ਮਨੋਰੰਜਨ ਜਗਤ ਤੋਂ ਮੰਦਭਾਗੀ ਖ਼ਬਰ ; ਮਸ਼ਹੂਰ ਬ੍ਰਾਜ਼ੀਲੀਅਨ ਅਦਾਕਾਰ ਤੇ Voice Artist ਦਾ ਹੋਇਆ ਦਿਹਾਂਤ
Sunday, Nov 30, 2025 - 01:15 PM (IST)
ਐਂਟਰਟੇਨਮੈਂਟ ਡੈਸਕ- ਮਨੋਰੰਜਨ ਜਗਤ ਤੋਂ ਇਕ ਦੁਖਦਾਈ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ ਮਸ਼ਹੂਰ ਬ੍ਰਾਜ਼ੀਲੀਅਨ ਅਦਾਕਾਰ ਅਤੇ ਵੌਇਸ ਆਰਟਿਸਟ ਟੋਨੀ ਜਰਮੇਨੋ ਨੇ 55 ਸਾਲ ਦੀ ਉਮਰ ਵਿੱਚ ਇਸ ਦੁਨੀਆ ਨੂੰ ਅਲਵਿਦਾ ਆਖ਼ ਦਿੱਤਾ ਹੈ। 26 ਨਵੰਬਰ ਨੂੰ ਵਪਾਰੇ ਇਕ ਭਿਆਨਕ ਹਾਦਸੇ 'ਚ ਉਨ੍ਹਾਂ ਦੀ ਮੌਤ ਹੋ ਗਈ, ਜਦੋਂ ਉਹ ਆਪਣੇ ਸਾਓ ਪਾਓਲੋ ਸਥਿਤ ਘਰ ਦੀ ਮੁਰੰਮਤ ਲਈ ਛੱਤ 'ਤੇ ਚੜ੍ਹੇ ਹੋਏ ਸਨ। ਇਸ ਦੌਰਾਨ ਅਚਾਨਕ ਉਹ ਛੱਤ ਤੋਂ ਡਿੱਗ ਗਏ ਤੇ ਗੰਭੀਰ ਸੱਟਾਂ ਲੱਗਣ ਮਗਰੋਂ ਉਨ੍ਹਾਂ ਦਾ ਦਿਹਾਂਤ ਹੋ ਗਿਆ।
ਟੋਨੀ ਜਰਮੇਨੋ ਬ੍ਰਾਜ਼ੀਲ ਦੇ ਇੱਕ ਜਾਣੇ-ਪਛਾਣੇ ਵੌਇਸ-ਓਵਰ ਆਰਟਿਸਟ, ਅਦਾਕਾਰ ਅਤੇ ਕਾਮੇਡੀਅਨ ਸਨ। ਉਹ ਪੁਰਤਗਾਲੀ ਡਬਿੰਗ ਲਈ ਪ੍ਰਸਿੱਧ ਸਨ। ਉਨ੍ਹਾਂ ਨੇ ਨੈੱਟਫਲਿਕਸ ਦੇ ਪ੍ਰੋਜੈਕਟ 'Go, Dog, Go!' ਅਤੇ ਨਿਕਲੋਡੀਅਨ ਸ਼ੋਅ 'Nicky, Ricky, Dicky & Dawn' ਵਿੱਚ ਆਪਣੀ ਆਵਾਜ਼ ਦਿੱਤੀ।
ਇਹੀ ਨਹੀਂ, ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਡਿਜ਼ਨੀ ਦੇ ਪ੍ਰੋਜੈਕਟਾਂ ਜਿਵੇਂ ਕਿ 2017 ਦੀ ਲਾਈਵ-ਐਕਸ਼ਨ 'Beauty and the Beast' ਦੇ ਸਾਊਂਡਟ੍ਰੈਕ ਅਤੇ ਸੀਰੀਜ਼ 'Elena of Avalor' ਅਤੇ 'The Muppets' ਵਿੱਚ ਵੀ ਕੰਮ ਕੀਤਾ।
ਜਰਮੇਨੋ ਸਟੇਜ ਪ੍ਰਦਰਸ਼ਨਾਂ ਜਿਵੇਂ ਕਿ 'The Phantom of the Opera', 'Miss Saigon' ਅਤੇ 'Jekyll & Hyde' ਲਈ ਵੀ ਜਾਣੇ ਜਾਂਦੇ ਸਨ। ਟੋਨੀ ਜਰਮੇਨੋ ਦਾ ਅੰਤਿਮ ਸੰਸਕਾਰ 27 ਨਵੰਬਰ ਨੂੰ ਵਰਗੇਮ ਗ੍ਰੈਂਡੇ ਪੌਲਿਸਤਾ, ਸਾਓ ਪਾਉਲੋ ਵਿੱਚ ਬੋਸਕ ਡਾ ਪਾਜ਼ ਕਬਰਸਤਾਨ ਵਿਖੇ ਕੀਤਾ ਗਿਆ ਸੀ। ਉਨ੍ਹਾਂ ਦੇ ਪ੍ਰਸ਼ੰਸਕ ਉਨ੍ਹਾਂ ਦੇ ਚਲੇ ਜਾਣ ਕਾਰਨ ਕਾਫ਼ੀ ਦੁਖੀ ਹਨ ਤੇ ਉਨ੍ਹਾਂ ਦੇ ਕੀਤੇ ਕੰਮ ਲਈ ਹਮੇਸ਼ਾ ਉਨ੍ਹਾਂ ਨੂੰ ਯਾਦ ਰੱਖਣਗੇ।
