ਤਣਾਅ ਭਰੇ ਦੌਰ ’ਚ ਫ਼ਰੈੱਸ਼ ਕਾਮੇਡੀ ਲੈ ਕੇ ਆ ਰਹੇ ਹਨ : ਰਾਘਵ ਜੁਯਾਲ

ਮੁੰਬਈ- ਡਾਂਸਰ, ਹੋਸਟ ਤੇ ਐਕਟਰ ਰਾਘਵ ਜੁਯਾਲ ਜਲਦ ਹੀ ਆਪਣੀ ਅਪਕਮਿੰਗ ਫ਼ਿਲਮ ‘ਭਾਈ ਤੇਰਾ ਸਟਾਰ ਹੈ’ ਨਾਲ ਵੱਡੇ ਪਰਦੇ ’ਤੇ ਨਜ਼ਰ ਆਉਣ ਵਾਲੇ ਹਨ। ਇਹ ਫ਼ਿਲਮ 30 ਜੁਲਾਈ ਨੂੰ ਰਿਲੀਜ਼ ਹੋਵੇਗੀ, ਜਿਸ ’ਚ ਕਾਮੇਡੀ, ਡਰਾਮਾ ਤੇ ਭਰਪੂਰ ਐਂਟਰਟੇਨਮੈਂਟ ਦਾ ਤੜਕਾ ਦੇਖਣ ਨੂੰ ਮਿਲੇਗਾ। ਫ਼ਿਲਮ ’ਚ ਰਾਘਵ ਜੁਯਾਲ ਨਾਲ ਨਿਹਾਰਿਕਾ ਐੱਨ.ਐੱਮ. ਮੁੱਖ ਭੂਮਿਕਾਵਾਂ ’ਚ ਹਨ, ਉੱਥੇ ਹੀ, ਸੰਜੇ ਕਪੂਰ, ਬਰਖਾ ਸਿੰਘ, ਚੰਦਨ ਰਾਏ ਸਾਨੀਆਲ, ਵਿਵਾਨ ਭਟੇਨਾ, ਨਿਕੀ ਅਨੇਜਾ ਵਾਲੀਆ ਤੇ ਵਿਕਲਪ ਮਹਿਤਾ ਵਰਗੇ ਕਲਾਕਾਰ ਵੀ ਅਹਿਮ ਕਿਰਦਾਰ ਨਿਭਾਉਂਦੇ ਦਿਖਾਈ ਦੇਣਗੇ। ਫ਼ਿਲਮ ਬਾਰੇ ਰਾਘਵ ਜੁਯਾਲ ਤੇ ਨਿਹਾਰਿਕਾ ਐੱਨ.ਐੱਮ. ਨੇ ਪੰਜਾਬ ਕੇਸਰੀ/ ਨਵੋਦਿਆ ਟਾਈਮਜ਼/ ਜਗ ਬਾਣੀ/ ਹਿੰਦ ਸਮਾਚਾਰ ਨਾਲ ਖ਼ਾਸ ਗੱਲਬਾਤ ਕੀਤੀ ਤੇ ਦਿਲਚਸਪ ਗੱਲਾਂ ਸ਼ੇਅਰ ਕੀਤੀਆਂ...

ਘਸੇ-ਪੁਰਾਣੇ ਫ਼ਾਰਮੂਲਿਆਂ ਤੋਂ ਵੱਖ ਹੈ ਸਾਡੀ ਕਾਮੇਡੀ ਫ਼ਿਲਮ : ਰਾਘਵ

Q ਅਚਾਨਕ ਇਹ ਫ਼ਿਲਮ ਰਿਲੀਜ਼ ਲਈ ਤਿਆਰ ਹੈ। ਕੀ ਇਹ ਤੁਹਾਡੀਆਂ ਸਭ ਤੋਂ ਤੇਜ਼ੀ ਨਾਲ ਬਣਨ ਵਾਲੀਆਂ ਫ਼ਿਲਮਾਂ ’ਚੋਂ ਇਕ ਰਹੀ?

— ਪੂਰੀ ਟੀਮ ਨੇ ਮਿਲ ਕੇ ਸੋਚਿਆ ਕਿ ਫ਼ਿਲਮ ਦੀ ਰਿਲੀਜ਼ ਪਹਿਲਾਂ ਕਰ ਦਿੱਤੀ ਜਾਵੇ। ਅੱਜਕਲ ਹਰ ਘਰ ’ਚ ਤਣਾਅ ਦਾ ਮਾਹੌਲ ਹੈ। ਲੋਕ ਆਪਣੀ ਰੋਜ਼ਾਨਾ ਦੀ ਜ਼ਿੰਦਗੀ ’ਚ ਪ੍ਰੇਸ਼ਾਨੀਆਂ ਨਾਲ ਘਿਰੇ ਹੋਏ ਹਨ। ਅਜਿਹੇ ਸਮੇਂ ’ਚ ਮੈਨੂੰ ਲੱਗਾ ਕਿ ਲੋਕਾਂ ਨੂੰ ਇਕ ਨਵੀਂ ਤੇ ਫ਼ਰੈੱਸ਼ ਕਾਮੇਡੀ ਦੇਖਣ ਦਾ ਮੌਕਾ ਮਿਲਣਾ ਚਾਹੀਦਾ ਹੈ। ਇਸ ਫ਼ਿਲਮ ’ਚ ਘਸੇ-ਪੁਰਾਣੇ ਕਾਮੇਡੀ ਫ਼ਾਰਮੂਲੇ ਨਹੀਂ ਹਨ। ਇਹ ਬਿਲਕੁਲ ਨਵੇਂ ਤਰ੍ਹਾਂ ਦੀ ਕਾਮੇਡੀ ਹੈ, ਜਿਸ ’ਚ ਲੋਕ ਖੁੱਲ੍ਹ ਕੇ ਹੱਸਣਗੇ। ਮੈਨੂੰ ਪੁਰਾਣੇ ਦੌਰ ਦੀ ਗੋਵਿੰਦਾ ਦੀਆਂ ਫ਼ਿਲਮਾਂ, ‘ਹੇਰਾਫੇਰੀ’ ਵਰਗੀ ਕਾਮੇਡੀ ਯਾਦ ਆਉਂਦੀ ਹੈ, ਜਿੱਥੇ ਲੋਕ ਥੀਏਟਰ ਤੋਂ ਹੱਸਦੇ ਹੋਏ ਬਾਹਰ ਨਿਕਲਦੇ ਸਨ। ਮੈਨੂੰ ਲੱਗਾ ਕਿ ਉਸ ਖ਼ਾਲੀ ਜਗ੍ਹਾ ਨੂੰ ਭਰਨ ਦਾ ਇਹੋ ਸਹੀ ਸਮਾਂ ਹੈ। ਇਸ ਲਈ ਅਸੀਂ ਫ਼ਿਲਮ ਦੀ ਰਿਲੀਜ਼ ਅੱਗੇ ਵਧਾਉਣ ਦਾ ਫ਼ੈਸਲਾ ਲਿਆ।

ਖ਼ੁਦ ਨੂੰ ਕਦੇ ਸਟ੍ਰਗਲਿੰਗ ਨਹੀਂ ਮੰਨਿਆ, ਮੇਰਾ ਕੰਮ ਹੀ ਮੇਰੀ ਪਛਾਣ ਹੈ

Q ਇਸ ਕਿਰਦਾਰ ਨਾਲ ਤੁਹਾਡੀ ਕੋਈ ਸਮਾਨਤਾ ਨਹੀਂ ਹੈ। ਤੁਸੀਂ ਆਪਣੇ ਤਜਰਬੇ ਤੋਂ ਇਸ ’ਚ ਕੀ ਜੋੜਿਆ?

— ਮੈਂ ਕਦੇ ਆਪਣੀ ਜ਼ਿੰਦਗੀ ’ਚ ਖ਼ੁਦ ਨੂੰ ਸਟ੍ਰਗਲਿੰਗ ਨਹੀਂ ਕਿਹਾ। ਜਦੋਂ ਮੈਂ ਰਿਐਲਿਟੀ ਸ਼ੋਅ ਕਰ ਰਿਹਾ ਸੀ, ਉਦੋਂ ਵੀ ਬਹੁਤ ਕੁਝ ਝੱਲਿਆ ਪਰ ਮੈਂ ਕਦੇ ਸ਼ਿਕਾਇਤ ਨਹੀਂ ਕੀਤੀ। ਮੇਰਾ ਕੰਮ ਹਮੇਸ਼ਾ ਮੇਰੇ ਵੱਲੋਂ ਬੋਲਦਾ ਰਿਹਾ। ਪਹਿਲਾਂ ਮੇਰੇ ਡਾਂਸ ਨੇ ਮੈਨੂੰ ਪਛਾਣ ਦਿਵਾਈ, ਫ਼ਿਰ ਹੋਸਟਿੰਗ ਨੇ ਤੇ ਹੁਣ ਐਕਟਿੰਗ ਮੈਨੂੰ ਅੱਗੇ ਲੈ ਕੇ ਜਾ ਰਹੀ ਹੈ। ਮੈਂ ਕਦੇ ਸ਼ਿਕਾਇਤ ਕਰਨ ਜਾਂ ਖ਼ੁਦ ’ਤੇ ਤਰਸ ਖਾਣ ’ਚ ਵਿਸ਼ਵਾਸ ਨਹੀਂ ਕਰਦਾ। ਮੇਰੀ ਜ਼ਿੰਦਗੀ ਦਾ ਵੱਡਾ ਟੀਚਾ ਇੰਨਾ ਵੱਡਾ ਹੈ ਕਿ ਰਸਤੇ ਦੀਆਂ ਛੋਟੀਆਂ-ਛੋਟੀਆਂ ਮੁਸ਼ਕਿਲਾਂ ਉਸ ’ਚ ਸਿਰਫ਼ ਇਕ ਛੋਟੇ-ਜਿਹੇ ਬਿੰਦੂ ਵਾਂਗ ਹਨ।

Q ਤੁਸੀਂ ਦੱਸਿਆ ਕਿ ਫ਼ਿਲਮ ਦੀ ਰਿਲੀਜ਼ ਪ੍ਰੀਪੋਨ ਕੀਤੀ ਗਈ ਪਰ ਸ਼ੁਰੂਆਤ ਕਿਵੇਂ ਹੋਈ?

— ਅਸਲ ’ਚ ਮੇਰੀਆਂ ਦੂਜੀਆਂ ਫ਼ਿਲਮਾਂ ਵੀ ਆਉਣ ਵਾਲੀਆਂ ਹਨ, ਜਿਵੇਂ ‘ਦਿ ਪੈਰਾਡਾਈਜ਼’ ਉਸ ਤੋਂ ਬਾਅਦ ‘ਏ.ਬੀ.ਸੀ.ਡੀ.’ ਤੇ ਹੋਰ ਵੀ ਕਈ ਪ੍ਰਾਜੈਕਟ ਹਨ। ਜਦੋਂ ਮੈਂ ‘ਭਾਈ ਤੇਰਾ ਸਟਾਰ ਹੈ’ ਦੇਖੀ ਤਾਂ ਮੈਨੂੰ ਲੱਗਾ ਕਿ ਇਹ ਬਹੁਤ ਚੰਗੀ ਅਤੇ ਵੱਖ ਤਰ੍ਹਾਂ ਦੀ ਫ਼ਿਲਮ ਹੈ। ਅੱਜਕਲ ਫ਼ਰੈੱਸ਼ ਕਾਮੇਡੀ ਦੇਖਣ ਨੂੰ ਨਹੀਂ ਮਿਲਦੀ। ਨਵੇਂ ਚਿਹਰੇ ਹਨ, ਨਵੀਂ ਕਹਾਣੀ ਹੈ ਤੇ ਦਰਸ਼ਕ ਵੀ ਕੁਝ ਨਵਾਂ ਦੇਖਣਾ ਚਾਹੁੰਦੇ ਹਨ। ਉਦੋਂ ਹੀ ਮੈਂ ਨਿਰਦੇਸ਼ਕ ਨੂੰ ਕਿਹਾ ਕਿ ਇਸ ਫ਼ਿਲਮ ਨੂੰ ਉਡੀਕ ਨਾ ਕਰਵਾਓ, ਇਸ ਦੀ ਰਿਲੀਜ਼ ਪਹਿਲਾਂ ਕਰ ਦਿੰਦੇ ਹਾਂ। ਇਹ ਫ਼ੈਸਲਾ ਪੂਰੀ ਤਰ੍ਹਾਂ ਦਿਲ ਤੋਂ ਲਿਆ ਗਿਆ ਸੀ ਕਿਉਂਕਿ ਮੈਂ ਚਾਹੁੰਦਾ ਸੀ ਕਿ ਲੋਕ ਮੈਨੂੰ ਫ਼ਿਰ ਉਸੇ ਮਸਤੀ ਵਾਲੇ ਅੰਦਾਜ਼ ’ਚ ਦੇਖਣ, ਜਿਸ ’ਚ ਉਨ੍ਹਾਂ ਨੇ ਮੈਨੂੰ ਪਹਿਲਾਂ ਪਸੰਦ ਕੀਤਾ ਸੀ। ਉਸ ਤੋਂ ਬਾਅਦ ਮੈਂ ਆਪਣੀਆਂ ਗੰਭੀਰ ਫ਼ਿਲਮਾਂ ਨਾਲ ਵੀ ਆਵਾਂਗਾ।

Q ਅਦਾਕਾਰ ਵਜੋਂ ਅਜਿਹੀ ਕਿਹੜੀ ਚੀਜ਼ ਹੈ ਜਿਸ ਨੂੰ ਤੁਸੀਂ ਕਮੀਂ ਮੰਨਦੇ ਹੋ ਤੇ ਜਿਸ ’ਤੇ ਕੰਮ ਕਰਨਾ ਚਾਹੁੰਦੇ ਹੋ?

— ਮੈਨੂੰ ਲੱਗਦਾ ਹੈ ਕਿ ਅਦਾਕਾਰੀ ਸਿੱਖਣ ਦੀ ਕੋਈ ਮੰਜ਼ਿਲ ਨਹੀਂ ਹੁੰਦੀ। ਇਹ ਜ਼ਿੰਦਗੀ ਭਰ ਚੱਲਣ ਵਾਲੀ ਪ੍ਰਕਿਰਿਆ ਹੈ। ਅਦਾਕਾਰੀ ਇਕ ਸਮੁੰਦਰ ਵਾਂਗ ਹੈ, ਜਿਸ ’ਚ ਹਰ ਦਿਨ ਕੁਝ ਨਵਾਂ ਸਿੱਖਣ ਨੂੰ ਮਿਲਦਾ ਹੈ। ਤੁਹਾਨੂੰ ਲਗਾਤਾਰ ਖ਼ੁਦ ਨੂੰ ਬਦਲਣਾ ਤੇ ਬਿਹਤਰ ਬਣਾਉਣਾ ਪੈਂਦਾ ਹੈ। ਅੱਜ ਤੋਂ 10-12 ਸਾਲ ਪਹਿਲਾਂ ਮੈਂ ਸਟੇਜ ’ਤੇ ਜਾਂ ਡਾਂਸ ’ਚ ਜਿਹੋ ਜਿਹਾ ਸੀ, ਅੱਜ ਬਿਲਕੁਲ ਅਜਿਹਾ ਨਹੀਂ ਹਾਂ। ਸਮੇਂ ਦੇ ਨਾਲ ਮੈਂ ਖ਼ੁਦ ਨੂੰ ਬਦਲਿਆ ਹੈ ਤੇ ਅੱਗੇ ਵੀ ਬਦਲਦਾ ਰਹਾਂਗਾ।

ਇਹ ਉਦੋਂ ਹੀ ਸੰਭਵ ਹੈ ਜਦੋਂ ਤੁਸੀਂ ਲਗਾਤਾਰ ਆਪਣੇ ਉੱਪਰ ਕੰਮ ਕਰੋ ਅਤੇ ਆਪਣੀਆਂ ਕਮੀਆਂ ਨੂੰ ਪਛਾਣੋ। ਮੈਨੂੰ ਪਤਾ ਹੈ ਕਿ ਮੈਨੂੰ ਆਪਣੀ ਆਵਾਜ਼ ’ਤੇ ਹੋਰ ਮਿਹਨਤ ਕਰਨੀ ਹੈ। ਇਸ ਲਈ ਜਦੋਂ ਵੀ ਮੌਕਾ ਮਿਲਦਾ ਹੈ, ਮੈਂ ਕਿਸੇ ਕਲਾਸੀਕਲ ਸਿੰਗਰ ਜਾਂ ਮਿਊਜ਼ੀਸ਼ੀਅਨ ਨਾਲ ਬੈਠਦਾ ਹਾਂ। ਸਰੀਰਕ ਪ੍ਰਕਿਰਿਆ ’ਤੇ ਤਾਂ ਮੈਂ ਲਗਾਤਾਰ ਕੰਮ ਕਰਦਾ ਹੀ ਰਹਿੰਦਾ ਹਾਂ ਕਿਉਂਕਿ ਮੈਂ ਡਾਂਸਰ ਹਾਂ ਪਰ ਇਕ ਕਲਾਕਾਰ ਲਈ ਸਿੱਖਣਾ ਕਦੇ ਖ਼ਤਮ ਨਹੀਂ ਹੁੰਦਾ। ਭਾਵੇਂ ਇੰਪ੍ਰੋਵ ਥੀਏਟਰ ਹੋਵੇ, ਕੋਈ ਨਵੀਂ ਵਰਕਸ਼ਾਪ ਹੋਵੇ ਜਾਂ ਕੋਈ ਨਵਾਂ ਤਜਰਬਾ—ਹਰ ਚੀਜ਼ ਤੁਹਾਨੂੰ ਬਿਹਤਰ ਕਲਾਕਾਰ ਬਣਾਉਂਦੀ ਹੈ।

ਸਕ੍ਰਿਪਟ ਪੜ੍ਹਨ ਤੋਂ ਬਾਅਦ ਮੈਂ ਆਪਣੇ ਕਿਰਦਾਰ ਨੂੰ ਹੋਰ ਮਜ਼ਬੂਤ ਬਣਾਇਆ: ਨਿਹਾਰਿਕਾ

Q ਕੀ ਇਸ ਫ਼ਿਲਮ ਨੂੰ ਅਸੀਂ ਪੁਰਾਣੇ ਦੌਰ ਵਾਲੀ ਐਸਕੇਪਿਜ਼ਮ ਇੰਟਰਟੇਨਮੈਂਟ ਕਹਿ ਸਕਦੇ ਹਾਂ?

— ਦਰਸ਼ਕਾਂ ਲਈ ਇਹ ਨਿਸ਼ਚਿਤ ਰੂਪ ’ਚ ਮਨੋਰੰਜਨ ਹੈ ਪਰ ਇਸ ਦੀ ਸਭ ਤੋਂ ਖ਼ਾਸ ਗੱਲ ਇਹ ਹੈ ਕਿ ਇਹ ਕਾਫ਼ੀ ਰਿਲੇਟੇਬਲ ਵੀ ਹੈ। ਅਸੀਂ ਸਾਰੇ ਆਪਣੀ ਜ਼ਿੰਦਗੀ ’ਚ ਕਿਸੇ ਨਾ ਕਿਸੇ ਅਜਿਹੇ ਇਨਸਾਨ ਨੂੰ ਜਾਣਦੇ ਹਾਂ, ਜੋ ਦਿਲ ਦਾ ਬਹੁਤ ਚੰਗਾ ਹੁੰਦਾ ਹੈ ਪਰ ਉਸ ਦੀ ਸੋਚ ਤੇ ਹਰਕਤਾਂ ਥੋੜ੍ਹੀਆਂ ਅਜੀਬ ਜਾਂ ਓਵਰ ਕਾਨਫ਼ੀਡੈਂਟ ਹੁੰਦੀਆਂ ਹਨ। ਮੇਰੇ ਕਿਰਦਾਰ ਦੀ ਇਹੋ ਖ਼ਾਸੀਅਤ ਹੈ ਕਿ ਉਹ ਅਜਿਹੇ ਇਨਸਾਨ ਨੂੰ ਸਹਿਣ ਵੀ ਕਰਦੀ ਹੈ ਤੇ ਸਮਝਦੀ ਵੀ ਹੈ। ਫ਼ਿਲਮ ਦੇ ਸਾਰੇ ਕਿਰਦਾਰ ਬਹੁਤ ਅਸਲ ਹਨ। ਸਿਰਫ਼ ਹਾਲਾਤ ਥੋੜ੍ਹੇ ਵੱਖ ਹਨ ਪਰ ਕਿਰਦਾਰ ਪੂਰੀ ਤਰ੍ਹਾਂ ਅਸਲੀ।

Q ਤੁਹਾਡੇ ਕਿਰਦਾਰ ’ਚ ਅਜਿਹੀ ਕਿਹੜੀ ਗੱਲ ਸੀ ਜਿਸ ਨਾਲ ਤੁਸੀਂ ਖ਼ੁਦ ਨੂੰ ਜੋੜ ਨਹੀਂ ਪਾ ਰਹੇ ਸੀ ਤੇ ਉਸ ’ਚ ਕੀ ਬਦਲਾਅ ਕੀਤੇ?

— ਜਦੋਂ ਮੈਂ ਪਹਿਲੀ ਵਾਰ ਸਕ੍ਰਿਪਟ ਪੜ੍ਹੀ, ਉਦੋਂ ਮੇਰਾ ਕਿਰਦਾਰ ਕਾਫ਼ੀ ਭੋਲਾ, ਸ਼ਰਮੀਲਾ ਤੇ ਸਿੱਧਾ-ਸਾਦਾ ਸੀ। ਅਜਿਹਾ ਲੱਗਦਾ ਸੀ ਕਿ ਉਹ ਹੀਰੋ ਦੀ ਹਰ ਗੱਲ ਆਸਾਨੀ ਨਾਲ ਮੰਨ ਲਵੇਗੀ ਪਰ ਸ਼ੂਟਿੰਗ ਸ਼ੁਰੂ ਹੋਣ ਤੋਂ ਬਾਅਦ ਚੀਜ਼ਾਂ ਬਦਲ ਗਈਆਂ। ਰਾਘਵ ਦੀ ਸਕ੍ਰੀਨ ਐਨਰਜੀ ਇੰਨੀ ਜ਼ਿਆਦਾ ਸੀ ਕਿ ਜੇਕਰ ਮੈਂ ਓਨੀਂ ਹੀ ਭੋਲੀ ਤੇ ਸ਼ਾਂਤ ਰਹਿੰਦੀ ਤਾਂ ਦ੍ਰਿਸ਼ ਪ੍ਰਭਾਵਸ਼ਾਲੀ ਨਹੀਂ ਲੱਗਦਾ। ਇਸ ਲਈ ਮੈਂ ਆਪਣੇ ਕਿਰਦਾਰ ’ਚ ਬਦਲਾਅ ਕੀਤਾ। ਮਜ਼ਬੂਤ ਬਣੀ, ਜਵਾਬ ਦੇਣਾ ਸਿੱਖ ਗਈ ਪਰ ਅੰਦਰੋਂ ਉਸ ਦੀ ਚੰਗਿਆਈ ਬਰਕਰਾਰ ਰਹੀ। ਉਹ ਰਾਘਵ ਦੇ ਕਿਰਦਾਰ ਦੀਆਂ ਬੇਵਕੂਫ਼ੀਆਂ ਨੂੰ ਸਹਿੰਦੀ ਵੀ ਹੈ ਅਤੇ ਲੋੜ ਪੈਣ ’ਤੇ ਉਸ ਨੂੰ ਉਸੇ ਅੰਦਾਜ਼ ’ਚ ਜਵਾਬ ਵੀ ਦਿੰਦੀ ਹੈ।

Q ਤੁਹਾਡੇ ਲਈ ਇਸ ਫ਼ਿਲਮ ਤੱਕ ਪੁੱਜਣ ਦਾ ਸਫ਼ਰ ਕਿਹੋ ਜਿਹਾ ਰਿਹਾ? ਕੀ ਤੁਹਾਨੂੰ ਆਡੀਸ਼ਨ ਜਾਂ ਲੁੱਕ ਟੈਸਟ ਦੇਣਾ ਪਿਆ?

— ਮੇਰਾ ਲੁੱਕ ਟੈਸਟ ਹੋਇਆ ਸੀ। ਨਿਰਦੇਸ਼ਕ ਨੂੰ ਲੱਗਾ ਕਿ ਮੈਂ ਇਸ ਤਰ੍ਹਾਂ ਦੀ ਕਾਮੇਡੀ ਲਈ ਫਿੱਟ ਬੈਠਾਂਗੀ। ਸ਼ਾਇਦ ਉਨ੍ਹਾਂ ਨੂੰ ਲੱਗਾ ਕਿ ਮੈਂ ਅਸਲ ਜ਼ਿੰਦਗੀ ’ਚ ਵੀ ਥੋੜ੍ਹੀ-ਬਹੁਤ ਅਜਿਹੀ ਹੀ ਹਾਂ। ਇਸ ਲਈ ਉਨ੍ਹਾਂ ਨੂੰ ਲੱਗਾ ਕਿ ਇਹ ਕਿਰਦਾਰ ਮੇਰੇ ਲਈ ਬਿਲਕੁਲ ਸਹੀ ਰਹੇਗਾ ਤੇ ਮੈਨੂੰ ਵੀ ਇਹ ਰੋਲ ਕਾਫ਼ੀ ਪਸੰਦ ਆਇਆ।

Q ਤੁਹਾਡੇ ਹਿਸਾਬ ਨਾਲ ਅਜਿਹੀ ਕਿਹੜੀ ਚੀਜ਼ ਹੈ ਜੋ ਕਦੇ-ਕਦੇ ਤੁਹਾਨੂੰ ਅਦਾਕਾਰ ਵਜੋਂ ਰੋਕਦੀ ਹੈ ਜਾਂ ਚੁਣੌਤੀ ਦਿੰਦੀ ਹੈ?

— ਮੈਨੂੰ ਲੱਗਦਾ ਹੈ ਕਿ ਜਦੋਂ ਵੀ ਮੈਂ ਕੋਈ ਅਜਿਹੀ ਚੀਜ਼ ਕਰਦੀ ਹਾਂ ਜੋ ਪਹਿਲਾਂ ਕਦੇ ਨਹੀਂ ਕੀਤੀ ਹੁੰਦੀ ਤਾਂ ਕਈ ਵਾਰ ਮੈਂ ਆਪਣੇ ਹੀ ਦਿਮਾਗ ’ਚ ਉਲਝ ਜਾਂਦੀ ਹਾਂ। ਜਦੋਂ ਅਜਿਹਾ ਹੁੰਦਾ ਹੈ, ਤਾਂ ਮੈਂ ਆਪਣੇ ਹੀ ਵਿਚਾਰਾਂ ’ਚ ਫ਼ਸ ਜਾਂਦੀ ਹਾਂ ਅਤੇ ਉੱਥੋਂ ਬਾਹਰ ਨਿਕਲਣਾ ਥੋੜ੍ਹਾ ਮੁਸ਼ਕਿਲ ਹੋ ਜਾਂਦਾ ਹੈ। ਮੇਰੀ ਸਭ ਤੋਂ ਵੱਡੀ ਚੁਣੌਤੀ ਇਹੋ ਹੈ ਕਿ ਮੈਂ ਬਹੁਤ ਜ਼ਿਆਦਾ ਓਵਰਥਿੰਕ ਕਰਦੀ ਹਾਂ।