮੰਜਾਰੋ 'ਤੇ ਬੁੱਧਵਾਰ ਨੂੰ ਇੱਕ ਦਰਦਨਾਕ ਹੈਲੀਕਾਪਟਰ ਹਾਦਸਾ ਵਾਪਰਨ ਦੀ ਖ਼ਬਰ ਸਾਹਮਣੇ ਆਈ ਹੈ। ਇਸ ਹਾਦਸੇ ਵਿੱਚ 5 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਿਸ ਦੀ ਪੁਸ਼ਟੀ ਤੰਜ਼ਾਨੀਆ ਦੀ ਸਿਵਲ ਐਵੀਏਸ਼ਨ ਅਥਾਰਟੀ (TCAA) ਵੱਲੋਂ ਕੀਤੀ ਗਈ ਹੈ। ਇਹ ਹਾਦਸਾ ਪਹਾੜ ਦੇ 'ਬਰਾਫੂ ਕੈਂਪ' (Barafu Camp) ਦੇ ਨੇੜੇ ਵਾਪਰਿਆ।

ਬਚਾਅ ਮਿਸ਼ਨ ਦੌਰਾਨ ਵਾਪਰਿਆ ਹਾਦਸਾ
ਮਿਲੀ ਜਾਣਕਾਰੀ ਅਨੁਸਾਰ, ਇਹ ਏਅਰਬੱਸ H125 ਹੈਲੀਕਾਪਟਰ ਦੋ ਚੈੱਕ ਸੈਲਾਨੀਆਂ ਨੂੰ ਬਚਾਉਣ ਲਈ ਇੱਕ ਰੈਸਕਿਊ ਮਿਸ਼ਨ 'ਤੇ ਨਿਕਲਿਆ ਸੀ। ਇਹ ਸੈਲਾਨੀ ਪਹਾੜ ਚੜ੍ਹਦੇ ਸਮੇਂ ਸਿਹਤ ਸੰਬੰਧੀ ਸਮੱਸਿਆਵਾਂ ਦਾ ਸਾਹਮਣਾ ਕਰ ਰਹੇ ਸਨ, ਜਿਨ੍ਹਾਂ ਨੂੰ ਹਸਪਤਾਲ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ। ਕਿਲੀਮੰਜਾਰੋ ਦੇ ਖੇਤਰੀ ਪੁਲਿਸ ਕਮਾਂਡਰ ਸਾਈਮਨ ਮੈਗਵਾ ਨੇ ਦੱਸਿਆ ਕਿ ਹਾਦਸਾ ਬੁੱਧਵਾਰ ਦੁਪਹਿਰ ਨੂੰ ਵਾਪਰਿਆ।

ਮ੍ਰਿਤਕਾਂ ਦੀ ਪਛਾਣ
ਪੁਲਸ ਵੱਲੋਂ ਦਿੱਤੀ ਜਾਣਕਾਰੀ ਮੁਤਾਬਕ ਇਸ ਹਾਦਸੇ ਵਿੱਚ ਜਾਨ ਗੁਆਉਣ ਵਾਲਿਆਂ ਵਿੱਚ ਦੋ ਚੈੱਕ ਗਣਰਾਜ ਦੇ ਸੈਲਾਨੀ, ਇੱਕ ਜ਼ਿੰਬਾਬਵੇ ਦਾ ਪਾਇਲਟ, ਇੱਕ ਤੰਜ਼ਾਨੀਆ ਦਾ ਮੈਡੀਕਲ ਡਾਕਟਰ ਤੇ ਇੱਕ ਤੰਜ਼ਾਨੀਆ ਦਾ ਮਾਊਂਟੇਨ ਗਾਈਡ ਸ਼ਾਮਲ ਸਨ। ਅਥਾਰਟੀ ਨੇ ਇਸ ਘਟਨਾ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ ਅਤੇ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਅਧਿਕਾਰਤ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।

ਟੂਰਿਜ਼ਮ ਨੂੰ ਉਤਸ਼ਾਹਿਤ ਕਰਨ ਲਈ ਕੇਬਲ ਕਾਰ ਦੀਆਂ ਤਿਆਰੀਆਂ
ਮਾਊਂਟ ਕਿਲੀਮੰਜਾਰੋ ਵਿਸ਼ਵ ਭਰ ਦੇ ਸੈਲਾਨੀਆਂ ਅਤੇ ਪਰਬਤਾਰੋਹੀਆਂ ਲਈ ਇੱਕ ਪ੍ਰਮੁੱਖ ਕੇਂਦਰ ਹੈ। ਸਰੋਤਾਂ ਅਨੁਸਾਰ, ਤੰਜ਼ਾਨੀਆ ਸਰਕਾਰ ਦੇਸ਼ ਦੇ 8 ਖੇਤਰਾਂ, ਜਿਨ੍ਹਾਂ ਵਿੱਚ ਕਿਲੀਮੰਜਾਰੋ ਵੀ ਸ਼ਾਮਲ ਹੈ, ਵਿੱਚ ਕੇਬਲ ਟ੍ਰਾਂਸਪੋਰਟ (ਕੇਬਲ ਕਾਰ) ਸਿਸਟਮ ਸ਼ੁਰੂ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਲੈਂਡ ਟ੍ਰਾਂਸਪੋਰਟ ਰੈਗੂਲੇਟਰੀ ਅਥਾਰਟੀ (LATRA) ਦੇ ਡਾਇਰੈਕਟਰ ਜਨਰਲ ਹਬੀਬੂ ਸੁਲੂਓ ਨੇ ਕਿਹਾ ਕਿ ਇਹ ਤਕਨੀਕ ਸੈਲਾਨੀਆਂ ਨੂੰ ਪਹਾੜੀ ਖੇਤਰਾਂ ਤੱਕ ਜਲਦੀ ਪਹੁੰਚਣ ਵਿੱਚ ਮਦਦ ਕਰੇਗੀ ਅਤੇ ਇਸ ਨਾਲ ਸਥਾਨਕ ਕੁਲੀਆਂ (porters) ਦੀਆਂ ਨੌਕਰੀਆਂ 'ਤੇ ਕੋਈ ਮਾੜਾ ਅਸਰ ਨਹੀਂ ਪਵੇਗਾ।