ਅਦਾਕਾਰਾ ਦੇ ਪੁੱਤਰ ਦੇ ਕਤਲ ਦੇ ਮਾਮਲੇ ''ਚ ਆਇਆ ਨਵਾਂ ਮੋੜ

ਬਰੇਲੀ- ਆਪਣੇ ਪੁੱਤਰ ਦੇ ਕਤਲ ਤੋਂ ਨਾਰਾਜ਼ ਅਦਾਕਾਰਾ ਸਪਨਾ ਸਿੰਘ ਬੁੱਧਵਾਰ ਨੂੰ ਬਾਰਾਦਰੀ ਥਾਣੇ ਪੁੱਜੀ ਅਤੇ ਪੁਲਸ ਤੋਂ ਮੰਗ ਕੀਤੀ ਕਿ ਦੋਸ਼ੀ ਨੂੰ ਉਸ ਦੇ ਹਵਾਲੇ ਕੀਤਾ ਜਾਵੇ। ਜਿਸ ਤੋਂ ਬਾਅਦ ਪੁਲਸ ਨੇ ਸਮਝਾ ਕੇ ਥਾਣੇ ਤੋਂ ਵਾਪਸ ਭੇਜ ਦਿੱਤਾ। ਫਿਲਹਾਲ ਕਤਲ ਕੇਸ ਦੇ ਦੋਵੇਂ ਦੋਸ਼ੀਆਂ ਨੂੰ ਵੀਰਵਾਰ ਨੂੰ ਅਦਾਲਤ 'ਚ ਪੇਸ਼ ਕੀਤਾ ਜਾਵੇਗਾ।ਤੁਹਾਨੂੰ ਦੱਸ ਦੇਈਏ ਕਿ ਹਾਲ ਹੀ 'ਚ ਮੁੰਬਈ 'ਚ ਸਥਾਪਿਤ ਅਦਾਕਾਰਾ ਸਪਨਾ ਸਿੰਘ ਦੇ ਪੁੱਤਰ ਸਾਗਰ ਗੰਗਵਾਰ ਦੀ ਸ਼ੱਕੀ ਹਾਲਾਤਾਂ ਵਿੱਚ ਮੌਤ ਹੋ ਗਈ ਸੀ। ਸਾਗਰ ਦੇ ਦੋ ਦੋਸਤਾਂ ਅਨੁਜ ਅਤੇ ਸੰਨੀ ਦੇ ਖਿਲਾਫ ਕਤਲ ਦਾ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਅਨੁਜ ਅਤੇ ਸੰਨੀ ਨੇ ਪੁਲਸ ਕੋਲ ਕਬੂਲ ਕੀਤਾ ਹੈ ਕਿ ਉਹ ਇਕੱਠੇ ਨਸ਼ਾ ਕਰਦੇ ਸਨ। ਉਨ੍ਹਾਂ ਨੇ ਸਾਗਰ ਨੂੰ ਵੱਡੀ ਮਾਤਰਾ 'ਚ ਨਸ਼ੀਲੇ ਪਦਾਰਥ ਦਿੱਤੇ ਅਤੇ ਸ਼ਰਾਬ ਵੀ ਪੀਣ ਲਈ ਦਿੱਤੀ। ਓਵਰਡੋਜ਼ ਅਤੇ ਕਾਕਟੇਲ ਕਾਰਨ ਜਦੋਂ ਉਸ ਦੀ ਹਾਲਤ ਵਿਗੜ ਗਈ ਤਾਂ ਉਸ ਦੇ ਹੱਥ-ਪੈਰ ਸੁੱਜਣ ਲੱਗੇ। ਦੋਵਾਂ ਨੇ ਸਾਗਰ ਨੂੰ ਹਸਪਤਾਲ ਲਿਜਾਣ ਦੀ ਬਜਾਏ ਉਸ ਨੂੰ ਟੋਏ 'ਚ ਸੁੱਟ ਦਿੱਤਾ ਅਤੇ ਆਪੋ-ਆਪਣੇ ਘਰ ਚਲੇ ਗਏ। ਉਥੇ ਹੀ ਨਾਬਾਲਗ ਸਾਗਰ ਦੀ ਮੌਤ ਹੋ ਗਈ। ਬਾਰਾਦਰੀ ਪੁਲਸ ਇਨ੍ਹਾਂ ਮੁਲਜ਼ਮਾਂ ਨੂੰ ਸਬੰਧਤ ਥਾਵਾਂ ’ਤੇ ਲਿਜਾ ਕੇ ਵਰਤੇ ਗਏ ਨਸ਼ੀਲੇ ਪਦਾਰਥਾਂ ਅਤੇ ਸ਼ਰਾਬ ਦੀ ਰਹਿੰਦ-ਖੂੰਹਦ ਨੂੰ ਇਕੱਠਾ ਕਰ ਰਹੀ ਹੈ।

ਹੈੱਡ ਕਾਂਸਟੇਬਲ ਦਾ ਪੁੱਤਰ ਹੈ ਮੁੱਖ ਦੋਸ਼ੀ 
ਪ੍ਰਾਪਤ ਜਾਣਕਾਰੀ ਅਨੁਸਾਰ ਯੂਪੀ ਦੇ ਮੁਰਾਦਾਬਾਦ 'ਚ ਤਾਇਨਾਤ ਇੱਕ ਹੈੱਡ ਕਾਂਸਟੇਬਲ ਦੇ ਪੁੱਤਰ ਅਨੁਜ ਨੂੰ ਇਸ ਘਟਨਾ 'ਚ ਕਤਲ ਦਾ ਮੁੱਖ ਮੁਲਜ਼ਮ ਬਣਾਇਆ ਗਿਆ ਹੈ। ਸੰਨੀ ਨੂੰ ਸਹਿ-ਦੋਸ਼ੀ ਵਜੋਂ ਰੱਖਿਆ ਗਿਆ ਹੈ। ਇਸ ਘਟਨਾ 'ਚ ਸੰਨੀ ਦੇ ਮਾਮੇ ਦੀ ਕਾਰ ਦੀ ਵਰਤੋਂ ਕੀਤੀ ਗਈ ਸੀ, ਜਿਸ ਨੂੰ ਪੁਲਸ ਨੇ ਬਰਾਮਦ ਕਰ ਲਿਆ ਹੈ। ਲਿਖਤੀ ਅਤੇ ਸਬੂਤ ਇਕੱਠੇ ਕਰਨ ਦਾ ਅੰਤਿਮ ਦੌਰ ਚੱਲ ਰਿਹਾ ਹੈ। ਦੋਵਾਂ ਮੁਲਜ਼ਮਾਂ ਨੂੰ ਵੀਰਵਾਰ ਨੂੰ ਅਦਾਲਤ 'ਚ ਪੇਸ਼ ਕੀਤਾ ਜਾਵੇਗਾ।

ਨਸ਼ੇ ਦੀ ਓਵਰਡੋਜ਼ ਕਾਰਨ ਮੌਤ
ਏਰੀਆ ਪੁਲਸ (ਫਰੀਦਪੁਰ) ਆਸ਼ੂਤੋਸ਼ ਸ਼ਿਵਮ ਨੇ ਕਿਹਾ, “ਮੌਤ ਦੇ ਕਾਰਨਾਂ ਦਾ ਪੋਸਟਮਾਰਟਮ ਤੋਂ ਸਪੱਸ਼ਟ ਨਹੀਂ ਹੋ ਸਕਿਆ ਹੈ। ਹਾਲਾਂਕਿ, ਜ਼ਹਿਰ ਜਾਂ ਨਸ਼ੇ ਦੀ ਓਵਰਡੋਜ਼ ਕਾਰਨ ਮੌਤ ਦੇ ਸੰਕੇਤ ਹਨ। ਥਾਣਾ ਭੁੱਟਾ ਦੇ ਇੰਚਾਰਜ ਇੰਸਪੈਕਟਰ ਸੁਨੀਲ ਕੁਮਾਰ ਨੇ ਦੱਸਿਆ, ''ਪੁੱਛਗਿੱਛ ਦੌਰਾਨ ਅਨੁਜ ਅਤੇ ਸੰਨੀ ਨੇ ਕਬੂਲ ਕੀਤਾ ਹੈ ਕਿ ਉਨ੍ਹਾਂ ਨੇ ਸਾਗਰ ਨਾਲ ਨਸ਼ੇ ਅਤੇ ਸ਼ਰਾਬ ਦਾ ਸੇਵਨ ਕੀਤਾ ਸੀ। ਓਵਰਡੋਜ਼ ਕਾਰਨ ਸਾਗਰ ਬੇਹੋਸ਼ ਹੋ ਗਿਆ। ਘਬਰਾ ਕੇ ਉਹ ਉਸ ਦੀ ਲਾਸ਼ ਨੂੰ ਘਸੀਟ ਕੇ ਖੇਤ ਵਿਚ ਲੈ ਗਏ ਅਤੇ ਉਥੇ ਹੀ ਛੱਡ ਗਏ।”

ਸੀਸੀਟੀਵੀ ਫੁਟੇਜ 'ਚ ਦੋਸਤ ਮ੍ਰਿਤਕ ਨੂੰ ਘਸੀਟਦੇ ਹੋਏ ਆਏ ਨਜ਼ਰ 
ਪੁਲਸ ਮੁਤਾਬਕ ਸਾਗਰ (14) 8ਵੀਂ ਜਮਾਤ ਦਾ ਵਿਦਿਆਰਥੀ ਬਰੇਲੀ ਦੇ ਆਨੰਦ ਵਿਹਾਰ ਕਾਲੋਨੀ 'ਚ ਆਪਣੇ ਮਾਮਾ ਓਮ ਪ੍ਰਕਾਸ਼ ਨਾਲ ਰਹਿੰਦਾ ਸੀ। ਐਤਵਾਰ ਸਵੇਰੇ ਉਸ ਦੀ ਲਾਸ਼ ਇਜਤਨਗਰ ਥਾਣਾ ਖੇਤਰ ਦੇ ਅਦਲਖੀਆ ਪਿੰਡ ਨੇੜੇ ਮਿਲੀ। ਪਹਿਲਾਂ ਤਾਂ ਇਸ ਨੂੰ ਅਣਪਛਾਤਾ ਮਾਮਲਾ ਮੰਨਦਿਆਂ ਪੋਸਟ ਮਾਰਟਮ ਕਰਵਾਇਆ ਗਿਆ ਸੀ। ਉਧਰ, ਬਾਰਾਦਰੀ ਪੁਲਸ ਨੇ ਓਮ ਪ੍ਰਕਾਸ਼ ਵੱਲੋਂ 7 ਦਸੰਬਰ ਨੂੰ ਗੁੰਮਸ਼ੁਦਗੀ ਦੀ ਸ਼ਿਕਾਇਤ ਦਰਜ ਕਰ ਲਈ ਸੀ। ਲਾਸ਼ ਦੀ ਪਛਾਣ ਹੋਣ ਤੋਂ ਬਾਅਦ ਮੌਕੇ ਦੇ ਨੇੜੇ ਲੱਗੇ ਸੀਸੀਟੀਵੀ ਫੁਟੇਜ ਵਿੱਚ ਅਨੁਜ ਅਤੇ ਸੰਨੀ ਸਾਗਰ ਨੂੰ ਘਸੀਟਦੇ ਹੋਏ ਦਿਖਾਈ ਦਿੱਤੇ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।