ਰੋਹਿਤ ਸ਼ਰਮਾ ਕਰਨਗੇ ਐਕਟਿੰਗ ''ਚ ਡੈਬਿਊ? ਨੈੱਟਫਲਿਕਸ ਨਾਲ ਵਾਇਰਲ ਪੋਸਟ ਨੇ ਛੇੜੀ ਚਰਚਾ

ਸਪੋਰਟਸ ਡੈਸਕ : ਭਾਰਤੀ ਕ੍ਰਿਕਟ ਦੇ ਦਿੱਗਜ ਖਿਡਾਰੀ ਰੋਹਿਤ ਸ਼ਰਮਾ ਦੀ ਇੱਕ 'ਰਹੱਸਮਈ' ਇੰਸਟਾਗ੍ਰਾਮ ਪੋਸਟ ਨੇ ਸੋਸ਼ਲ ਮੀਡੀਆ 'ਤੇ ਨਵੀਂ ਬਹਿਸ ਛੇੜ ਦਿੱਤੀ ਹੈ। ਉਨ੍ਹਾਂ ਨੇ ਇੱਕ ਤਸਵੀਰ ਸਾਂਝੀ ਕੀਤੀ ਹੈ ਜਿਸ ਵਿੱਚ ਨੈੱਟਫਲਿਕਸ (Netflix) ਅਤੇ ਮੁੰਬਈ ਇੰਡੀਅਨਜ਼ ਦੇ ਲੋਗੋ ਵਾਲੀ ਇੱਕ ਸਕ੍ਰਿਪਟ ਦਾ ਡਰਾਫਟ ਨਜ਼ਰ ਆ ਰਿਹਾ ਹੈ। ਇਸ ਸਕ੍ਰਿਪਟ 'ਤੇ "ਡਰਾਫਟ #45" ਅਤੇ ਅੱਜ ਦੀ ਤਾਰੀਖ਼ "9 ਅਪ੍ਰੈਲ, 2026" ਲਿਖੀ ਹੋਈ ਹੈ।

ਕੀ ਹੈ ਪੂਰੀ ਖ਼ਬਰ? 
ਇਸ ਸਕ੍ਰਿਪਟ ਦੇ ਅੰਤ ਵਿੱਚ "ਚੈਂਪੀਅਨ" (Champion) ਸ਼ਬਦ ਸਾਫ਼ ਤੌਰ 'ਤੇ ਦਿਖਾਈ ਦੇ ਰਿਹਾ ਹੈ, ਜਿਸ ਨੇ ਪ੍ਰਸ਼ੰਸਕਾਂ ਦੀ ਉਤਸੁਕਤਾ ਵਧਾ ਦਿੱਤੀ ਹੈ। ਰੋਹਿਤ ਨੇ ਇਸ ਪੋਸਟ ਦੇ ਨਾਲ "#collab" ਲਿਖਿਆ ਹੈ, ਜਿਸ ਤੋਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਉਹ ਨੈੱਟਫਲਿਕਸ ਦੇ ਕਿਸੇ ਵੱਡੇ ਪ੍ਰੋਜੈਕਟ ਦਾ ਹਿੱਸਾ ਹੋ ਸਕਦੇ ਹਨ। ਹਾਲਾਂਕਿ ਇਸ ਬਾਰੇ ਅਜੇ ਤੱਕ ਨੈੱਟਫਲਿਕਸ ਜਾਂ ਰੋਹਿਤ ਸ਼ਰਮਾ ਵੱਲੋਂ ਕੋਈ ਅਧਿਕਾਰਤ ਐਲਾਨ ਨਹੀਂ ਹੋਇਆ ਹੈ।

ਬਾਇਓਪਿਕ ਜਾਂ ਡਾਕੂਮੈਂਟਰੀ? 
ਪ੍ਰਸ਼ੰਸਕਾਂ ਵੱਲੋਂ ਕਈ ਤਰ੍ਹਾਂ ਦੇ ਅੰਦਾਜ਼ੇ ਲਗਾਏ ਜਾ ਰਹੇ ਹਨ ਕਿ ਇਹ ਰੋਹਿਤ ਦੇ ਕਰੀਅਰ 'ਤੇ ਕੋਈ ਡਾਕੂ-ਸੀਰੀਜ਼ ਜਾਂ ਬਾਇਓਪਿਕ ਹੋ ਸਕਦੀ ਹੈ। ਕੁਝ ਦਾ ਮੰਨਣਾ ਹੈ ਕਿ ਇਹ ਆਈਪੀਐਲ ਵਿੱਚ ਮੁੰਬਈ ਇੰਡੀਅਨਜ਼ ਦੇ ਸਫ਼ਰ ਅਤੇ ਉਨ੍ਹਾਂ ਦੀ ਵਿਰਾਸਤ 'ਤੇ ਕੇਂਦਰਿਤ ਕੋਈ ਸ਼ੋਅ ਹੋ ਸਕਦਾ ਹੈ। ਸਕ੍ਰਿਪਟ ਦਾ ਫਾਰਮੈਟ ਦੇਖ ਕੇ ਲੋਕ ਇਹ ਵੀ ਕਹਿ ਰਹੇ ਹਨ ਕਿ ਸ਼ਾਇਦ ਰੋਹਿਤ ਇਸ ਪ੍ਰੋਜੈਕਟ ਵਿੱਚ ਸਿਰਫ਼ ਅਦਾਕਾਰ ਹੀ ਨਹੀਂ ਸਗੋਂ ਕਿਸੇ ਹੋਰ ਰਚਨਾਤਮਕ ਭੂਮਿਕਾ ਵਿੱਚ ਵੀ ਨਜ਼ਰ ਆਉਣਗੇ।

ਆਈਪੀਐਲ 2026 'ਚ ਰੋਹਿਤ ਦੀ ਫਾਰਮ 
ਮਨੋਰੰਜਨ ਜਗਤ ਦੀਆਂ ਇਨ੍ਹਾਂ ਖਬਰਾਂ ਦੇ ਵਿਚਕਾਰ, ਰੋਹਿਤ ਆਈਪੀਐਲ ਦੇ ਮੈਦਾਨ 'ਤੇ ਵੀ ਪੂਰੀ ਤਰ੍ਹਾਂ ਸਰਗਰਮ ਹਨ। ਉਨ੍ਹਾਂ ਨੇ ਟੂਰਨਾਮੈਂਟ ਦੇ ਪਹਿਲੇ ਹੀ ਮੈਚ ਵਿੱਚ 38 ਗੇਂਦਾਂ ਵਿੱਚ 78 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ ਸੀ। ਹੁਣ ਤੱਕ ਤਿੰਨ ਮੈਚਾਂ ਵਿੱਚ ਉਨ੍ਹਾਂ ਨੇ ਕੁੱਲ 118 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਦਿੱਲੀ ਕੈਪੀਟਲਸ ਵਿਰੁੱਧ 35 ਦੌੜਾਂ ਵੀ ਸ਼ਾਮਲ ਹਨ।

ਅਗਲਾ ਮੁਕਾਬਲਾ ਮੁੰਬਈ ਇੰਡੀਅਨਜ਼ ਦੀ ਟੀਮ 
ਹੁਣ 12 ਅਪ੍ਰੈਲ ਨੂੰ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ਵਿੱਚ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਦਾ ਸਾਹਮਣਾ ਕਰੇਗੀ। ਪ੍ਰਸ਼ੰਸਕ ਹੁਣ ਨਾ ਸਿਰਫ਼ ਰੋਹਿਤ ਦੀ ਬੱਲੇਬਾਜ਼ੀ ਬਲਕਿ ਨੈੱਟਫਲਿਕਸ ਨਾਲ ਉਨ੍ਹਾਂ ਦੇ ਇਸ ਨਵੇਂ ਪ੍ਰੋਜੈਕਟ ਦੇ ਅਧਿਕਾਰਤ ਐਲਾਨ ਦੀ ਵੀ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ।