ਹੈਲਥ ਡੈਸਕ - ਅਜੋਕੇ ਸਮੇਂ ਦੀ ਭੱਜ-ਦੌੜ ਭਰੀ ਜ਼ਿੰਦਗੀ ਅਤੇ ਗਲਤ ਖਾਣ-ਪੀਣ ਦਾ ਸਭ ਤੋਂ ਮਾੜਾ ਅਸਰ ਸਾਡੇ ਦੰਦਾਂ 'ਤੇ ਪੈ ਰਿਹਾ ਹੈ। ਬੱਚਿਆਂ ਤੋਂ ਲੈ ਕੇ ਬਜ਼ੁਰਗਾਂ ਤੱਕ, ਦੰਦਾਂ 'ਚ ਕੀੜਾ (Cavity) ਲੱਗਣਾ ਇਕ ਆਮ ਸਮੱਸਿਆ ਬਣ ਗਈ ਹੈ। ਮਾਹਿਰ ਡਾਕਟਰ ਫੁਰਕਾਨ ਅੰਸਾਰੀ ਦੇ ਅਨੁਸਾਰ, ਰਾਤ ਨੂੰ ਮਿੱਠਾ ਖਾ ਕੇ ਬਿਨਾਂ ਕੁਰਲੀ ਕੀਤੇ ਸੌਣਾ ਇਸ ਸਮੱਸਿਆ ਦੀ ਸਭ ਤੋਂ ਵੱਡੀ ਜੜ੍ਹ ਹੈ। ਜੇਕਰ ਤੁਹਾਡੇ ਦੰਦਾਂ 'ਚ ਵੀ ਠੰਡਾ-ਗਰਮ ਲੱਗ ਰਿਹਾ ਹੈ ਜਾਂ ਤੇਜ਼ ਦਰਦ ਹੈ, ਤਾਂ ਇਹ ਜਾਣਕਾਰੀ ਤੁਹਾਡੇ ਲਈ ਬਹੁਤ ਫਾਇਦੇਮੰਦ ਹੋ ਸਕਦੀ ਹੈ।

ਕਿਉਂ ਲੱਗਦੇ ਹਨ ਦੰਦਾਂ ਨੂੰ ਕੀੜੇ?

ਡਾਕਟਰਾਂ ਦਾ ਮੰਨਣਾ ਹੈ ਕਿ ਮੂੰਹ ਦੀ ਸਹੀ ਸਫਾਈ ਨਾ ਹੋਣਾ ਹੀ ਬੈਕਟੀਰੀਆ ਨੂੰ ਸੱਦਾ ਦਿੰਦਾ ਹੈ। ਇਸ ਦੇ ਮੁੱਖ ਕਾਰਨ ਹਨ :-

- ਰਾਤ ਨੂੰ ਬਿਨਾਂ ਬੁਰਸ਼ ਕੀਤੇ ਸੌਣਾ।
- ਜ਼ਿਆਦਾ ਚਾਕਲੇਟ, ਟੌਫੀ ਅਤੇ ਮਿੱਠੀਆਂ ਚੀਜ਼ਾਂ ਦਾ ਸੇਵਨ।
- ਖਾਣਾ ਖਾਣ ਤੋਂ ਬਾਅਦ ਕੁਰਲੀ ਨਾ ਕਰਨ ਦੀ ਆਦਤ।
- ਦਿਨ ਭਰ ਵਾਰ-ਵਾਰ ਸਨੈਕਸ ਖਾਂਦੇ ਰਹਿਣਾ।

2 ਦਿਨਾਂ 'ਚ ਅਸਰ ਦਿਖਾਉਣ ਵਾਲਾ ਘਰੇਲੂ ਨੁਸਖ਼ਾ

ਜੇਕਰ ਇਨਫੈਕਸ਼ਨ ਸ਼ੁਰੂਆਤੀ ਪੜਾਅ 'ਤੇ ਹੈ, ਤਾਂ ਤੁਸੀਂ ਘਰ 'ਚ ਹੀ ਇਕ ਖ਼ਾਸ ਪੇਸਟ ਬਣਾ ਕੇ ਕੀੜਿਆਂ ਅਤੇ ਦਰਦ ਤੋਂ ਰਾਹਤ ਪਾ ਸਕਦੇ ਹੋ। 

ਬਣਾਉਣ ਦੀ ਸਮੱਗਰੀ ਅਤੇ ਤਰੀਕਾ :- 

ਲੌਂਗ : 2 ਨਗ (ਪੀਸੇ ਹੋਏ)।
ਸਰ੍ਹੋਂ ਦਾ ਤੇਲ : 1 ਚਮਚ।
ਫਿਟਕਰੀ ਦਾ ਪਾਊਡਰ : 1 ਚਮਚ।

ਇਨ੍ਹਾਂ ਤਿੰਨਾਂ ਚੀਜ਼ਾਂ ਨੂੰ ਮਿਲਾ ਕੇ ਇਕ ਗਾੜ੍ਹਾ ਪੇਸਟ ਬਣਾ ਲਓ ਅਤੇ ਕੀੜੇ ਵਾਲੀ ਥਾਂ 'ਤੇ 5 ਮਿੰਟ ਲਈ ਲਗਾ ਕੇ ਛੱਡ ਦਿਓ। ਫਿਟਕਰੀ ਅਤੇ ਲੌਂਗ ਦੇ ਐਂਟੀ-ਬੈਕਟੀਰੀਅਲ ਗੁਣ ਬੈਕਟੀਰੀਆ ਨੂੰ ਖਤਮ ਕਰਨ ਅਤੇ ਸੋਜ ਘਟਾਉਣ 'ਚ ਮਦਦ ਕਰਦੇ ਹਨ।

ਸਰ੍ਹੋਂ ਦਾ ਤੇਲ ਅਤੇ ਨਮਕ ਦਾ ਪੁਰਾਣਾ ਨੁਸਖ਼ਾ
ਦੰਦਾਂ ਅਤੇ ਮਸੂੜਿਆਂ ਦੀ ਮਜ਼ਬੂਤੀ ਲਈ ਅੱਧਾ ਚਮਚ ਸਰ੍ਹੋਂ ਦੇ ਤੇਲ 'ਚ ਇਕ ਚੁਟਕੀ ਨਮਕ ਮਿਲਾ ਕੇ ਉਂਗਲੀ ਨਾਲ ਹੌਲੀ-ਹੌਲੀ ਮਸਾਜ ਕਰੋ। ਇਸ ਨਾਲ ਦੰਦਾਂ 'ਚ ਜੰਮੀ ਗੰਦਗੀ (Plaque) ਸਾਫ਼ ਹੁੰਦੀ ਹੈ ਅਤੇ ਮੂੰਹ ਦੀ ਬਦਬੂ ਤੋਂ ਵੀ ਛੁਟਕਾਰਾ ਮਿਲਦਾ ਹੈ।

ਦੰਦਾਂ ਨੂੰ ਬਚਾਉਣ ਦੇ 'ਗੋਲਡਨ ਰੂਲਜ਼'
ਕੈਵਿਟੀ ਨੂੰ ਜੜ੍ਹ ਤੋਂ ਖਤਮ ਕਰਨ ਅਤੇ ਦੁਬਾਰਾ ਹੋਣ ਤੋਂ ਰੋਕਣ ਲਈ ਇਹਨਾਂ ਗੱਲਾਂ ਦੀ ਪਾਲਣਾ ਕਰੋ:

ਦੋ ਵਾਰ ਬੁਰਸ਼
- ਸਵੇਰੇ ਅਤੇ ਰਾਤ ਨੂੰ ਸੌਣ ਤੋਂ ਪਹਿਲਾਂ ਬੁਰਸ਼ ਜ਼ਰੂਰ ਕਰੋ।

ਕੁਰਲੀ ਹੈ ਜ਼ਰੂਰੀ
- ਕੁਝ ਵੀ ਮਿੱਠਾ ਜਾਂ ਚਿਪਕਣ ਵਾਲਾ ਖਾਣ ਤੋਂ ਬਾਅਦ ਸਾਦੇ ਪਾਣੀ ਨਾਲ ਕੁਰਲੀ ਕਰੋ।

ਫਲਾਸਿੰਗ
- ਦੰਦਾਂ ਦੇ ਵਿਚਕਾਰ ਫਸੇ ਖਾਣੇ ਨੂੰ ਕੱਢਣ ਲਈ ਫਲਾਸ (Floss) ਦੀ ਵਰਤੋਂ ਕਰੋ।

ਨਿਯਮਤ ਚੈੱਕਅਪ
- ਹਰ 6 ਮਹੀਨੇ 'ਚ ਇਕ ਵਾਰ ਡੈਂਟਿਸਟ ਤੋਂ ਦੰਦਾਂ ਦੀ ਜਾਂਚ ਜ਼ਰੂਰ ਕਰਵਾਓ।