ਮਨੋਜ ਬਾਜਪਾਈ ਵੇਚਣਾ ਚਾਹੁੰਦੇ ਨੇ ਆਪਣਾ ਬਾਂਦਰਾ ਵਾਲਾ ਘਰ, ਟਵੀਟ ਕਰਕੇ ਲੋਕਾਂ ਨੂੰ ਦਿੱਤੀ ਜਾਣਕਾਰੀ

ਮੁੰਬਈ (ਬਿਊਰੋ)– ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ ਮਨੋਜ ਬਾਜਪਾਈ ਨੇ ਅੱਜ ਇਕ ਟਵੀਟ ਕੀਤਾ ਹੈ, ਜਿਸ ਕਾਰਨ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ’ਚ ਚਰਚਾਵਾਂ ਸ਼ੁਰੂ ਹੋ ਗਈਆਂ ਹਨ। ਅਦਾਕਾਰ ਨੇ ਟਵਿਟਰ ’ਤੇ ਲਿਖਿਆ ਹੈ ਕਿ ਉਹ ਆਪਣਾ ਘਰ ਵੇਚਣਾ ਚਾਹੁੰਦਾ ਹੈ। ਹੁਣ ਇਹ ਚੁਟਕਲੇ ’ਚ ਲਿਖਿਆ ਗਿਆ ਹੈ ਜਾਂ ਇਹ ਸੱਚਮੁੱਚ ਦੱਸਿਆ ਗਿਆ ਹੈ, ਇਸ ਬਾਰੇ ਕੁਝ ਨਹੀਂ ਕਿਹਾ ਜਾ ਸਕਦਾ ਪਰ ਪ੍ਰਸ਼ੰਸਕ ਜਾਣਨਾ ਚਾਹੁੰਦੇ ਹਨ ਕਿ ਉਨ੍ਹਾਂ ਦੇ ਮਨਪਸੰਦ ਅਦਕਾਰ ਨਾਲ ਕੀ ਹੋਇਆ, ਜੋ ਘਰ ਵੇਚਣ ਦੀ ਨੌਬਤ ਆ ਗਈ।

ਮਨੋਜ ਬਾਜਪਾਈ ਨੇ ਟਵਿਟਰ ’ਤੇ ਲਿਖਿਆ, ‘ਆਪਣੇ ਬਾਂਦਰਾ ਵਾਲੇ ਘਰ ਦੇ ਲਈ ਖਰੀਦਦਾਰ ਲੱਭ ਰਿਹਾ ਹਾਂ। ਕੋਈ ਹੋਵੇ ਤਾਂ ਦੱਸਣਾ।’ ਉਸ ਸਮੇਂ ਤੋਂ ਇਸ ਬਾਰੇ ਅਟਕਲਾਂ ਹਨ ਕਿ ਕੀ ਹੋਇਆ ਹੈ। ਕੁਝ ਲੋਕ ਹਨ, ਜੋ ਖਰੀਦਣਾ ਚਾਹੁੰਦੇ ਹਨ ਤੇ ਖੁਦ ਟਵਿਟਰ ’ਤੇ ਅਦਾਕਾਰ ਨੂੰ ਜਵਾਬ ਦੇ ਰਹੇ ਹਨ।

Apne Bandra wale ghar ke liye buyers dhoond raha hoon. Koi ho toh batana.

— manoj bajpayee (@BajpayeeManoj) January 25, 2021

ਕੁਝ ਲੋਕਾਂ ਨੂੰ ਉਸੇ ਬਹਾਨੇ ਮੀਮ ਬਣਾਉਣ ਦਾ ਮੌਕਾ ਮਿਲਿਆ ਹੈ। ਕੁਝ ਲੋਕ ਹਸਾਉਣ ਵਾਲੀਆਂ ਪੋਸਟਾਂ ਵੀ ਸਾਂਝੀਆਂ ਕਰ ਰਹੇ ਹਨ। ਦੱਸ ਦੇਈਏ ਕਿ ਮਨੋਜ ਬਾਜਪਾਈ ਜਲਦ ਹੀ ਵੈੱਬ ਸੀਰੀਜ਼ ‘ਦਿ ਫੈਮਿਲੀ ਮੈਨ 2’ ’ਚ ਨਜ਼ਰ ਆਉਣ ਵਾਲੇ ਹਨ। ਇਸ ਦਾ ਟੀਜ਼ਰ ਆ ਚੁੱਕਾ ਹੈ ਤੇ ਪ੍ਰਸ਼ੰਸਕ ਬੇਸਬਰੀ ਨਾਲ ਇਸ ਦੇ ਰਿਲੀਜ਼ ਦਾ ਇੰਤਜ਼ਾਰ ਕਰ ਰਹੇ ਹਨ।

ਇਸ ਦਾ ਟਰੇਲਰ 19 ਜਨਵਰੀ ਨੂੰ ਰਿਲੀਜ਼ ਹੋਣ ਵਾਲਾ ਸੀ ਪਰ ਇਸ ਦੀ ਤਾਰੀਖ਼ ਅਗੇ ਕਰ ਦਿੱਤੀ ਗਈ ਹੈ। ਮਨੋਜ ਦੇ ਇਸ ਟਵੀਟ ਤੋਂ ਬਾਅਦ ਕੁਝ ਯੂਜ਼ਰਜ਼ ਨੇ ਇਹ ਵੀ ਲਿਖਿਆ ਕਿ ਜੇਕਰ ਇਸ ਦਾ ਟਰੇਲਰ ਜਾਰੀ ਹੋਇਆ ਤਾਂ ਉਹ ਘਰ ਖਰੀਦਣਗੇ।

ਇਸ ਵੈੱਬ ਸੀਰੀਜ਼ ਦਾ ਪਹਿਲਾ ਸੀਜ਼ਨ ਵੀ ਕਾਫੀ ਪਸੰਦ ਕੀਤਾ ਗਿਆ ਸੀ। ਇਸ ’ਚ ਮਨੋਜ ਬਾਜਪਾਈ ਮੁੱਖ ਭੂਮਿਕਾ ’ਚ ਹਨ। ਇਹ ਸੀਰੀਜ਼ ਹਿੱਟ ਰਹੀ ਸੀ ਤੇ ਉਦੋਂ ਤੋਂ ਹੀ ਇਸ ਦੇ ਦੂਜੇ ਸੀਜ਼ਨ ਲਈ ਪ੍ਰਸ਼ੰਸਕਾਂ ’ਚ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਹੈ।

ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਜ਼ਰੂਰ ਸਾਂਝੀ ਕਰੋ।