BCCI ਦੀ ਸਜ਼ਾ ਤੋਂ ਬਾਅਦ ਰੀਆਨ ਪਰਾਗ ਦਾ ਧਮਾਕਾ; DC ਖ਼ਿਲਾਫ਼ ਕਰ''ਤਾ ਇਹ ਕਮਾਲ

ਸਪੋਰਟਸ ਡੈਸਕ- ਰਾਜਸਥਾਨ ਰਾਇਲਜ਼ ਦੇ ਕਪਤਾਨ ਰੀਆਨ ਪਰਾਗ ਨੇ ਆਈਪੀਐਲ 2026 ਵਿੱਚ ਆਪਣੇ ਬੱਲੇ ਦਾ ਦਮ ਦਿਖਾਉਂਦੇ ਹੋਏ ਆਲੋਚਕਾਂ ਦੇ ਮੂੰਹ ਬੰਦ ਕਰ ਦਿੱਤੇ ਹਨ। ਦਿੱਲੀ ਕੈਪੀਟਲਜ਼ ਖ਼ਿਲਾਫ਼ ਖੇਡੇ ਗਏ ਮੁਕਾਬਲੇ ਵਿੱਚ ਪਰਾਗ ਨੇ ਸ਼ਾਨਦਾਰ ਬੱਲੇਬਾਜ਼ੀ ਕਰਦਿਆਂ ਮਹਿਜ਼ 32 ਗੇਂਦਾਂ ਵਿੱਚ ਅਰਧ ਸੈਂਕੜਾ ਠੋਕ ਦਿੱਤਾ।

ਜ਼ਿਕਰਯੋਗ ਹੈ ਕਿ ਰੀਆਨ ਪਰਾਗ ਪਿਛਲੇ ਕੁਝ ਸਮੇਂ ਤੋਂ ਗਲਤ ਕਾਰਨਾਂ ਕਰਕੇ ਸੁਰਖੀਆਂ ਵਿੱਚ ਸਨ। ਪੰਜਾਬ ਕਿੰਗਜ਼ ਵਿਰੁੱਧ ਮੈਚ ਦੌਰਾਨ 'ਵੇਪ' ਪੀਂਦੇ ਨਜ਼ਰ ਆਉਣ ਤੋਂ ਬਾਅਦ ਬੀਸੀਸੀਆਈ (BCCI) ਨੇ ਉਨ੍ਹਾਂ ਨੂੰ ਸਜ਼ਾ ਦਿੱਤੀ ਸੀ। ਹਾਲਾਂਕਿ, ਇਸ ਸਜ਼ਾ ਤੋਂ ਬਾਅਦ ਮੈਦਾਨ 'ਤੇ ਉਤਰੇ ਪਰਾਗ ਨੇ ਆਪਣੇ ਪ੍ਰਦਰਸ਼ਨ ਨਾਲ ਸਭ ਨੂੰ ਹੈਰਾਨ ਕਰ ਦਿੱਤਾ।

ਰਾਜਸਥਾਨ ਰਾਇਲਜ਼ ਦੀ ਸ਼ੁਰੂਆਤ ਬਹੁਤ ਖਰਾਬ ਰਹੀ ਸੀ ਅਤੇ ਟੀਮ ਨੇ ਪਹਿਲੇ ਦੋ ਓਵਰਾਂ ਵਿੱਚ ਹੀ ਆਪਣੇ ਦੋਵੇਂ ਸਲਾਮੀ ਬੱਲੇਬਾਜ਼ ਗੁਆ ਦਿੱਤੇ ਸਨ। ਯਸ਼ਸਵੀ ਜਾਇਸਵਾਲ ਨੂੰ ਮਿਸ਼ੇਲ ਸਟਾਰਕ ਨੇ ਅਤੇ ਵੈਭਵ ਸੂਰਯਵੰਸ਼ੀ ਨੂੰ ਕਾਇਲ ਜੈਮੀਸਨ ਨੇ ਬੋਲਡ ਕੀਤਾ। ਇਸ ਨਾਜ਼ੁਕ ਮੋੜ 'ਤੇ ਪਰਾਗ ਨੇ ਧਰੁਵ ਜੁਰੇਲ ਨਾਲ ਮਿਲ ਕੇ ਮੋਰਚਾ ਸੰਭਾਲਿਆ ਅਤੇ ਦੋਵਾਂ ਨੇ ਮਿਲ ਕੇ 102 ਦੌੜਾਂ ਦੀ ਮਜ਼ਬੂਤ ਸਾਂਝੇਦਾਰੀ ਕੀਤੀ।

ਆਪਣੀ ਪਾਰੀ ਦੌਰਾਨ ਪਰਾਗ ਨੇ ਦਿੱਲੀ ਦੇ ਗੇਂਦਬਾਜ਼ਾਂ 'ਤੇ ਕਹਿਰ ਵਰ੍ਹਾਇਆ। ਉਨ੍ਹਾਂ ਨੇ ਕਾਇਲ ਜੈਮੀਸਨ ਦੇ ਇੱਕੋ ਓਵਰ ਵਿੱਚ ਦੋ ਛੱਕੇ ਅਤੇ ਇੱਕ ਚੌਕਾ ਲਗਾਇਆ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਸਪਿਨਰ ਅਕਸ਼ਰ ਪਟੇਲ ਨੂੰ ਲਗਾਤਾਰ ਦੋ ਛੱਕੇ ਜੜੇ ਅਤੇ ਨਟਰਾਜਨ ਦੀ ਗੇਂਦ 'ਤੇ ਇੱਕ ਅਨੋਖਾ 'ਟੈਨਿਸ ਸ਼ਾਟ' ਵਰਗਾ ਛੱਕਾ ਮਾਰਿਆ।

ਪਰਾਗ ਦੀ ਇਸ ਤੂਫ਼ਾਨੀ ਪਾਰੀ ਦੀ ਸਾਬਕਾ ਕ੍ਰਿਕਟਰਾਂ ਨੇ ਰੱਜ ਕੇ ਸ਼ਲਾਘਾ ਕੀਤੀ ਹੈ। ਆਰ. ਅਸ਼ਵਿਨ ਨੇ ਉਨ੍ਹਾਂ ਨੂੰ ਇੱਕ 'ਸਪੈਸ਼ਲ ਪਲੇਅਰ' ਦੱਸਿਆ, ਜਦਕਿ ਇਰਫਾਨ ਪਠਾਨ ਉਨ੍ਹਾਂ ਦੇ ਸ਼ਾਟਸ ਦੀ ਚੋਣ ਦੇ ਕਾਇਲ ਨਜ਼ਰ ਆਏ। ਇਹ ਇਸ ਸੀਜ਼ਨ ਵਿੱਚ ਪਰਾਗ ਦਾ ਪਹਿਲਾ ਅਰਧ ਸੈਂਕੜਾ ਹੈ।