ਹਫ਼ਤੇ ਦੇ ਆਖ਼ਰੀ ਦਿਨ ਸ਼ੇਅਰ ਬਾਜ਼ਾਰ ''ਚ ਵੱਡੀ ਗਿਰਾਵਟ ; ਸੈਂਸੈਕਸ-ਨਿਫਟੀ ਦੋਵੇਂ ਡਿੱਗੇ

ਮੁੰਬਈ (ਭਾਸ਼ਾ) - ਅੱਜ ਸ਼ੁੱਕਰਵਾਰ ਦਾ ਦਿਨ ਭਾਰਤੀ ਸ਼ੇਅਰ ਬਾਜ਼ਾਰ ਲਈ ਗਿਰਾਵਟ ਵਾਲਾ ਰਿਹਾ। ਹਫਤੇ ਦੇ ਅੰਤ ਵਿੱਚ ਬਾਜ਼ਾਰ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। ਬੈਂਕ ਨਿਫਟੀ ਦੀ 12 ਦਿਨਾਂ ਦੀ ਤੇਜ਼ੀ ਰੁਕ ਗਈ। ਸੈਂਸੈਕਸ 387.73 ਅੰਕ ਭਾਵ 0.47% ਦੀ ਗਿਰਾਵਟ ਨਾਲ 82,626.23 ਅੰਕ 'ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ 11 ਸਟਾਕ ਵਾਧੇ ਨਾਲ ਅਤੇ 19 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। 
 
ਨਿਫਟੀ 96.55 ਅੰਕ ਭਾਵ 0.38% ਡਿੱਗ ਕੇ 25,327.05 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਬੈਂਕ ਨਿਫਟੀ 250 ਅੰਕ ਡਿੱਗ ਕੇ 55,500 ਦੇ ਨੇੜੇ ਬੰਦ ਹੋਇਆ।

ਟਾਟਾ ਕੰਸਲਟੈਂਸੀ ਸਰਵਿਸਿਜ਼ ਅਤੇ ਆਈਸੀਆਈਸੀਆਈ ਬੈਂਕ ਵਰਗੀਆਂ ਵੱਡੀਆਂ ਕੰਪਨੀਆਂ ਦੇ ਸ਼ੇਅਰਾਂ ਵਿੱਚ ਮੁਨਾਫਾ ਵਸੂਲੀ ਵਿਚਕਾਰ ਸ਼ੁੱਕਰਵਾਰ ਨੂੰ ਸ਼ੁਰੂਆਤੀ ਕਾਰੋਬਾਰ ਵਿੱਚ ਪ੍ਰਮੁੱਖ ਸਟਾਕ ਸੂਚਕਾਂਕ, ਸੈਂਸੈਕਸ ਅਤੇ ਨਿਫਟੀ ਡਿੱਗ ਗਏ। 30 ਸ਼ੇਅਰਾਂ ਵਾਲਾ ਬੀਐਸਈ ਸੈਂਸੈਕਸ 264.36 ਅੰਕ ਡਿੱਗ ਕੇ 82,749.60 'ਤੇ ਆ ਗਿਆ। ਦੂਜੇ ਪਾਸੇ, 50 ਸ਼ੇਅਰਾਂ ਵਾਲਾ ਐਨਐਸਈ ਨਿਫਟੀ 65 ਅੰਕ ਡਿੱਗ ਕੇ 25,358.60 'ਤੇ ਆ ਗਿਆ। 

ਸੈਂਸੈਕਸ ਕੰਪਨੀਆਂ ਵਿੱਚੋਂ, ਟਾਟਾ ਕੰਸਲਟੈਂਸੀ ਸਰਵਿਸਿਜ਼, ਟਾਈਟਨ, ਆਈਸੀਆਈਸੀਆਈ ਬੈਂਕ, ਪਾਵਰ ਗਰਿੱਡ, ਮਹਿੰਦਰਾ ਐਂਡ ਮਹਿੰਦਰਾ, ਅਤੇ ਐਚਸੀਐਲ ਟੈਕ ਕਮਜ਼ੋਰ ਸਨ। 

ਇਸ ਦੌਰਾਨ, ਅਡਾਨੀ ਪੋਰਟਸ, ਭਾਰਤ ਇਲੈਕਟ੍ਰਾਨਿਕਸ, ਲਾਰਸਨ ਐਂਡ ਟੂਬਰੋ, ਅਤੇ ਐਨਟੀਪੀਸੀ ਉੱਪਰ ਸਨ। 

ਸਵੇਰ ਦੇ ਕਾਰੋਬਾਰ ਵਿੱਚ ਅਡਾਨੀ ਸਮੂਹ ਦੇ ਸਾਰੇ ਸਟਾਕ ਵਧੇ। ਉਦਯੋਗਪਤੀ ਗੌਤਮ ਅਡਾਨੀ ਨੂੰ ਰਾਹਤ ਦਿੰਦੇ ਹੋਏ, ਮਾਰਕੀਟ ਰੈਗੂਲੇਟਰ ਸੇਬੀ ਨੇ ਵੀਰਵਾਰ ਨੂੰ ਉਨ੍ਹਾਂ ਅਤੇ ਅਡਾਨੀ ਸਮੂਹ ਦੇ ਖਿਲਾਫ ਅਮਰੀਕੀ ਸ਼ਾਰਟ-ਸੈਲਰ ਹਿੰਡਨਬਰਗ ਰਿਸਰਚ ਦੇ ਦੋਸ਼ਾਂ ਨੂੰ ਖਾਰਜ ਕਰ ਦਿੱਤਾ। 
ਗਰੁੱਪ ਦੇ ਸ਼ੇਅਰਾਂ ਵਿੱਚੋਂ, ਅਡਾਨੀ ਟੋਟਲ ਗੈਸ 13.27 ਪ੍ਰਤੀਸ਼ਤ, ਅਡਾਨੀ ਪਾਵਰ 8.89 ਪ੍ਰਤੀਸ਼ਤ, ਅਡਾਨੀ ਗ੍ਰੀਨ ਐਨਰਜੀ 5.45 ਪ੍ਰਤੀਸ਼ਤ ਅਤੇ ਅਡਾਨੀ ਐਂਟਰਪ੍ਰਾਈਜ਼ 5.23 ਪ੍ਰਤੀਸ਼ਤ ਵਧਿਆ। ਗਲੋਬਲ ਆਇਲ ਇੰਡੈਕਸ ਬ੍ਰੈਂਟ ਕਰੂਡ 0.15 ਪ੍ਰਤੀਸ਼ਤ ਡਿੱਗ ਕੇ $67.34 ਪ੍ਰਤੀ ਬੈਰਲ ਹੋ ਗਿਆ। 
ਸਟਾਕ ਮਾਰਕੀਟ ਦੇ ਅੰਕੜਿਆਂ ਅਨੁਸਾਰ, ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FIIs) ਨੇ ਵੀਰਵਾਰ ਨੂੰ 366.69 ਕਰੋੜ ਰੁਪਏ ਦੇ ਸ਼ੇਅਰ ਖਰੀਦੇ।