ਕਰੋੜਾਂ 'ਚ ਵਿਕੇ ਪਰ ਮੁੱਲ ਕੋਡੀ ਨਹੀਂ ਪਾਇਆ... IPL 'ਚ ਫਲਾਪ ਰਹੇ ਇਹ 5 ਖਿਡਾਰੀ

ਸਪੋਰਟਸ ਡੈਸਕ- ਜਿਵੇਂ-ਜਿਵੇਂ ਇੰਡੀਅਨ ਪ੍ਰੀਮੀਅਰ ਲੀਗ (IPL 2025) ਦਾ ਸਫ਼ਰ ਅੱਗੇ ਵਧਦਾ ਜਾ ਰਿਹਾ ਹੈ, ਉਂਝ ਹੀ ਇਸਦਾ ਉਤਸ਼ਾਹ ਵੀ ਵਧਦਾ ਜਾ ਰਿਹਾ ਹੈ। ਇਸ ਸੀਜ਼ਨ ਵਿੱਚ ਕਈ ਖਿਡਾਰੀਆਂ ਨੇ ਆਪਣੇ ਪ੍ਰਦਰਸ਼ਨ ਨਾਲ ਪ੍ਰਸ਼ੰਸਕਾਂ ਦੇ ਦਿਲਾਂ ਵਿੱਚ ਜਗ੍ਹਾ ਬਣਾਈ ਹੈ। ਪਰ ਬਹੁਤ ਸਾਰੇ ਖਿਡਾਰੀ ਅਜਿਹੇ ਹਨ ਜਿਨ੍ਹਾਂ ਤੋਂ ਚੰਗੇ ਪ੍ਰਦਰਸ਼ਨ ਦੀ ਉਮੀਦ ਕੀਤੀ ਜਾਂਦੀ ਸੀ ਪਰ ਇੰਨੀ ਵੱਡੀ ਰਕਮ ਦੇ ਬਾਵਜੂਦ, ਉਨ੍ਹਾਂ ਦਾ ਪ੍ਰਦਰਸ਼ਨ ਹੁਣ ਤੱਕ ਮਾੜਾ ਰਿਹਾ ਹੈ। ਆਓ ਗੱਲ ਕਰੀਏ 5 ਅਜਿਹੇ ਖਿਡਾਰੀਆਂ ਬਾਰੇ ਜਿਨ੍ਹਾਂ 'ਤੇ ਫ੍ਰੈਂਚਾਇਜ਼ੀ ਨੇ ਕਰੋੜਾਂ ਰੁਪਏ ਦਾ ਨਿਵੇਸ਼ ਕੀਤਾ ਪਰ ਉਨ੍ਹਾਂ ਦੇ ਪ੍ਰਦਰਸ਼ਨ 'ਤੇ ਸਵਾਲ ਖੜ੍ਹੇ ਹੋ ਗਏ ਹਨ।

ਰੋਹਿਤ ਸ਼ਰਮਾ

ਰੋਹਿਤ ਸ਼ਰਮਾ ਆਈਪੀਐਲ ਵਿੱਚ ਆਪਣੀ ਟੀਮ ਮੁੰਬਈ ਇੰਡੀਅਨਜ਼ ਦੇ ਕਪਤਾਨ ਰਹਿ ਚੁੱਕੇ ਸਨ ਉਨ੍ਹਾਂ ਨੂੰ ਕੋਣ ਨਹੀਂ ਜਾਣਦਾ। ਉਨ੍ਹਾਂ ਨੇ ਆਪਣੀ ਕਪਤਾਨੀ ਵਿੱਚ ਆਪਣੀ ਟੀਮ ਨੂੰ 5 ਵਾਰ ਖਿਤਾਬ ਜਿੱਤਾਇਆ ਹੈ। , ਪਰ 16 ਕਰੋੜ ਤੋਂ ਵੱਧ ਦੀ ਵੱਡੀ ਰਕਮ ਲੈਣ ਵਾਲੇ ਰੋਹਿਤ ਸ਼ਰਮਾ ਇਸ ਸੀਜਨ 'ਚ ਕੁਝ ਖਾਸ ਨਹੀਂ ਕਰ ਸਕੇ। ਰੋਹਿਤ ਸ਼ਰਮਾ ਨੇ ਹੁਣ ਤੱਕ ਖੇਡੇ ਗਏ 6 ਮੈਚਾਂ ਵਿੱਚ ਸਿਰਫ਼ 82 ਦੌੜਾਂ ਹੀ ਬਣਾਈਆਂ ਹਨ। ਉਸਦਾ ਸਭ ਤੋਂ ਵੱਧ ਸਕੋਰ ਸਿਰਫ਼ 26 ਦੌੜਾਂ ਹਨ। ਰੋਹਿਤ ਸ਼ਰਮਾ ਦੇ ਇਸ ਪ੍ਰਦਰਸ਼ਨ ਕਾਰਨ ਮੁੰਬਈ ਦੀਆਂ ਮੁਸ਼ਕਲਾਂ ਘੱਟ ਹੁੰਦੀਆਂ ਨਹੀਂ ਜਾਪ ਰਹੀਆਂ। ਮੁੰਬਈ ਨੂੰ 7 ਵਿੱਚੋਂ 4 ਮੈਚਾਂ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ।

ਗਲੇਨ ਮੈਕਸਵੈੱਲ

ਗਲੇਨ ਮੈਕਸਵੈੱਲ ਹਮੇਸ਼ਾ ਤੋਂ ਆਈਪੀਐਲ 'ਚ ਧਾਕੜ ਬੱਲੇਬਾਜ਼ ਵਜੋਂ ਜਾਣਿਆ ਜਾਂਦਾ ਹੈ ਪਰ ਉਹ ਇਸ ਸੀਜ਼ਨ 'ਚ ਆਪਣਾ ਜਲਵਾ ਨਹੀਂ ਦਿਖਾ ਸਕੇ। ਪੰਜਾਬ ਕਿੰਗਜ਼ ਨੇ ਮੈਕਸਵੈੱਲ ਨੂੰ 4.2 ਕਰੋੜ ਰੁਪਏ ਵਿੱਚ ਰਿਟੇਨ ਕੀਤਾ ਹੈ। ਪਰ ਹੁਣ ਤੱਕ ਖੇਡੇ ਗਏ 6 ਮੈਚਾਂ ਵਿੱਚ ਮੈਕਸਵੈੱਲ ਦੇ ਬੱਲੇ ਤੋਂ ਸਿਰਫ਼ 41 ਦੌੜਾਂ ਹੀ ਆਈਆਂ ਹਨ। ਉਸਦੀ ਔਸਤ 8.20 ਹੈ। ਮੈਕਸਵੈੱਲ, ਜੋ ਲੰਬੇ ਚੌਕੇ ਅਤੇ ਛੱਕੇ ਮਾਰਨ ਲਈ ਮਸ਼ਹੂਰ ਹੈ, ਨੇ ਇਸ ਸੀਜ਼ਨ ਵਿੱਚ ਸਿਰਫ਼ 4 ਚੌਕੇ ਅਤੇ ਇੱਕ ਛੱਕਾ ਮਾਰਿਆ ਹੈ।

ਵੈਂਕਟੇਸ਼ ਅਈਅਰ

ਕੋਲਕਾਤਾ ਨਾਈਟ ਰਾਈਡਰਜ਼ (ਕੇਕੇਆਰ) ਨੇ ਵੈਂਕਟੇਸ਼ ਅਈਅਰ ਨੂੰ ₹23.75 ਕਰੋੜ ਦੀ ਵੱਡੀ ਰਕਮ ਵਿੱਚ ਆਪਣੀ ਟੀਮ ਵਿੱਚ ਸ਼ਾਮਲ ਕੀਤਾ। ਪਰ ਅਈਅਰ ਦੇ ਬੱਲੇ ਨੇ ਹੁਣ ਤੱਕ ਖੇਡੇ ਗਏ 7 ਮੈਚਾਂ ਵਿੱਚ 24.5 ਦੀ ਔਸਤ ਅਤੇ 155.05 ਦੇ ਸਟ੍ਰਾਈਕ ਰੇਟ ਨਾਲ ਸਿਰਫ਼ 121 ਦੌੜਾਂ ਹੀ ਬਣਾਈਆਂ ਹਨ। ਉਸਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਸਨਰਾਈਜ਼ਰਜ਼ ਹੈਦਰਾਬਾਦ ਵਿਰੁੱਧ 29 ਗੇਂਦਾਂ ਵਿੱਚ 60 ਦੌੜਾਂ ਦੀ ਪਾਰੀ ਸੀ, ਜਿਸ ਵਿੱਚ ਉਸਨੇ ਸੱਤ ਚੌਕੇ ਅਤੇ ਤਿੰਨ ਛੱਕੇ ਲਗਾਏ। ਹਾਲਾਂਕਿ, ਇਸ ਸੀਜ਼ਨ ਵਿੱਚ ਅਈਅਰ ਦਾ ਬੱਲਾ ਚੁੱਪ ਰਿਹਾ ਹੈ।

ਰਿਸ਼ਭ ਪੰਤ

ਇਹ ਸੀਜ਼ਨ ਰਿਸ਼ਭ ਪੰਤ ਲਈ ਬਹੁਤ ਮਾੜਾ ਰਿਹਾ ਹੈ, ਜਿਸ ਨੂੰ 27 ਕਰੋੜ ਰੁਪਏ ਵਿੱਚ ਆਈਪੀਐਲ ਇਤਿਹਾਸ ਦਾ ਸਭ ਤੋਂ ਮਹਿੰਗਾ ਖਿਡਾਰੀ ਚੁਣਿਆ ਗਿਆ ਸੀ। 7 ਮੈਚਾਂ ਵਿੱਚ, ਉਸਨੇ 17.17 ਦੀ ਔਸਤ ਨਾਲ 103 ਦੌੜਾਂ ਬਣਾਈਆਂ ਹਨ ਅਤੇ 100 ਤੋਂ ਥੋੜ੍ਹਾ ਵੱਧ ਸਟ੍ਰਾਈਕ ਰੇਟ ਹੈ। ਉਸਦਾ ਇੱਕੋ ਇੱਕ ਮਹੱਤਵਪੂਰਨ ਯੋਗਦਾਨ ਚੇਨਈ ਸੁਪਰ ਕਿੰਗਜ਼ ਵਿਰੁੱਧ 63 ਦੌੜਾਂ ਦੀ ਪਾਰੀ ਦੇ ਰੂਪ ਵਿੱਚ ਆਇਆ, ਜਿਸ ਵਿੱਚ ਟੀਮ ਹਾਰ ਗਈ। ਉਸਦੀ ਕਪਤਾਨੀ ਵੀ ਸਵਾਲਾਂ ਦੇ ਘੇਰੇ ਵਿੱਚ ਹੈ।

ਮਾਰਕਸ ਸਟੋਇਨਿਸ

ਮਾਰਕਸ ਸਟੋਇਨਿਸ (ਪੰਜਾਬ ਕਿੰਗਜ਼) ਨੂੰ ਪੰਜਾਬ ਕਿੰਗਜ਼ ਨੇ ₹11 ਕਰੋੜ ਵਿੱਚ ਖਰੀਦਿਆ। ਇਹ ਸੀਜ਼ਨ ਵੀ ਹੁਣ ਤੱਕ ਉਸਦੇ ਲਈ ਚੰਗਾ ਨਹੀਂ ਰਿਹਾ। ਉਸਨੇ 6 ਮੈਚਾਂ ਵਿੱਚ ਸਿਰਫ਼ 66 ਦੌੜਾਂ ਬਣਾਈਆਂ ਹਨ। ਉਸਦੀ ਸਭ ਤੋਂ ਵਿਸਫੋਟਕ ਪਾਰੀ ਸਨਰਾਈਜ਼ਰਜ਼ ਹੈਦਰਾਬਾਦ ਵਿਰੁੱਧ ਸੀ, ਜਿਸ ਵਿੱਚ ਉਸਨੇ ਸਿਰਫ਼ 11 ਗੇਂਦਾਂ ਵਿੱਚ 34 ਦੌੜਾਂ ਬਣਾਈਆਂ, ਜਿਸ ਵਿੱਚ ਆਖਰੀ ਓਵਰ ਵਿੱਚ ਲਗਾਤਾਰ ਚਾਰ ਛੱਕੇ ਸ਼ਾਮਲ ਸਨ। ਉਹ ਗੇਂਦਬਾਜ਼ੀ ਵਿੱਚ ਵੀ ਬੇਅਸਰ ਰਿਹਾ ਹੈ। ਉਸਨੇ ਆਪਣੇ ਸਾਰੇ ਮੈਚਾਂ ਵਿੱਚ ਕੋਈ ਵਿਕਟ ਨਹੀਂ ਲਈ ਹੈ।