ਸ਼ੇਅਰ ਬਾਜ਼ਾਰ ''ਚ ਹਾਹਾਕਾਰ: ਸੈਂਸੈਕਸ 550 ਅੰਕ ਟੁੱਟਿਆ ; ਆਟੋ ਤੇ ਬੈਂਕਿੰਗ ਸੈਕਟਰ ''ਚ ਭਾਰੀ ਬਿਕਵਾਲੀ

ਬਿਜ਼ਨੈੱਸ ਡੈਸਕ : ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਅੱਜ ਯਾਨੀ ਬੁੱਧਵਾਰ, 20 ਮਈ ਨੂੰ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਗਲੋਬਲ ਬਾਜ਼ਾਰਾਂ ਤੋਂ ਮਿਲੇ ਨਕਾਰਾਤਮਕ ਸੰਕੇਤਾਂ ਕਾਰਨ ਭਾਰਤੀ ਸੂਚਕਾਂਕ ਲਾਲ ਨਿਸ਼ਾਨ 'ਤੇ ਕਾਰੋਬਾਰ ਕਰ ਰਹੇ ਹਨ। ਸੈਂਸੈਕਸ 550 ਅੰਕ (0.75%) ਦੀ ਗਿਰਾਵਟ ਨਾਲ 74,647 'ਤੇ ਆ ਗਿਆ ਹੈ, ਜਦਕਿ ਨਿਫਟੀ ਵੀ 170 ਅੰਕ (0.72%) ਡਿੱਗ ਕੇ 23,450 ਦੇ ਪੱਧਰ 'ਤੇ ਕਾਰੋਬਾਰ ਕਰ ਰਿਹਾ ਹੈ।

ਇਨ੍ਹਾਂ ਸੈਕਟਰਾਂ ਵਿੱਚ ਦੇਖਣ ਨੂੰ ਮਿਲੀ ਸਭ ਤੋਂ ਵੱਧ ਗਿਰਾਵਟ

ਅੱਜ ਦੇ ਕਾਰੋਬਾਰ ਦੌਰਾਨ ਸਭ ਤੋਂ ਵੱਧ ਬਿਕਵਾਲੀ ਆਟੋ, ਬੈਂਕਿੰਗ ਅਤੇ ਮੈਟਲ ਸ਼ੇਅਰਾਂ ਵਿੱਚ ਦੇਖੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ, ਰਿਲਾਇੰਸ, ਏਅਰਟੈੱਲ ਅਤੇ ਟੀ.ਸੀ.ਐੱਸ. (TCS) ਵਰਗੀਆਂ ਵੱਡੀਆਂ ਕੰਪਨੀਆਂ ਦੀ ਮਾਰਕੀਟ ਵੈਲਿਊ ਵਿੱਚ ਵੀ ਕਮੀ ਦਰਜ ਕੀਤੀ ਗਈ ਹੈ। ਬਾਜ਼ਾਰ ਵਿੱਚ ਲਗਾਤਾਰ ਹੋ ਰਹੀ ਗਿਰਾਵਟ ਕਾਰਨ ਹੁਣ ਦੁਨੀਆ ਦੀਆਂ ਚੋਟੀ ਦੀਆਂ 100 ਕੰਪਨੀਆਂ ਵਿੱਚ ਇੱਕ ਵੀ ਭਾਰਤੀ ਕੰਪਨੀ ਸ਼ਾਮਲ ਨਹੀਂ ਰਹੀ।

ਵਿਦੇਸ਼ੀ ਨਿਵੇਸ਼ਕਾਂ ਨੇ ਖਿੱਚੇ ਹੱਥ 

ਬਾਜ਼ਾਰ ਵਿੱਚ ਗਿਰਾਵਟ ਦਾ ਇੱਕ ਵੱਡਾ ਕਾਰਨ ਵਿਦੇਸ਼ੀ ਨਿਵੇਸ਼ਕਾਂ ਵੱਲੋਂ ਕੀਤੀ ਜਾ ਰਹੀ ਬਿਕਵਾਲੀ ਹੈ। ਅੰਕੜਿਆਂ ਅਨੁਸਾਰ ਵਿਦੇਸ਼ੀ ਨਿਵੇਸ਼ਕਾਂ (FII) ਨੇ 2,458 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ ਹਨ। ਦੂਜੇ ਪਾਸੇ, ਘਰੇਲੂ ਨਿਵੇਸ਼ਕਾਂ (DII) ਨੇ 3,802 ਕਰੋੜ ਰੁਪਏ ਦੀ ਖਰੀਦਦਾਰੀ ਕੀਤੀ ਹੈ, ਪਰ ਇਹ ਬਾਜ਼ਾਰ ਨੂੰ ਸੰਭਾਲਣ ਲਈ ਕਾਫੀ ਨਹੀਂ ਰਹੀ।

ਗਲੋਬਲ ਬਾਜ਼ਾਰਾਂ ਦਾ ਹਾਲ 

ਸਿਰਫ਼ ਭਾਰਤੀ ਬਾਜ਼ਾਰ ਹੀ ਨਹੀਂ, ਸਗੋਂ ਏਸ਼ੀਆਈ ਅਤੇ ਅਮਰੀਕੀ ਬਾਜ਼ਾਰਾਂ ਵਿੱਚ ਵੀ ਮੰਦੀ ਦਾ ਦੌਰ ਹੈ।
ਏਸ਼ੀਆਈ ਬਾਜ਼ਾਰ: ਦੱਖਣੀ ਕੋਰੀਆ ਦਾ ਕੋਸਪੀ 2.83% ਅਤੇ ਜਾਪਾਨ ਦਾ ਨਿੱਕੇਈ 1.30% ਡਿੱਗਿਆ ਹੈ।
ਅਮਰੀਕੀ ਬਾਜ਼ਾਰ: ਬੀਤੇ ਦਿਨ ਡਾਓ ਜੋਨਸ ਅਤੇ ਨੈਸਡੈਕ ਵਿੱਚ ਵੀ ਗਿਰਾਵਟ ਦਰਜ ਕੀਤੀ ਗਈ ਸੀ।

ਰੁਪਿਆ ਹੇਠਲੇ ਪੱਧਰ 'ਤੇ, ਸੋਨਾ-ਚਾਂਦੀ ਹੋਏ ਮਹਿੰਗੇ 

ਆਰਥਿਕ ਮੋਰਚੇ 'ਤੇ ਹੋਰ ਚਿੰਤਾਵਾਂ ਵੀ ਵਧੀਆਂ ਹਨ। ਭਾਰਤੀ ਰੁਪਿਆ 96.67 ਦੇ ਹੁਣ ਤੱਕ ਦੇ ਸਭ ਤੋਂ ਹੇਠਲੇ ਪੱਧਰ (All-time low) 'ਤੇ ਪਹੁੰਚ ਗਿਆ ਹੈ। ਇਸ ਦੇ ਨਾਲ ਹੀ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਭਾਰੀ ਉਛਾਲ ਆਇਆ ਹੈ। ਸੋਨਾ 1,338 ਰੁਪਏ ਵਧ ਕੇ 1.59 ਲੱਖ ਰੁਪਏ ਪ੍ਰਤੀ ਦਸ ਗ੍ਰਾਮ 'ਤੇ ਪਹੁੰਚ ਗਿਆ ਹੈ, ਜਦਕਿ ਚਾਂਦੀ 2.69 ਲੱਖ ਰੁਪਏ ਪ੍ਰਤੀ ਕਿਲੋ ਦੇ ਪੱਧਰ 'ਤੇ ਹੈ।

ਆਮ ਆਦਮੀ 'ਤੇ ਮਾਰ

ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ਵਧੀਆਂ ਬਾਜ਼ਾਰ ਦੀ ਗਿਰਾਵਟ ਦੇ ਵਿਚਕਾਰ ਆਮ ਜਨਤਾ ਨੂੰ ਮਹਿੰਗਾਈ ਦਾ ਝਟਕਾ ਵੀ ਲੱਗਾ ਹੈ। ਪਿਛਲੇ 5 ਦਿਨਾਂ ਵਿੱਚ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿੱਚ 3.90 ਰੁਪਏ ਦਾ ਵਾਧਾ ਹੋਇਆ ਹੈ। ਇਰਾਨ ਜੰਗ ਕਾਰਨ ਤੇਲ ਦੀ ਸਪਲਾਈ ਅਜੇ ਵੀ ਪ੍ਰਭਾਵਿਤ ਹੋ ਰਹੀ ਹੈ।