Telecom ਕੰਪਨੀ ਦੇ ਨਵੇਂ ਫੈਸਲੇ ਨੇ ਵਧਾਈ ਪ੍ਰੀਪੇਡ ਗਾਹਕਾਂ ਦੀ ਚਿੰਤਾ! ''ਪ੍ਰਾਯੋਰਿਟੀ ਪਲਾਨ'' ਨੂੰ ਲੈ ਕੇ ਖੜ੍ਹੇ ਹੋਏ ਵੱਡੇ ਸਵਾਲ

ਗੈਜੇਟ ਡੈਸਕ - ਟੈਲੀਕਾਮ ਖੇਤਰ ਦੀ ਦਿੱਗਜ ਕੰਪਨੀ Airtel ਨੇ ਆਪਣੀ ਨਵੀਂ 'ਪ੍ਰਾਯੋਰਿਟੀ ਪੋਸਟਪੇਡ' ਸੇਵਾ ਸ਼ੁਰੂ ਕਰਕੇ ਇੰਟਰਨੈੱਟ ਦੀ ਦੁਨੀਆ 'ਚ ਇਕ ਨਵੀਂ ਬਹਿਸ ਛੇੜ ਦਿੱਤੀ ਹੈ। ਇਸ ਸੇਵਾ ਦੇ ਤਹਿਤ ਕੰਪਨੀ ਪੋਸਟਪੇਡ ਗਾਹਕਾਂ ਨੂੰ ਬਿਹਤਰ ਕਨੈਕਟੀਵਿਟੀ ਅਤੇ ਤੇਜ਼ ਇੰਟਰਨੈੱਟ ਸਪੀਡ ਮੁਹੱਈਆ ਕਰਵਾਏਗੀ, ਜਿਸ ਕਾਰਨ ਹੁਣ 'ਨੈੱਟ ਨਿਊਟ੍ਰੈਲਿਟੀ' ਦੇ ਨਿਯਮਾਂ 'ਤੇ ਸਵਾਲ ਉੱਠਣ ਲੱਗੇ ਹਨ।

ਕੀ ਹੈ 'ਨੈੱਟਵਰਕ ਸਲਾਇਸਿੰਗ' ਤਕਨੀਕ?
ਏਅਰਟੈੱਲ ਦੀ ਇਹ ਨਵੀਂ ਸੇਵਾ 'ਨੈੱਟਵਰਕ ਸਲਾਇਸਿੰਗ' ਤਕਨੀਕ 'ਤੇ ਅਧਾਰਿਤ ਹੈ। ਇਹ ਤਕਨੀਕ ਇਕੋ 5G ਨੈੱਟਵਰਕ ਨੂੰ ਕਈ ਹਿੱਸਿਆਂ 'ਚ ਵੰਡ ਦਿੰਦੀ ਹੈ, ਜਿਸ ਨੂੰ ਤੁਸੀਂ ਸੜਕ 'ਤੇ ਬਣੀ ਇਕ 'ਵੀਆਈਪੀ ਲੇਨ' ਵਾਂਗ ਸਮਝ ਸਕਦੇ ਹੋ। ਭੀੜ-ਭੜੱਕੇ ਵਾਲੇ ਇਲਾਕਿਆਂ ਜਿਵੇਂ ਕਿ ਬਾਜ਼ਾਰਾਂ ਜਾਂ ਕੰਸਰਟਾਂ 'ਚ, ਜਿੱਥੇ ਨੈੱਟਵਰਕ 'ਤੇ ਜ਼ਿਆਦਾ ਲੋਡ ਹੁੰਦਾ ਹੈ, ਉੱਥੇ ਏਅਰਟੈੱਲ ਆਪਣੇ ਪੋਸਟਪੇਡ ਗਾਹਕਾਂ ਲਈ ਇਕ ਵੱਖਰੀ 'ਫਾਸਟ ਲੇਨ' ਸੁਰੱਖਿਅਤ ਰੱਖੇਗੀ। ਇਸ ਨਾਲ ਇਹ ਗਾਹਕ ਬਿਨਾਂ ਕਿਸੇ ਰੁਕਾਵਟ ਦੇ ਵੀਡੀਓ ਸਟ੍ਰੀਮਿੰਗ ਅਤੇ ਹੋਰ ਸੇਵਾਵਾਂ ਦਾ ਆਨੰਦ ਲੈ ਸਕਣਗੇ।

ਪ੍ਰੀਪੇਡ ਗਾਹਕਾਂ ਲਈ ਚਿੰਤਾ ਦੀ ਗੱਲ
ਇਸ ਸੇਵਾ ਦੇ ਆਉਣ ਨਾਲ ਭਾਰਤ ਦੀ ਵੱਡੀ ਪ੍ਰੀਪੇਡ ਆਬਾਦੀ ਲਈ ਚਿੰਤਾ ਪੈਦਾ ਹੋ ਗਈ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਨੈੱਟਵਰਕ ਦਾ ਮੂਲ ਢਾਂਚਾ ਸਾਰਿਆਂ ਲਈ ਇਕੋ ਜਿਹਾ ਹੈ, ਇਸ ਲਈ ਸਿਰਫ਼ ਪੈਸਿਆਂ ਬਦਲੇ ਪ੍ਰੀਪੇਡ ਗਾਹਕਾਂ ਦੀ ਇੰਟਰਨੈੱਟ ਗੁਣਵੱਤਾ ਨੂੰ ਪ੍ਰਭਾਵਿਤ ਕਰਨਾ ਗਲਤ ਹੋ ਸਕਦਾ ਹੈ। ਕੰਪਨੀਆਂ ਦਾ ਉਦੇਸ਼ ਗਾਹਕਾਂ ਨੂੰ ਮਹਿੰਗੇ ਪੋਸਟਪੇਡ ਪਲਾਨ ਲੈਣ ਲਈ ਆਕਰਸ਼ਿਤ ਕਰਨਾ ਹੈ।

ਨੈੱਟ ਨਿਊਟ੍ਰੈਲਿਟੀ ਅਤੇ TRAI ਦੇ ਨਿਯਮ
TRAI ਦੇ 2018 ਦੇ ਨਿਯਮਾਂ ਮੁਤਾਬਕ ਇੰਟਰਨੈੱਟ 'ਤੇ ਕਿਸੇ ਵੀ ਯੂਜ਼ਰ ਜਾਂ ਐਪ ਨਾਲ ਵਿਤਕਰਾ ਨਹੀਂ ਹੋਣਾ ਚਾਹੀਦਾ ਅਤੇ ਨਾ ਹੀ ਪੈਸਿਆਂ ਬਦਲੇ ਕਿਸੇ ਨੂੰ ਖਾਸ ਸਪੀਡ ਦਿੱਤੀ ਜਾਣੀ ਚਾਹੀਦੀ ਹੈ। ਹਾਲਾਂਕਿ, ਏਅਰਟੈੱਲ ਦਾ ਤਰਕ ਹੈ ਕਿ ਉਹ ਕਿਸੇ ਖਾਸ ਐਪ ਦੀ ਸਪੀਡ ਨਹੀਂ ਵਧਾ ਰਹੇ, ਸਿਰਫ਼ ਆਪਣੇ ਗਾਹਕਾਂ ਨੂੰ ਨੈੱਟਵਰਕ 'ਚ ਪਹਿਲ ਦੇ ਰਹੇ ਹਨ।

ਆਉਣ ਵਾਲੇ ਸਮੇਂ 'ਚ ਕੀ ਹੋਵੇਗਾ?
ਜ਼ਿਕਰਯੋਗ ਹੈ ਕਿ ਅਮਰੀਕਾ ਅਤੇ ਸਿੰਗਾਪੁਰ ਵਰਗੇ ਦੇਸ਼ਾਂ 'ਚ ਇਹ ਤਕਨੀਕ ਪਹਿਲਾਂ ਹੀ ਵਰਤੀ ਜਾ ਰਹੀ ਹੈ। ਏਅਰਟੈੱਲ ਤੋਂ ਬਾਅਦ ਹੁਣ ਰਿਲਾਇੰਸ ਜੀਓ ਵੀ ਜਲਦੀ ਹੀ ਆਪਣੀ ਪ੍ਰੀਮੀਅਮ 5G ਸੇਵਾ ਲਿਆਉਣ ਦੀ ਤਿਆਰੀ 'ਚ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ TRAI ਇਸ ਮਾਮਲੇ 'ਤੇ ਕੀ ਰੁਖ਼ ਅਪਣਾਉਂਦੀ ਹੈ।