ਭੂਚਾਲ ਦੇ ਝਟਕਿਆਂ ਨਾਲ ਕੰਬਿਆ ਸਿਡਨੀ, ਸਕੂਲ ਕਰਵਾਏ ਖਾਲੀ

ਸਿਡਨੀ : ਆਸਟ੍ਰੇਲੀਆ ਦੇ ਸੂਬੇ ਨਿਊ ਸਾਊਥ ਵੇਲਜ਼ ਵਿਚ ਸ਼ੁੱਕਰਵਾਰ ਨੂੰ 4.8 ਤੀਬਰਤਾ ਦਾ ਭੂਚਾਲ ਆਇਆ, ਜਿਸ ਕਾਰਨ ਬਿਜਲੀ ਬੰਦ ਹੋ ਗਈ, ਮਾਮੂਲੀ ਨੁਕਸਾਨ ਹੋਇਆ ਅਤੇ ਸਕੂਲ ਖਾਲੀ ਕਰਵਾ ਲਏ ਗਏ। ਭੂਚਾਲ, ਜਿਸ ਦੀ ਸ਼ੁਰੂਆਤੀ ਖਬਰਾਂ ਵਿਚ ਤੀਬਰਤਾ 5 ਦੱਸੀ ਗਈ ਸੀ, ਸ਼ੁੱਕਰਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਦੁਪਹਿਰ ਵੇਲੇ, ਅੱਪਰ ਹੰਟਰ ਵੈਲੀ ਖੇਤਰ ਵਿੱਚ ਸਿਡਨੀ ਤੋਂ 180 ਕਿਲੋਮੀਟਰ ਉੱਤਰ-ਪੱਛਮ ਵਿੱਚ, ਮੁਸਵੈਲਬਰੂਕ ਸ਼ਹਿਰ ਦੇ ਨੇੜੇ ਆਇਆ।

ਸਿਨਹੂਆ ਨਿਊਜ਼ ਏਜੰਸੀ ਨੇ ਰਿਪੋਰਟ ਦਿੱਤੀ ਕਿ 2,500 ਤੋਂ ਵੱਧ ਲੋਕਾਂ ਨੇ ਮੁਸਵੇਲਬਰੂਕ ਤੋਂ 300 ਕਿਲੋਮੀਟਰ ਤੋਂ ਵੱਧ ਉੱਤਰ ਵਿਚ ਕੈਨਬਰਾ, ਸਿਡਨੀ ਅਤੇ ਕੌਫਸ ਹਾਰਬਰ ਤੱਕ ਸਰਕਾਰੀ ਏਜੰਸੀ ਜੀਓਸਾਇੰਸ ਆਸਟ੍ਰੇਲੀਆ ਨੂੰ ਭੂਚਾਲ ਦੇ ਝਟਕੇ ਮਹਿਸੂਸ ਕਰਨ ਦੀ ਰਿਪੋਰਟ ਦਿੱਤੀ। NSW ਸਟੇਟ ਐਮਰਜੈਂਸੀ ਸਰਵਿਸ (ਐਸਈਐਸ) ਦੇ ਡਿਪਟੀ ਉੱਤਰੀ ਜ਼ੋਨ ਕਮਾਂਡਰ ਪੀਟਰ ਕੀਗਨ ਨੇ ਕਿਹਾ ਕਿ ਚਾਲਕ ਦਲ ਨੂੰ ਮਾਮੂਲੀ ਨੁਕਸਾਨ ਦੀਆਂ ਰਿਪੋਰਟਾਂ ਮਿਲੀਆਂ ਹਨ।

ਉਸਨੇ ਆਸਟ੍ਰੇਲੀਅਨ ਬ੍ਰੌਡਕਾਸਟਿੰਗ ਕਾਰਪੋਰੇਸ਼ਨ (ਏਬੀਸੀ) ਨੂੰ ਦੱਸਿਆ ਕਿ ਮੁਸਵੇਲਬਰੂਕ ਖੇਤਰ ਵਿੱਚ ਨੁਕਸਾਨ ਦੀਆਂ ਕਈ ਰਿਪੋਰਟਾਂ ਆਈਆਂ ਹਨ, ਜਿਵੇਂ ਕਿ ਟੁੱਟੀਆਂ ਖਿੜਕੀਆਂ ਆਦਿ। ਸਾਡੇ ਕੋਲ ਕਿਸੇ ਦੇ ਵੀ ਜ਼ਖਮੀ ਹੋਣ ਦੀ ਖਬਰ ਨਹੀਂ ਹੈ, ਸਿਰਫ ਅੱਪਰ ਹੰਟਰ ਵਿੱਚ ਮਾਮੂਲੀ ਨੁਕਸਾਨ ਦੀਆਂ ਕੁਝ ਰਿਪੋਰਟਾਂ ਹਨ। NSW ਪੁਲਸ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਨੁਕਸਾਨ ਸੀਮਤ ਸੀ ਪਰ ਡੈਮ ਮਾਲਕਾਂ ਨੂੰ ਕਿਸੇ ਵੀ ਢਾਂਚਾਗਤ ਨੁਕਸਾਨ ਦੀ ਜਾਂਚ ਕਰਨ ਲਈ ਕਿਹਾ ਗਿਆ ਹੈ।

ਬਿਜਲੀ ਪ੍ਰਦਾਨ ਕਰਨ ਵਾਲੀ ਕੰਪਨੀ ਔਸਗ੍ਰਿਡ ਨੇ ਕਿਹਾ ਕਿ ਭੂਚਾਲ ਕਾਰਨ ਮੁਸਵੇਲਬਰੂਕ ਅਤੇ ਆਸਪਾਸ ਦੇ ਖੇਤਰ ਵਿੱਚ 2,500 ਤੋਂ ਵੱਧ ਗਾਹਕ ਬਿਜਲੀ ਤੋਂ ਵਾਂਝੇ ਹੋ ਗਏ। ਮਸਵੇਲਬਰੂਕ ਦੇ ਦੋ ਸਕੂਲਾਂ ਨੂੰ ਭੂਚਾਲ ਦੌਰਾਨ ਖਾਲੀ ਕਰਵਾ ਲਿਆ ਗਿਆ।