T20 WC 'ਚ ਅਚਾਨਕ ਹੋਈ ਇਸ ਸਟਾਰ ਬੱਲੇਬਾਜ਼ ਦੀ ਐਂਟਰੀ, ਕਪਤਾਨ ਦੀ ਸੱਟ ਨੇ ਖੋਲ'ਤੀ ਕਿਸਮਤ

ਸਪੋਰਟਸ ਡੈਸਕ : ਟੀ-20 ਵਿਸ਼ਵ ਕੱਪ 2026 ਦੇ ਸ਼ੁਰੂਆਤੀ ਪੜਾਅ ਵਿੱਚ ਆਸਟ੍ਰੇਲੀਆਈ ਟੀਮ ਨੂੰ ਇੱਕ ਬਹੁਤ ਵੱਡਾ ਝਟਕਾ ਲੱਗਾ ਹੈ। ਟੀਮ ਦੇ ਕਪਤਾਨ ਮਿਚੇਲ ਮਾਰਸ਼ ਟ੍ਰੇਨਿੰਗ ਦੌਰਾਨ ਲੱਗੀ ਗੰਭੀਰ ਸੱਟ ਕਾਰਨ ਆਇਰਲੈਂਡ ਵਿਰੁੱਧ ਹੋਣ ਵਾਲੇ ਪਹਿਲੇ ਮੁਕਾਬਲੇ ਵਿੱਚੋਂ ਬਾਹਰ ਹੋ ਗਏ ਹਨ। ਮਾਰਸ਼ ਦੀ ਸੱਟ ਨੇ ਦਿੱਗਜ ਬੱਲੇਬਾਜ਼ ਸਟੀਵ ਸਮਿਥ ਲਈ ਕਿਸਮਤ ਦੇ ਦਰਵਾਜ਼ੇ ਖੋਲ੍ਹ ਦਿੱਤੇ ਹਨ, ਜਿਨ੍ਹਾਂ ਨੂੰ ਬਤੌਰ 'ਕਵਰ ਖਿਡਾਰੀ' ਤੁਰੰਤ ਸਕੁਐਡ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।

ਮਾਰਸ਼ ਦੀ ਸੱਟ ਅਤੇ ਟ੍ਰੈਵਿਸ ਹੈੱਡ ਦੀ ਕਪਤਾਨੀ 
ਇਸ ਹਫ਼ਤੇ ਟ੍ਰੇਨਿੰਗ ਦੌਰਾਨ ਮਿਚੇਲ ਮਾਰਸ਼ ਨੂੰ ਗਰੋਇਨ (groin) ਵਿੱਚ ਸੱਟ ਲੱਗੀ ਸੀ। ਸਕੈਨ ਵਿੱਚ ਪੁਸ਼ਟੀ ਹੋਈ ਹੈ ਕਿ ਉਨ੍ਹਾਂ ਦੇ 'ਟੈਸਟੀਕੂਲਰ ਬਲੀਡਿੰਗ' (testicular bleeding) ਹੋਈ ਹੈ, ਜਿਸ ਕਾਰਨ ਉਨ੍ਹਾਂ ਨੂੰ ਹਿਲਣ-ਜੁਲਣ ਵਿੱਚ ਕਾਫ਼ੀ ਦਿੱਕਤ ਅਤੇ ਦਰਦ ਹੋ ਰਿਹਾ ਹੈ। ਕ੍ਰਿਕਟ ਆਸਟ੍ਰੇਲੀਆ ਨੇ ਦੱਸਿਆ ਹੈ ਕਿ ਮੈਡੀਕਲ ਸਲਾਹ ਅਨੁਸਾਰ ਉਨ੍ਹਾਂ ਨੂੰ ਕੁਝ ਸਮਾਂ ਆਰਾਮ ਕਰਨਾ ਪਵੇਗਾ। ਮਾਰਸ਼ ਦੀ ਗੈਰ-ਹਾਜ਼ਰੀ ਵਿੱਚ ਟ੍ਰੈਵਿਸ ਹੈੱਡ ਆਇਰਲੈਂਡ ਵਿਰੁੱਧ ਹੋਣ ਵਾਲੇ ਮੈਚ ਵਿੱਚ ਕਪਤਾਨੀ ਦੀ ਜ਼ਿੰਮੇਵਾਰੀ ਸੰਭਾਲਣਗੇ।

ਸਮਿਥ ਨੂੰ ਮਿਲਿਆ ਬਿਗ ਬੈਸ਼ 'ਚ ਧਮਾਕੇਦਾਰ ਪ੍ਰਦਰਸ਼ਨ ਦਾ ਇਨਾਮ
ਸਟੀਵ ਸਮਿਥ, ਜੋ ਆਖਰੀ ਵਾਰ 2024 ਵਿੱਚ ਟੀ-20 ਅੰਤਰਰਾਸ਼ਟਰੀ ਖੇਡੇ ਸਨ, ਦੀ ਵਾਪਸੀ ਪਿੱਛੇ ਉਨ੍ਹਾਂ ਦਾ ਹਾਲੀਆ ਸ਼ਾਨਦਾਰ ਪ੍ਰਦਰਸ਼ਨ ਹੈ। ਹਾਲ ਹੀ ਵਿੱਚ ਹੋਈ ਬਿਗ ਬੈਸ਼ ਲੀਗ ਵਿੱਚ ਉਨ੍ਹਾਂ ਨੇ ਸਿਡਨੀ ਸਿਕਸਰਸ ਲਈ ਖੇਡਦਿਆਂ 6 ਮੈਚਾਂ ਵਿੱਚ 59.80 ਦੀ ਔਸਤ ਅਤੇ 167.97 ਦੇ ਸਟ੍ਰਾਈਕ ਰੇਟ ਨਾਲ 299 ਦੌੜਾਂ ਬਣਾਈਆਂ ਸਨ। ਇਸ ਦੌਰਾਨ ਉਨ੍ਹਾਂ ਦੇ ਬੱਲੇ ਤੋਂ ਇੱਕ ਸੈਂਕੜਾ ਅਤੇ ਦੋ ਅਰਧ-ਸੈਂਕੜੇ ਵੀ ਨਿਕਲੇ, ਜਿਸ ਕਾਰਨ ਚੋਣਕਾਰਾਂ ਨੇ ਉਨ੍ਹਾਂ 'ਤੇ ਦੁਬਾਰਾ ਭਰੋਸਾ ਜਤਾਇਆ ਹੈ।