ਬਾਲੀਵੁੱਡ ਬਨਾਮ ਸਾਊਥ ਇੰਡਸਟਰੀ ’ਤੇ ਬੋਲੇ ਅਕਸ਼ੇ ਕੁਮਾਰ, ਕਿਹਾ- ‘ਸਾਨੂੰ ਇਕ ਇੰਡਸਟਰੀ...’

ਮੁੰਬਈ (ਬਿਊਰੋ)– ਸਾਊਥ ਦੀਆਂ ਫ਼ਿਲਮਾਂ ਜਿਸ ਤਰ੍ਹਾਂ ਸਿਨੇਮਾਘਰਾਂ ’ਚ ਤਹਿਲਕਾ ਮਚਾ ਰਹੀਆਂ ਹਨ, ਉਸ ਤੋਂ ਬਾਅਦ ਬਾਲੀਵੁੱਡ ਬਨਾਮ ਸਾਊਥ ਇੰਡਸਟਰੀ ਦੀ ਡਿਬੇਟ ਸ਼ੁਰੂ ਹੋ ਗਈ ਹੈ। ਜਿਥੇ ਇਕ ਪਾਸੇ ਹਾਲ ਹੀ ’ਚ ਰਿਲੀਜ਼ ਹੋਈਆਂ ਕਈ ਬਾਲੀਵੁੱਡ ਫ਼ਿਲਮਾਂ ਕੁਝ ਖ਼ਾਸ ਕਮਾਲ ਨਹੀਂ ਕਰ ਪਾਈਆਂ, ਉਥੇ ਸਾਊਥ ਦੀਆਂ ਫ਼ਿਲਮਾਂ ਨੇ ਰਿਕਾਰਡਤੋੜ ਕਮਾਈ ਕੀਤੀ ਹੈ।

ਅਜਿਹੇ ’ਚ ਸੈਲੇਬ੍ਰਿਟੀਜ਼ ਵਲੋਂ ਵੀ ਇਸ ’ਤੇ ਪ੍ਰਤੀਕਿਰਿਆਵਾਂ ਆ ਰਹੀਆਂ ਹਨ। ਸਾਊਥ ਫ਼ਿਲਮਾਂ ਦੀ ਪ੍ਰਸਿੱਧੀ ਨੂੰ ਦੇਖਦਿਆਂ ਭਾਸ਼ਾ ’ਤੇ ਵੀ ਵਿਵਾਦ ਛਿੜ ਗਿਆ ਹੈ। ਹੁਣ ਇਸ ਪੂਰੇ ਮਾਮਲੇ ’ਚ ਅਕਸ਼ੇ ਕੁਮਾਰ ਨੇ ਆਪਣਾ ਜਵਾਬ ਦਿੱਤਾ ਹੈ। ਅਕਸ਼ੇ ਕੋਲੋਂ ਜਦੋਂ ਇਸ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਵੱਖ-ਵੱਖ ਇੰਡਸਟਰੀ ਕਿਹਾ ਹੀ ਕਿਉਂ ਜਾਂਦਾ ਹੈ। ਆਖਿਰ ਕਿਉਂ ਨਹੀਂ ਇਕ ਇੰਡਸਟਰੀ ਕਿਹਾ ਜਾਣਾ ਚਾਹੀਦਾ।

ਅਕਸ਼ੇ ਨੇ ਅੱਗੇ ਕਿਹਾ ਕਿ ਸਾਰੀਆਂ ਭਾਸ਼ਾਵਾਂ ਬਹੁਤ ਵਧੀਆ ਹਨ ਤੇ ਅਸੀਂ ਆਪਣੀ ਮਾਂ ਬੋਲੀ ’ਚ ਗੱਲ ਕਰਦੇ ਹਾਂ। ਇੰਡੀਆ ਟੁਡੇ ਨਾਲ ਗੱਲਬਾਤ ਕਰਦਿਆਂ ਅਕਸ਼ੇ ਕਹਿੰਦੇ ਹਨ, ‘‘ਲੋਕ ਸਾਡੇ ਟੈਲੇਂਟ ’ਤੇ ਸਵਾਲ ਚੁੱਕਦੇ ਹਨ। ਇਹ ਟੈਲੇਂਟ ਬਾਰੇ ਨਹੀਂ ਹੈ, ਸਾਡੇ ਸਾਰਿਆਂ ਕੋਲ ਹੈ, ਇਹ ਦਰਸ਼ਕਾਂ ਨਾਲ ਜੁੜਨ ਵਾਲੀ ਕਹਾਣੀ ਬਾਰੇ ਹੈ। ਹੁਣ ਟਵਿਟਰ ’ਤੇ ਹਰ ਕੋਈ ਕ੍ਰਿਟਿਕ ਬਣ ਗਿਆ ਹੈ ਤੇ ਹਰ ਗੱਲ ’ਤੇ ਆਪਣੀ ਰਾਏ ਰੱਖਣਾ ਚਾਹੁੰਦੇ ਹਨ। ਕਿਉਂ?’’

ਇਹ ਖ਼ਬਰ ਵੀ ਪੜ੍ਹੋ : ਕਾਨਸ 2022 ’ਚ ਹਿਨਾ ਖ਼ਾਨ ਨੂੰ ਕੀਤਾ ਨਜ਼ਰਅੰਦਾਜ਼, ਇਸ ਗੱਲੋਂ ਪ੍ਰਗਟਾਈ ਨਾਰਾਜ਼ਗੀ

ਅਕਸ਼ੇ ਨੇ ਅੱਗੇ ਕਿਹਾ, ‘‘ਅਸੀਂ ਸਾਰੇ ਆਪਣਾ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਾਂ। ਇਹ ਦੁਖੀ ਕਰਨ ਵਾਲੀ ਗੱਲ ਹੈ ਕਿ ਇਹ ਬਹਿਸ ਹੋ ਰਹੀ ਹੈ ਤੇ ਅਸੀਂ ਸਾਰੇ ਇਸ ਦੇ ਸ਼ਿਕਾਰ ਹੋ ਰਹੇ ਹਾਂ। ਸਾਨੂੰ ਇਕ ਇੰਡਸਟਰੀ ਕਿਉਂ ਨਹੀਂ ਕਿਹਾ ਜਾ ਸਕਦਾ? ਨਾਰਥ ਤੇ ਸਾਊਥ ਇੰਡਸਟਰੀ ਕਿਉਂ ਕਿਹਾ ਜਾ ਰਿਹਾ ਹੈ? ਸਾਡੀਆਂ ਸਾਰੀਆਂ ਭਾਸ਼ਾਵਾਂ ਵਧੀਆ ਹਨ। ਅਸੀਂ ਆਪਣੀ ਮਾਂ ਬੋਲੀ ’ਚ ਗੱਲ ਕਰ ਰਹੇ ਹਾਂ ਤੇ ਅਸੀਂ ਸਾਰੇ ਸੁੰਦਰ ਹਾਂ। ਇਹ ਦੁਖੀ ਕਰਨ ਵਾਲੀ ਗੱਲ ਹੈ ਕਿ ਅਸੀਂ ਖ਼ੁਦ ਨੂੰ ਵੰਡਦੇ ਰਹਿੰਦੇ ਹਾਂ।’’

ਅਕਸ਼ੇ ਨੇ ਕਿਹਾ ਕਿ ਉਹ ਲੋਕ ਜੇਕਰ ਬੋਲ ਰਹੇ ਹਨ ਤਾਂ ਤੁਸੀਂ ਕਿਉਂ ਜਵਾਬ ਦੇ ਰਹੇ ਹੋ, ਉਹ ਕੀ ਕਹਿੰਦੇ ਹਨ, ਮੈਨੂੰ ਉਸ ਨਾਲ ਮਤਲਬ ਨਹੀਂ ਹੈ। ਮੈਨੂੰ ਲੱਗਦਾ ਹੈ ਕਿ ਇਹ ਠੀਕ ਨਹੀਂ ਹੈ। ਸਾਨੂੰ ਮਿਲ ਕੇ ਕੰਮ ਕਰਨਾ ਹੋਵੇਗਾ, ਉਦੋਂ ਹੀ ਫਾਇਦਾ ਹੋਵੇਗਾ।

ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।