ਸਾਵਧਾਨ! ਇਹ 4 ਸੰਕੇਤ ਦਿਸਣ ਤਾਂ ਤੁਰੰਤ ਬਦਲ ਲਵੋ ਗੀਜ਼ਰ, ਨਹੀਂ ਤਾਂ ਹੋ ਸਕਦੈ ਵੱਡਾ ਨੁਕਸਾਨ

ਗੈਜੇਟ ਡੈਸਕ : ਸਰਦੀਆਂ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਹਰ ਘਰ ਵਿੱਚ ਗੀਜ਼ਰ ਦੀ ਵਰਤੋਂ ਵੱਧ ਜਾਂਦੀ ਹੈ। ਗਰਮ ਪਾਣੀ ਤੋਂ ਬਿਨਾਂ ਨਹਾਉਣਾ ਮੁਸ਼ਕਲ ਹੋ ਜਾਂਦਾ ਹੈ, ਪਰ ਕੀ ਤੁਹਾਡਾ ਗੀਜ਼ਰ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ? ਮਾਹਿਰਾਂ ਅਨੁਸਾਰ, ਲੰਬੇ ਸਮੇਂ ਤੱਕ ਵਰਤੋਂ ਕਾਰਨ ਗੀਜ਼ਰ ਵਿੱਚ ਖਰਾਬੀ ਆਉਣਾ ਆਮ ਗੱਲ ਹੈ, ਪਰ ਕਈ ਵਾਰ ਇਹ ਇੰਨੀ ਗੰਭੀਰ ਹੋ ਜਾਂਦੀ ਹੈ ਕਿ ਹਾਦਸੇ ਦਾ ਡਰ ਬਣਿਆ ਰਹਿੰਦਾ ਹੈ। ਜੇਕਰ ਤੁਹਾਡਾ ਗੀਜ਼ਰ ਹੇਠ ਲਿਖੇ ਸੰਕੇਤ ਦੇ ਰਿਹਾ ਹੈ, ਤਾਂ ਸੁਚੇਤ ਹੋਣ ਦੀ ਲੋੜ ਹੈ:

1. ਗੀਜ਼ਰ ਵਿੱਚੋਂ ਅਜੀਬ ਆਵਾਜ਼ਾਂ ਆਉਣਾ
ਜੇਕਰ ਤੁਹਾਡੇ ਗੀਜ਼ਰ ਵਿੱਚੋਂ ਖੜਕਣ, ਸੀਟੀ ਮਾਰਨ ਜਾਂ ਕੋਈ ਹੋਰ ਅਸਧਾਰਨ ਆਵਾਜ਼ ਆ ਰਹੀ ਹੈ, ਤਾਂ ਇਹ ਚਿੰਤਾ ਦਾ ਵਿਸ਼ਾ ਹੈ। ਅਕਸਰ ਪਾਣੀ ਦੇ ਨਾਲ ਆਉਣ ਵਾਲੀ ਗੰਦਗੀ ਅਤੇ ਕਚਰਾ ਟੈਂਕ ਵਿੱਚ ਜਮ੍ਹਾ ਹੋ ਜਾਂਦਾ ਹੈ, ਜਿਸ ਕਾਰਨ ਗੀਜ਼ਰ ਨੂੰ ਪਾਣੀ ਗਰਮ ਕਰਨ ਲਈ ਜ਼ਿਆਦਾ ਮਿਹਨਤ ਕਰਨੀ ਪੈਂਦੀ ਹੈ। ਇਸ ਨਾਲ ਗੀਜ਼ਰ ਦੇ ਹਿੱਸਿਆਂ 'ਤੇ ਦਬਾਅ ਵਧਦਾ ਹੈ, ਜਿਸ ਨਾਲ ਓਵਰਹੀਟਿੰਗ ਅਤੇ ਟੈਂਕ ਫਟਣ ਦਾ ਖਤਰਾ ਰਹਿੰਦਾ ਹੈ।

2. ਪਾਣੀ ਦਾ ਰਿਸਾਅ (Leakage)
ਗੀਜ਼ਰ ਵਿੱਚੋਂ ਪਾਣੀ ਟਪਕਣਾ ਜਾਂ ਰਿਸਾਅ ਹੋਣਾ ਕੋਈ ਮਾਮੂਲੀ ਸਮੱਸਿਆ ਨਹੀਂ ਹੈ। ਭਾਵੇਂ ਇਹ ਟੈਂਕ, ਵਾਲਵ ਜਾਂ ਕਿਸੇ ਕਨੈਕਸ਼ਨ ਵਿੱਚੋਂ ਹੋਵੇ—ਇਹ ਹਮੇਸ਼ਾ ਖ਼ਤਰੇ ਦੀ ਘੰਟੀ ਹੈ। ਇਸ ਨਾਲ ਨਾ ਸਿਰਫ਼ ਪਾਣੀ ਦੀ ਬਰਬਾਦੀ ਹੁੰਦੀ ਹੈ, ਸਗੋਂ ਸਭ ਤੋਂ ਵੱਡਾ ਖ਼ਤਰਾ ਬਿਜਲੀ ਅਤੇ ਪਾਣੀ ਦੇ ਸੰਪਰਕ ਵਿੱਚ ਆਉਣ ਦਾ ਹੁੰਦਾ ਹੈ, ਜੋ ਕਿ ਕਿਸੇ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦਾ ਹੈ।

3. ਵਾਰ-ਵਾਰ ਖਰਾਬ ਹੋਣਾ
ਜੇਕਰ ਤੁਹਾਡੇ ਗੀਜ਼ਰ ਨੂੰ ਹਰ ਕੁਝ ਮਹੀਨਿਆਂ ਬਾਅਦ ਮੁਰੰਮਤ (Repair) ਦੀ ਲੋੜ ਪੈਂਦੀ ਹੈ, ਤਾਂ ਇਹ ਸਪੱਸ਼ਟ ਸੰਕੇਤ ਹੈ ਕਿ ਉਸ ਦਾ ਸਮਾਂ ਪੂਰਾ ਹੋ ਚੁੱਕਾ ਹੈ। ਪੁਰਾਣੇ ਗੀਜ਼ਰ 'ਤੇ ਵਾਰ-ਵਾਰ ਪੈਸੇ ਖਰਚਣ ਨਾਲੋਂ ਨਵਾਂ ਅਤੇ ਭਰੋਸੇਮੰਦ ਗੀਜ਼ਰ ਲੈਣਾ ਸਿਆਣਪ ਭਰਿਆ ਕਦਮ ਹੈ।

4. ਬਿਜਲੀ ਦੇ ਬਿੱਲ ਵਿੱਚ ਅਚਾਨਕ ਵਾਧਾ
ਪੁਰਾਣੇ ਗੀਜ਼ਰ ਸਮੇਂ ਦੇ ਨਾਲ ਆਪਣੀ ਕਾਰਜਕੁਸ਼ਲਤਾ ਗੁਆ ਦਿੰਦੇ ਹਨ ਅਤੇ ਜ਼ਿਆਦਾ ਬਿਜਲੀ ਦੀ ਖਪਤ ਕਰਨ ਲੱਗਦੇ ਹਨ। ਜੇਕਰ ਇਸ ਸਰਦੀ ਵਿੱਚ ਤੁਹਾਡਾ ਬਿਜਲੀ ਦਾ ਬਿੱਲ ਪਹਿਲਾਂ ਨਾਲੋਂ ਜ਼ਿਆਦਾ ਆ ਰਿਹਾ ਹੈ, ਤਾਂ ਇਸ ਦਾ ਕਾਰਨ ਗੀਜ਼ਰ ਹੋ ਸਕਦਾ ਹੈ। ਇੱਕ ਨਵਾਂ 'ਐਨਰਜੀ ਐਫੀਸ਼ੀਐਂਟ' ਗੀਜ਼ਰ ਲਗਾਉਣਾ ਨਾ ਸਿਰਫ਼ ਬਿਜਲੀ ਦੀ ਬਚਤ ਕਰਦਾ ਹੈ, ਸਗੋਂ ਸੁਰੱਖਿਆ ਦੇ ਲਿਹਾਜ਼ ਨਾਲ ਵੀ ਫਾਇਦੇਮੰਦ ਹੁੰਦਾ ਹੈ।

ਗੀਜ਼ਰ ਵੱਲੋਂ ਦਿੱਤੇ ਜਾਣ ਵਾਲੇ ਇਨ੍ਹਾਂ ਸ਼ੁਰੂਆਤੀ ਸੰਕੇਤਾਂ ਨੂੰ ਪਛਾਣ ਕੇ ਤੁਸੀਂ ਕਿਸੇ ਵੀ ਗੰਭੀਰ ਹਾਦਸੇ ਤੋਂ ਬਚ ਸਕਦੇ ਹੋ। ਸਰਦੀਆਂ ਦੇ ਇਸ ਸੀਜ਼ਨ ਵਿੱਚ ਆਪਣੀ ਅਤੇ ਆਪਣੇ ਪਰਿਵਾਰ ਦੀ ਸੁਰੱਖਿਆ ਨਾਲ ਕੋਈ ਸਮਝੌਤਾ ਨਾ ਕਰੋ।