ਸ਼ੇਅਰ ਬਾਜ਼ਾਰ 'ਚ ਹੁਣ ਤੱਕ ਦੀ ਸਭ ਤੋਂ ਵੱਡੀ ਤਬਾਹੀ ਕਾਰਨ ਕਰੋੜਾਂ ਦਾ ਨੁਕਸਾਨ, ਮਾਹਰਾਂ ਦੀ ਨਿਵੇਸ਼ਕਾਂ ਲਈ ਸਲਾਹ

ਬਿਜ਼ਨੈੱਸ ਡੈਸਕ — ਭਾਰਤੀ ਸ਼ੇਅਰ ਬਾਜ਼ਾਰ 'ਚ ਅੱਜ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲੀ, ਜਿਸ ਨਾਲ ਨਿਵੇਸ਼ਕਾਂ ਨੂੰ ਵੱਡਾ ਝਟਕਾ ਲੱਗਾ ਹੈ। ਦੋਵੇਂ ਪ੍ਰਮੁੱਖ ਸੂਚਕਾਂਕ ਨਿਫਟੀ ਅਤੇ ਸੈਂਸੈਕਸ 'ਚ ਵੱਡੀ ਗਿਰਾਵਟ ਦਰਜ ਕੀਤੀ ਗਈ, ਜਿਸ ਕਾਰਨ ਲੱਖਾਂ ਨਿਵੇਸ਼ਕਾਂ ਨੂੰ ਕਰੋੜਾਂ ਰੁਪਏ ਦਾ ਨੁਕਸਾਨ ਹੋਇਆ। ਹਫਤੇ ਦੇ ਪਹਿਲੇ ਕਾਰੋਬਾਰੀ ਦਿਨ, ਸ਼ੁਰੂਆਤੀ ਘੰਟਿਆਂ ਵਿੱਚ ਸੈਂਸੈਕਸ ਅਤੇ ਨਿਫਟੀ ਦੋਵਾਂ ਵਿੱਚ ਗਿਰਾਵਟ ਦੇਖੀ ਗਈ। ਸੈਂਸੈਕਸ 3,939.68 ਅੰਕ ਡਿੱਗ ਕੇ 71,425.01 'ਤੇ ਖੁੱਲ੍ਹਿਆ, ਜਦੋਂ ਕਿ ਨਿਫਟੀ 1,160.8 ਅੰਕ ਡਿੱਗ ਕੇ 21,743.65 'ਤੇ ਖੁੱਲ੍ਹਿਆ। ਇਸ ਤੋਂ ਇਲਾਵਾ ਭਾਰਤੀ ਰੁਪਿਆ ਵੀ ਅਮਰੀਕੀ ਡਾਲਰ ਦੇ ਮੁਕਾਬਲੇ 30 ਪੈਸੇ ਡਿੱਗ ਕੇ 85.74 ਦੇ ਪੱਧਰ 'ਤੇ ਪਹੁੰਚ ਗਿਆ। ਇਸ ਗਿਰਾਵਟ ਨੇ ਨਿਵੇਸ਼ਕਾਂ ਵਿੱਚ ਅਸਥਿਰਤਾ ਅਤੇ ਚਿੰਤਾ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ।

ਗਿਰਾਵਟ ਦਾ ਕਾਰਨ ਕੀ ਹੈ?

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਦੁਨੀਆ ਭਰ ਦੇ ਦੇਸ਼ਾਂ 'ਤੇ ਭਾਰੀ ਟੈਰਿਫ ਲਗਾਏ ਹਨ, ਜਿਸ ਤੋਂ ਬਾਅਦ ਕਈ ਦੇਸ਼ਾਂ ਨੇ ਅਮਰੀਕਾ 'ਤੇ ਜਵਾਬੀ ਟੈਰਿਫ ਵਧਾ ਦਿੱਤੇ ਹਨ। ਇਸ ਵਿੱਚ ਚੀਨ ਅਤੇ ਕੈਨੇਡਾ ਵਰਗੇ ਵੱਡੇ ਦੇਸ਼ ਸ਼ਾਮਲ ਹਨ। ਇਸ ਵਧਦੇ ਵਪਾਰ ਯੁੱਧ ਨੇ ਵਿਸ਼ਵ ਪੱਧਰ 'ਤੇ ਆਰਥਿਕ ਤਣਾਅ ਨੂੰ ਵਧਾ ਦਿੱਤਾ ਹੈ ਅਤੇ ਨਤੀਜੇ ਵਜੋਂ ਮਹਿੰਗਾਈ ਅਤੇ ਮੰਦੀ ਦੇ ਖ਼ਤਰੇ ਨੂੰ ਡੂੰਘਾ ਕੀਤਾ ਹੈ। ਇਸ ਸਥਿਤੀ ਕਾਰਨ ਦੁਨੀਆ ਭਰ ਦੇ ਬਾਜ਼ਾਰਾਂ ਵਿੱਚ ਭਾਰੀ ਗਿਰਾਵਟ ਆਈ ਹੈ।

ਗਿਰਾਵਟ ਦਾ ਮੁੱਖ ਕਾਰਨ ਗਲੋਬਲ ਬਾਜ਼ਾਰਾਂ 'ਚ ਅਸਥਿਰਤਾ ਵੀ ਹੈ, ਜਿੱਥੇ ਦੁਨੀਆ ਭਰ ਦੇ ਪ੍ਰਮੁੱਖ ਬਾਜ਼ਾਰਾਂ 'ਚ ਭਾਰੀ ਬਿਕਵਾਲੀ ਦੇਖਣ ਨੂੰ ਮਿਲੀ। ਪਿਛਲੇ ਹਫਤੇ ਅਮਰੀਕੀ ਬਾਜ਼ਾਰਾਂ 'ਚ ਭਾਰੀ ਗਿਰਾਵਟ ਤੋਂ ਬਾਅਦ ਹੁਣ ਭਾਰਤੀ ਬਾਜ਼ਾਰ 'ਚ ਵੀ ਇਸ ਦਾ ਅਸਰ ਦੇਖਣ ਨੂੰ ਮਿਲਿਆ ਹੈ। ਇਸ ਤੋਂ ਇਲਾਵਾ ਘਰੇਲੂ ਆਰਥਿਕ ਅੰਕੜਿਆਂ ਅਤੇ ਕੰਪਨੀਆਂ ਦੇ ਤਿਮਾਹੀ ਨਤੀਜਿਆਂ ਨੇ ਵੀ ਨਿਵੇਸ਼ਕਾਂ ਦੇ ਮਨੋਬਲ ਨੂੰ ਪ੍ਰਭਾਵਿਤ ਕੀਤਾ। ਨਿਵੇਸ਼ਕਾਂ ਵਿੱਚ ਵਧਦੀ ਅਸਥਿਰਤਾ ਅਤੇ ਕਮਜ਼ੋਰ ਆਰਥਿਕ ਸੂਚਕਾਂ ਨੇ ਬਾਜ਼ਾਰ ਵਿੱਚ ਦਹਿਸ਼ਤ ਪੈਦਾ ਕਰ ਦਿੱਤੀ ਹੈ।

ਨਿਵੇਸ਼ਕਾਂ ਲਈ ਸਲਾਹ

ਮਾਹਿਰਾਂ ਦਾ ਕਹਿਣਾ ਹੈ ਕਿ ਅਜਿਹੇ ਹਾਲਾਤ 'ਚ ਨਿਵੇਸ਼ਕਾਂ ਨੂੰ ਧੀਰਜ ਰੱਖਣ ਅਤੇ ਲੰਬੀ ਮਿਆਦ ਦੀ ਨਿਵੇਸ਼ ਰਣਨੀਤੀ ਅਪਣਾਉਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ। ਥੋੜ੍ਹੇ ਸਮੇਂ ਦੇ ਬਾਜ਼ਾਰ ਦੇ ਉਤਰਾਅ-ਚੜ੍ਹਾਅ ਤੋਂ ਘਬਰਾਉਣ ਦੀ ਬਜਾਏ, ਨਿਵੇਸ਼ਕਾਂ ਨੂੰ ਲੰਬੇ ਸਮੇਂ ਲਈ ਮਜ਼ਬੂਤ ​​ਕੰਪਨੀਆਂ ਦੇ ਸ਼ੇਅਰਾਂ ਵਿੱਚ ਨਿਵੇਸ਼ ਕਰਨਾ ਚਾਹੀਦਾ ਹੈ। ਇਸ ਦੇ ਨਾਲ ਹੀ, ਬ੍ਰੋਕਰੇਜ ਹਾਊਸ ਨੇ ਨਿਵੇਸ਼ਕਾਂ ਨੂੰ ਇੱਕ ਸੰਦੇਸ਼ ਦਿੱਤਾ ਹੈ ਕਿ ਗਲੋਬਲ ਮਾਰਕੀਟ ਦੀ ਮੌਜੂਦਾ ਸਥਿਤੀ ਅਤੇ ਸਾਡੀ RMS ਨੀਤੀ ਅਨੁਸਾਰ, ਨਕਦ ਹਿੱਸੇ ਵਿੱਚ ਇੰਟਰਾਡੇ ਵਪਾਰ (ਲਾਂਗ ਅਤੇ ਸ਼ੋਰਟ) ਅਸਥਾਈ ਤੌਰ 'ਤੇ ਬੰਦ ਕਰ ਦਿੱਤਾ ਗਿਆ ਹੈ। ਇਸ ਕਰਕੇ ਨਿਵੇਸ਼ਕ ਆਪਣੀਆਂ ਵਪਾਰਕ ਯੋਜਨਾਵਾਂ ਨੂੰ ਬਾਜ਼ਾਰ ਦੀ ਸਥਿਤੀ ਅਨੁਸਾਰ ਵਿਵਸਥਿਤ ਕਰਨ।

ਟਾਟਾ ਮੋਟਰਜ਼, ਲਾਰਸਨ ਐਂਡ ਟੂਬਰੋ, ਇਨਫੋਸਿਸ, ਰਿਲਾਇੰਸ ਇੰਡਸਟਰੀਜ਼ ਸਮੇਤ ਕਈ ਵੱਡੀਆਂ ਕੰਪਨੀਆਂ ਦੇ ਸ਼ੇਅਰਾਂ 'ਚ ਭਾਰੀ ਗਿਰਾਵਟ ਦਰਜ ਕੀਤੀ ਗਈ ਜੋ 6 ਫੀਸਦੀ ਤੋਂ ਜ਼ਿਆਦਾ ਡਿੱਗ ਗਈ।

ਟਾਟਾ ਮੋਟਰਜ਼: 8.02% ਗਿਰਾਵਟ

ਲਾਰਸਨ ਐਂਡ ਟੂਬਰੋ: 7.02% ਗਿਰਾਵਟ

ਇਨਫੋਸਿਸ: 6.80% ਗਿਰਾਵਟ

TCS: 6.74% ਗਿਰਾਵਟ

ਐਚਸੀਐਲ ਟੈਕ: 6.56% ਹੇਠਾਂ

ਅਡਾਨੀ ਪੋਰਟਸ: 6.38% ਗਿਰਾਵਟ

ਟੈਕ ਮਹਿੰਦਰਾ: 6.38% ਦੀ ਗਿਰਾਵਟ

ਰਿਲਾਇੰਸ ਇੰਡਸਟਰੀਜ਼: 6.04% ਗਿਰਾਵਟ

ਇੰਡਸਇੰਡ ਬੈਂਕ: 5.63% ਗਿਰਾਵਟ

NTPC: 5.18% ਗਿਰਾਵਟ

Zomato: 5.15% ਗਿਰਾਵਟ

ਮਹਿੰਦਰਾ ਐਂਡ ਮਹਿੰਦਰਾ: 4.61% ਦੀ ਗਿਰਾਵਟ

ਬਜਾਜ ਫਾਈਨਾਂਸ: 4.27% ਹੇਠਾਂ

ਟਾਇਟਨ: 3.55% ਹੇਠਾਂ

ਏਸ਼ੀਅਨ ਪੇਂਟਸ: ​​3.51% ਹੇਠਾਂ

ਨੇਸਲੇ ਇੰਡੀਆ: 3.51% ਦੀ ਗਿਰਾਵਟ

ਬਜਾਜ ਫਿਨਸਰਵ: 3.37% ਹੇਠਾਂ

ਮਾਰੂਤੀ ਸੁਜ਼ੂਕੀ: 3.27% ਦੀ ਗਿਰਾਵਟ

ਕੋਟਕ ਮਹਿੰਦਰਾ ਬੈਂਕ: 3.25% ਦੀ ਗਿਰਾਵਟ

ਸਨਫਾਰਮਾ: 3.14% ਹੇਠਾਂ

ਸਟੇਟ ਬੈਂਕ ਆਫ ਇੰਡੀਆ: 3.00% ਗਿਰਾਵਟ

ਹਿੰਦੁਸਤਾਨ ਯੂਨੀਲੀਵਰ: 2.96% ਗਿਰਾਵਟ

HDFC ਬੈਂਕ: 2.86% ਹੇਠਾਂ

ਐਕਸਿਸ ਬੈਂਕ: 2.69% ਗਿਰਾਵਟ

ਅਲਟਰਾਟੈਕ ਸੀਮੈਂਟ: 2.65% ਹੇਠਾਂ

ITC: 2.42% ਗਿਰਾਵਟ

ICICI ਬੈਂਕ: 1.93% ਹੇਠਾਂ

ParvGrid: 1.86% ਹੇਠਾਂ