"ਵਿਆਹ ਕਰਕੇ ਤੁਸੀਂ ਕਿਹੜਾ ਤੀਰ ਮਾਰ ਲਿਆ", ਟ੍ਰੋਲ ਕਰਨ ਵਾਲੇ ਨੂੰ ਅਦਾਕਾਰਾ ਨੇ ਦਿੱਤਾ ਮੂੰਹ-ਤੋੜ ਜਵਾਬ

ਮੁੰਬਈ : ਬਾਲੀਵੁੱਡ ਅਦਾਕਾਰਾ ਅਤੇ ਸ਼ਿਲਪਾ ਸ਼ੈੱਟੀ ਦੀ ਭੈਣ ਸ਼ਮਿਤਾ ਸ਼ੈੱਟੀ ਆਪਣੀ ਬੇਬਾਕੀ ਕਾਰਨ ਸੋਸ਼ਲ ਮੀਡੀਆ 'ਤੇ ਸੁਰਖੀਆਂ ਵਿੱਚ ਹੈ। 27 ਮਈ 2026 ਨੂੰ ਸ਼ਮਿਤਾ ਨੇ ਆਪਣੇ ਇੰਸਟਾਗ੍ਰਾਮ 'ਤੇ ਇੱਕ ਟ੍ਰੋਲਰ ਦੀ ਜੰਮ ਕੇ ਕਲਾਸ ਲਗਾਈ, ਜੋ ਉਸ ਦੀ ਉਮਰ ਅਤੇ ਵਿਆਹ ਨੂੰ ਲੈ ਕੇ ਲਗਾਤਾਰ ਭੱਦੇ ਕਮੈਂਟ ਕਰ ਰਿਹਾ ਸੀ।

ਦਰਅਸਲ, ਪੰਕਜ ਮਿੱਤਲ ਨਾਮਕ ਇੱਕ ਯੂਜ਼ਰ ਨੇ ਸ਼ਮਿਤਾ ਦੀ ਪੋਸਟ 'ਤੇ ਕਮੈਂਟ ਕਰਦਿਆਂ ਉਸ ਨੂੰ ਉਸ ਦੀ ਉਮਰ ਦਾ ਤਾਣਾ ਮਾਰਿਆ ਸੀ। ਇਸ 'ਤੇ ਪਲਟਵਾਰ ਕਰਦਿਆਂ ਸ਼ਮਿਤਾ ਨੇ ਲਿਖਿਆ, "ਹਾਂ, ਮੈਂ ਅਲੱਗ ਦਿਖਾਂਗੀ, ਸਮੇਂ ਦੇ ਨਾਲ ਚੀਜ਼ਾਂ ਬਦਲਦੀਆਂ ਹਨ ਅਤੇ ਇਹ ਜ਼ਿੰਦਗੀ ਦਾ ਕੁਦਰਤੀ ਤਰੀਕਾ ਹੈ। ਮੈਂ ਆਪਣੀ ਉਮਰ ਦੇ ਹਿਸਾਬ ਨਾਲ ਸਿਹਤਮੰਦ, ਫਿੱਟ ਅਤੇ ਖੁਸ਼ ਹਾਂ ਅਤੇ ਮੇਰੇ ਲਈ ਇਹੀ ਮਾਇਨੇ ਰੱਖਦਾ ਹੈ"।

ਟ੍ਰੋਲਰ ਨੇ ਇੱਥੇ ਹੀ ਬੱਸ ਨਹੀਂ ਕੀਤੀ, ਉਸਨੇ ਅੱਗੇ ਲਿਖਿਆ ਕਿ ਜੇਕਰ ਸ਼ਮਿਤਾ ਨੇ ਸਮੇਂ ਸਿਰ ਵਿਆਹ ਕਰ ਲਿਆ ਹੁੰਦਾ ਤਾਂ ਅੱਜ ਉਸਦੇ ਬੱਚੇ ਵੱਡੇ ਹੁੰਦੇ। ਇਸ ਦਾ ਜਵਾਬ ਦਿੰਦਿਆਂ ਅਦਾਕਾਰਾ ਭੜਕ ਗਈ ਅਤੇ ਕਿਹਾ, "ਭਾਈ, ਤੁਸੀਂ ਵਿਆਹ ਕਰਕੇ ਕਿਹੜਾ ਤੀਰ ਮਾਰ ਲਿਆ ਹੈ? ਤੁਸੀਂ ਕੀ ਉਖਾੜ ਲਿਆ?" ਉਸਨੇ ਸਵਾਲ ਕੀਤਾ ਕਿ ਅਜਿਹੇ ਲੋਕ ਸਿੰਗਲ ਔਰਤਾਂ ਨੂੰ ਸਿਰਫ ਉਮਰ ਦਾ ਤਾਣਾ ਮਾਰਨ ਲਈ ਫਾਲੋ ਹੀ ਕਿਉਂ ਕਰਦੇ ਹਨ।

ਸ਼ਮਿਤਾ ਨੇ ਆਪਣੀ ਪੁਰਾਣੇ ਜ਼ਮਾਨੇ ਦੀ ਸੋਚ ਥੋਪਣ ਵਾਲੇ ਇਸ ਟ੍ਰੋਲਰ ਨੂੰ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ ਉਹ ਉਸ 'ਤੇ ਇੱਕ ਅਹਿਸਾਨ ਕਰੇ ਅਤੇ ਉਸ ਨੂੰ ਤੁਰੰਤ ਅਨਫਾਲੋ ਕਰ ਦੇਵੇ। ਸੋਸ਼ਲ ਮੀਡੀਆ 'ਤੇ ਸ਼ਮਿਤਾ ਦੇ ਇਸ ਦਲੇਰਾਨਾ ਅੰਦਾਜ਼ ਦੀ ਕਾਫੀ ਚਰਚਾ ਹੋ ਰਹੀ ਹੈ।

ਜ਼ਿਕਰਯੋਗ ਹੈ ਕਿ ਸ਼ਮਿਤਾ ਸ਼ੈੱਟੀ 'ਮੋਹੱਬਤਾਂ', 'ਜ਼ਹਿਰ' ਅਤੇ 'ਮੇਰੇ ਯਾਰ ਕੀ ਸ਼ਾਦੀ ਹੈ' ਵਰਗੀਆਂ ਫਿਲਮਾਂ ਤੋਂ ਇਲਾਵਾ 'ਬਿੱਗ ਬੌਸ 15' ਅਤੇ 'ਖਤਰੋਂ ਕੇ ਖਿਲਾੜੀ 9' ਵਰਗੇ ਰਿਐਲਿਟੀ ਸ਼ੋਅਜ਼ ਦਾ ਹਿੱਸਾ ਰਹਿ ਚੁੱਕੀ ਹੈ।