ਰਿਸ਼ਭ ਪੰਤ ਦੀ ਕਪਤਾਨੀ ''ਤੇ ਉੱਠੇ ਸਵਾਲ ! ਮੁਹੰਮਦ ਕੈਫ਼ ਨੇ ਕੀਤੀ ਤਿੱਖੀ ਆਲੋਚਨਾ, ਕਿਹਾ- ''ਵੱਧ ਜ਼ਿੰਮੇਵਾਰੀ ਲੈਣੀ ਹੋਵੇਗੀ''

ਸਪੋਰਟਸ ਡੈਸਕ : ਸਾਬਕਾ ਭਾਰਤੀ ਕ੍ਰਿਕਟਰ ਮੁਹੰਮਦ ਕੈਫ਼ ਨੇ ਲਖਨਊ ਸੁਪਰ ਜਾਇੰਟਸ (LSG) ਦੇ ਕਪਤਾਨ ਰਿਸ਼ਭ ਪੰਤ ਦੀ ਖੇਡ ਸ਼ੈਲੀ ਅਤੇ ਕਪਤਾਨੀ 'ਤੇ ਸਵਾਲ ਚੁੱਕਦਿਆਂ ਉਨ੍ਹਾਂ ਦੀ ਤਿੱਖੀ ਆਲੋਚਨਾ ਕੀਤੀ ਹੈ। ਭਾਵੇਂ ਲਖਨਊ ਨੇ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਵਿਰੁੱਧ ਤਿੰਨ ਵਿਕਟਾਂ ਨਾਲ ਰੋਮਾਂਚਕ ਜਿੱਤ ਦਰਜ ਕੀਤੀ, ਪਰ ਕੈਫ਼ ਦਾ ਮੰਨਣਾ ਹੈ ਕਿ ਪੰਤ ਨੂੰ ਆਪਣੀ ਖੇਡ ਦੀ ਸਮਝ ਵਿੱਚ ਸੁਧਾਰ ਕਰਨ ਅਤੇ ਟੀਮ ਲਈ ਵਧੇਰੇ ਜ਼ਿੰਮੇਵਾਰੀ ਲੈਣ ਦੀ ਲੋੜ ਹੈ।

ਸਿਰਫ਼ 10 ਦੌੜਾਂ ਬਣਾ ਕੇ ਹੋਏ ਆਊਟ 
ਮੈਚ ਦੌਰਾਨ ਜਦੋਂ ਲਖਨਊ ਦੀ ਟੀਮ ਟੀਚੇ ਦਾ ਪਿੱਛਾ ਕਰ ਰਹੀ ਸੀ, ਤਾਂ ਰਿਸ਼ਭ ਪੰਤ ਸਿਰਫ਼ 10 ਦੌੜਾਂ ਬਣਾ ਕੇ ਪੈਵੇਲੀਅਨ ਪਰਤ ਗਏ। ਉਸ ਸਮੇਂ ਟੀਮ ਦੇ ਹੋਰ ਉੱਪਰਲੇ ਕ੍ਰਮ ਦੇ ਬੱਲੇਬਾਜ਼ ਵੀ ਫ਼ਲਾਪ ਰਹੇ ਸਨ। ਕੈਫ਼ ਨੇ ਕਿਹਾ ਕਿ ਜਦੋਂ ਪੰਤ ਬੱਲੇਬਾਜ਼ੀ ਕਰਨ ਆਏ ਸਨ, ਉਦੋਂ ਸਥਿਤੀ ਬਹੁਤ ਮੁਸ਼ਕਿਲ ਨਹੀਂ ਸੀ ਕਿਉਂਕਿ ਲਖਨਊ ਨੇ ਪਹਿਲੇ 5 ਓਵਰਾਂ ਵਿੱਚ 41 ਦੌੜਾਂ ਬਣਾ ਲਈਆਂ ਸਨ। ਅਜਿਹੇ ਵਿੱਚ ਇੱਕ ਤਜਰਬੇਕਾਰ ਖਿਡਾਰੀ ਅਤੇ ਕਪਤਾਨ ਹੋਣ ਦੇ ਨਾਤੇ ਪੰਤ ਨੂੰ ਅੰਤ ਤੱਕ ਕ੍ਰੀਜ਼ 'ਤੇ ਟਿਕ ਕੇ ਮੈਚ ਜਿਤਾਉਣਾ ਚਾਹੀਦਾ ਸੀ।

ਨਿਰੰਤਰਤਾ ਦੀ ਕਮੀ 'ਤੇ ਚੁੱਕੇ ਸਵਾਲ 
ਕੈਫ਼ ਨੇ ਨਾਰਾਜ਼ਗੀ ਜ਼ਾਹਿਰ ਕਰਦਿਆਂ ਕਿਹਾ ਕਿ ਪੰਤ 2016 ਤੋਂ ਆਈਪੀਐਲ ਖੇਡ ਰਹੇ ਹਨ, ਪਰ ਉਨ੍ਹਾਂ ਦੀ ਖੇਡ ਵਿੱਚ ਨਿਰੰਤਰਤਾ (Consistency) ਦੀ ਕਮੀ ਹੈ। ਉਨ੍ਹਾਂ ਕਿਹਾ, "ਜੇਕਰ ਕਪਤਾਨ ਖ਼ੁਦ ਜ਼ਿੰਮੇਵਾਰੀ ਨਹੀਂ ਲੈਂਦਾ, ਤਾਂ ਉਹ ਟੀਮ ਨੂੰ ਜਿੱਤ ਦਿਵਾਉਣ ਵਿੱਚ ਮਦਦ ਨਹੀਂ ਕਰ ਸਕਦਾ"। ਉਨ੍ਹਾਂ ਨੇ ਸਨਰਾਈਜ਼ਰਜ਼ ਹੈਦਰਾਬਾਦ ਵਿਰੁੱਧ ਪੰਤ ਦੇ ਚੰਗੇ ਪ੍ਰਦਰਸ਼ਨ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੂੰ ਹਰ ਮੈਚ ਦੀ ਸਥਿਤੀ ਅਨੁਸਾਰ ਆਪਣੀ ਰਣਨੀਤੀ ਬਦਲਣੀ ਸਿੱਖਣੀ ਹੋਵੇਗੀ।

ਮੁਕੁਲ ਚੌਧਰੀ ਨੇ ਬਚਾਈ ਪੱਤ
 ਜ਼ਿਕਰਯੋਗ ਹੈ ਕਿ ਇਸ ਮੈਚ ਵਿੱਚ ਲਖਨਊ ਦੀ ਜਿੱਤ ਦਾ ਸਿਹਰਾ ਨੌਜਵਾਨ ਖਿਡਾਰੀ ਮੁਕੁਲ ਚੌਧਰੀ ਦੇ ਸਿਰ ਬੱਝਾ, ਜਿਸ ਨੇ ਨਾਬਾਦ 54 ਦੌੜਾਂ ਦੀ ਪਾਰੀ ਖੇਡ ਕੇ ਟੀਮ ਨੂੰ ਹਾਰ ਦੇ ਮੂੰਹੋਂ ਬਾਹਰ ਕੱਢਿਆ। ਕੈਫ਼ ਅਨੁਸਾਰ ਇੱਕ ਕਪਤਾਨ ਦਾ ਮੁੱਖ ਕੰਮ ਟੀਚੇ ਦਾ ਪਿੱਛਾ ਕਰਦੇ ਹੋਏ ਅੰਤ ਤੱਕ ਟਿਕੇ ਰਹਿਣਾ ਹੁੰਦਾ ਹੈ, ਜਿਸ ਵਿੱਚ ਪੰਤ ਨਾਕਾਮ ਰਹੇ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e