T20 WC, IND vs ENG Semifinal:ਕਿਹੜੀ ਟੀਮ ''ਤੇ  ਹੋਵੇਗਾ ਵਾਧੂ ਦਬਾਅਦ? ਦਿਨੇਸ਼ ਕਾਰਤਿਕ ਨੇ ਦੱਸਿਆ

ਮੁੰਬਈ : ਆਈਸੀਸੀ ਟੀ-20 ਵਿਸ਼ਵ ਕੱਪ 2026 ਦੇ ਦੂਜੇ ਸੈਮੀਫਾਈਨਲ ਵਿੱਚ ਭਾਰਤ ਅਤੇ ਇੰਗਲੈਂਡ ਦੀਆਂ ਟੀਮਾਂ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ਵਿੱਚ ਇੱਕ-ਦੂਜੇ ਦੇ ਸਾਹਮਣੇ ਹੋਣਗੀਆਂ। ਇਸ ਅਹਿਮ ਮੁਕਾਬਲੇ ਤੋਂ ਪਹਿਲਾਂ ਪੂਰਵ ਭਾਰਤੀ ਵਿਕਟਕੀਪਰ-ਬੱਲੇਬਾਜ਼ ਦਿਨੇਸ਼ ਕਾਰਤਿਕ ਨੇ ਵੱਡਾ ਬਿਆਨ ਦਿੰਦਿਆਂ ਕਿਹਾ ਹੈ ਕਿ ਮੇਜ਼ਬਾਨ ਅਤੇ ਡਿਫੈਂਡਿੰਗ ਚੈਂਪੀਅਨ ਹੋਣ ਕਾਰਨ ਭਾਰਤ 'ਤੇ ਇੰਗਲੈਂਡ ਦੇ ਮੁਕਾਬਲੇ ਜ਼ਿਆਦਾ ਦਬਾਅ ਰਹੇਗਾ।

ਘਰੇਲੂ ਮੈਦਾਨ ਅਤੇ ਉਮੀਦਾਂ ਦਾ ਭਾਰ 
ਕਾਰਤਿਕ ਅਨੁਸਾਰ, ਆਪਣੇ ਘਰ ਵਿੱਚ ਵਿਸ਼ਵ ਕੱਪ ਖੇਡਣਾ ਮਾਣ ਵਾਲੀ ਗੱਲ ਹੈ, ਪਰ ਇਸ ਨਾਲ ਜਿੱਤ ਦੀਆਂ ਉਮੀਦਾਂ ਦਾ ਮਾਨਸਿਕ ਦਬਾਅ ਵੀ ਵਧ ਜਾਂਦਾ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਮੌਜੂਦਾ ਚੈਂਪੀਅਨ ਹੋਣ ਕਾਰਨ ਬਾਕੀ ਸਾਰੀਆਂ ਟੀਮਾਂ ਭਾਰਤ ਨੂੰ ਹਰਾਉਣ ਦਾ ਟੀਚਾ ਰੱਖਦੀਆਂ ਹਨ, ਜਿਸ ਕਾਰਨ ਭਾਰਤੀ ਖਿਡਾਰੀ ਮੈਚ ਦੀ ਸ਼ੁਰੂਆਤ ਤੋਂ ਹੀ ਜਾਣਦੇ ਹਨ ਕਿ ਉਨ੍ਹਾਂ ਤੋਂ ਸਿਰਫ਼ ਜਿੱਤ ਦੀ ਉਮੀਦ ਕੀਤੀ ਜਾ ਰਹੀ ਹੈ।

ਇੰਗਲੈਂਡ ਲਈ 'ਗੁਆਉਣ ਨੂੰ ਘੱਟ ਤੇ ਪਾਉਣ ਨੂੰ ਬਹੁਤ ਕੁਝ' 
ਦੂਜੇ ਪਾਸੇ, ਦਿਨੇਸ਼ ਕਾਰਤਿਕ ਦਾ ਮੰਨਣਾ ਹੈ ਕਿ ਹੈਰੀ ਬਰੂਕ ਦੀ ਅਗਵਾਈ ਵਾਲੀ ਇੰਗਲੈਂਡ ਦੀ ਟੀਮ ਮੁਕਾਬਲਤਨ ਘੱਟ ਦਬਾਅ ਵਿੱਚ ਹੋਵੇਗੀ। ਇੰਗਲਿਸ਼ ਟੀਮ ਨੇ ਮੁੰਬਈ ਵਿੱਚ ਪਹਿਲਾਂ ਹੀ ਕੁਝ ਚੁਣੌਤੀਪੂਰਨ ਮੈਚ ਖੇਡੇ ਹਨ, ਜਿਸ ਨਾਲ ਉਨ੍ਹਾਂ ਨੂੰ ਇੱਥੋਂ ਦੇ ਹਾਲਾਤਾਂ ਦਾ ਤਜਰਬਾ ਹੋ ਗਿਆ ਹੈ। ਕਾਰਤਿਕ ਅਨੁਸਾਰ, ਇੰਗਲੈਂਡ ਕੋਲ "ਗੁਆਉਣ ਲਈ ਬਹੁਤ ਘੱਟ ਅਤੇ ਪਾਉਣ ਲਈ ਬਹੁਤ ਜ਼ਿਆਦਾ" ਹੈ, ਜੋ ਉਨ੍ਹਾਂ ਨੂੰ ਸੈਮੀਫਾਈਨਲ ਵਿੱਚ ਖੁੱਲ੍ਹ ਕੇ ਆਪਣਾ ਕੁਦਰਤੀ ਖੇਡ ਦਿਖਾਉਣ ਵਿੱਚ ਮਦਦ ਕਰੇਗਾ।

ਅਭਿਸ਼ੇਕ ਸ਼ਰਮਾ ਅਤੇ ਸੰਜੂ ਸੈਮਸਨ 'ਤੇ ਭਰੋਸਾ 
ਕਾਰਤਿਕ ਨੇ ਟੀਮ ਪ੍ਰਬੰਧਨ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਉਨ੍ਹਾਂ ਖਿਡਾਰੀਆਂ 'ਤੇ ਭਰੋਸਾ ਬਰਕਰਾਰ ਰੱਖਣ ਜਿਨ੍ਹਾਂ ਨੇ ਟੀਮ ਨੂੰ ਇਸ ਮੁਕਾਮ ਤੱਕ ਪਹੁੰਚਾਇਆ ਹੈ। ਉਨ੍ਹਾਂ ਨੇ ਖ਼ਾਸ ਤੌਰ 'ਤੇ ਸਲਾਮੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਦਾ ਸਮਰਥਨ ਕਰਦਿਆਂ ਕਿਹਾ ਕਿ ਭਾਵੇਂ ਉਹ ਹਾਲ ਹੀ ਵਿੱਚ ਚੰਗੀ ਲੈਅ ਵਿੱਚ ਨਹੀਂ ਰਹੇ, ਪਰ ਉਨ੍ਹਾਂ ਨੂੰ ਲਗਾਤਾਰ ਮੌਕੇ ਮਿਲਣੇ ਚਾਹੀਦੇ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਸਿਖਰਲੇ ਕ੍ਰਮ ਵਿੱਚ ਸੰਜੂ ਸੈਮਸਨ ਅਤੇ ਈਸ਼ਾਨ ਕਿਸ਼ਨ ਦੇ ਸੁਮੇਲ ਨੂੰ ਬਰਕਰਾਰ ਰੱਖਣ ਦਾ ਸੁਝਾਅ ਦਿੱਤਾ ਹੈ।

ਦੋਵਾਂ ਟੀਮਾਂ ਦਾ ਹੁਣ ਤੱਕ ਦਾ ਸਫ਼ਰ 
ਭਾਰਤ ਨੇ ਟੂਰਨਾਮੈਂਟ ਵਿੱਚ ਹੁਣ ਤੱਕ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਸੱਤ ਵਿੱਚੋਂ ਛੇ ਮੈਚ ਜਿੱਤੇ ਹਨ। ਸੁਪਰ-8 ਵਿੱਚ ਦੱਖਣੀ ਅਫ਼ਰੀਕਾ ਹੱਥੋਂ ਮਿਲੀ ਹਾਰ ਤੋਂ ਬਾਅਦ ਵੈਸਟਇੰਡੀਜ਼ ਵਿਰੁੱਧ ਸੰਜੂ ਸੈਮਸਨ ਦੀ ਨਾਬਾਦ 97 ਦੌੜਾਂ ਦੀ ਪਾਰੀ ਨੇ ਭਾਰਤ ਦੀ ਸੈਮੀਫਾਈਨਲ ਵਿੱਚ ਜਗ੍ਹਾ ਪੱਕੀ ਕੀਤੀ ਸੀ। ਦੂਜੇ ਪਾਸੇ, ਇੰਗਲੈਂਡ ਦੀ ਟੀਮ ਵੀ ਲਗਾਤਾਰ ਪੰਜ ਮੈਚ ਜਿੱਤ ਕੇ ਪੂਰੇ ਆਤਮ-ਵਿਸ਼ਵਾਸ ਵਿੱਚ ਹੈ ਅਤੇ ਸੱਤ ਵਿੱਚੋਂ ਛੇ ਮੁਕਾਬਲੇ ਜਿੱਤ ਕੇ ਇੱਥੇ ਤੱਕ ਪਹੁੰਚੀ ਹੈ।