ਰੋ-ਰੋ ਕੇ ਦੇਵੋਲੀਨਾ ਨੇ ਖੋਲ੍ਹਿਆ ਦਿਵਿਆ ਦੇ ਪਤੀ ਦਾ ਕੱਚਾ ਚਿੱਠਾ, ਸਰੀਰਕ ਸ਼ੋਸ਼ਣ ਦਾ ਲਾਇਆ ਦੋਸ਼
12/08/2020 1:00:23 PM
ਜਲੰਧਰ (ਬਿਊਰੋ)– ਦਿਵਿਆ ਭਟਨਾਗਰ 34 ਸਾਲ ਦੀ ਸੀ ਤੇ ਪਿਛਲੇ ਦਿਨੀਂ ਕੋਰੋਨਾ ਵਾਇਰਸ ਤੋਂ ਬਾਅਦ ਉਸ ਨੂੰ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ। ਹਾਲਤ ਵਿਗੜਨ ਤੋਂ ਬਾਅਦ ਦਿਵਿਆ ਨੂੰ ਵੈਂਟੀਲੇਟਰ ’ਤੇ ਰੱਖਿਆ ਗਿਆ ਪਰ ਦਿਵਿਆ ਕੋਰੋਨਾ ਨਾਲ ਜੰਗ ਹਾਰ ਗਈ। ਉਸ ਦੀ ਮੌਤ ਨਾਲ ਪਰਿਵਾਰ ਤੇ ਦੋਸਤਾਂ ਦੇ ਨਾਲ-ਨਾਲ ਟੀ. ਵੀ. ਇੰਡਸਟਰੀ ਨੂੰ ਵੀ ਡੂੰਘਾ ਸਦਮਾ ਪੁੱਜਾ ਹੈ।
ਦਿਵਿਆ ਦੇ ਪਤੀ ਨੂੰ ਸਜ਼ਾ ਦਿਵਾਉਣ ਦੀ ਖਾਧੀ ਸਹੁੰ
ਪਰ ਦੇਵੋਲੀਨਾ ਨੇ ਹੁਣ ਦਿਵਿਆ ਦੇ ਪਤੀ ਬਾਰੇ ਵੱਡੇ ਖੁਲਾਸੇ ਕਰਦਿਆਂ ਉਸ ਨੂੰ ਸਜ਼ਾ ਦਿਵਾਉਣ ਦੀ ਸਹੁੰ ਖਾ ਲਈ ਹੈ। ਦੇਵੋਲੀਨਾ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ’ਤੇ ਇਕ ਵੀਡੀਓ ਸ਼ੇਅਰ ਕੀਤੀ ਹੈ, ਜਿਸ ’ਚ ਉਸ ਨੇ ਦਿਵਿਆ ਦੇ ਪਤੀ ਗਗਨ ਗੱਬਰੂ ਨੂੰ ਲੈ ਕੇ ਵੱਡੇ ਖੁਲਾਸੇ ਕੀਤੇ ਹਨ ਤੇ ਰੋ ਰਹੀ ਹੈ।
ਦਿਵਿਆ ਨੂੰ ਸਭ ਨੇ ਦੁੱਖ ਪਹੁੰਚਾਇਆ, ਇਸਤੇਮਾਲ ਕੀਤਾ
ਵੀਡੀਓ ’ਚ ਦੇਵੋਲੀਨਾ ਕਹਿ ਰਹੀ ਹੈ, ‘ਪਿਛਲੇ 9-10 ਸਾਲਾਂ ’ਚ ਮੈਂ ਕਦੇ ਵੀ ਨਹੀਂ ਦੇਖਿਆ ਕਿ ਦਿਵਿਆ ਨੇ ਕਿਸੇ ਨੂੰ ਦੁੱਖ ਪਹੁੰਚਾਇਆ ਹੋਵੇ ਜਾਂ ਗਲਤ ਕੀਤਾ ਹੋਵੇ। ਸਿਰਫ ਲੋਕਾਂ ਨੇ ਹੀ ਉਸ ਨੂੰ ਦੁੱਖ ਪਹੁੰਚਾਇਆ, ਉਸ ਦੀ ਵਰਤੋਂ ਕੀਤੀ। ਖਾਸ ਕਰਕੇ ਰਿਸ਼ਤਿਆਂ ’ਚ। ਹਰ ਲੜਕੀ ਰਿਲੇਸ਼ਨਸ਼ਿਪ ’ਚ ਇਹ ਗਲਤੀ ਕਰਦੀ ਹੈ ਕਿ ਜੇਕਰ ਖਰਾਬ ਰਿਲੇਸ਼ਨਸ਼ਿਪ ਤੋਂ ਬਾਅਦ ਕੋਈ ਕਿਸੇ ਪਾਸੋਂ ਸਹਾਰਾ ਦੇ ਦਿੰਦਾ ਹੈ ਤਾਂ ਉਹ ਬਿਨਾਂ ਸੋਚੇ-ਸਮਝੇ, ਉਸ ਨੂੰ ਆਪਣਾ ਸਹਾਰਾ ਮੰਨ ਲੈਂਦੀ ਹੈ। ਬਿਨਾਂ ਉਸ ਦਾ ਪਿਛੋਕੜ ਜਾਣੇ, ਬਿਨਾਂ ਕੁਝ ਹੋਰ ਜਾਣੇ। ਦਿਵਿਆ ਤਾਂ ਇਕਦਮ ਮਾਸੂਮ ਸੀ, ਬਿਲਕੁਲ ਭੋਲੀ ਸੀ। ਉਸ ਪਾਗਲ ਨੂੰ ਤਾਂ ਮੈਂ ਸਮਝਾਉਂਦੀ ਸੀ।’
ਦਿਵਿਆ ਦਾ ਹੋਇਆ ਸਰੀਰਕ ਤੇ ਮਾਨਸਿਕ ਸ਼ੋਸ਼ਣ
ਦੇਵੋਲੀਨਾ ਫੁੱਟ-ਫੁੱਟ ਕੇ ਰੋਣ ਲੱਗਦੀ ਹੈ ਤੇ ਰੋਂਦੇ ਹੋਏ ਕਹਿੰਦੀ ਹੈ, ‘ਅੱਜ ਇਹ ਵੀਡੀਓ ਬਣਾਉਣੀ ਬਹੁਤ ਜ਼ਰੂਰੀ ਹੈ ਉਸ ਇਨਸਾਨ ਲਈ, ਜਿਸ ਦੀ ਵਜ੍ਹਾ ਨਾਲ ਮੇਰੀ ਦਿਵਿਆ ਨੇ ਇੰਨਾ ਬਰਦਾਸ਼ਤ ਕੀਤਾ। ਮੈਂ ਜਾਣਦੀ ਹਾਂ ਕਿ ਅੱਜ ਦਿਵਿਆ ਸਾਡੇ ਵਿਚਾਲੇ ਕੋਵਿਡ-19 ਦੀ ਵਜ੍ਹਾ ਕਰਕੇ ਨਹੀਂ ਹੈ ਪਰ ਜੋ ਮਾਨਸਿਕ ਤਣਾਅ ਤੇ ਸਰੀਰਕ ਸ਼ੋਸ਼ਣ ਉਸ ਦੇ ਨਾਲ ਕੀਤਾ ਗਿਆ, ਕੋਈ ਵੀ ਇਨਸਾਨ ਜੇਕਰ ਉਸ ’ਚੋਂ ਲੰਘਦਾ ਹੈ ਤਾਂ ਛੋਟੀ ਤੋਂ ਛੋਟੀ ਬੀਮਾਰੀ ਨਾਲ ਲੜਨ ਦੀ ਤਾਕਤ ਵੀ ਉਸ ਇਨਸਾਨ ਦੇ ਕੋਲ ਨਹੀਂ ਹੁੰਦੀ।’
ਦਿਵਿਆ ਦੇ ਪਤੀ ’ਤੇ ਭੜਕੀ ਦੇਵੋਲੀਨਾ
ਦੇਵੋਲੀਨਾ ਅੱਗੇ ਕਹਿੰਦੀ ਹੈ, ‘ਬਹੁਤ ਹੀ ਸ਼ਾਂਤੀ ਨਾਲ ਮੈਂ ਤੁਹਾਨੂੰ ਸਾਰਿਆਂ ਨੂੰ ਇਹ ਚੀਜ਼ ਦੱਸ ਰਹੀ ਹਾਂ, ਖਾਸ ਕਰਕੇ ਤੈਨੂੰ ਗਗਨ ਗੱਬਰੂ। ਉਸ ਦਿਨ ਤੂੰ ਕਿਉਂ ਪੋਸਟ ਕੀਤਾ ਕਿ ਉਸ ਦੀ ਮਾਂ ਤੇ ਭਰਾ ਤੇਰੇ ਰਿਲੇਸ਼ਨਸ਼ਿਪ ਦੇ ਖਿਲਾਫ ਸਨ? ਉਹ ਨਹੀਂ ਚਾਹੁੰਦੇ ਸਨ ਕਿ ਤੇਰਾ ਵਿਆਹ ਹੋਵੇ ਤੇ ਉਹ ਤੇਰੇ ਨਾਂ ’ਤੇ ਸ਼ੋਹਰਤ ਲੈ ਰਹੇ ਸਨ। ਤੇਰੀ ਔਕਾਤ ਕੀ ਹੈ? ਤੂੰ ਕੌਣ ਹੈ? ਜੋ ਤੂੰ ਇਥੇ 4-5 ਗਿਣੇ-ਚੁਣੇ ਕਲਾਕਾਰਾਂ ਨੂੰ ਜਾਣਦਾ ਹੈ, ਉਹ ਸਿਰਫ ਦਿਵਿਆ ਦੀ ਬਦੌਲਤ ਹੈ। ਭੀਖ ਮੰਗ ਕੇ ਤੂੰ ਹਿਮਾਚਲ ਤੋਂ ਦਿਵਿਆ ਨਾਲ ਇਥੇ ਰਹਿਣ ਆਇਆ ਸੀ। ਤੇਰੇ ਖਿਲਾਫ ਸਿਰਫ ਦਿਵਿਆ ਦਾ ਪਰਿਵਾਰ ਹੀ ਨਹੀਂ, ਮੈਂ ਵੀ ਖੜ੍ਹੀ ਸੀ। ਇਸ ਲਈ 4 ਸਾਲ ਮੇਰੀ ਉਸ ਦੌਰਾਨ ਦਿਵਿਆ ਨਾਲ ਗੱਲ ਨਹੀਂ ਹੋਈ ਸੀ ਕਿਉਂਕਿ ਮੈਨੂੰ ਪਤਾ ਸੀ ਕਿ ਤੂੰ ਅਜਿਹਾ ਹੀ ਨਿਕਲੇਗਾ ਪਰ ਦਿਵਿਆ ਤੇਰੇ ਪਿਆਰ ’ਚ ਇੰਨੀ ਅੰਨ੍ਹੀ ਹੋ ਗਈ ਸੀ ਕਿ ਉਸ ਨੂੰ ਅੱਗੇ-ਪਿੱਛੇ ਕੁਝ ਦਿਖਾਈ ਨਹੀਂ ਦੇ ਰਿਹਾ ਸੀ। ਤੂੰ ਉਸ ਨੂੰ ਆਪਣੀਆਂ ਗੱਲਾਂ ’ਚ ਇੰਨਾ ਫਸਾ ਲਿਆ ਸੀ। ਇਸ ਲਈ ਉਸ ਨੇ ਨਾ ਆਪਣੇ ਮਾਂ-ਭਰਾ ਦੀ ਸੁਣੀ, ਨਾ ਮੇਰੀ ਸੁਣੀ ਤੇ ਨਾ ਹੀ ਬਾਕੀ ਦੋਸਤਾਂ ਦੀ ਸੁਣੀ, ਜਿਸ ਕਰਕੇ ਅੱਜ ਉਹ ਸਾਡੇ ਵਿਚਾਲੇ ਨਹੀਂ ਹੈ।’
ਨੋਟ– ਦਿਵਿਆ ਦੀ ਮੌਤ ’ਤੇ ਦੇਵੋਲੀਨਾ ਵਲੋਂ ਉਸ ਦੇ ਪਤੀ ’ਤੇ ਲਗਾਏ ਦੋਸ਼ਾਂ ਨੂੰ ਤੁਸੀਂ ਕਿਵੇਂ ਦੇਖਦੇ ਹੋ? ਕੁਮੈਂਟ ਕਰਕੇ ਆਪਣੀ ਰਾਏ ਜ਼ਰੂਰ ਦਿਓ।
