ਮੈਚ ਦੌਰਾਨ ਵਾਪਰਿਆ ਹਾਦਸਾ! ਰਿਸ਼ਭ ਪੰਤ ਦੀ ਨੱਕ ''ਤੇ ਵੱਜੀ ਗੇਂਦ

ਸਪੋਰਟਸ ਡੈਸਕ- ਇੰਡੀਅਨ ਪ੍ਰੀਮੀਅਰ ਲੀਗ 2026 ਵਿੱਚ ਲਖਨਊ ਸੁਪਰ ਜਾਇੰਟਸ ਦੇ ਕਪਤਾਨ ਰਿਸ਼ਭ ਪੰਤ ਦੀਆਂ ਮੁਸ਼ਕਲਾਂ ਘੱਟ ਹੋਣ ਦਾ ਨਾਮ ਨਹੀਂ ਲੈ ਰਹੀਆਂ। ਇੱਕ ਪਾਸੇ ਜਿੱਥੇ ਉਨ੍ਹਾਂ ਦੀ ਟੀਮ ਨਿਰਾਸ਼ਾਜਨਕ ਪ੍ਰਦਰਸ਼ਨ ਕਰ ਰਹੀ ਹੈ, ਉੱਥੇ ਹੀ ਪੰਤ ਖੁਦ ਲਗਾਤਾਰ ਸੱਟਾਂ ਦਾ ਸ਼ਿਕਾਰ ਹੋ ਰਹੇ ਹਨ। ਬੁੱਧਵਾਰ ਨੂੰ ਰਾਜਸਥਾਨ ਰਾਇਲਜ਼ ਦੇ ਖਿਲਾਫ ਖੇਡੇ ਗਏ ਮੈਚ ਵਿੱਚ ਵਿਕਟਕੀਪਿੰਗ ਕਰਦੇ ਸਮੇਂ ਗੇਂਦ ਰਿਸ਼ਭ ਪੰਤ ਦੇ ਨੱਕ 'ਤੇ ਜਾ ਲੱਗੀ, ਜਿਸ ਕਾਰਨ ਉਨ੍ਹਾਂ ਨੂੰ ਕਾਫੀ ਦਰਦ ਦਾ ਸਾਹਮਣਾ ਕਰਨਾ ਪਿਆ।

ਇਹ ਘਟਨਾ ਰਾਜਸਥਾਨ ਦੀ ਪਾਰੀ ਦੇ 11ਵੇਂ ਓਵਰ ਦੀ ਚੌਥੀ ਗੇਂਦ 'ਤੇ ਵਾਪਰੀ। ਇੱਕ ਫੀਲਡਰ ਨੇ ਤੇਜ਼ੀ ਨਾਲ ਥ੍ਰੋਅ ਸੁੱਟਿਆ, ਪਰ ਗੇਂਦ ਪਿੱਚ ਤੋਂ ਅਚਾਨਕ ਉਛਲ ਗਈ ਅਤੇ ਪੰਤ ਨੂੰ ਸੰਭਲਣ ਦਾ ਮੌਕਾ ਦਿੱਤੇ ਬਿਨਾਂ ਸਿੱਧੀ ਉਨ੍ਹਾਂ ਦੇ ਨੱਕ 'ਤੇ ਜਾ ਲੱਗੀ। ਹਾਦਸੇ ਤੋਂ ਤੁਰੰਤ ਬਾਅਦ ਖੇਡ ਨੂੰ ਰੋਕਣਾ ਪਿਆ ਅਤੇ ਲਖਨਊ ਦੇ ਫਿਜ਼ੀਓ ਨੇ ਮੈਦਾਨ 'ਤੇ ਆ ਕੇ ਉਨ੍ਹਾਂ ਦੀ ਜਾਂਚ ਕੀਤੀ। ਗਨੀਮਤ ਇਹ ਰਹੀ ਕਿ ਗੇਂਦ ਅੱਖ 'ਤੇ ਨਹੀਂ ਲੱਗੀ, ਨਹੀਂ ਤਾਂ ਸੱਟ ਹੋਰ ਵੀ ਗੰਭੀਰ ਹੋ ਸਕਦੀ ਸੀ।

IPL 2026 ਰਿਸ਼ਭ ਪੰਤ ਲਈ ਸਰੀਰਕ ਤੌਰ 'ਤੇ ਕਾਫੀ ਚੁਣੌਤੀਪੂਰਨ ਸਾਬਤ ਹੋ ਰਿਹਾ ਹੈ। ਇਹ ਇਸ ਸੀਜ਼ਨ ਵਿੱਚ ਤੀਜੀ ਵਾਰ ਹੈ ਜਦੋਂ ਉਹ ਮੈਦਾਨ 'ਤੇ ਸੱਟ ਖਾ ਬੈਠੇ ਹਨ:

RCB ਵਿਰੁੱਧ: ਖੱਬੇ ਹੱਥ ਦੀ ਕੋਹਣੀ 'ਤੇ ਗੇਂਦ ਲੱਗਣ ਕਾਰਨ ਉਨ੍ਹਾਂ ਨੂੰ 'ਰਿਟਾਇਰਡ ਹਰਟ' ਹੋ ਕੇ ਮੈਦਾਨ ਛੱਡਣਾ ਪਿਆ ਸੀ।
ਪੰਜਾਬ ਕਿੰਗਜ਼ ਵਿਰੁੱਧ: ਇਸ ਮੈਚ ਵਿੱਚ ਉਨ੍ਹਾਂ ਦੇ ਸੱਜੇ ਹੱਥ 'ਤੇ ਸੱਟ ਲੱਗੀ ਸੀ।
ਰਾਜਸਥਾਨ ਰਾਇਲਜ਼ ਵਿਰੁੱਧ: ਹੁਣ ਨੱਕ 'ਤੇ ਸੱਟ ਲੱਗਣ ਕਾਰਨ ਉਹ ਮੁਸੀਬਤ ਵਿੱਚ ਨਜ਼ਰ ਆਏ।

ਸੱਟ ਦੇ ਬਾਵਜੂਦ ਪੰਤ ਨੇ ਮੈਦਾਨ 'ਤੇ ਆਪਣਾ ਜੌਹਰ ਦਿਖਾਇਆ। ਉਨ੍ਹਾਂ ਨੇ ਮੁਹੰਮਦ ਸ਼ਮੀ ਦੀ ਗੇਂਦ 'ਤੇ ਯਸ਼ਸਵੀ ਜਾਇਸਵਾਲ ਦਾ ਇੱਕ ਬੇਹੱਦ ਸ਼ਾਨਦਾਰ ਕੈਚ ਉਛਲ ਕੇ ਫੜਿਆ। ਹਾਲਾਂਕਿ, 15ਵੇਂ ਓਵਰ ਵਿੱਚ ਉਨ੍ਹਾਂ ਕੋਲੋਂ ਇੱਕ ਵੱਡੀ ਗਲਤੀ ਵੀ ਹੋਈ। ਉਨ੍ਹਾਂ ਕੋਲ ਬੱਲੇਬਾਜ਼ ਫਰੇਰਾ ਨੂੰ ਰਨ ਆਊਟ ਕਰਨ ਦਾ ਸੁਨਹਿਰੀ ਮੌਕਾ ਸੀ ਪਰ ਪੰਤ ਨੇ ਗੇਂਦ ਫੜਨ ਤੋਂ ਪਹਿਲਾਂ ਹੀ ਵਿਕਟਾਂ ਦੀਆਂ ਬੇਲਜ਼ ਡੇਗ ਦਿੱਤੀਆਂ, ਜਿਸ ਕਾਰਨ ਰਾਜਸਥਾਨ ਦੇ ਬੱਲੇਬਾਜ਼ ਨੂੰ ਜੀਵਨਦਾਨ ਮਿਲ ਗਿਆ।