ਅੱਜ ਰਾਜਸਥਾਨ ਤੇ ਗੁਜਰਾਤ ਦੀ ਟੀਮ ਹੋਵੇਗੀ ਆਹਮੋ-ਸਾਹਮਣੇ, ਇਸ ਬੱਲੇਬਾਜ਼ ''ਤੇ ਰਹੇਗੀ ਸਭ ਦੀ ਨਜ਼ਰ

ਜੈਪੁਰ : ਆਤਮਵਿਸ਼ਵਾਸ ਨਾਲ ਭਰਪੂਰ ਗੁਜਰਾਤ ਟਾਈਟਨਜ਼ ਸ਼ਨੀਵਾਰ ਨੂੰ ਇੱਥੇ ਰਾਜਸਥਾਨ ਰਾਇਲਜ਼ ਵਿਰੁੱਧ ਹੋਣ ਵਾਲੇ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ. ਪੀ. ਐੱਲ.) ਦੇ ਮੈਚ ’ਚ ਆਪਣੀ ਜਿੱਤ ਦਾ ਸਿਲਸਿਲਾ ਜਾਰੀ ਰੱਖ ਕੇ ਅੰਕ ਸੂਚੀ ’ਚ ਆਪਣੀ ਸਥਿਤੀ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਕਰੇਗਾ। ਰਾਜਸਥਾਨ ਰਾਇਲਜ਼ ਤੇ ਗੁਜਰਾਤ ਦੀ ਟੀਮ ਦੀ ਸਥਿਤੀ ਲੱਗਭਗ ਇਕ ਬਰਾਬਰ ਹੈ। ਇਨ੍ਹਾਂ ਦੋਵਾਂ ਨੇ ਹੁਣ ਤੱਕ 10 ਮੈਚਾਂ ’ਚ 6 ਜਿੱਤਾਂ ਤੇ 4 ਹਾਰਾਂ ਦਰਜ ਕੀਤੀਆਂ ਹਨ। ਰਾਇਲਜ਼ ਬਿਹਤਰ ਨੈੱਟ ਰਨ ਰੇਟ (0.510) ਦੇ ਕਾਰਨ ਗੁਜਰਾਤ ਤੋਂ ਅੱਗੇ ਹੈ। ਗੁਜਰਾਤ ਟਾਈਟਨਜ਼ ਨੇ ਹਾਲਾਂਕਿ ਲਗਾਤਾਰ ਤਿੰਨ ਜਿੱਤਾਂ ਹਾਸਲ ਕੀਤੀਆਂ ਹਨ ਤੇ ਉਹ ਟਾਪ-4 ’ਚ ਜਗ੍ਹਾ ਬਣਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।

ਰਾਇਲਜ਼ ਨੂੰ ਆਪਣੇ ਪਿਛਲੇ 5 ਮੈਚਾਂ ’ਚੋਂ ਤਿੰਨ ਮੈਚਾਂ ’ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਰਾਇਲਜ਼ ਨੇ ਦਿੱਲੀ ਕੈਪੀਟਲਸ ਵਿਰੁੱਧ ਆਪਣੇ ਪਿਛਲੇ ਮੈਚ ’ਚ ਕਪਤਾਨ ਰਿਆਨ ਪ੍ਰਾਗ ਦੀਆਂ 90 ਦੌੜਾਂ ਦੀ ਮਦਦ ਨਾਲ 6 ਵਿਕਟਾਂ ’ਤੇ 225 ਦੌੜਾਂ ਬਣਾਈਆਂ ਸਨ ਪਰ ਉਸ ਦੇ ਗੇਂਦਬਾਜ਼ ਇਸ ਸਕੋਰ ਦਾ ਬਚਾਅ ਨਹੀਂ ਕਰ ਸਕੇ ਸਨ। ਇਹ ਲਗਾਤਾਰ ਦੂਜਾ ਮੌਕਾ ਸੀ ਜਦੋਂ ਰਾਇਲਜ਼ 220 ਤੋਂ ਵੱਧ ਦੇ ਸਕੋਰ ਦਾ ਬਚਾਅ ਨਹੀਂ ਕਰ ਸਕੇ। ਰਾਜਸਥਾਨ ਹਾਲਾਂਕਿ ਵੈਭਵ ਸੂਰਯਵੰਸ਼ੀ (404 ਦੌੜਾਂ), ਯਸ਼ਸਵੀ ਜਾਇਸਵਾਲ (312) ਤੇ ਇੱਥੋਂ ਤੱਕ ਕਿ ਧਰੁਵ ਜੁਰੈਲ (290) ਵਰਗੇ ਚੋਟੀਕ੍ਰਮ ਦੇ ਬੱਲੇਬਾਜ਼ਾਂ ਦੇ ਕਾਰਨ ਕਾਫੀ ਮਜ਼ਬੂਤ ਹੈ ਪਰ ਉਸ ਦੇ ਮੱਧ ਤੇ ਹੇਠਲੇ ਕ੍ਰਮ ਦੇ ਬੱਲੇਬਾਜ਼ ਉਮੀਦਾਂ ਅਨੁਸਾਰ ਪ੍ਰਦਰਸ਼ਨ ਨਹੀਂ ਕਰ ਸਕੇ ਹਨ। ਇਨ੍ਹਾਂ ਬੱਲੇਬਾਜ਼ਾਂ ’ਚ ਸਿਰਫ ਡੋਨੋਵਨ ਫਰੇਰਾ (229) ਹੀ 150 ਜਾਂ ਉਸ ਤੋਂ ਵੱਧ ਦੌੜਾਂ ਬਣਾ ਸਕਿਆ ਹੈ।

ਜੁਰੈਲ ਰਾਇਲਜ਼ ਦੀ ਬੱਲੇਬਾਜ਼ੀ ਦਾ ਮਹੱਤਵਪੂਰਨ ਹਿੱਸਾ ਹੈ ਪਰ ਉਹ ਉਮੀਦਾਂ ਅਨੁਸਾਰ ਤੇਜ਼ੀ ਨਾਲ ਦੌੜਾਂ ਨਹੀਂ ਬਣਾ ਪਾ ਰਿਹਾ। ਜੁਰੈਲ ਨੇ ਆਪਣੀਆਂ ਪਿਛਲੀਆਂ 3 ਪਾਰੀਆਂ ’ਚ ਤੀਜੇ ਨੰਬਰ ’ਤੇ ਬੱਲੇਬਾਜ਼ੀ ਕਰਦੇ ਹੋਏ 30 ਗੇਂਦਾਂ ’ਚ 42 ਦੌੜਾਂ, 20 ਗੇਂਦਾਂ ’ਚ 16 ਦੌੜਾਂ ਤੇ 30 ਗੇਂਦਾਂ ’ਚ 42 ਦੌੜਾਂ ਬਣਾਈਆਂ ਹਨ। ਇਨ੍ਹਾਂ ਅੰਕੜਿਆਂ ਨੂੰ ਦੇਖ ਕੇ ਸਪੱਸ਼ਟ ਹੋ ਜਾਂਦਾ ਹੈ ਕਿ ਸੁਧਾਰ ਦੀ ਗੁੰਜਾਇਸ਼ ਹੈ ਕਿਉਂਕਿ ਟੂਰਨਾਮੈਂਟ ’ਚ ਇਹ ਸਾਫ ਹੋ ਗਿਆ ਕਿ ਕੋਈ ਵੀ ਸਕੋਰ ਸੁਰੱਖਿਅਤ ਨਹੀਂ ਹੈ। ਆਈ. ਪੀ. ਐੱਲ. ਦਾ ਮੌਜੂਦਾ ਸੈਸ਼ਨ ਗੇਂਦਬਾਜ਼ਾਂ ਲਈ ਚੰਗਾ ਨਹੀਂ ਰਿਹਾ ਹੈ ਤੇ ਅਜਿਹੇ ’ਚ ਰਾਇਲਜ਼ ਨੂੰ ਵਿਸ਼ੇਸ਼ ਕਰ ਵਿਚਾਲੇ ਦੇ ਓਵਰਾਂ ’ਚ ਆਪਣੀ ਗੇਂਦਬਾਜ਼ੀ ਦੀਆਂ ਸਮੱਸਿਆਵਾਂ ਨੂੰ ਦੂਰ ਕਰਨਾ ਪਵੇਗਾ।

ਗੁਜਰਾਤ ਟਾਈਟਨਜ਼ ਦੀ ਟੀਮ ਇਸ ਗੱਲ ਤੋਂ ਖੁਸ਼ ਹੋਵੇਗੀ ਕਿ ਉਸ ਨੇ ਸਹੀ ਸਮੇਂ ’ਤੇ ਲੈਅ ਹਾਸਲ ਕਰ ਲਈ ਹੈ। ਕਪਤਾਨ ਸ਼ੁਭਮਨ ਗਿਲ (378 ਦੌੜਾਂ) ਦੇ ਪ੍ਰਦਰਸ਼ਨ ’ਚ ਨਿਰੰਤਰਤਾ ਹੈ ਤੇ ਉਹ ਇਸ ਨੂੰ ਬਰਕਰਾਰ ਰੱਖਣ ਲਈ ਵਚਨਬੱਧ ਹੋਵੇਗਾ। ਸਾਈ ਸੁਦਰਸ਼ਨ (385) ਵੀ ਆਪਣੀ ਫਾਰਮ ਦਾ ਪੂਰਾ ਫਾਇਦਾ ਚੁੱਕਣਾ ਚਾਹੇਗਾ। ਉਸ ਨੇ ਆਪਣੀਆਂ ਪਿਛਲੀਆਂ 4 ਪਾਰੀਆਂ ’ਚ 2 ਅਰਧ ਸੈਂਕੜੇ ਤੇ ਇਕ ਸੈਂਕੜਾ ਲਾਇਆ ਹੈ। ਜੋਸ ਬਟਲਰ (335) ਦੇ ਨਿਰੰਤਰਤਾ ਬਣਾਈ ਰੱਖਣ ਨਾਲ ਗੁਜਰਾਤ ਟਾਈਟਨਜ਼ ਦਾ ਚੋਟੀਕ੍ਰਮ ਬੇਹੱਦ ਮਜ਼ਬੂਤ ਨਜ਼ਰ ਆਉਂਦਾ ਹੈ। ਉਸ ਕੋਲ ਹੇਠਲੇ ਕ੍ਰਮ ’ਚ ਮੁਸ਼ਕਿਲ ਹਾਲਾਤ ਨਾਲ ਨਜਿੱਠਣ ’ਚ ਮਾਹਿਰ ਚੰਗੇ ਫਿਨਿਸ਼ਰ ਵੀ ਹਨ।

ਗੁਜਰਾਤ ਟਾਈਟਨਜ਼ ਦੀ ਗੇਂਦਬਾਜ਼ੀ ਵੀ ਚੰਗੀ ਹੈ। ਕੈਗਿਸੋ ਰਬਾਡਾ (16 ਵਿਕਟਾਂ) ਤੇਜ਼ ਗੇਂਦਬਾਜ਼ੀ ਹਮਲੇ ਦੀ ਅਗਵਾਈ ਬਾਖੂਬੀ ਕਰ ਰਿਹਾ ਹੈ। ਉਸ ਦੀ ਟੀਮ ਰਬਾਡਾ, ਪ੍ਰਸਿੱਧ ਕ੍ਰਿਸ਼ਨਾ (12) ਤੇ ਮੁਹੰਮਦ ਸਿਰਾਜ (11) ਦੀ ਤੇਜ਼ ਗੇਂਦਬਾਜ਼ੀ ਤਿੱਕੜੀ ਦੇ ਪ੍ਰਦਰਸ਼ਨ ਤੋਂ ਕਾਫੀ ਖੁਸ਼ ਹੋਵੇਗੀ। ਇੱਥੇ ਸਵਾਈ ਮਾਨ ਸਿੰਘ ਸਟੇਡੀਅਮ ’ਚ 220 ਤੋਂ ਵੱਧ ਦੇ ਸਕੋਰ ਦਾ ਦੋ ਵਾਰ ਸਫਲਤਾਪੂਰਵਕ ਪਿੱਛਾ ਕੀਤਾ ਜਾ ਚੁੱਕਾ ਹੈ, ਇਸ ਲਈ ਟਾਸ ਜਿੱਤਣ ਵਾਲੀ ਟੀਮ ਪਹਿਲਾਂ ਫੀਲਡਿੰਗ ਕਰਨਾ ਪਸੰਦ ਕਰੇਗੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e