"ਸੰਜੂ ਸੈਮਸਨ ਨੂੰ ਅਗਲਾ ਧੋਨੀ ਬਣਨ ਦੀ ਲੋੜ ਨਹੀਂ, ਉਹ ਆਪਣੇ ਆਪ ਵਿੱਚ ਖਾਸ ਹੈ": ਗੌਤਮ ਗੰਭੀਰ

ਸਪੋਰਟਸ ਡੈਸਕ- ਭਾਰਤੀ ਕ੍ਰਿਕਟ ਕੋਚ ਗੌਤਮ ਗੰਭੀਰ ਨੇ ਇੱਕ ਵਾਰ ਕਾਂਗਰਸ ਸਾਂਸਦ ਸ਼ਸ਼ੀ ਥਰੂਰ ਨੂੰ ਸੰਜੂ ਸੈਮਸਨ ਬਾਰੇ ਗੱਲ ਕਰਦਿਆਂ ਕਿਹਾ ਸੀ ਕਿ ਇਸ ਖਿਡਾਰੀ ਨੂੰ ਅਗਲਾ ਮਹਿੰਦਰ ਸਿੰਘ ਧੋਨੀ ਬਣਨ ਦੀ ਕੋਈ ਲੋੜ ਨਹੀਂ ਹੈ ਕਿਉਂਕਿ ਉਹ 'ਆਪਣੇ ਆਪ ਵਿੱਚ ਖਾਸ ਅਤੇ ਇਕਲੌਤਾ ਸੰਜੂ ਸੈਮਸਨ' ਹੋਵੇਗਾ।
 
ਸ਼ਸ਼ੀ ਥਰੂਰ ਨੇ ਪੀ.ਟੀ.ਆਈ. (PTI) ਨਾਲ ਗੱਲਬਾਤ ਦੌਰਾਨ ਗੰਭੀਰ ਨਾਲ ਹੋਈ ਇਸ ਪੁਰਾਣੀ ਚਰਚਾ ਨੂੰ ਯਾਦ ਕੀਤਾ ਅਤੇ ਹਾਲ ਹੀ ਵਿੱਚ ਭਾਰਤ ਦੇ ਲਗਾਤਾਰ ਟੀ-20 ਵਿਸ਼ਵ ਕੱਪ ਚੈਂਪੀਅਨ ਬਣਨ ਦੌਰਾਨ ਸੈਮਸਨ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਵੀ ਜੰਮ ਕੇ ਤਾਰੀਫ਼ ਕੀਤੀ।
14 ਸਾਲ ਦੀ ਉਮਰ ਤੋਂ ਮਿਲ ਰਿਹਾ ਹੈ ਸਮਰਥਨ ਕਲੱਬ ਕ੍ਰਿਕਟਰ ਦੇ ਤੌਰ 'ਤੇ ਸੈਮਸਨ ਦੇ ਕਰੀਅਰ ਦੀ ਸ਼ੁਰੂਆਤ ਤੋਂ ਹੀ ਉਸ ਦਾ ਸਮਰਥਨ ਕਰਦੇ ਆ ਰਹੇ ਥਰੂਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਕ੍ਰਿਕਟਰ ਦੀਆਂ ਪ੍ਰਾਪਤੀਆਂ 'ਤੇ ਮਾਣ ਹੈ।
 
ਉਨ੍ਹਾਂ ਦੱਸਿਆ, "ਮੈਂ ਅਸਲ ਵਿੱਚ ਉਸ ਨੂੰ ਉਦੋਂ ਮਿਲਿਆ ਸੀ ਜਦੋਂ ਉਹ 14 ਸਾਲ ਦਾ ਸੀ। ਉਹ ਦੇਖਣ ਵਿੱਚ ਭਾਵੇਂ ਦੁਬਲਾ-ਪਤਲਾ ਲੱਗਦਾ ਸੀ, ਪਰ ਉਸ ਦਾ ਸਰੀਰ ਕਾਫੀ ਗਠੀਲਾ ਸੀ ਅਤੇ ਉਸ ਵਿੱਚ ਜ਼ਬਰਦਸਤ ਪ੍ਰਤਿਭਾ ਸੀ।" ਥਰੂਰ ਅਨੁਸਾਰ ਸੈਮਸਨ ਉਸ ਸਮੇਂ ਤੋਂ ਹੀ ਵਿਕਟਕੀਪਿੰਗ ਅਤੇ ਬੱਲੇਬਾਜ਼ੀ ਦੋਵੇਂ ਕਰ ਰਿਹਾ ਸੀ।

ਥਰੂਰ ਨੇ ਯਾਦ ਕਰਦਿਆਂ ਦੱਸਿਆ ਕਿ ਉਨ੍ਹਾਂ ਨੇ ਸੈਮਸਨ ਨੂੰ ਕਿਹਾ ਸੀ ਕਿ ਉਹ 'ਅਗਲਾ ਧੋਨੀ' ਬਣੇਗਾ। ਪਰ ਸਾਲਾਂ ਬਾਅਦ ਜਦੋਂ ਉਨ੍ਹਾਂ ਨੇ ਇਸ ਟਿੱਪਣੀ ਦਾ ਜ਼ਿਕਰ ਕੀਤਾ ਤਾਂ ਉਨ੍ਹਾਂ ਦੇ ਦੋਸਤ ਗੌਤਮ ਗੰਭੀਰ ਨੇ ਕਿਹਾ, "ਨਹੀਂ, ਨਹੀਂ, ਉਸ ਨੂੰ ਅਗਲਾ ਧੋਨੀ ਬਣਨ ਦੀ ਲੋੜ ਨਹੀਂ ਹੈ, ਉਹ ਆਪਣੇ ਆਪ ਵਿੱਚ ਖਾਸ, ਬੱਸ ਸੰਜੂ ਸੈਮਸਨ ਹੋਵੇਗਾ।" ਥਰੂਰ ਨੇ ਕਿਹਾ ਕਿ ਸੈਮਸਨ ਬਿਲਕੁਲ ਵੈਸਾ ਹੀ ਸਾਬਤ ਹੋਇਆ ਹੈ।

ਤਿਰੂਵਨੰਤਪੁਰਮ ਤੋਂ ਸੰਸਦ ਮੈਂਬਰ ਥਰੂਰ ਨੇ ਸੈਮਸਨ ਦੇ ਆਤਮ-ਵਿਸ਼ਵਾਸ ਦੀ ਸ਼ਲਾਘਾ ਕਰਦਿਆਂ ਵੈਸਟਇੰਡੀਜ਼ ਵਿਰੁੱਧ ਉਸ ਦੀ 97 ਦੌੜਾਂ ਦੀ ਨਾਬਾਦ ਪਾਰੀ ਦਾ ਜ਼ਿਕਰ ਕੀਤਾ।
 
ਉਨ੍ਹਾਂ ਕਿਹਾ ਕਿ ਟੀਵੀ 'ਤੇ ਮੈਚ ਦੇਖਦਿਆਂ ਹੀ ਉਨ੍ਹਾਂ ਨੂੰ ਸੈਮਸਨ ਦੇ ਚਿਹਰੇ 'ਤੇ ਉਹ ਭਰੋਸਾ ਦਿਖ ਗਿਆ ਸੀ ਕਿ ਉਹ ਅੱਜ ਆਊਟ ਨਹੀਂ ਹੋਵੇਗਾ।
 
ਇਸ ਦੇ ਨਾਲ ਹੀ ਥਰੂਰ ਨੇ ਟੀ-20 ਵਿਸ਼ਵ ਕੱਪ ਦੇ ਸੈਮੀਫਾਈਨਲ ਅਤੇ ਫਾਈਨਲ ਦੋਵਾਂ ਮੈਚਾਂ ਵਿੱਚ ਸੈਮਸਨ ਵੱਲੋਂ ਖੇਡੀਆਂ ਗਈਆਂ 89-89 ਦੌੜਾਂ ਦੀਆਂ ਪਾਰੀਆਂ ਦਾ ਵੀ ਵਿਸ਼ੇਸ਼ ਜ਼ਿਕਰ ਕੀਤਾ।