ਬੋਪੰਨਾ-ਡੋਡਿਗ ਦੀ ਜੋੜੀ ਚਾਈਨਾ ਓਪਨ ਦੇ ਪਹਿਲੇ ਦੌਰ ''ਚ ਹਾਰੀ

ਬੀਜਿੰਗ- ਭਾਰਤ ਦੇ ਸਟਾਰ ਟੈਨਿਸ ਖਿਡਾਰੀ ਰੋਹਨ ਬੋਪੰਨਾ ਅਤੇ ਉਨ੍ਹਾਂ ਦੇ ਕ੍ਰੋਏਸ਼ੀਆਈ ਜੋੜੀਦਾਰ ਇਵਾਨ ਡੋਡਿਗ ਸ਼ਨੀਵਾਰ ਨੂੰ ਇੱਥੇ ਚੀਨ ਓਪਨ ਏਟੀਪੀ 500 ਟੈਨਿਸ ਟੂਰਨਾਮੈਂਟ ਦੇ ਪਹਿਲੇ ਦੌਰ ਵਿੱਚ ਫਰਾਂਸਿਸਕੋ ਸੇਰੁਨਡੋਲੋ ਅਤੇ ਨਿਕੋਲਸ ਜੈਰੀ ਦੀ ਜੋੜੀ ਤੋਂ ਹਾਰ ਕੇ ਮੁਕਾਬਲੇ ਤੋਂ ਬਾਹਰ ਹੋ ਗਏ। ਭਾਰਤ ਅਤੇ ਕ੍ਰੋਏਸ਼ੀਆ ਦੀ ਦੂਜਾ ਦਰਜਾ ਪ੍ਰਾਪਤ ਜੋੜੀ ਨੂੰ ਅਰਜਨਟੀਨਾ ਦੇ ਸੇਰੁਨਡੋਲੋ ਅਤੇ ਚਿਲੀ ਦੇ ਜੈਰੀ ਦੀ ਗੈਰ ਦਰਜਾ ਪ੍ਰਾਪਤ ਜੋੜੀ ਦੇ ਖਿਲਾਫ ਪ੍ਰੀ-ਕੁਆਰਟਰ ਫਾਈਨਲ ਮੁਕਾਬਲੇ ਵਿੱਚ ਇੱਕ ਘੰਟੇ 31 ਮਿੰਟ ਵਿੱਚ 5-7, 6-7 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਬੋਪੰਨਾ ਦੇ ਨਿਯਮਤ ਸਾਥੀ ਆਸਟ੍ਰੇਲੀਆ ਦੇ ਮੈਥਿਊ ਏਬਡੇਨ ਨੇ ਇਸ ਏਟੀਪੀ 500 ਈਵੈਂਟ ਵਿੱਚ ਹਿੱਸਾ ਨਾ ਲੈਣ ਦਾ ਫੈਸਲਾ ਕੀਤਾ ਸੀ। ਬੋਪੰਨਾ ਇਸ ਤੋਂ ਪਹਿਲਾਂ 2017 ਅਤੇ 2021 ਵਿੱਚ ਵੀ ਡੋਡਿਗ ਨਾਲ ਖੇਡ ਚੁੱਕੇ ਹਨ। ਇਸ ਜੋੜੀ ਦਾ ਸਰਵੋਤਮ ਪ੍ਰਦਰਸ਼ਨ 2017 ਵਿੱਚ ਏਟੀਪੀ ਮਾਂਟਰੀਅਲ ਮਾਸਟਰਜ਼ 1000 ਈਵੈਂਟ ਦੇ ਫਾਈਨਲ ਵਿੱਚ ਪਹੁੰਚਣਾ ਸੀ। ਬੋਪੰਨਾ ਨੇ ਇਸ ਸਾਲ ਆਸਟ੍ਰੇਲੀਅਨ ਓਪਨ ਗ੍ਰੈਂਡ ਸਲੈਮ ਅਤੇ ਮਿਆਮੀ ਓਪਨ ਖਿਤਾਬ ਜਿੱਤੇ ਹਨ।