ਹੈਲਥ ਡੈਸਕ - ਅਕਸਰ ਗਰਮੀਆਂ ਦੇ ਮੌਸਮ 'ਚ ਜਾਂ ਬਹੁਤ ਜ਼ਿਆਦਾ ਸਰੀਰਕ ਮਿਹਨਤ ਕਰਨ ਤੋਂ ਬਾਅਦ ਪਿਆਸ ਲੱਗਣਾ ਆਮ ਗੱਲ ਹੈ ਪਰ ਕੀ ਤੁਹਾਡੇ ਨਾਲ ਵੀ ਅਜਿਹਾ ਹੁੰਦਾ ਹੈ ਕਿ ਵਾਰ-ਵਾਰ ਪਾਣੀ ਪੀਣ ਦੇ ਬਾਵਜੂਦ ਤੁਹਾਡਾ ਗਲਾ ਸੁੱਕਦਾ ਰਹਿੰਦਾ ਹੈ ਅਤੇ ਪਿਆਸ ਨਹੀਂ ਬੁੱਝਦੀ? ਜੇਕਰ ਹਾਂ, ਤਾਂ ਇਸ ਨੂੰ ਆਮ ਗੱਲ ਸਮਝ ਕੇ ਨਜ਼ਰਅੰਦਾਜ਼ ਕਰਨ ਦੀ ਭੁੱਲ ਬਿਲਕੁਲ ਨਾ ਕਰੋ। ਮੈਡੀਕਲ ਵਿਗਿਆਨ ਦੇ ਅਨੁਸਾਰ, ਲੋੜ ਤੋਂ ਵੱਧ ਪਿਆਸ ਲੱਗਣਾ (ਜਿਸ ਨੂੰ ਡਾਕਟਰੀ ਭਾਸ਼ਾ 'ਚ 'ਪੌਲੀਡਿਪਸੀਆ' ਕਿਹਾ ਜਾਂਦਾ ਹੈ) ਸਰੀਰ 'ਚ ਪੈਦਾ ਹੋ ਰਹੀ ਕਿਸੇ ਵੱਡੀ ਬੀਮਾਰੀ ਦਾ ਸ਼ੁਰੂਆਤੀ ਸੰਕੇਤ ਹੋ ਸਕਦਾ ਹੈ।

ਆਓ ਜਾਣਦੇ ਹਾਂ ਪਾਣੀ ਪੀਣ ਦੇ ਬਾਵਜੂਦ ਵੀ ਜ਼ਿਆਦਾ ਪਿਆਸ ਲੱਗਣ ਦੇ ਮੁੱਖ ਕਾਰਨ ਕੀ ਹਨ :-

ਡਾਇਬੀਟੀਜ਼ ਦਾ ਸ਼ੁਰੂਆਤੀ ਲੱਛਣ 
- ਬਹੁਤ ਜ਼ਿਆਦਾ ਪਿਆਸ ਲੱਗਣਾ ਡਾਇਬੀਟੀਜ਼ ਦੇ ਸਭ ਤੋਂ ਪਹਿਲੇ ਅਤੇ ਮੁੱਖ ਲੱਛਣਾਂ ਵਿੱਚੋਂ ਇੱਕ ਹੈ। ਜਦੋਂ ਸਰੀਰ 'ਚ ਬਲੱਡ ਸ਼ੂਗਰ ਦਾ ਪੱਧਰ ਵਧ ਜਾਂਦਾ ਹੈ, ਤਾਂ ਗੁਰਦਿਆਂ ਨੂੰ ਵਾਧੂ ਸ਼ੂਗਰ ਨੂੰ ਬਾਹਰ ਕੱਢਣ ਲਈ ਜ਼ਿਆਦਾ ਮਿਹਨਤ ਕਰਨੀ ਪੈਂਦੀ ਹੈ। ਇਸ ਪ੍ਰਕਿਰਿਆ 'ਚ ਸਰੀਰ ਦਾ ਪਾਣੀ ਪਿਸ਼ਾਬ ਰਾਹੀਂ ਬਾਹਰ ਨਿਕਲ ਜਾਂਦਾ ਹੈ, ਜਿਸ ਕਾਰਨ ਵਾਰ-ਵਾਰ ਪਿਆਸ ਲੱਗਦੀ ਹੈ।

ਸਰੀਰ 'ਚ ਡੀਹਾਈਡ੍ਰੇਸ਼ਨ 
- ਕਈ ਵਾਰ ਸਾਨੂੰ ਲੱਗਦਾ ਹੈ ਕਿ ਅਸੀਂ ਪੂਰਾ ਪਾਣੀ ਪੀ ਰਹੇ ਹਾਂ, ਪਰ ਸਾਡੇ ਸਰੀਰ ਦੀ ਲੋੜ ਮੁਤਾਬਕ ਉਹ ਘੱਟ ਹੁੰਦਾ ਹੈ। ਚਾਹ, ਕੌਫੀ ਜਾਂ ਕੋਲਡ ਡਰਿੰਕਸ ਦਾ ਜ਼ਿਆਦਾ ਸੇਵਨ ਕਰਨ ਨਾਲ ਸਰੀਰ 'ਚੋਂ ਪਾਣੀ ਤੇਜ਼ੀ ਨਾਲ ਬਾਹਰ ਨਿਕਲਦਾ ਹੈ, ਜਿਸ ਨਾਲ ਡੀਹਾਈਡ੍ਰੇਸ਼ਨ ਹੋ ਜਾਂਦੀ ਹੈ ਅਤੇ ਪਿਆਸ ਵਧ ਜਾਂਦੀ ਹੈ।

ਅਨੀਮੀਆ 
- ਸਰੀਰ 'ਚ ਲਾਲ ਬਲੱਡ ਸੈਲਸ ਦੀ ਕਮੀ ਯਾਨੀ ਅਨੀਮੀਆ ਹੋਣ 'ਤੇ ਵੀ ਜ਼ਿਆਦਾ ਪਿਆਸ ਲੱਗ ਸਕਦੀ ਹੈ। ਜਦੋਂ ਖੂਨ ਦੀ ਕਮੀ ਗੰਭੀਰ ਰੂਪ ਲੈ ਲੈਂਦੀ ਹੈ, ਤਾਂ ਸਰੀਰ ਉਸ ਦੀ ਭਰਪਾਈ ਕਰਨ ਲਈ ਵਧੇਰੇ ਤਰਲ ਪਦਾਰਥਾਂ ਦੀ ਮੰਗ ਕਰਦਾ ਹੈ।

ਹਾਈਪਰਕੈਲਸੀਮੀਆ 
- ਜੇਕਰ ਤੁਹਾਡੇ ਖੂਨ 'ਚ ਕੈਲਸ਼ੀਅਮ ਦੀ ਮਾਤਰਾ ਲੋੜ ਤੋਂ ਵੱਧ ਹੋ ਜਾਵੇ, ਤਾਂ ਉਸ ਨੂੰ 'ਹਾਈਪਰਕੈਲਸੀਮੀਆ' ਕਿਹਾ ਜਾਂਦਾ ਹੈ। ਇਹ ਸਥਿਤੀ ਤੁਹਾਡੀਆਂ ਹੱਡੀਆਂ ਅਤੇ ਗੁਰਦਿਆਂ ਨੂੰ ਪ੍ਰਭਾਵਿਤ ਕਰਦੀ ਹੈ, ਜਿਸ ਕਾਰਨ ਵਾਰ-ਵਾਰ ਪਿਆਸ ਲੱਗਣਾ ਅਤੇ ਪਿਸ਼ਾਬ ਆਉਣਾ ਆਮ ਗੱਲ ਹੈ।

ਬਹੁਤ ਜ਼ਿਆਦਾ ਨਮਕੀਨ ਜਾਂ ਮਸਾਲੇਦਾਰ ਖਾਣਾ 
- ਸਾਡੀ ਖੁਰਾਕ ਵੀ ਪਿਆਸ ਲੱਗਣ ਦਾ ਇੱਕ ਵੱਡਾ ਕਾਰਨ ਹੁੰਦੀ ਹੈ। ਜੇਕਰ ਤੁਸੀਂ ਖਾਣੇ 'ਚ ਨਮਕ, ਮਿਰਚ ਜਾਂ ਮਸਾਲਿਆਂ ਦੀ ਵਰਤੋਂ ਜ਼ਿਆਦਾ ਕਰਦੇ ਹੋ, ਤਾਂ ਸਰੀਰ ਦੇ ਸੈੱਲਾਂ 'ਚੋਂ ਪਾਣੀ ਖਿੱਚਿਆ ਜਾਂਦਾ ਹੈ, ਜਿਸ ਨਾਲ ਦਿਮਾਗ ਨੂੰ ਵਾਰ-ਵਾਰ ਪਾਣੀ ਪੀਣ ਦਾ ਸਿਗਨਲ ਮਿਲਦਾ ਹੈ।

ਡਾਕਟਰ ਦੀ ਸਲਾਹ ਕਦੋਂ ਲਈਏ?
- ਜੇਕਰ ਤੁਹਾਨੂੰ ਕਈ ਦਿਨਾਂ ਤੋਂ ਲਗਾਤਾਰ ਬਹੁਤ ਜ਼ਿਆਦਾ ਪਿਆਸ ਲੱਗ ਰਹੀ ਹੈ ਅਤੇ ਇਸ ਦੇ ਨਾਲ ਹੀ ਥਕਾਵਟ, ਧੁੰਦਲਾ ਦਿਖਾਈ ਦੇਣਾ, ਵਾਰ-ਵਾਰ ਪਿਸ਼ਾਬ ਆਉਣਾ ਜਾਂ ਅਚਾਨਕ ਵਜ਼ਨ ਘਟਣਾ ਵਰਗੇ ਲੱਛਣ ਦਿਖਾਈ ਦੇ ਰਹੇ ਹਨ, ਤਾਂ ਤੁਰੰਤ ਡਾਕਟਰ ਕੋਲ ਜਾ ਕੇ ਆਪਣੀ ਬਲੱਡ ਸ਼ੂਗਰ ਅਤੇ ਹੋਰ ਜ਼ਰੂਰੀ ਟੈਸਟ ਕਰਵਾਓ।