ਹੁਵੇਈ ਦੀ ਸੀ.ਐੱਫ.ਓ. ਦੀ ਗ੍ਰਿਫਤਾਰੀ ਮਗਰੋਂ ਹਿਰਾਸਤ 'ਚ ਲਏ ਗਏ 13 ਕੈਨੇਡੀਅਨ

ਓਟਾਵਾ (ਭਾਸ਼ਾ)— ਚੀਨ ਵਿਚ ਕੈਨੇਡਾ ਦੇ 13 ਨਾਗਰਿਕਾਂ ਨੂੰ ਹਿਰਾਸਤ ਵਿਚ ਲਿਆ ਜਾ ਚੁੱਕਿਆ ਹੈ। ਇਹ ਕਾਰਵਾਈ ਚੀਨ ਦੀ ਦੂਰਸੰਚਾਰ ਉਪਕਰਣ ਨਿਰਮਾਤਾ ਕੰਪਨੀ ਹੁਵੇਈ ਦੀ ਮੁਖ ਵਿੱਤੀ ਅਧਿਕਾਰੀ(ਸੀ.ਐੱਫ.ਓ.) ਮੇਂਗ ਵਾਨਝਾਊ ਦੀ ਇਕ ਦਸੰਬਰ ਨੂੰ ਹੋਈ ਗ੍ਰਿਫਤਾਰੀ ਦੇ ਬਾਅਦ ਕੀਤੀ ਗਈ ਹੈ। ਹਾਲਾਂਕਿ ਉਨ੍ਹਾਂ ਵਿਚੋਂ 8 ਨੂੰ ਛੱਡ ਦਿੱਤਾ ਗਿਆ। ਕੈਨੇਡਾ ਦੇ ਵਿਦੇਸ਼ੀ ਮਾਮਲਿਆਂ ਦੇ ਬੁਲਾਰੇ ਜੀ. ਬੇਰੂਬੇ ਨੇ ਨਾਗਰਿਕਾਂ ਨੂੰ ਹਿਰਾਸਤ ਵਿਚ ਲੈਣ ਦੀ ਪੁਸ਼ਟੀ ਕੀਤੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਵਿਚ ਹਾਂਗਕਾਂਗ ਵਿਚ ਹਿਰਾਸਤ ਵਿਚ ਲਏ ਗਏ ਲੋਕ ਸ਼ਾਮਲ ਨਹੀਂ ਹਨ। 

ਹਿਰਾਸਤ ਵਿਚ ਲਏ ਗਏ 13 ਕੈਨੇਡੀਅਨ ਨਾਗਰਿਕਾਂ ਵਿਚ ਸਾਬਕਾ ਡਿਪਲੋਮੈਟ ਮਾਈਕਲ ਕੋਵਰਿਗ ਅਤੇ ਸਲਾਹਕਾਰ ਮਾਈਕਲ ਸਪਾਵੋਰ ਸ਼ਾਮਲ ਹਨ। ਇਨ੍ਹਾਂ ਨੂੰ 10 ਦਸੰਬਰ ਨੂੰ ਕੌਮੀ ਸੁਰੱਖਿਆ ਲਈ ਖਤਰਾ ਦੱਸਦਿਆਂ ਹਿਰਾਸਤ ਵਿਚ ਲਿਆ ਗਿਆ ਸੀ। ਨਾਲ ਹੀ ਚੀਨ ਨੇ ਕੈਨੇਡੀਅਨ ਅਧਿਆਪਕ ਸਾਰਾ ਮੈਕਲਵੇਰ ਨੂੰ ਵੀ ਹਿਰਾਸਤ ਵਿਚ ਲਿਆ ਸੀ ਪਰ ਬਾਅਦ ਵਿਚ ਉਨ੍ਹਾਂ ਨੂੰ ਛੱਡ ਦਿੱਤਾ ਗਿਆ। ਹੁਣ ਉਹ ਕੈਨੇਡਾ ਪਰਤ ਚੁੱਕੀ ਹੈ। ਚੀਨ ਨੇ ਕਰੀਬ 200 ਕੈਨੇਡੀਅਨ ਨਾਗਰਿਕਾਂ ਨੂੰ ਵੱਖ-ਵੱਖ ਦੋਸ਼ਾਂ ਅਤੇ ਕਾਰਨਾਂ ਕਾਰਨ ਹਿਰਾਸਤ ਵਿਚ ਲਿਆ ਹੈ। ਜੇ ਤੁਲਨਾਤਮਕ ਤੌਰ 'ਤੇ ਦੇਖੀਏ ਤਾਂ ਅਮਰੀਕਾ ਵਿਚ ਕਰੀਬ 900 ਕੈਨੇਡੀਅਨ ਨਾਗਰਿਕ ਅਜਿਹੀ ਸਥਿਤੀ ਵਿਚ ਹਨ। ਕਿਹਾ ਜਾ ਰਿਹਾ ਹੈ ਕਿ ਹੁਵੇਈ ਦੀ ਮੁੱਖ ਵਿੱਤੀ ਅਧਿਕਾਰੀ ਮੇਂਗ ਵਾਨਝਾਊ ਦੀ 1 ਦਸੰਬਰ ਨੂੰ ਹੋਈ ਗ੍ਰਿਫਤਾਰੀ ਦੇ ਬਾਅਦ ਕੈਨੇਡੀਅਨ ਨਾਗਰਿਕਾਂ ਨੁੰ ਹਿਰਾਸਤ ਵਿਚ ਲਿਆ ਜਾਣਾ ਬਦਲੇ ਦੀ ਭਾਵਨਾ ਵਜੋਂ ਕੀਤੀ ਗਈ ਕਾਰਵਾਈ ਹੈ।